HECHOS 7
7
Esteban runaguta huañuchishcamanda
1Sacerdotecunata mandajmi, Estebandaca:
“¿Paicuna villashca shimicunaca chashnapachachu?” nishpa tapurca.
2Shina nijpimi paica cashna nijurca:
“Huauquicuna, taitacuna, uyahuaichi. Ninan ushaita charij Taita Diosca, ñucanchipaj ñaupa taita Abrahammanmi, Harán shuti pueblopi causangapaca nara rijpillata, Mesopotamia llactapi ricurishca. 3Shina ricurishpami, paitaca: ‘Cambaj llactata, cambaj ayllucunata, saquishpa rilla. Ñucami, can maipi causagrichumbash ricuchisha’ nishcami. 4Shina nijpimi Abrahamga, Caldea shuti llactamanda llujshishpa, Harán shuti pueblopi causagrishca. Paipaj taita huañushca jipami, cunan canguna causanajushca llactaman, Taita Diosca pushamushca. 5Ashtahuangarin Abrahammanga, maipi chaqui shayarinatallapash na carashcachu carca. Paica, huahuatapash nara charijpillatami: ‘Cambaj jipa miraicunamanmi, chaitaca carashapacha’ nijushca carca. 6Taita Diosca, cashnatapashmi nijushca carca: ‘Cambaj mirai huahuacunaca, shuj llactapimi gañan tigrashpa, ninanda llaquichijpi, chuscu patsaj huatacaman causanajunga. 7Gañanda rurashpa, charishcamandami chai llactataca ninandapacha llaquichisha, Diosca nirca. Chai jipami, cai llactapi Ñucapajta rurashpa causanajunga’ nishcami. 8Abrahammanga, circuncisionda rurashpa ‘ari nirishcata’ pactachinatami mandarca. Chaimandami Abrahamga, paipaj churi Isaacta charishpaca, pusaj punlla chayanhuan circuncisionda rurarca. Shinamandami Isaacpash, paipaj churi Jacobtaca circuncisionda rurarca. Shinallata Jacobpash, paipaj chunga ishcai churicunatami, circuncisiondaca rurarca. Paicunaca, ñucanchipaj ñaupa taitacunami carca.
9Chai ñaupa taitacunaca, paicunapaj huauqui Joseta na ricunayachishpami, Egiptoman jatushpa cacharca. Ashtahuangarin Taita Diosca, Josehuanmi causajurca. 10Shina cashpami Josetaca, tucui llaquicunamanda llujchijurca. Shinallata, ninandapacha juyashpami, aligutapacha yachajushca cachumbash, ushaita cararca. Shina cajpimi, Egipto llactata jatun mandaj Faraonbash, paitaca alicachishpa, Egipto llactatapipash, paipaj tucui huasipipash mandachun Josetaca churarca.
11Chai punllacunapimi, Egipto llactapipash, Canaán llactapipash, ninan yarjai tiyajpi, ninan llaquicunata apanajurca. Shina cajpimi, ñucanchi ñaupa taitacunaca micunataca maipipash na tarinajurca.
12Taita Jacobca: ‘Egiptopimi trigo tiyan’ nijta uyashpami, ñucanchi ñaupa taitacunataca chaimanra punda cacharca. 13Jipaman cutin rijpica: ‘Cangunapaj huauquimi cani’ nishpami, Joseca villashca. Chaipimi, Josetaca, pipaj mirai cajtapash, Faraonga yachaj chayarca. 14Chai jipami Joseca, paipaj taita Jacobtapash, paipaj ayllucunatapash, pushashpa tigrachun cacharca. Paicunaca canchis chunga pichami carca. 15Chashnami taita Jacobca, Egiptopi causangapa urai rirca. Chaipimi paipash, ñucanchipaj ñaupa taitacunapash huañurca. 16Chaimandami paicunapaj tullucunataca, Siquem shuti llactaman apashpa shamurca. Hamor shuti runapaj churicunata, llashaj culquipaj taita Abraham randishca alpapimi chai tullucunataca pambanajurca.
17Taita Diosmi, Abrahammanga: ‘Cai llactataca carashapachami’ nishpa juramentushca carca. Chai punllacuna pactangacamanmi, Israelcunaca, Egipto llactapi ninanda miranajurca. 18Chai jipami, Egipto llactata mandangapaca, Joseta na rijsishca shuj jatun mandaj tiyarishca carca. 19Chai mandajmi, jatun yachaj tucushca cashpa, ñucanchipaj taitacunataca ninanda llaquichijushca. Huañushpa, ama ashtahuan miranajuchunmi, jari huahuacunataca shitashpa saquichun mandashca. 20Chai huatacunapimi, Moisespash huacharishca carca. Paica, Taita Dios ninanda juyashcami cashca. Paitaca, quimsa quillacamanmi, taita mamaca pacashpa huasipilla charishca carca. 21Huañuchigrinajujpi, na ashtahuan pacai ushashpa jichushpa saquishcatami, Faraonbaj ushi tarishpa, paipaj huahuatashna viñachirca. 22Shina cashpami Moisesca, Egipto llactapi causajcunapaj yachajunatapash tucuita yachajushpa viñarca. Paica rimanatapash alipacha yachashpami, imata ruranatapash ninan ushaihuan rurajurca.
