Lukas 7
7
I Kotua do Soujor Minokilingos di Yisus di Turiponjo
(Mat. 8:5-13)
1Om koopod nopo dii i Yisus monuduk kasangkat diri di tongotulun, om ongoino dii Isido siri Bandar Kaparnaum. 2Om kivaro dii iso kotua do soujor siri do mantad Vonuvo Ruum, do kivaro iso turiponjo di au marong kojuuanjo. Om toruolono dii ino turiponjo gosob sipapataino daa. 3Om korongou nopo dii i kotua do soujor do abar pasal di Yisus, om suuono dii disido iri tongomoloingon di tulun do Joudi mongoi si di Yisus do mitangar do, “Poongoiopo i Yisus siti dogo do mokilingos oku di turiponku,” ka. 4Om ongoino dii iolo, om korikot siri di Yisus, om pokitulungno marong iolo do kadiolo, “Tuan, apatutno marong do tulungonNu i kotua do soujor dino, 5do isido nopo nga au kojuu do bansa tokou, om isidono mongungkus do pamaal do valai sasambayanganja,” kadi tongomoloingon. 6Om vaja dii i Yisus diolo.
Nga minsosomokno dii Isido di valai, om ponuu i kotua do soujor di tongosongkoruanganjo do mongoi mitangar di Yisus do ka, “ ‘Tuan, apagonKopo mindakod si valaiku, do okukuvaan oku dii poindakod Dika 7do okonko kotumi oku di kuasaNu, om ioku kondiri nga au kobulun do mongoi rumomut Dika. Nga tangaroi supaya olingasan ilo susuuonku. 8Oilaanku do kivaro kuasaNu, do ioku nopo diti nga kivaro monguasa dogon. Om ioku diti nogi nga kivaro soujor do kuasawonku. Om onuu nopo ponuuanku diolo ongoion nopo iri isuuku. Nong “Ongoipo soi,” kangku di kotiso, isido pun mongoi. “Ongoipo siti,” kangku di koduvo, isido pun rumikot. Irad nogi dino i turiponku, onuu nopo ipavaalku disido nga vaalon,’ kadi kotua di soujor,” kadi koruangjo popoilo di Yisus.
9Om oirananno dii marong i Yisus do nokorongou di tinangar mantad di kotua do soujor, om oilaanJo do aparsaya Disido. Om kovilino Isido di tulun toguu do samvaja-vaja Disido, om pitangar do, “PatangaronKu marong dikovu iti, insan tulunpo do Israil nga aupo insan Oku korongou do kivaro kaparsayaan do irad dino kagajo,” kadi Yisus. 10Nga kouli dii siri valai i sinuuan di kotua do soujor, nga naantangan dii diolo i turipon do napangkauno dii.
Minomijau i Yisus di Tomulok do Napatai
11Om au alaid mantad diri, om pampanauno dii i Yisus do mongoi siri bandar, ngaran do Nain. Om vajano dii i tongotulun di Yisus om i kinoguuan do tulun nga samvaja-vaja nogi Disido. 12Nga di koinsomok nopo Isido di pintu do bandar diri, om kasamung dii Isido di tongotulun mangakat di tulun napatai do lumabus nogi siri pintu diri do mongoi mongolobong. Iri nopo i napatai dii nga tanak kusai tunggal om iinojo nga napatajan do savo. Om oguu dii i tongotulun do mantad siri bandar diri do samvaja-vaja diinojo di tanak napatai. 13Om koontong dii i Tuhan di tongondu diri, om osianan marong Isido, om pitangar do, “Abu, ada pogiad,” ka.
14Om insomokno dii Isido, om kamawono dii iri sarasai,#7:14 sarasai: piniompujungan ko irad do surungon om indadano dii iri tulun minonimban. Om pitangarno dii i Yisus di napatai do ka, “Tomulok,#7:14 Tomulok: Vavajoi tungagno!” ka. 15Om pogtangar di Yisus tungagno dii i napatai, om ogomno dii, om timpuunno dii isido kumituturan. Nga pitangarno dii i Yisus diinojo do, “Ongoiono iti tanaknu!” ka.
16Om korosijaino dii kasaangkat i tongotulun mivaja do mangarajou do Kinoringan do ka, “Nokoimbulaino dii siti daton#7:16 daton: ditokou iri iso nabi i kikuasa,” ka, om “Nipoontongno di Kinoringan iri kosiananJo si di bansaJo,” kadi tulun. 17Om kotongkop nopo dii iri abar di kosunduvan di Yisus gosob siri Vonuvo Yudia om kasangkat do kawasan di misoliput do vonuvo diri.
