JUAN 16

1Cai shimicunataca, canguna ama pandarichunmi villajuni. 2Cangunataca sinagogacunamanda llujchishpami cachanajunga. Shinallata cangunata, maijan huañuchishpapash, Taita Dios munashcatami pactachircani ninajuna punllacunami chayamujun. 3Ñuca Taitatapash, Ñucatapash na rijsimandami, chashnaca ruranajunga. 4Chai punllacuna chayamujpica, cangunaman Ñuca ima nishpa villajushcata yarichunmi chashna villajurcani.

Jucha illaj Diospaj Espiritumi yachachinga nishcami

5Cunanga, Ñucata cachamuj Taitapajmanmi rigrijuni. Shina cajpipash: ‘¿Canga, maimanda rigrijungui?’ nishpaca, maijambash na tapushcami canguichi. 6Ashtahuangarin, cunan caicunata villajpimi, cangunaca shungu junda llaquiringuichi. 7Na llullashpami cangunataca cashna nijuni: Ñucaca, cangunapaj ali cachunmi rina cani. Ñuca na rijpica, cangunata Cushichijca na shamungachu. Ñuca rishpallami, cangunata Cushichijtaca cachamusha. 8Pai shamushpallami cai pachapi causajcunataca: Juchapi causanajushcata, alitalla ruranamanda, shinallata llaquichina chayamunatapash villanga. 9Ñucata na crishcamanda, juchayu cashcatami ricuchinga. 10Shinallata, alitalla ruraj cashpa, Ñuca Taitapajman rijpimi na ashtahuan ricunguichi. 11Shinallata, cai pachata mandajtapash ña llaquichishca cashcatami ricuchinga.

12Cangunaman yachachinataca, ashtacata charinirami. Ashtahuangarin, canguna na ushanalla cajpimi na yachachijuni. 13Diospaj na llullaj Espíritu shamushpami, na llullashpa tucuita cangunaman yachachinga. Na Paipaj munashcata villajungachu. Ashtahuangarin, uyashcatallami tucuita villajunga. Shinallata, shamui punllacunapi ima llaqui tiyanatapashmi yachachinga. 14Paimi, Ñucamanda imata chasquishcatapash, cangunaman yachachishpa, Ñucataca alicachijunga. 15Ñuca Taita tucui imata charishcapash Ñucapajmi. Shina cajpimi Ñucamanda chasquishcataca, Diospaj Espíritu cangunaman yachachinga” nijurcani.

Llaquipash cushijuiman tigranamanda

16“Ashacamanlla caipi cashpa, ñapash rijpimi na ricuhuanguichi. Shinallata, ñapash tigramujpimi cutin ricuhuanguichi. Cunanga Ñuca Taitapajmanmi rigrini” nijurcami.

17Shina nijpimi Paipaj yachajujpuramanda huaquingunaca cashna nishpa tapurinajurca:

“¿Ima nishpata cashna nijun?: ‘Ashacamanlla caipi cashpa, ñapash rijpimi na ricuhuanguichi. Shinallata, ñapash tigramujpimi cutin ricuhuanguichi. Cunanga Ñuca Taitapajmanmi rigrini’ nijun” ninajurcami.

18Cutimbashmi cashna ninajurca: “¿Ima nishpata: ‘Ashagutallami caipi cani’ nirijun? Pai ima nijujtapash na yacharinllu” ninajurcami.

19Jesusca, Paita tapungapa munanajujta yachashpami cashna nijurca:

“¿Ashacamanlla caipi cashpa, ñapash rijpimi na ricuhuanguichi. Shinallata ñapash tigramujpimi cutin ricuhuanguichi, nishcatachu cangunapura tapuringuichi? 20Napacha llullashpami, cangunataca cashna nijuni: ‘Canguna huacashpa, llaqui llaqui purinajujta ricushpami, cai pachapajtalla rurashpa causajcunaca ninanda cushijunga. Ashtahuangarin, chashna llaqui llaqui cashpapash, ninan cushijuiman tigrana punllacunami chayamunga’ ninimi. 21Vijsayu huarmica, unguna punlla pactajpi nanachishpami ninanda llaquirin. Ashtahuangarin, huahuaguta ungushca jipaca, huahuaguta cai pachapi charishpami, nanachishcataca cungashpa cushijun. 22Shinallatami cangunapajpash, llaqui llaqui cana punllacuna chayamushca. Ashtahuangarin, cangunata ricungapa Ñuca tigramujpimi, tucui shungumandapacha ninanda cushijunajunguichi. Chai cushijuitaca, pipash na anchuchi ushangachu.

23Chai punlla chayamujpimi, na ashtahuan tapuhuanguichi. Napacha llullashpami cangunataca cashna nijuni: Ñuca shutipi, Ñuca Taitata imagutapash mañajpica carangallami. 24Cunangamanmi, Ñuca shutipi imagutapash nara mañanguichi. Canguna ninanda cushijushpa causangapa mañashpaca, japinguichillami.

Cai pachapi ima na alitapash misharcanimi nishcamanda

25Caicunataca, yarichina shimicunahuanmi villajurcani. Yarichina shimicunahuan villajuna punllacunaca ñami tucurina chayamujun. Shina cajpimi, canguna yuyaipi japichun, Ñuca Taitamandaca aligutapacha villajusha. 26Chai punlla chayamujpimi cangunaca, Ñuca shutipi mañanguichi. Cangunamanda Ñuca Taitata mañanataca ñana shuyanachu canguichi. 27Ñuca Taita cachamushcata crishpa, Ñucata juyanajujpimi, Ñuca Taitapash cangunataca ninanda juyajun. 28Ñuca Taitamanda llujshishpami, cai pachaman shamurcani. Cunanga cai pachata saquishpami, Ñuca Taitapajman cutin rigrijuni” nijurcami.

29Shina nijpimi Paipaj yachajujcunaca, cashna ninajurca:

“Cunanga yarichina shimicunataca saquishpami aligutapacha villajungui. 30Cunanga, tucui imatapash yachajpacha cajtaca yachapanchimi. Pipash nara tapujpillata, tucuita yachanguillami. Shina cajpimi, Taita Diosmanda llujshishpa shamushcataca cripanchi” ninajurcami.

31Shina nijpimi Jesusca:

“Cunanga ¿ñachu crihuanguichi? nirca. 32Ricuichi, cangunataca maitapash calpachijpi, caita chaita rina punllacunami ña chayamugrin. Chaica, ñamari pactamurca. Canguna tucuilla Ñucatalla saquishpa rijpipash, na Ñucalla cashachu, Ñuca Taitaca ñucahuanmi canga. 33Canguna, Ñucahuan shujlla tucushpa cushijuita charichunmi caicunataca villajuni. Cai pachapica ninan llaquicunatami apanguichi. Shina cashpapash, Ñucapi crishpami catina canguichi. Ñucami, cai pacha na ali causaitaca ña misharcani” nijurcami.

Currently Selected:

JUAN 16: QVI16

Highlight

Copy