HECHOS 8

Saulo runa, crijcunata llaquichishcamanda

1Saulo runaca, Estebanda huañuchijujta ricushpaca, alicachishpami ricujurca. Chai punllapica, Jerusalenbi tandanajushca crijcunata catiriyashpa llaquichinajujpimi, paicunaca, Judea llactaman, Samaria llactaman, caiman, chaiman pacajushpa rinajurca. Apostolcunallami Jerusalenbi saquirinajurca. 2Diosta yarishpa causaj runacunami, Esteban runagutaca, ninanda llaquishpa, huacashpa pambangapa rinajurca. 3Shinallata, Saulo runaca, tandanajushca crijcunata llaquichishpa tucuchingapa munashpami, huasin huasin yaicushpa, jaricunatapash, huarmicunatapash aisashpa prezu churajurca.

Samaria llactapimi quishpirinamanda villanajushca

4Jerusalenmanda pacajushpa rishcacunaca, maita rinajushpapashmi quishpirinamanda villashpandi rinajurca. 5Felipepash, Samaria puebloman urai rishpami, Cristomanda villajurca. 6Felipe chashna villajujpimi, gentecunaca tandanajushpa, aliguta uyanajurca. Shinallata, pipash na rurai ushanallacunata rurajtapashmi ricunajurca. 7Ashtaca gentecunamanda, mapata rurachij ayacunata llujchijpimi, ninanda caparishpa llujshinajurca. Na cuyuri ushajcunatapash, suchucunatapashmi ashtacacunata alichijurca. 8Shinamandami, chai pueblopi causajcunaca, ninanda cushijunajurca. 9Ashtahuangarin Samaria pueblopica, Simón shuti runami causajurca. Chai runaca, llulla yachaj cashpami, chaipi causajcunataca, alipi ricurishpa ninanda umachishpa causajushca carca. 10Paitaca, tucuicunami, uchillamanda callarishpa, jatungunacaman: “Caica, Taita Diospaj ninan ushaimi” nishpa alicachishpa uyanajurca.

11Unai huatacunatami paipaj ruraicunahuan chashna umachishpa causajurca, chaimandami, tucuicuna paitaca alicachishpa uyanajuj carca. 12Ashtahuangarin, Taita Dios mandajuj llactaman ringapa quishpirinamandapash, Jesucristopaj shutimandapash, Felipe villajujpimi, jaricunapash, huarmicunapash crishpa bautizarinajurca. 13Simón runapash crishpa, bautizarishpaca, Felipeta cumbashpami purijurca. Pipash na rurai ushanallacunata, imapash ricuchinacunata Felipe rurajujta ricushpami, Simonga ninandapacha manllarijurca.

14Jerusalenbi causaj apostolcunaca, Diospaj Shimita, Samaria pueblopi causajcuna aliguta chasquishcata yachashpami, Pedrotapash, Juandapash chaiman cachanajurca. 15Paicuna chaiman chayashpaca, chaipi crijcunapash jucha illaj Diospaj Espirituta chasquichunmi Diosta mañanajurca. 16Diospaj Espirituca, paicunapurapica nara shamushcachu carca. Shina cajpipash, paicunaca, Apunchi Jesuspaj shutipimi bautizarishca carca. 17Chai crijcunapaj umapi maquita churashpa mañajpimi, jucha illaj Diospaj Espirituta chasquinajurca.

18Apostolcuna, crijcunapaj umapi maquita churashpa, jucha illaj Diospaj Espirituta cujta ricushpami, Simón runaca paicunaman culquita cungapa munajurca. 19Paica cashnami nijurca:

“Ñuca maquita pipaj umapi churajpipash, jucha illaj Diospaj Espirituta chasquichun, ñucamambash chai ushaita cuhuaichi” nircami.

20Shina nijpimi Pedroca, cashna nirca:

“Taita Dios ushaita caramujujtaca, ‘culquihuan randisha’ yajushcamandami, chai culquindi chingaita chingagringui. 21Cambaj shungu, Taita Diospaj ñaupajpi na ali cashcamandami, cai ali ruranacunataca napacha japi ushangui. 22Chashna na alita rurashcamandaca, ninanda llaquirishpami Taita Diospajman tigrarina cangui. Cambaj shungupi chashna na alita yarijushcata perdonaipapash, Taita Diosta mañanami cangui. 23Cambaj shunguca, ninan na alilla junda cashpa, juchapi prezu causajujtami ricuni” nircami.

