JUAN 2

Caná pueblopi cazarai boda tiyashcatami villajun

1Chaimanda quimsa punlla jipami, Galilea llactapi tiyajuj Caná shuti pueblopica, cazaraipi micui tiyarca.

Jesuspaj mamapash chaipimi carca. 2Chai cazarai micuiman cayashca cajpimi Jesusca, paipaj yachajujcunandi rirca. 3Chaipi vino tucurijpimi, Jesuspaj mamaca:

“Vinoca ña tucurishcamari” nirca.

4Shina nijpi Jesús tigrachishpaca:

“¿Mama, ima nishpata chaitara nihuangui? Ñuca imaguta rurana punllapash nara pactamunllu” nirca.

5Chaipimi Jesuspaj mamaca, chai runacunataca:

“Pai imaguta mandashcata ruranguichilla” nijurca.

6Chaipica, yacuta churangapa rurashca, sucta jatun rumicunami tiyarca. Chai rumicunaca, Diospaj ñaupajpi ama mapa cangapa, judiocuna maillaringapa rurashcami carca. Uchilla funducunamanda yacuta talijpica, ishcai fundu yalita apajmi carca.

7Chaipimi Jesusca: “Chai rumi funducunapi yacuta jundachipaichi” nishpa mandarca. Shina nijpimi chai rumicunapi jundachinajurca.

8Chaipimi paicunataca:

“Ashaguta vishishpa, jatun serviciopajman apaichi” nirca.

Shina nijujpimi vishishpa apanajurca. 9Yacuta vinoman tigrachishcatami, jatun servicioca malirca. Paica, chai vinota maimanda apamushcatapash na yacharcachu. Yacuta vishishpa churajcunallami yacharca. Shina cajpimi, chai servicioca noviota cayachishpa, 10cashna nijurca:

“Tucuicunami callaripica, ali vinotara ufiachun caran. Ña ali ufiashca jipaca, yangalla vinotami caran. Ashtahuangarin, cunangamanmi canga ali vinota charishcanguira” nijurcami.

11Galilea llactapi tiyajuj Caná pueblopimi, pipash na rurai ushanallacunata rurashpa, Jesusca ricuchi callarirca. Imatapash rurai ushaj cashcata ricuchijpimi, Paipaj yachajujcunaca Jesusta crinajurca.

12Chai jipami Jesusca, Paipaj mamandi, huauquicunandi, yachajujcunandi, Capernaúm puebloman urai rinajurca. Paicunaca, huaquin punllatallami chaipica saquirirca.

Diospaj huasita mapayachijcunata, Jesús llujchishpa cachashcamanda

(Mat. 21:12-13; Mar. 11:15-18; Luc. 19:45-46)

13Judiocunapaj pascua punllacuna ña chayamujujpimi, Jesusca Jerusalenman vichai rirca. 14Chaipi cashpami, Diospaj huasi ucupica huagracunata, llamacunata, palomacunata jatunajujta Jesusca ricurca. Shinallata, culquicunata randishpa jatushpa tiyanajujtapashmi ricurca. 15Jesusca, huascacunata azialta rurashpami llamacunata, huagracunata, Diospaj huasi ucumanda tucuillata canllaman astishpa calpachirca. Shinallata, culquita randishpa jatuj runacunapaj culquicunatapash, mezacunatapash shitashpami saquirca. 16Shinallata, palomacunata jatujcunataca:

“Caicunataca, caimanda llujchishpa canllaman apaichi. Ñuca Taitapaj huasitaca, jatushpa tiyana huasitaca na ruranachu canguichi” nijurcami.

17Shinata ricushpami, Paipaj yachajujcunaca: “Cambaj huasita juyaimandami huañungashna cani” nishpa, quilcashca tiyajujta yarinajurca.

18Shina rurajpi judiocuna tapushpaca:

“Cashna rurangapaca, ¿pipash na rurai ushanallacunata rurashpa ricuchigringuichu?” ninajurcami.

19Shina ninajujpimi Jesusca:

“Diosta yarina cai huasitaca, shitashpa ñutuichilla. Quimsa punllahuanga cutin shayachishallami” nijurca.

20Shina nijpimi, judiocunaca cashna ninajurca:

“Chuscu chunga sucta huatacaman rurashpami, Diosta yarina cai huasitaca shayachinajurca. ¿Cutin canga, quimsa punllapilla shayachishalla ninguichu?” ninajurcami.

21Ashtahuangarin Jesusca, Paipaj cuerpomandami shina nijurca. 22Huañushcacunapaj chaupimanda causarijpimi, Paipaj yachajujcunaca Jesús chashna nijushcataca yarinajurca. Chaimandami, Dios quilcachishca Shimipi imata nijujtapash, Jesús imata nishcatapash crinajurca.

Gentecuna imata yarinajujtapash Jesusca yacharcami

23Pascua punllacunapimi Jesusca, Jerusalenbi purijurca. Chaipica, pipash na rurai ushanallacunata rurajta ricushpami ashtaca gentecuna crinajurca. 24Chashna cajpipash, paicuna imashna cajta ali yachashpami, Jesusca paicunataca napacha crirca. 25Runacunapaj shungu imashna cajta ali yachashpami, chai gentecunamanda maijan imata nichumbash na shuyarca.

Currently Selected:

JUAN 2: QVI16

Highlight

Copy