LUCAS 23

Jesustaca, Pilatopaj ñaupajmanmi apashca

(Mat. 27:1-2,11-14; Mar. 15:1-5; Juan 18:28-38)

1Tucuilla chai gentecuna jatarishpaca, Pilatopaj ñaupajmanmi Jesustaca apashpa rinajurca. 2Chaipimi cashna nishpa juchachi callarinajurca:

“Cai runataca, ñucanchi llactapi causajcunata pandata yachachijujtami japircanchi. Shinallata: ‘Roma llactata jatun mandaj Cesarman, impuestotaca na cunachu canguichi. Ñucamari, jatun mandaj Cristo cani’ nijujtami japircanchi” ninajurcami.

3Shina ninajujpimi:

“¿Canllu judiocunata Jatun Mandaj cangui?” nishpa, Pilatoca tapurca.

Shina tapujpica Jesusca:

“Canllata ñamari chashna nijungui” nirca.

4Shina nijpimi Pilatoca:

“Cai runataca, ima na alita rurashcatapash na japinichu” nishpa, mandaj sacerdotecunaman, gentecunaman villarca.

5Shina nijpicarin ashtahuanmi, cashna ni callarinajurca:

“Cai runaca tucui Judea llactapimi shina pandata yachachijurca, Galilea llactamanda callarishpa cai llactacamanmi chashna pandachishpa shamujushca” ninajurcami.

Herodespaj ñaupajmanmi Jesustaca apashca

6“Galilea llactamanda” ninajujta Pilato uyashpami:

“¿Cai runaca, Galilea llactamandachu?” nishpa tapurca.

7Herodes mandajuj llactamanda cajta yachashpami, Jesustaca, paipajman cacharca. Herodespash, chai punllacunapica, Jerusalenpimi carca. 8Herodesca, Jesusta ricushpami, ninandapacha cushijurca. Paica, unaitapachami Jesusta ricungapa munashpa causajurca. Jesusmanda imatapash ashtacata uyashca cashpami, Paica: “Jesús imatapash rurajta ricushami” yashpa shuyajurca. 9Herodesca ninandami imatapash tapujurca. Ashtahuangarin Jesusca, imatapash na tigrachircachu. 10Chaipica, mandaj sacerdotecunapash, mandashca shimita yachachijcunapash, ninandapachami Jesustaca juchachishpa rimanajurca. 11Chaipimi Herodespash, paipaj macanajuj runacunapash Jesustaca, juyailla churajunata churachishpa, yangapi churashpa asinajurca. Chashna rurashpami, Pilatopajman cutin cacharca. 12Chai punllami Pilatohuan, Herodeshuanga cutin ali tucunajurca. Paicunaca, pundaca fiñanajushpami causashca carca.

Jesusca huañunapacha cashcamanda

(Mat. 27:15-26; Mar. 15:6-15; Juan 18:38—19:16)

13Chai jipami, mandaj sacerdotecunatapash, llactata mandajcunatapash, gentecunatapash tandanajuchun, Pilatoca cayachun mandarca. 14Paicunataca cashnami nirca:

“Cangunami cai runataca: ‘Gentecunaman pandata yachachishpami purijun’ nishpa apamurcanguichi. Cangunapash uyajtami cai runata tapuchircani, Ashtahuangarin, canguna juchachishcashna na alita rurashcatapash na tarinichu. 15Shinallata, Herodespash cai runa na alita rurashcataca na tarishpami, ñucapajman cutin tigrachimushca. Ricuichi, cai runaca pai huañuchi tucungapaca, ima na alitapash na rurashcachu. 16Cunanga, astichishpallami cacharigrini” nircami.

17Chai cushijui punllacunapica, shuj prezutami cacharina carca. 18Ashtahuangarin:

“¡Cai runataca huañuchilla, Barrabastami cacharichun munanchi!” nishpami tucuilla gentecuna ninanda caparinajurca.

19Chai Barrabasca, pueblopi macanajuita callarichishcamanda, huañuchishcamandami prezu tiyajurca. 20Pilatoca, Jesusta cacharingapa munashpami, gentecunata cutin tapurca. 21Ashtahuangarin:

“¡Chai runataca cruzpi chacatailla, cruzpi chacatailla!” nishpami, gentecunaca cutin ninanda caparinajurca.

22Shina caparinajujpimi, caihuanga ña quimsacaman tapushpa, Pilatoca cashna nirca:

“¿Cai runaca, ima na alitata rurashcayari? Pai huañuchi tucungapaca, ima na alita rurashcatapash napacha tarinichu. Cunanga, astichishpallami cachagrini” nircami.

23Ashtahuangarin gentecunaca:

“Cruzpi chacataipacha” nishpami ninandapacha caparinajurca. Paicunapash mandaj sacerdotecunapash caparishcahuanmi, Pilatotaca misharca.

24Chaimi Pilatoca, paicuna imata rurangapa mañashcata rurachun saquirca. 25Shina nishpallami, paicuna: “Cacharipai” nishpa mañashca runatara cacharirca. Chai runaca, llactapi macanajuita callarichishcamanda, huañuchishcamandami, prezu tiyajurca. Chaimi Jesustaca paicunapaj maquipi saquirca.