23Moisesca, ña chuscu chunga huatata charishpami, paipaj shungupica, paipaj ayllu Israelcuna imashna causanajujta ricungapa munashca carca. 24Pai rishpaca, Egiptomanda runa, shuj Israel runata macajujtami ricushca. Chai runata ama ashtahuan macachun mitsashpami, Egiptomanda runata chugrichishpa huañuchirca. 25Ashtahuangarin Moisesca: ‘Ñuca ayllucunaca, cai llaquicunamandaca, ñuca maquihuan cacharichijuchun, Taita Dios cachamushcataca yachangami’ yajurcami. Ashtahuangarin, paicunaca chaitaca na yacharcachu. 26Cayandi punllapash, Israelpurallata ninanda fiñanajushpa macanajujta ricushpami, paicunata alichingapa munashpa cashna nijurca: ‘Cangunaca huauquipurami canguichi ¿imashpata caishuj, chaishuj cashna fiñanajunguichi?’ nijurca. 27Shina nijpimi, paipaj cumbata fiñashpa macajuj runaca, Moisesta tangashpa churashpa cashna nijurca: ‘¿Pita candaca ñucanchita mandaj cachun, juez cachun churarca? 28¿Egipto runata caina huañuchishcashnachu, ñucatapash huañuchingapa munangui?’ nijurcami. 29Chashna nijpimi Moisesca, Egiptomanda llujshishpa, Madián llactaman pacajushpa rirca. Chaipi causashpami, ishcai churita charirca.
30Chuscu chunga huata jipaca, Sinaí urcu quimirialla shitashca pambapimi, zarza yura rupajuj chaupipi shuj ángel ricurca. 31Muscuipishna ricushpami Moisesca, ninanda manllarishpa, ashtahuan aliguta ricungapa chayagrirca. Chaipimi Jatun Dios rimajuj uyarishpa cashna nirca: 32‘Ñucami, Abrahambaj, Isaacpaj, Jacobpaj, tucui cambaj taitacunapaj Jatun Dios cani’ nijushcami. Shina nijpimi Moisesca, manllaihuan chujchurishpa, ashtahuan ricungapaca na usharca. 33Jatun Diosca, cashnatapashmi nirca: ‘Cambaj chaquipi churajushcata llujchishpa anchuchi. Can shayajuj alpaca, Ñucapajlla shicanyachishca alpami, 34Ñuca agllashca gentecunatami, Egipto llactapica ninan llaquicunata apashpa, huacanajujta ricurcani. Chai llaquimanda llujchingapami caiman urai shamurcani. Cunanga candami Egiptoman cachagrini, caiman shamui’ nijurcami.
35Na cazushpa, yangapi churashca Moisestami gentecunaca: ‘¿Pita candaca, ñucanchita mandaj cachun, juez cachunga churarca?’ ninajurca. Taita Diosca, paitallatami, zarza yurapi ricurij angelpaj ushaihuan, Israelcunata mandashpa llujchijuchun cachashca carca. 36Shina cachajpimi Moisesca, Egipto llactamandaca, ñucanchipaj ñaupa taitacunata llujchirca. Paica, pipash na rurai ushanallacunatami, Egipto llactapipash, Puca Cuchapipash, jichushca pambapipash, chuscu chunga huatacaman rurashpa ricuchijurca. 37Chai Moisesllatami, Israelcunataca cashna nijushca: ‘Cangunata Mandaj Jatun Diosmi, cangunapuramandaca shuj profetata cachamusha. Paica ñucashnami villajunga. Pai imata nishcatami cazuna canguichi’ nijushcami. 38Moisesca, tucui tandanajushca Israelcunahuanmi, jichushca pambapi causashca. Paica, Sinaí urcupi ángel villashcataca, ñucanchipaj ñaupa taitacunamanmi yalichishca. Causaita caraj shimicunata Dios carajpi japishpami Moisesca, ñucanchimambash yalichimushca.