Monuu i Yaya Mamamatis#7:18 Mamamatis: Momomonsu Mongoduat di Yisus
(Mat. 11:2-19)
18Om karangaai dii di tongotulun di Yaya diri kosunduvan di Yisus om porongoo dii diolo i Yaya. Om loovono di Yaya i duvo tulunjo, 19om suuono disido iolo do mongoi mongoduat di Tuhan do ka, “Oinomod do Ikano i rumikot mantad si di Kinoringan iri sinoritaku, ko kivaropo andadon tokou do sondiang,” kadi Yaya.
20Om pampanauno dii iolo mongoi siri di Yisus, om pitangarno dii iolo di Yisus do, “Sinuu ikoi di Yaya Mamamatis#7:20 Mamamatis: Momomonsu do mongoi mongoduat Dika nong oinomod do, ‘Ikano i rumikot mantad si di Kinoringan iri sinoritaku, ko kivaropo andadon tokou do sondiang,’ kadi Yaya,” kadiolo.
21Nga ontok nopo diri om oguu i tulun do noigitan do moisosondiang toruol, om moisosondiang kasansaraan, om i norosukan do rogon do nolingasan di Yisus, om oguu nogi i tulun do bolou pinoontong Disido. 22Om jawapno i Yisus di tulun sinuu di Yaya do, “Ulino om abaraino i Yaya do onuu nopo iri naantangan om i norongou muju do, ‘ “Irino tulun bolou nga koontong, om iri tulun mimpo-kimpo mampanau nga lalais mampanau, om iri tulun di rumanai i kojuvanjo nga olingasan, om iri tulun bongolon nga korongou, om iri tulun napatai nga ovijau kavagu, om iri tulun miskin nogi nga aabaran diri Abar do Aandai. 23Ososogitno i tulun diri au opiduvo ginavo do aparsaya do Iokuno sinuu di Kinoringan rumikot siti,” kadi Tuhan,’ kanto nono di Yaya,” kadi Yisus.
24Om kapanau nopo dii i tulun diri sinuu di Yaya, om timpuunno dii i Yisus monuturan di tongotulun toguu iri koongongoio di Yaya si padang do kovotuvan do ka, “Onu i naantangan muju di ongoi kou mongontong di Yaya soi padang do kovotuvan? Mongontong kou naku di barau#7:24 barau: porupu miajub-ajub do osorupan? Okoni, kon! 25Ko onu iri inongoi muju antangai silo? Mongontong kou naku di tulun diri aandai i pakaian? Nga tulun nopo di aandai i pakaian om moginakanon do auso gosob nga siri valai do raja ijonon. 26Nga poiloo Okuno dikovu nong onu iri inongoi muju antangai silo. Minongontong kou di nabi, i popolombus di tinangaran do Kinoringan? Oinomod ino, do poiloonKu ikovu do i Yaya nopo nga okoniko nabi noopo, nga kipangkat isido mantad di tongonabi vokon. 27Do i Yayano iri komoion di nokotulis siri Kitab do, ‘Kadi Kinoringan,
“Antangaino, monuu Oku di susuuonKu
do poguluvononKu mantad Dika.
Om isidono i monginavau laaid di ralan do vajaanNu,”
kadi Kinoringan,’ kadi tangar siri Kitab.#Antangai Malaki 3:1.
28Itino tangaronKu dikovu do i Yayano i tulun do agajo pangkat mantad di kasangkat di tongotulun di nosusu siti saralom vonuvo. Nga insan irad dino, ii nogi tulun di aparsaya Dogo di osuribak pangkat si Kopomorintaan di Kinoringan, ii nogi agajo pangkat mantad di Yaya,” kadi Yisus.
29Om kasangkat di tongotulun om i momumumpung do sukai diri mongkinongou di tangar di Yisus nga mongintutun do aandai i gaagaya do Kinoringan. Do iolo nopo nga maja diri kouvangan do Kinoringan do minokibatis di Yaya. 30Nga ii nopo kumpulan Porisi om i guru do Undang-undang Ugama do Joudi nga minangada diri kouvangan do Kinoringan sabap iolono au uvang mokibatis di Yaya.
31Om kadii di Yisus kavagu, “Onu naku poiradanKu diti tongotulun do maino? 32Oinomodno do iolo nopo nga koirad-irad do tongotangaanak do songingogom moikukuyaug siri tomu do moiloou-loou do ka,
‘Mitogunggu#7:32 Mitogunggu: Monuntung ko mituntung ikoi nga aui magalai kou,
om moginupus ikoi nga au kovi mogiad!’ ka.
