HECHOS 5
5
Ananías runamandapash, Safira huarmimandapash
1Ananías runaca, Safira paipaj huarmihuanmi, shuj alpata jaturca. 2Paica, alpata jatushca culquimandaca paipaj huarmindillata shuj ashata japishpami, ashatalla apostolcunaman cungapa apamurca. 3Shinamandami Pedroca cashna nirca:
“Ananías, jucha illaj Diospaj Espirituta chashna llullangapaca ¿imashpata cambaj shungupi, Satanás yaicuchun saquircangui? Chashna cashpami alpata jatushca culquimandaca ashata japircangui. 4¿Chai jatushca culquica nachu cambajlla carca? ¿Nachu tucuillata canlla japinalla carcangui? ¿Imashpata cambaj shungupica chashna na alita ruranatara yarircangui? Runacunataca na llullashcanguichu, ashtahuangarin Taita Diostami llullashcangui” nircami.
5Chashna nijta uyashcandimi, Ananiasca ñapash huañurca. Chashna tucushcata uyajcunaca, tucuicunami ninandapacha manllarinajurca. 6Huañushcataca, huambracuna jatarishpami pilluchinajurca. Shina rurashpami, canllaman llujchishpa pambangapa apanajurca.
7Ña quimsa pachacuna yalishca jipami, paipaj huarmipash chaiman yaicumurca. Chaipi ima tucushcataca paica nara yacharcachu. 8Shina cajpimi, Pedroca cashna nirca:
“Alpataca, ¿chaipajllachu jaturcanguichi? chaita villahuayari” nishpa tapujpimi chai huarmica:
“Ari, chaipajllami jatuparcanchi” nirca.
9Shina nijpimi Pedroca, cashna nirca:
“¿Imashpata ishcandi parlarishpa, Jatun Diospaj Espirituta umachinata yarircanguichi? Cambaj cusata pambashpa shamujcunaca, ñami punguta yaicumunajun. Candapash, paicunallatami apagrin” nircami.
10Chashna nijujhuanmi, chai huarmipash huañushpa, paipaj ñaupajpi ñapash urmarca. Chai huambracuna yaicushpaca, huarmipash huañushcata ricushpami, paitapash apashpa, paipaj cusapaj quimiriapillata pambanajurca. 11Shinamandami, tandanajun crijcunapash, chashna tucushcata tucui uyancunapash, ninanda manllarinajurca.
Pipash na rurai ushanallacunatapash, imapash juyaillacunatapash ashtacatami ruranajushca
12Apostolcunaca, pipash na rurai ushanallacunata, jatun manllarinacunata rurashpami gentecunaman ricuchinajurca. Tucui crijcunami, Salomón rurashca corredorpi shujllashnalla tandanajunajurca. 13Shuj gentecunaca, paicunahuan tandanajungapaca na munarcachu. Shina cashpapash, ashtacacunami ninanda alicachinajurca. 14Jaricunapash, huarmicunapash, Apunchi Jesusta crishpami ashtahuan ashtahuan miranajurca. 15Huañujujcunataca ñanman llujchishpami camacunapi, huandujcunapi churanajurca. Pedro chaita yalijushpaca, paipaj llanduhuanllapash alichingapashchari yashpami, chashna ruranajurca. 16Chai quimirialla pueblocunapi causajcunapashmi, ashtacacuna Jerusalenman shamunajurca. Paicunaca huañujujcunata, mapata rurachij ayacuna llaquichijpi causajcunata apashpami shamunajurca. Tucui paicunami ungüimanda alichi tucunajurca.
Pedrotapash, Juandapash catiriyashpami llaquichishca
17Shina alichijta ricushpami, sacerdotecunata mandajpash, paihuan chaipi tucui tandanajushca saduceocunapash ninanda fiñarishpa jatarirca. 18Chashna cashpami, apostolcunata japishpa, tucuicunata prezuna huasipi churanajurca. 19Ashtahuangarin, Jatun Diospaj angelmi, prezuna huasi pungutaca tuta pascashpa, paicunata llujchijushpaca cashna nirca:
20“Cunanga, Diospaj huasiman rishpa, mushuj causaimanda gentecunaman tucuita villanguichi” nirca.
21Shina nishcata cazushpami, Diospaj huasiman tutamandata yaicushpa yachachinajurca.
