HECHOS 9

Saulo runa Jesucristota crishcamanda

(Hech. 22:6-16; 26:12-18)

1Saulo runaca, Apunchi Jesusta catijcunataca, ninanda na ricunayachishpa huañuchingapa yarijushpami, sacerdotecunata mandajpajman shamurca. 2Paica, Damasco pueblopi tiyaj sinagogacunaman yaicui ushangapami, quilcacunata mañarca. Shina mañashpaca, chai Ñanda catijcunataca, jaricuna cajpi, huarmicuna cajpipash, Jerusalenman prezu apamungapami shina mañarca. 3Ashtahuangarin Damasco puebloman Saulo ña chayagrijujpimi, cashna tucurca: Jahua pachamandami, punchapamba paipaj muyundipi ñapash shitamurca. 4Shina cajpi, pai alpaman urmashpaca:

“Saulo, Saulo, ¿imashpata catiriyashpa llaquichihuangui?” nishpa rimajtami uyarca.

5Shina nijta uyashpami, Sauloca:

“¿Pita capangui, Mandaj Taitalla?” nishpa tapurca.

Shina tapujpimi:

“Can catiriyashpa llaquichijuj Jesusmi cani. Chashna rurajushpaca canllatami llaquita japijungui” nirca.

6Shina nijpimi Sauloca, ninanda manllarishpa chujchushpa:

“Apunchi Jesús, ¿imatata rurana capani?” nirca.

Shina nijpimi Apunchi Jesusca:

“Cunanga, jatarishpa chai puebloman rilla. Chaipimi, can imata rurachumbash villanga” nirca.

7Saulohuan rinajun runacunaca, rimajlla uyarishpa, pipash na ricurijpimi, ninandapacha manllarishpa anchurinajurca. 8Shinamandami, alpamanda Saulo jatarishpa, ñavita pascashpaca, pitapash na ricui usharca. Shina cajpimi, paitaca, maquimanda aisashpa, Damasco puebloman pushanajurca. 9Chaipica, quimsa punllacaman ñausa cashpami, imatapash na micushpa, na ufiashpa tiyajurca.

10Chai Damasco pueblopimi, Jesusta crishpa catij Ananías runa causajurca. Paimanmi, Apunchi Jesusca muscuipishna ricurishpa:

“Ananías” nirca.

Shina nijpimi, Ananiasca:

“Caipimi capani, Apunchi Jesús” nirca.

11Shina nijpimi Apunchi Jesusca, cashna nirca:

“Jatarishpa, Derecha shuti ñanman ri. Chaiman chayashpaca, Judas runapaj huasiman rishpa, Tarso pueblomanda Saulo runata mascagringui. Paica, chaipimi Diosta mañajunga. 12Saulo runaca, pai cutin ricui ushangapaca, Ananías yaicushpa, paipaj umapi maquita churantami, muscuipishnalla ricushca” nircami. 13Shina nijpimi Ananiasca cashna nirca:

“Apunchi Jesús, chai runaca cambajlla causajcunata, Jerusalenbi ‘ninandapacha llaquichijun’ nishpa ashtacacuna parlanajujtami uyashcani. 14Shinallata, Cambaj shutipi tucui mañajcunata, caipipash japichunmi, sacerdotecunata mandajcunaca ushaita cushca” nircami.

15Shina nijpimi Apunchi Jesusca, cashna nirca:

“Rilla. Paitaca, ñami Ñuca mandashcata rurachun agllarcani. Paimi, na Israelcunapaj ñaupajpi, jatun mandajcunapaj ñaupajpi, Israelcunapaj ñaupajpi, Ñuca shutipi villajunga. 16Ñucamanda llaquita apanapacha cashcatami paiman ricuchisha” nircami.

17Shina nijpimi Ananiasca, chai huasiman rishpa, Saulopaj umapi maquita churashpa, cashna nirca:

“Huauqui Saulo, ñanda can shamujujpi canman ricurishca Apunchi Jesusmi cachamuhuarca. Cambaj ñavipash cutin ricuchun, jucha illaj Diospaj Espiritupash junda cachunmi cachamuhuarca” nircami.

18Shina nijhuanmi, Saulopaj ñavimandaca piji carashna urmajpi, cutin ñapash ali ricurca. Paica, jatarishcandi bautizai tucurcallami. 19Chai jipami micushpa, cutin shinlli tucurca. Sauloca tauca punllacunatami, Damasco pueblopi crijcunahuan saquirirca.

Saulo runaca, Damasco pueblopimi villai callarishca

20Chai punllamandapachami Saulo runaca: “Cristoca, Taita Diospaj Churimi” nishpa sinagogacunapi villajurca.

21Pai villajujta tucui uyajcunami, ninanda manllarishpa cashna ninajurca:

“¿Nachu cai runaca, Jesuspaj shutipi mañajcunata Jerusalenbi llaquichin carca? Cunambash, sacerdotecunata mandajcunapajman prezu apangapami, caiman shamushca” ninajurcami.