33Do korikot nopo i Yaya Mamamatis#7:33 Mamamatis: Momomonsu siti dikovu, nga au mangakan om mongiup di vaig do anggur do mogpuasa. Nga tangaron muju nogi do, ‘Rinosukan isido do rogon,’ kamuju. 34Nga korikot Oku nopo dii, i Sinumiliu do Tulun, om Ioku nopo diti nga mangakani om mongiupi om mitangar kou dino Dogo do, ‘Antangaipo dii Isido anakan#7:34 anakan: alagak ko osisil ko orusuk om moginovukan nopo om kumoruang nogi dilo tongotulun momumumpung do sukai om tulun di kiduso!’ kamuju. 35Nga insan pun irad dino tangar muju, sabap mantad diri gaagaya do aandai nga oilaani di tongotulun do oinomod i kopintaro di Kinoringan,” kadi Yisus.
Tinuntugan i Takod di Yisus do Lana di Aangod
36Kivaro iso tulun Porisi do minongoloou di Yisus do mangakan soi valaijo. Om pampanauno i Yisus mongoi si valai disido om asuno siri saralom om urukno dii Isido mangakan. 37Om kampung nopo diri nga kivaro iso tongondu iri araat marong gaagaya disido. Om karangaai nopo dii di tongondu do nokoongoi mangakan i Yisus siri valai di tulun Porisi om pongovitno dii isido di sombutul di vinaal mantad bolinanaan, i noponu do lana di aangod marong. 38Om ingkakatno dii i tongondu siri likud di Yisus si somok takodJo do miad-iad, om noiopos diri i takod di Yisus do noturuan di romoujo, om piidono dii di tobukjo i takod#7:38 Koubasan nopo do tulun di pogulu ontok do mangakan nga mili-kili (modop-odop) si toogomon do alanggau misoliput di mija, irino dii do asanang i tongondu momiid di takod di Yisus. di Yisus. Om siumojo om potuntugojo nogi dii siri takod di Yisus i lana di aangod.
39Nga kaantangai nopo dii di tulun Porisi, i minongoloou di Yisus, do irad diri om kadi ginavojo, “Nong oinomod do nabi tulun diti om tantu do oilaan Disido ilo tongondu, om gaagaya disido,” ka.
40Nga noilaan di Yisus diri ginavo di tulun Porisi, om tangarono Disido do ka, “Simun, kivaro tangaronKu dika,” ka.
Om jawapno isido, “Onu daa iri, Guru?” ka.
41Nga pitangarno i Yisus, “Kivaro duvo tulun do kitutang siri di pangangalasan do siin. Nga iri nopo iso tulun om minongutang do limo naatus pirok, om iri nopo koduvo tulun om limoi nopulu pirok inutangjo. 42Nga nuka do miirad iolo do auso pamayar di tutang, jadi au dii mokibayar i tulun di pinangalasan do siin. Jadi nong ika minsoromo isaino tulun di lobi au kojuu diri tulun di pinangalasan do siin?” kadi Yisus.
43Nga kadi Simun, “Nong ioku, irino tulun di noompunan do tutang toguu,” kadi Simun.
Jawapai di Yisus isido, “Oinomod kono dino,” ka.
44Om kovilijono dii di Yisus i tongondu, om pitangarno dii di Simun do, “Koontongkoi diti tondu? Nokorikot Okui siti valainu, nga aui inonuan Oku dika do vaig pongugas do takodKu, nga ilo nopo tongondu om minongugas diti takodKu do romoujo, om piido dii dilo tobukjo. 45Om ika nopo nga au minonium Dogo tanda do ourumatko Dogo di korikot Oku. Tapi ilo nopo tongondu nga au marong tumingkod monium diti takodKu mantad di nakaasu Oku siti. 46Om ika nopo nga au minongumau diti tuluKu do lana, nga ilo nopo tongondu om minonuntug diti takodKu do lana di aangod. 47Om sabap diri do mitangar Oku dika do irino tanda do nipoontong disido do au marong isido kojuu Dogo, do songkuro koguu diri dusojo pun nga noompunani. Nga tulun nopo di okuyak i dusojo noompunan nga au songkuro isido au kojuu di Kinoringan,” kadi Yisus.
48Om pitangar nogi dii Isido di tongondu do, “Noompunanno ino dusonu maino,” ka.
49Nga poitatangarno dii i tongotulun di songurukan di Yisus do, “Isai naku tulun diti do obuli nogi mangampun do duso?” ka.
50Om pitangarno kavagu i Yisus di tongondu do ka, “Nokovijau nopo dika nga i kaparsayaannu. Nga ulino pogi, om antatangai,” ka.
Currently Selected:
Lukas 7: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