Chaicamanmi, sacerdotecunata mandajpash, paihuan purijcunapash, mandajpuralla tandanajungapa nishpa, Israelcunata mandaj tucui ancianocunata tandachirca. Shina tandanajushpami, apostolcunataca, prezuna huasimanda llujchigrichun cacharca. 22Ashtahuangarin, chapajcuna chaiman chayajpica, prezuna huasipica illashcami carca. Chaimandami cutin tigrashpa villanajurca. 23Paicunaca cashnami villanajurca:
“Prezuna huasi pungutaca, alipacha vichashpa jarcashcatami japigrircanchi. Ricushpa tiyaj chapajcunapash, pungucunapi ricushpami canllapi shayanajushca carca. Ashtahuangarin, punguta pascashpa ricujpica, pipash illashcami carca” nishpami villanajurca.
24Shina villajta uyashpami, sacerdotecunata mandajpash, Diospaj huasita huacaichijcunata mandajpash, sacerdotecunata shuj mandajcunapash; “¿chai runacunaca imashi tucurca?” nishpami tapurinajurca.
25Ashtahuangarin, shuj runa shamushpami, cashna nishpa villarca:
“Prezuna huasipi canguna vichashca runacunaca, Diospaj huasipimi gentecunaman yachachinajun” nircami.
26Shina nijpimi, chapajcunata mandaj runaca, chapajcunandi cutinllata paicunata japingapa rirca. Chaipi tandanajushca gentecuna, rumicunahuan huañuchinata manllashpami, paicunatalla alilla aparca. 27Shina apamushpaca, mandajpuralla tandanajushcapaj ñaupajpimi shayachinajurca. Chaipimi sacerdotecunata mandajca cashna tapujurca.
28Cangunataca: “¿Nachu chai Shutimandaca, napacha cutinga yachachinachu canguichi nircanchi? Shina cajpipash na cazushpami, canguna Jerusalenbipash ninanda yachachinajunguichi. ‘Chai runatapash, paicunami yahuarta jichashpa huañuchirca’ nishpami, ñucanchitaca juchachingapa munanguichi” nircami.
29Shina nijpimi Pedroca, caishuj apostolcunandi cashna nirca:
“Taita Diostami, runacunatapash yali ashtahuan cazunapacha canchi. 30Cangunami, Jesustaca caspipi chacatashpa huañuchircanguichi. Shina huañuchijpipash, ñucanchi ñaupa taitacunapaj Taita Diosmi causachirca. 31Paitami, Mandaj cachumbash, Quishpichij cachumbash, Taita Diosca jatumbi churashpa, Paipaj ali maquiman tiyachirca. Israelcuna llaquirishpa, Diospajman tigrarijpi juchacunata perdonangapami, chashnaca rurarca. 32Ñucanchica, chaita ricushcata villajcunami canchi. Paita cazujcunaman Taita Dios carashca Jucha illaj Espiritupash chaitallatami villajun” ninajurcami.
33Chashna villajpi uyashpami chai mandajcunaca, ninanda fiñashpa huañuchingapa munanajurca. 34Shina cajpimi, Gamaliel shuti fariseo runaca, mandajpuralla tandanajushcamanda jatarishpa, apostolcunataca ashacamanlla canllaman llujchichun mandarca. Paica, Mandashca shimita alipacha yachachij cajpimi, paitaca tucuicuna ninanda alicachin carca. 35Chai jipami paica cashna nijurca:
“Israel runacuna, cai runacunata imata rurangapapash alipacha yuyaipi japinarami canguichi. 36Yalishca punllacunapica, Teudas shuti runataca: ‘Mandajmi cani’ nijpimi, chuscu patsajshna runacuna catinajurca. Ashtahuangarin, chai runata huañuchijpimi, paita catijcunaca caita chaita rishpa tucurirca. 37Chai jipami, mashna gentecuna tiyajta yachangapa yupana punllacunapica, Galilea llactamanda Judaspash jatarishpa, ashtaca gentecunata catichirca. Shinallata paita huañuchijpica, paita catijcunapash caita chaita rishpami tucurirca. 38Chaimandami cangunataca cashna nini: Cai runacunataca, ama imatapash nishpa saquichilla. Paicuna yarinajushcapash, paicuna imata rurashcapash, runacunapaj munaimandalla cashpaca tucuringallami. 39Ashtahuangarin, Taita Diosmanda cajpica, na tucuchi usharingachu. pactarallapash Taita Diostara fiñachinguichiman” nijurcami.
40Pai villashcata alicachishpami, apostolcunataca cayachun cachashpa, astishpaca: “Jesuspaj shutipica, cutinga na villanachu canguichi” nishpa manllachishpa cacharinajurca.
41Mandajpuralla tandanajushcapaj ñaupajmanda llujshishpaca: “Jesuspaj Shutimanda llaquita apanajushpami” ninanda cushijunajurca.
42Paicunaca, Diospaj huasipipash, shuj huasicunapipash punllandi Jesucristomanda yachachishpa villanataca napacha saquircachu.
Currently Selected:
HECHOS 5: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
