HECHOS 4

Pedrotapash, Juandapash, mandajpuralla tandanajushcapaj ñaupajmanmi apashca

1Pedropash, Juanbash gentecunaman villanajujpimi sacerdotecunaca, Diospaj huasita ricujcunata mandajhuan, saduceocunahuan, paicunata japingapa shamunajurca. 2“Jesusta crishpallami, huañushcacunapaj chaupimanda causaringa” nishpa, gentecunaman villanajujta uyashpami, paicunaca ninanda fiñarishpa chashna shamunajurca. 3Paicunata japishpaca, ña chishajujpimi, cayandi punllacaman prezuna huasipi churanajurca. 4Ashtahuangarin, paicuna villanajujta uyashpaca, ashtacacunami crinajurca. Jaricunallami, picha huarangashna carca.

5Chai cayandi punllami, Israelcunata mandajcuna, mandaj ancianocuna, mandashca Shimita yachachijcunapash, Jerusalenbi tandanajunajurca. 6Shinallata, sacerdotecunata mandaj Anaspash, Caifaspashmi chaipi carca. Shinallata, Juanbash, Alejandropash, sacerdotecunata mandajpaj tucuilla ayllucunapashmi chaipi tandanajurca. 7Paicunaca, Pedrotapash, Juandapash, chaupipi churashpami:

“¿Cangunaca, pipaj ushaihuan, maijan mandajpita, caitaca rurarcanguichi?” ninajurca.

8Shinamandami Pedroca, Jucha illaj Diospaj Espíritu junda cashpa, cashna nijurca:

“Cai pueblota mandajcuna, Israel llacta ancianocuna, uyahuaichi. 9Shuj huañujuj runaguman alita rurashcamandami: ‘Imashnata cai runaca ali tucurca’ nishpa cunanga tapunajunguichi. 10Cangunapash, tucui Israelcunapash yachachunmi, cashna villagrini: ‘Nazaret pueblomanda Jesucristopaj’ shutipimi, cai runagutaca alichircanchi. Chai Jesusta canguna chacatashpa huañuchijpipash, Taita Diosmi huañushcacunapaj chaupimanda causachirca. Cai runagutaca, Pai alichijpi ali tucushcatami ricunajunguichi. 11Chai Jesustami cangunaca, huasichingapa imapapash na ali rumitashna shitashcanguichi. Ashtahuangarin Paica, huasi pirca tigranapi churana jatun rumipachami tucurca. 12Shina cashcamanda, ashtahuan shuj quishpichijca maijambash na tiyanllu. Ñucanchi quishpiri ushachun, cai pachapi runacunaman cushca shuj shutica ashtahuanga na tiyanllu” nijurcami.

13Pedropash, Juanbash, na imatapash yachajushca, yangalla runacunami carca. Shina cashpapash, paicunaca na manllashpa, alitapacha villanajujpimi, mandajcunaca ninanda manllarijurca. Paicunataca: “Jesushuan purinajushpami chashnapacha yachajushca” ninajurcami. 14Shinallata, chai ali tucushca runagutapash, paicunahuan shayajujta ricushpami, imata nitapash na ushanajurca. 15Chaimandami paicunataca, chai mandajpuralla tandanajushca ucumanda llujchishpa, paicunapuralla parlarinajurca. 16Paicunaca cashnami ninajurca:

“Cai runacunataca, ¿imatata rurana canchi? Pipash na rurai ushanallacunata paicuna rurashcataca tucuicunami yachan. Shinallata, Jerusalenbi causajcunapash tucuicunami ricushca. Shinamandami: ‘Chaicunaca llullami’ nitaca na ushanchi. 17Shina cajpipash, paicuna imata rurashcapash ama ashtahuan uyarichun, cunanmandaca, ama ashtahuan Jesuspaj shutipi villanajuchunga: ‘Llaquichishunbachami’ nishpami saquina canchi” ninajurcami.

18Shinamandami, paicunata cayashpaca:

“pactarallapash, Jesuspaj shutipi villashpa yachachinguichiman” nishpa ninanda manllachinajurca.

