HECHOS 6
6
Canchis diaconocunata agllashcamanda
1Chai punllacunapica, ashtacacunami Jesusta crishpa miranajurca. Chaipica punllandi imata caranatapash, sapalla mamacunaman na chashnallata carashcamandami, griego shimita rimajcunaca, hebreo shimita rimajcunataca na alicachinajurca.
2Shinamandami, chunga ishcai apostolcunaca, ashtaca crijcunata tandachishpa, cashna ninajurca: “Diospaj Shimita ñucanchi villanata saquishpa, micunatara caranajunaca na alichu. 3Chaita rurachunga, cangunapuramanda canchis runacunata mascashpa agllapaichi. Paicunaca, tucuipi alicachi tucushca, jucha illaj Diospaj Espíritu junda, aliguta yachajushcacuna cachun ninchimi. 4Paicunata churashpami, ñucanchica, Diosta mañanatapash na saquishpa, paipaj Shimitapash villanajushun” ninajurcami.
5Shina nishcataca, chaipi tandanajushca tucuicunami alicachinajurca. Shinamandami, jucha illaj Diospaj Espíritu junda, ali crij Esteban runaguta, shinallata, Felipe, Prócoro, Nicanor, Timón, Parmenas, Nicolás shuti runacunatapash agllanajurca. Nicolás runaca, Israelcuna yachachishcata catij, Antioquía pueblomandami carca. 6Paicunataca, apostolcunapajman pushamujpimi, paicunapaj umapi maquita churashpa Diosta mañanajurca.
7Jatun Diospaj Shimita ashtahuan ashtahuan villanajujpimi, Jerusalenbica ashtacacuna crishpa miranajurca. Shinallata, ashtaca sacerdotecunapashmi, Jesusta crishpa catinajurca.
Esteban runaguta prezu japishcamanda
8Esteban runaguca, ninan juyaihuan, ninan ushaihuan junda cashpami, chai gentecunapica, jatun manllarinacunata, pipash na rurai ushanallacunata rurashpa ricuchijurca. 9Shinamandami: “Cacharichi tucushca” shuti sinagogamanda huaquingunaca, Estebanda fiñashpa rimangapa jatarinajurca. Shinallata, Cirene, Alejandría pueblocunamanda, Cilicia, Asia llactacunamanda runacunapashmi shina fiñashpa jatarinajurca. 10Esteban runaguca, Diospaj Espíritu yachachijpi, ali yachaihuan villajujpimi, “na chashnachu” nishpa rimaitaca na ushanajurca. 11Shinamandami paicunaca: “Moisés mandashca shimitapash, Taita Diostapash na ali shimicunata rimajujtami uyarcanchi” nishpa llullanajuchun, culquita pacalla cunajurca.
12Shinami, chaipi causajcuna, mandaj ancianocuna, mandashca Shimita yachachijcunapash fiñarishpa jatarichun, na ali yuyaita cunajurca. Shina cashpami, Estebanda japishpaca, mandajpuracunalla tandanajushcapaj ñaupajman apanajurca. 13Llullashpa villachun churashca shuj runacunapash cashnami ninajurca: “Cai runaca na shaijushpami, Diospajlla huasitapash, mandashca shimitapash, na ali shimicunatalla rimajujta uyarcanchi. 14Shinallata, cashnatapashmi nijujta uyarcanchi: ‘Nazaret pueblomanda Jesusmi, Diospaj huasitaca urmachinga. Paillatami, Moisés ñucanchiman yachachishcataca chingachishpa, shujta yachachinga’ nijujtapashmi uyarcanchi” ninajurcami.
15Mandajpuralla tandanajuna ucupi tiyanajuj tucui runacuna, Estebanda ricunajujpica, paipaj ñavica, angelpaj ñavishnami ricurirca.
Currently Selected:
HECHOS 6: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