24Shina nijpimi, Simón runaca:

“Canguna nijushcashnaca amapacha ñucapi tucuchun, ñucamanda Jatun Diosta mañapaichi” nirca.

25Paicunaca, tucui ima alicunata rurashcatapash, Diospaj Shimitapash villashca jipami Jerusalenman tigranajurca. Shinallata, Samaria llactapi, tauca pueblocunapipash, quishpirinamanda villashpandimi rinajurca.

Etiopía llactamanda runaman, Felipe villashcamanda

26Jatun Dios cachamushca angelmi Felipetaca cashna nirca: “Jerusalenmanda llujshishpa, Gaza puebloman rina, jichushca pambata yalijun ñanda japishpa urai ringuilla” nircami. 27Shina nijpi rijushpami, Etiopía llactamanda eunuco runahuan tuparirca. Paica, Etiopía llactata jatun mandaj Candace shuti huarmi tucui imalla charishcata ricushpa causajmi carca. Paica, Diosta alicachingapami Jerusalenman shamushca carca. 28Chai runa carretapi tigrajushpaca, profeta Isaías quilcashcatami, quilca catishpandi rijurca. 29Shina rijujpimi Felipetaca, Diospaj Espírituca:

“Chai carretaman quimirigri” nirca.

30Felipe chaiman chayashpaca, profeta Isaías quilcashcata, quilca catishpandi rijujta uyashpami:

“Canga, ¿chaipi imata nijujtapash yuyaipi japinguichu?” nishpa tapurca.

31Shina nijpimi chai runaca:

“Pipash na yachachijpica, ¿imashnata yachashayari?” nirca.

Chaipimi Felipetaca: “Caiman shamushpa tiyaripai” nishpa ninanda mañarca.

32Paica, caitami quilca catijurca. Chai Quilcashcapica cashnami nijurca:

“Llamagutashna huañuchingapami, paitaca apanajurca.

Paica, rutujcunapaj ñaupajpi, maltun llamagu upalla sirijujshnami,

imata ningapapash shimita na pascarca.

33Na ricunayachishpa llaquichijujpipash,

‘na chashna ruranachu canguichi’ nishpaca pipash na nircachu.

Cai pachapi huañuchi tucujpimi,

‘paimanda miraicuna tiyan’ nishpaca, pipash na villangachu” nijurcami.

34Chai eunuco runaca, Felipetaca cashnami nijurca:

“Profetaca, ¿paimandallatachu cashna villajupan, na cashpaca shuj runamandachu villajupan? Maijanmanda chashna nijujtapash villahuailla” nircami.

35Shina nijpimi, Felipeca, chai quilcashcata catishpa, Jesusmanda ali villanata villajurca. 36Ñanda rinajushpa, yacu tiyajta ricushpami, chai eunuco runaca:

“Ricui, caipi yacu tiyashcamari, ¿ñuca bautizaringapaca, imamandapash na ushanalla tiyapanllu?” nirca.

37(Shina nijpimi, Felipeca:

“Tucui shunguhuan crishpaca, bautizari ushanguimi” nirca.

Shina nijpimi, chai runaca:

“Ari, Jesucristotaca, Taita Diospaj Churi cajta crinipachami” nirca)#8:37 Cai versículo 37 teca, ashtahuan punda quilcashcacunapica (manuscrito antiguo) na tiyajunllu..

38Shina nishpaca, carretata shayachishpami, Felipepash, eunuco runapash, yacuman ishcandi uriajushpa paitaca bautizarca. 39Chai yacumanda llujshijpimi Felipetaca, Jatun Diospaj Espíritu aparca. Chai eunuco runaca, Felipetaca na ashtahuan ricushpapash, ninanda cushijushpa rircallami. 40Ashtahuangarin, Azoto shuti pueblopimi Felipeca ricurirca. Paica, chai pueblomanda callarishpaca, tucui pueblocunapimi quishpirinamanda ali villanata villashpandi, Cesarea pueblocaman rijurca.

Currently Selected:

HECHOS 8: QVI16

Highlight

Copy