19Ashtahuangarin, Pedropash, Juanbash cashnami ninajurca:

“Cangunallata aliguta yarichi. Taita Diospaj ñaupajpica, ¿Taita Diostara na cazushpa, cangunatara cazunachu, ali canga? 20Ñucanchi ricushcata, uyashcataca, napacha saquishpami villanapacha canchi” ninajurcami.

21Shina ninajujpimi chai mandajcunaca, imamanda llaquichitapash na ushashpa: “Cangunataca llaquichishunbachami” nishpalla cacharinajurca. Paicuna imatalla rurashcata tucui gentecuna yachashpami Taita Diostaca ninanda alicachinajurca. 22Na alichi ushanalla ungüimanda alichi tucushca chai runaguca, chuscu chunga huata yalitami charirca.

Crijcunaca, Taita Dios ushaita carachunmi mañashca

23Ña cacharijpica Pedropash, Juanbash crijcunapajman shamushpami, sacerdotecunata mandajcuna, mandaj ancianocuna imatalla nishcata villanajurca. 24Chaita uyashpami, tucuicuna caparishpa, Taita Diostaca cashna nishpa mañanajurca:

“Tucuita mandaj Jatun Dioslla, Canmi jahua pachatapash, cai pachatapash, mama cuchatapash, chaicunapi tucui imalla tiyajcunatapash churaj Taita Dios capangui. 25Cambajta ruraj Davidpash, Can rimachijpimi cashna nijushca:

‘Chai gentecunaca, ¿imashpata chashna fiñashpa jatarinajun?

Pueblocunapi causajcunapash, ¿imashpata maitapash yarinajun?

26Cai pachapi jatun mandajcunapash,

llactacunata mandajcunapash, shujllashnalla tandanajushpami,

Jatun Diostapash, Pai cachamushca Cristotapash fiñashpa jatarinajurca’ nijushcami.

27Chashna nishcashnapachami, mandaj Herodespash, Poncio Pilatopash, na Israelcunahuan, Israelcunahuan tandanajurca. Paicunaca, can Diosllata agllashca, jucha illaj cambaj Churi Jesusta llaquichingapami cai pueblopi tandanajurca. 28Chashna tucuchunga, Canllatami pundamandapacha, Cambaj ushaihuan, ña yuyarishcalla charishcangui. 29Jatun Dioslla, cunanga, paicuna llaquichingapa munanajujtaca ricupayari. Cambajta rurajcunaca, na manllashpa cambaj Shimita villachun ushaita carapayari. 30Cambaj ushaihuanmi, huañujujcunata alichishpa, pipash na rurai ushanallacunata rurashpa, jatun manllarinacunata rurashpa ricuchinajunga. Jucha illaj cambaj Churi Jesuspaj shutipimi chashna rurai ushanajunga” nishpami mañanajurca.

31Chashna mañashca jipami, paicuna tandanajushca pushtuca chujchurca. Tucuicunami, Jucha illaj Diospaj Espíritu junda cashpa, Diospaj Shimitaca ninan ushaihuan villanajurca.

Imata charishcacunapash, tucuillapajmi cashca

32Ashtaca crijcuna cashpapash, tucui shunguhuan, tucui almahuanmi, shujllashnalla yarishpa causanajurca. Imata charishcacunapash, tucuicunapajmi carca. Shina cajpimi, “caica ñucapajmi” nishpaca, pipash na ninajurca. 33Apostolcunaca, Apunchi Jesús causarishcataca, ninan ushaihuanmi villanajurca. Shinallata, Diospaj ninan juyaica tucuilla crijcunapimi carca. 34Shina cashpami, tucui crijcuna imagupash na illaj causanajurca. Paicuna charishca alpata cashpa, huasita cashpapash jatushpami, chai jatushca culquitaca apamunajurca. 35Shina apamushpaca apostolcunamanmi cunajurca. Chaitaca, maijanman cuna cashcata ali ricushpami tucuicunaman cunajurca. 36Bernabé nishpa apostolcuna shutichishca Josepash chaipimi carca. (Bernabé nishpaca “cushichij” nijunmi) Paica, mama cucha chaupipi tiyajuj, Chipre llactamanda levitami carca. 37Chai runaca, pai charishca alpata jatushpami, chai jatushca culquitaca apostolcunaman apamurca.

Currently Selected:

HECHOS 4: QVI16

Highlight

Copy