22Shina cajpipash Saulo runaca, ashtahuanmi villajurca. Jesusca, Cristopacha cajta villajujpimi, Damasco pueblopi causaj judiocunaca, na yachai ushanajurca.

Huañuchingapa munajpimi, Saulo runaca pacajushpa rishca

23Tauca punllacuna jipami judiocunaca, Saulota huañuchingapa nishpa parlarinajurca. 24“Huañuchishun” nishpami, tutapash, punllapash, chai pueblomanda llujshina pungucunapi chapanajurca. Shina chapanajujtaca, Saulopash yacharcami. 25Shinamandami yachajujcunaca, Saulota canastapi churashpa, pueblota muyushca jatun pirca jahuata, tuta uriajuchishpa cacharca.

Jerusalenmanmi Saulo runaca tigrashca

26Jerusalenman Saulo tigrashpaca, Jesusta catijcunahuanmi tandanajungapa munarca. Ashtahuangarin paitaca, na crijchu canga yashpami, tucuicuna manllanajurca. 27Shinamandami, Bernabeca, apostolcunapajman Saulotaca pusharca. Shina pushashpaca, Sauloman, Apunchi Jesús imashna ñambi ricurishcatami villarca. Shinallata, Damasco pueblopi na manllashpa, Jesuspaj shutipi Saulo villashcatapashmi villarca. 28Saulo runaca, Jerusalenbi crijcunahuan tandanajushpami purijurca. 29Paica, Griego shimita rimajcunahuambash, na manllashpa Apunchi Jesuspaj shutipi villajurca. Chaimandami Saulotaca, huañuchingapa munanajurca. 30Chaita yachashpami crijcunaca, Cesarea pueblocaman pushashpa, chaimandaca Tarso puebloman cachanajurca.

31Shina caipimi, Judea, Galilea, Samaria llactacunapi tandanajuj crijcunaca, ali causaita charishpa, cushijushpa causanajurca. Jatun Diosta manllashpa causanajushpami, jucha illaj Diospaj Espíritu ushaita carajpi ashtahuan shinlli tucushpa miranajurca.

Eneas shuti runatami, Pedroca alichishca

32Pedroca, tucui crijcunata ricushpa purijushpami, Lida shuti pueblopi Diospajlla causajcunatapash ricungapa shamurca. 33Chaipi cashpami, Eneas shuti runatapash ricugrirca. Paica, ña pusaj huatatami na cuyuri ushashca, nanaihuan sirijurca. 34Chashna sirijujpimi Pedroca, cashna nirca:

“Eneas, candaca Jesucristomi alichin. Cunanda jatarishpa, cambaj sirijushcacunataca alichilla” nijhuanmi, ñapash jatarirca.

35Lida shuti, Sarón shuti pueblocunapi causajcunaca, tucui chaita ricushpami, Apunchi Jesusta crishpa catinajurca.

Dorcas shuti huarmitami Pedroca causachishca

36Jope shuti pueblopipash, Jesusta crishpa catij Tabita#9:36 Tabita nishpaca, gacela shuti animaltami shina nijun. shuti huarmimi causajurca. (Chai shutitaca, griego rimaipica, Dorcas nijunmi). Chai huarmica, imagupash illajcunaman carashpami, ashtahuan ima alicunatapash rurashpa causajurca. 37Chai punllacunapimi, chai huarmiguca ungushpa huañurca. Paitaca armachishpami, altibajo ucupi churanajurca. 38Shinallata, Lida shuti puebloca, Jope shuti pueblo quimirialla cajpimi, Jesusta crishpa catijcunaca, Pedro chaipi purijujta yacharca. Shina cajpimi: “Jope shuti puebloman ucha shamupai” nigrichun, ishcai runacunata cacharca.

39Shina cajpimi, Pedroca paicunahuan rirca. Ña chaiman chayajpi, paita ucuman pushajpica, Dorcas shuti huarmigu causajushpa rurashca jahualla churajunatapash, shuj churajunatapash, ricuchishpami, sapalla huarmicunaca muyundi shayarishpa ninanda huacanajurca. 40Shina cajpimi, Pedroca, tucuicunata canllaman llujchishpa, cungurishpa Diosta mañarca. Paica, chai huañushca huarmita tigrarishpa ricushpami:

“Tabita, jatari” nirca.

Shina nijpi chai huarmi causarishpami, ñavita pascashcandi Pedrota ricushpa tiyarirca. 41Shina cajpimi Pedroca, maquimanda aisashpa shayachirca. Shinallata, Diospajlla causajcunata, sapalla huarmicunata cayashpami, chai huarmitaca ña causarishcata ricuchirca. 42Jope shuti pueblopi causajcunaca, chaita yachashpami, ashtacacuna Apunchi Jesusta crinajurca. 43Jope shuti pueblopica, carata jacushpa chaquichij Simonbaj huasipimi Pedroca, tauca punllacunata mingarishpa causajurca.

Currently Selected:

HECHOS 9: QVI16

Highlight

Copy