Génesis 34
34
Ac'bot stoj Siquem te la yuts'in Dina
1Te yantsil-nich'an Jacob te Dina sbiil te yantsil-al Lea, ba yula'tay te yantsilelic te mach'atic nainemic tey a. 2Te Hamor te heveo-winic te jtsobwanej ta slumal, ay snich'an Siquem sbiil te la yil te ach'ixe. La stsac, way soc, jich la yuts'in. 3Te Siquem la smulan te Dina, la sc'an te ya yic' sba soc, lec la sc'opon. 4Soc la yalbey te state ja' te Hamor:
—Ja' x'ac'anbon te ach'ixe, co'tan ya xnujbinon soc —xi'.
5La yaiy stojol te Jacob te laj ta uts'inel te Dina te yantsil-nich'ane, ma'yuc bi la yal, yu'un ma ba nacal te snich'nabe, q'uejel baemic ta yilel xchamsbalamic a. Ja' to c'alal julic tel la yalbey yaiyic. 6Ja'uc me to, te Hamor te stat Siquem tal sc'opon te Jacob.
7Te c'alal talic te snich'nab Jacob, la yaiyic stojol ta ora. Bayal la smel yo'tanic soc bayal ilinic yu'un, melel bolob sc'oplal Israel yu'un te bit'il way soc te yantsil-nich'an Jacob te Siquem, melel ma lecuc te jich la spase.
8Te Hamor la sc'opon te snich'nab Jacob:
—Toyol yo'tan te jnich'an Siquem te ja'uc ya yic' sba soc te awijts'in-ach'ixe. Wocoluc jiche, ac'bon yinamin a. 9Soc ja' lec ya cac'bey jbajtic cantsileltic. 10Soc nainanic ta coliltic, chican banti ya amulan te q'uinale. Nainanic li'to, at'ejanic soc manaic ta bay ya amulanic te q'uinale —xi'.
11Ja' nix te Siquem la yalbey te stat te Dina soc te xi'leltaque:
—Teme ya ac'uxtayone, chican te bila ya ac'anbon, ya cac'bat spisil. 12Jayebuc te bila ya ac'anbonique, soc jayeb xan majt'aniletic, ja' ay sc'oplal ta co'tan te ya awac'bon quinamin te ach'ixe —xi'.
13Ja'uc me to, te snich'nab Jacob la slo'layic ta c'op te Siquem soc te Hamor, melel ja' ilinic yu'un te la yuts'inbeyix te yijts'in-ach'ixe, ja' te Dina. 14Jich yu'un la yalbeyic:
—Ma xju' ya cac'bat te bit'il ma ba awich'oj circuncisión te ja'ate, yu'un ma lecuc ya caiytic te jo'otique. 15Pero ya xju' ya jc'uxtayticat teme ya ach'uunbotic te bila ya caltique: te jayeb winiquexe ya me awich'ic circuncisión. 16Jich to me ya xju' ya awic'botic te cantsileltique, soc jich to me ya xju' ya quic' jbajtic soc te awantsilelique. Jich me ya xnainotic ta awolilic, soc jun me ya xc'ootic. 17Yan teme ma x'ac'an ach'uunic te ya awich'ic circuncisione, ya me quic' bael te quijts'in-ach'ixe, ya me xbootic soc —xi'.
18Te Siquem soc te state lec c'ot ta yo'tanic te bila albotique. 19Te querem ora la xch'uun, melel toyol yo'tan yu'un te ya yic' sba soc te yantsil-nich'an Jacob. Ich'bil ta muc' stuquel, c'ax jich te bit'il mach'a jayeb ay ta sna te state, 20jich yu'un te Hamor soc te Siquem la stejc'an sbaic ta yochibal sts'ajc'ul te lume, la sc'oponic te yajwal te slumalique, jich la yalbeyic:
21—Lec yo'tanic te mach'atic q'uejel talemic. Ja' lec ya cac'tic xnainic li'to, soc ac'a at'ejuquic, melel muc' te q'uinale. Soc ja' lec ya quic' jbajtic soc te yantsilelique, soc ja' lec ac'a yic' sbaic soc te cantsileltique. 22Ja'uc me to, ja' to ya xch'uunic te jun ya xc'ootic soc teme ya quich'tic circuncisión jo'otic te jayeb winicotique, jich bit'il yich'ojic circuncisión stuquelic. 23Cu'untic ya xc'ot te jayeb xchamsbalamic soc te jayeb sc'ulejalic soc jayeb te bila ay yu'unic. Jich yu'un ja' lec ya jchap jc'optic soc, jich me ya xnainic ta coliltic —xiic.
24Spisil te mach'atic jich ya'wilal te ya xtuun ta soldadoile la xch'uunbeyic sc'op te Hamor soc te Siquem, la xch'uunic yich'el circuncisión ta spisilic. 25Yoxebal c'aal yich'belic circuncisión a, ja' yorail c'ajc'uben a te yejch'enique, ochic ta lum te cheb snich'nab Jacob, ja' te Simeón soc te Leví, te xi'leltac te Dina. Chapalic tel soc spuñalic, jun yo'tan la yochintayic te lume, la smilic spisil te winiquetique. 26La smilic ta puñal te Hamor soc te Siquem. La yiq'uic loq'uel ta sna Siquem te Dina, bajt'ic soc. 27Spisil te snich'nab Jacob tal yich'beyic bael spisil sbiluc te mach'atic lajemique, jc'axel la sjinic jilel te lume, ja' ta scaj te laj ta uts'inel te yijts'in-ach'ixe. 28La yic'beyic bael spisil te xchijic, te swacaxic, te sburroic, soc spisil te bila ay ta slumalic soc spisil te bila ay ta sq'uinalique. 29Soc la yich'beyic bael spisil te sc'ulejalic te ay ta snaic, soc la yic'beyic bael te yal-snich'anic soc te yinamique. 30Te Jacob la yalbey te Simeón soc te Leví:
—Ja'ex ta awentaic te bit'il ya me slab-o'tantayoniquix spisil te cananeoetic soc te ferezeoetic te nainemic li' ta q'uinal to. Te bit'il ma ba tsobolon te jo'one, ya me stsob sbaic tel xtal smilonic, jich ya xlajon soc spisil mach'a ay cu'un —xi'.
31Ja'uc me to la yalic:
—¿Yu'un bal ma amenuc te bit'il la yuts'inbotic te quijts'in-ach'ixtic jichuc jtul jmulawil ants? —xiic yu'un.
Currently Selected:
Génesis 34: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