Jesustaca chacatashpami huañuchishca

(Mat. 27:32-56; Mar. 15:21-41; Juan 19:17-30)

26Jesusman cruzta apachishpa rinajushpami, pambamanda tigramujuj Cirene pueblomanda Simón shuti shuj runata tuparirca. Paimanmi, Jesusta catishpa richun cruzta apachinajurca. 27Jesustaca ashtaca gentecunami catishpa rinajurca. Shinallata huarmicunapash huacashpa ninanda llaquirishpami caparishpa catinajurca. 28Ashtahuangarin Jesusca, paicunata tigrarishpa ricushpami cashna nirca:

“Jerusalenbi causaj huarmicuna, Ñucamandaca na huacanachu canguichi. Ashtahuangarin cangunamanda, cangunapaj huahuacunamandami huacana canguichi. 29Ricuichi: ‘huahuata na tarij huarmicunapash, na vijsayuj tucun huarmicunapash, huahuata na chuchuchij huarmicunapash, ninanda cushijunguichi’ ninajuna punllacunami chayamunga. 30Chai punllacuna chayamujpica, urcucunataca: ‘Llapihuaichi’ ninajungami. Lomacunatapash: ‘Pambahuaichi’ ninajungami. 31Verde quirushna causajujtapash cashna llaquichinajushpaca, ¿chaquishca quirushna causajcunatacarin imatashi ruranga?” nircami.

32Jesusta apanajushpaca, na alita ruraj ishcai runacunatapashmi, huañuchingapa apanajurca. 33Uma Tullu shuti lomaman chayashpami, Jesustaca cruzpi chacatanajurca. Chaipimi na alita ruraj runacunatapash, shujtaca aliman, shujtaca lluquiman churashpa chacatanajurca. 34Chashna ruranajujpimi Jesusca, cashna nirca:

“Ñuca Taitalla, perdonapailla na yachaimandami cashna ruranajun” nirca.

Macanajuj runacunaca, pipaj urmajta yachangapa rurashpami, Jesuspaj churajunataca paicunapura chaupirinajurca. 35Gentecunaca, ricushpallami shayanajurca. Llactata mandajcunapash, Jesustaca asishpa ricushpami cashna ninajurca:

“Shujcunataca quishpichircallami. Taita Dios agllashca Cristo cashpaca, Paillata quishpiri ushanmanmi” ninajurcami.

36Macanajuj runacunapash, Jesustaca na ali shimicunata rimashpami, quimirishpa vinagreta ricuchinajurca. 37Chashna rurashpami:

“Judiocunata jatun Mandaj cashpaca, Canllata quishpiriyari” ninajurca.

38Jesús chacatariyajuj caspi jahuapipash: Griego, latín, hebreo rimaicunapi quilcashcami tiyajurca, chaipica: “CAICA, JUDIOCUNATA JATUN MANDAJMI” nijurcami. 39Chacatai tucushcapuramanda na alita ruraj shuj runaca, Jesusta ninanda na alicachishpami cashna nirca:

“Canga, Cristo cashpaca, Canllata quishpirishpa, ñucanchitapash quishpichiyari” nircami.

40Shina nijpimi caishuj runaca, jarcashpa rimashpa cashna nirca:

“Llaquita cashna ninanda apajushpapash. Taita Diostaca, ¿nachu canga manllangui? 41Ñucanchica na alita rurashcamanda, ninanda llaquita apanapacha cashpami, cashna llaquichi tucunajunchi. Ashtahuangarin paica, ima na alitapash na rurashcachu” nircami.

42Shina nishpallami Jesustaca:

“Can mandangapa shamushpaca, Ñucataca yarihuangui” nirca.

43Shina nijpimi Jesusca, chai runataca cashna nirca:

“Na llullashpami candaca cashna nini: Cunanllatami, paraisopi Ñucahuan cangui” nirca.

44Chaupi punllashna canamandaca, chishi quimsa pachacamanmi, tucui cai pachaca yana yana tucurca. 45Indipash yanayarcami. Diospaj huasi ucupi huarcushca jatun fachapash, chaupipimi liquirirca. 46Chai jipaca Jesusca, ninanda caparishpami:

“Ñuca Taitalla, Cambaj maquipimi, Ñuca espiritutaca mingapani” nirca.

Shina nishpalla huañurcallami. 47Chashna tucujujta patsaj macanajuj runacunata mandaj ricushpaca, Taita Diosta ninanda alicachishpami:

“Cai runaguca, alitalla rurajpachami cashca” nirca.

48Chaipi ricunajushca tucuilla gentecunapash, chashna tucujujta ricushpaca, ninanda llaquirishpa pechotapash huajtarishpami tigranajurca. 49Ashtahuangarin, Jesusta tucui rijsijcunapash, Galilea llactamandapacha Paita catishpa shamushca huarmicunapash, chashna tucuntaca carumandallami ricushpa shayanajurca.

Jesusta pambashcamanda

(Mat. 27:57-61; Mar. 15:42-47; Juan 19:38-42)

50Judeapi tiyaj Arimatea pueblomanda Josepashmi chaipi carca. Paica, ali runagu cashpami, alitalla rurashpa causajurca. Paica, mandajpuralla tandanajujpurami carca. 51Paipash, Taita Dios mandajpi causanatami shuyajurca. Joseca, paicunalla parlarishpa na alita rurajcuna cajpimi, na alicachijurca. 52Paimi, Pilatopajman rishpa, Jesús huañushcata pambangapa mañarca. 53Paica, Jesús huañushcata uriajuchishpami, jatun fachahuan pilluchishpa, jaca rumipi rurashca utujupi churarca. Chaipica, pitapash nara pambashcachu carca. 54Chai punllapica, samana punlla chayajujpimi, tucuita alichina carca. 55Galilea llactamandapacha Jesusta catishpa shamushca huarmicunapashmi, Jesús huañushcata apajujpica, catishpa rinajurca. Paicunami, Jesús huañushcata maijan utujupi churantapash ricunajurca. 56Paicuna chaimanda tigrashpaca, mishquillagu ashnajun jambicunatapash, aceitetapash aliguta alichishpallami, mandashca shimipi nijujshna samana punllapica samanajurca.

Currently Selected:

LUCAS 23: QVI16

Highlight

Copy