39Chaitami ñucanchipaj ñaupa taitacunaca na cazungapa munashca. Ashtahuangarin, yachachishcacunata yangapi churashpami paicunapaj shungupica, Egiptomanllata tigrangapa munanajushca. 40Chashna cashpami Aarondaca cashna ninajurca: ‘Shuj dioscunata rurapailla, paicunami ñucanchipaj ñaupajpi rishpa, Egiptoman tigrachinga. Ñucanchita llujchishpa pushamuj Moisestaca, ima tucushcatapash na yacharinllu’ ninajurcami. 41Shina nishpaca, shicuman rijchaj shuj diosta rurashpami, animalcunata carashpa rupachinajurca. Paicunapaj maquihuan rurashca dioshuanmi ninanda cushijunajurca. 42Shinamandami, Taita Diosca, paicunapaj munashcata rurashpa, lucerocunata mañanajuchun saquirca. Profetacuna quilcashca shimicunapipash cashnami nijun:
‘Israelcuna, cangunaca jichushca pambapica,
¿chuscu chunga huatacamanllu,
animalcunata Ñucaman carashpa huañuchishpa rupachircanguichi?
43Ashtahuangarin Moloc shuti diospaj carpatami apashpa purircanguichi.
Shinallata, Renfán nishca lucerotashna rurashca diostapash apashpami purircanguichi.
Chaicunatami, cangunaca ninanda alicachircanguichi.
Shinamandami cangunataca, Babilonia llactata ashtahuan yalishpa, carupi causachun cachasha’ nijunmi.
44Ñucanchi ñaupa taitacunaca, jichushca pambapi cashpami, mandashca Shimicunata alichishca carpa huasita apashpa purinajushca. Moisesman, Taita Dios imashna rurachun ricuchishcashnami, chai carpataca rurashca carca. 45Chai carpataca, ñucanchi ñaupa taitacunami, Josué pushajpi apashpa shamushca. Ñucanchipaj ñaupa taitacunaman carangapami, Taita Diosca cai llactapi causaj na Israelcunataca llujchishpa cachashca. Chaitaca, David mandaj tucuna punllacamanmi chashna ruranajushca. 46Davidtaca, Taita Diosca ninandami juyajushca. Shinamandami taita Jacobpaj Diosman, ‘shuj huasita rurasha’ nishpa mañajurca. 47Ashtahuangarin, Salomonmi, Diospaj huasitaca huasichishca. 48Shina cajpipash, Jahua pachapi tiyajuj Taita Diosca, gentecuna maquihuan huasichishcapica na causanllu. Shinamandami profetacunapash cashna nishca:
49‘Jatun Diosca, cashnami nijun:
Jahua pachaca, Ñuca mandashpa tiyajunami.
Cai pachaca, Ñuca chaqui sarunami.
¿Imashna huasitata Ñucaman ruragringuichi?
¿Na cashpaca, maipita samana cani?
50Tucui chaicunataca, ¿nachu Ñuca maquihuanmi rurarcani?’ Nishca.
51¡Cangunaca shinlli shungu cashpami, jucha illaj Diospaj Espíritu ima nijujtapash na uyangapa munanguichi. Cangunaca, cangunapaj ñaupa taitacunashnallata na cazujcunami canguichi! 52Cangunapaj ñaupa taitacunaca, ¿maijan profetacunatata na catiriyashpa llaquichishca? ‘Alitalla Ruraj shamungami’ nishpa villajcunatapash huañuchishpami, Paitapash japichishpa huañuchircanguichi. 53Dios mandashca shimicunata, angelcuna cujpi chasquishpapash na cazujcunamari canguichi” nijurcami.
54Esteban chashna villajujta uyashpami, chai mandajcunaca shungupi ninandapacha fiñarishpa, quirutapash canirishpa ricunajurca. 55Ashtahuangarin Estebanga, jucha illaj Diospaj Espíritu junda cashpami, jahua pachata vichai ricushpaca, Taita Dios punchapamba tiyajujta, Paipaj Churi Jesuspash Taita Diospaj ali maquiman tiyajujta ricujurca. 56Shina ricushpami Estebanga, cashna nirca:
“Jahua pacha pascariyajujtami ricuni. Chaipica, Taita Diospaj ali maquimanmi, Runa Aichayuj tucushcapash tiyajun” nircami.
57Shina nijta uyashpaca, ama uyangapami, rinricunata llapirishpa, ninanda caparinajurca. Paicunaca tucuilla tucushpami Estebandaca japirca. 58Chashna japishpami Estebandaca, aisashpa pueblomanda llujchishpa rumicunahuan huañuchi callarirca. Llullashpa villajcunaca, paicunapaj churajunata llujchishpami, Saulo shuti huambraman minganajurca. 59Rumicunahuan chashna huañuchinajujpimi, Estebanga:
“Apunchi Jesús, ñuca espirituta chasquipailla” nishpa mañajurca.
60Esteban cungurishpaca:
“Apunchi Jesús, paicunapaj cai juchataca, ama yaripanguichu” nishpami ninanda caparirca.
Shina nishca jipaca huañurcallami.
Currently Selected:
HECHOS 7: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
