JUAN 15

Jesusca, uva yuragushnami

1Ñucami, uva yuragushna cani. Ñuca Taitaca, uva chagrata tarpujmi capan. 2Ñucapi maijan malquipash na fucujtaca tucuillami cuchushpa anchuchinga. Ali fucujujtaca, ashtahuan ali fucuchunmi ima na alitapash anchuchinga. 3Ñuca villajushca shimicunami, cangunataca mapa illajta saquishca. 4Canguna, Ñucahuan causanajujpimi, Ñucapash cangunahuan causajuni. Uva yuramanda anchuchishca malquipica, na paimandallata fucunllu. Cangunapash na Ñucahuan causanajushpaca chashnallatami canguichi.

5Ñucami, uva yura cani, cangunaca malquicunami canguichi. Maijan cashpapash Ñucahuan causajujpillami, Ñucapash Paihuan causajusha. Paica, granota ninanda fucunshnami causajunga. Ñucamanda anchurishpaca, imata ruraitapash na ushashpami causanguichi. 6Ñucahuan na causajujtaca, na fucuj malquitashna canllaman shitajpimi chaipi chaquinga. Chaitaca tandachishpa, ninapi shitajpimi rupajunga.

7Canguna Ñucahuan causajushpa, Ñuca villajushca shimicunatapash yariashpa causashpaca, tucui imata cashpapash Ñuca Taitata mañanguichilla. Paica carangallami. 8Aliguta fucujujshna causajpimi, Ñucapaj yachajujcuna cajtaca ricunga. Shina ricushpami, Ñuca Taitataca ninanda alicachinajunga. 9Ñuca Taita Ñucata juyashcashnami, Ñucapash cangunataca juyajuni. Cangunaca Ñuca juyaipimi causana canguichi. 10Canguna, Ñuca mandashca shimicunata pactachijpimi, Ñucapash cangunataca ninanda juyashpa charisha. Ñuca Taitapash, Pai mandashcacunata Ñuca pactachijpimi, Ñucataca ninanda juyahuan.

11Caicunataca, Ñucapaj ninan cushijuita chasquishpa, canguna ninanda cushijushpa causachunmi villajuni. 12Caimi Ñuca mandashca shimicuna: Imashnami cangunata juyarcani, chashnallatami cangunapash caishujhuan chaishujhuan juyarishpa causana canguichi. 13Maijan cashpapash, paipaj cumbamanda huañushpami, ninandapacha juyashcataca ricuchijun. 14Ñuca mandashcata pactachishpaca, cangunapash Ñuca juyashca cumbacunami canguichi. 15Cangunataca, Ñucapajta rurajcunami canguichi nishpaca na nishachu. Mandajpajta ruraj runaca paita mandaj imatalla rurajtaca na yachanllu. Cangunataca, Ñuca cumbacunami nircanimi. Shina cashpami, Ñuca Taita Ñucaman imata villajushcatapash, tucuita ña villarcani. 16Ñucataca na canguna agllashcachu canguichi. Ashtahuangarin, Ñucami cangunataca agllarcani. Aliguta fucuj yuragushna causanata villagrichunmi cangunataca agllarcani. Chai granoca causaitami causanga. Chashna cajpica, Ñuca shutipi canguna, Ñuca Taitata imaguta mañajpipash, Paica carangallami. 17Cangunataca, caishujhuan chaishujhuan juyarishpa causanguichi nishpami mandani.

Cai pachapajtalla rurashpa causajcunaca, millanayachishpami ricunga

18Cai pachapi causajcuna cangunata millanayachijpica, Ñucatara millanayachishcatami yachana canguichi. 19Cangunapash, cai pachapi causajcunashna causajpica, cangunataca ninandami juyanman. Ashtahuangarin, na cai pachamanda cajpimi cangunataca agllarcani. Chaimandami cangunataca ninanda millanayachin. 20Ñuca villajushca shimicunataca yarinami canguichi: ‘Mandajpajta ruraj runaca, paita mandajtaca na yalichu’ nircanimi. Ñucata catiriyashpa llaquichijshnami, cangunatapash llaquichinajunga. Ñuca villajushca shimicunata cazushpaca, canguna villajushcatapash cazungami. 21Ashtahuangarin Ñuca shutipi villanajujpimi, cangunataca chashna llaquichinajunga. Paicunaca, Ñucata cachamuj Taitata na rijsimandami chashna ruranajunga.

22Ñuca na shamushpa, paicunaman na villajpica, juchayuj cashcataca na yachanmanllu carca. Ashtahuangarin cunanga, juchata na rurashcanichu nitaca na ushangachu. 23Maijambash Ñucata millanayachishpaca, Ñuca Taitatapashmi millanayachijun. 24Paicunapaj ñaupajpica, pipash na ruraita ushashcatami, imatapash rurajurcani. Na chashna rurashpa purishca cajpica, paicuna juchayuj cashcataca na yachanmanllu carca. Cunanga, chashna rurashcata ricushca cashpapashmi Ñucatapash, Ñuca Taitatapash millanayachinajun. 25‘Yanga yangamandami, Ñucataca millanayachihuarca’ nishpa, mandashca shimipi quilcashca pactachunmi Ñucataca millanayachinajun.

26Ashtahuangarin, Ñuca Taitapajmandami cangunata Cushichij, na llullaj Espirituta cachamusha. Chai Espírituca Taitapajmanda shamushpami, Ñucamanda villajunga. 27Cangunaca, Ñuca villai callarishca punllamandapachami, Ñucahuan purircanguichi. Shina cashpami, Ñucamandaca chashnapachami nishpa villanajunguichi.

Currently Selected:

JUAN 15: QVI16

Highlight

Copy