Génesis 35
35
Jacob ac'bot bendición ta Betel
1C'oponot yan buelta yu'un Dios te Jacob:
—Jajch'an, beenan, moan bael ta Betel, nainan tey a. Tey me ya xc'o apas scajtijib ta chiq'uel jmajt'an a ta bay la cac' jba ta ilel ta atojol te jo'on Dioson, te c'alal loc'at ta anel ta stojol te abanquil Esaú#Gn 28.11-17. —xi' sc'oplal.
2Jich te Jacob la spas ta mandal mach'a jayeb ay ta sna soc te mach'a jayeb sjoineje:
—Ch'ojaic loq'uel te jayeb bitic acuyojic ta Dios te awich'ojique, soc poca abaic, lapa yan ac'u'ic. 3Jajch'ucotic ta beel ta ora, conic ta Betel. Tey me ya xc'o jpasbey scajtijib ta chiq'uel smajt'an Dios a te bit'il la scoltayon c'alal ayon ta wocole, soc la sjoinon te bayuc beenone —xi'.
4Jich yu'un la stsobic te bitic scuyojic ta Dios te yich'ojic, soc te staq'uinal xchiquinique. Te Jacob la smuc jilel ta lum ta yet'al jijte' ay ta nopol lum Siquem. 5Jajch'ic ta beel. Te jaychajp lum ta banti ayique, ma ba nutsotic yu'un, melel ac'bot xiwel ta yo'tanic yu'un Dios, jich ma ba nutsotic.
6Te Jacob soc spisil te mach'atic sjoineje, c'otic ta lum Luz te ay ta sq'uinal Canaán, te Betel yan sbiile. 7Tey c'o spasbey scajtijib ta chiq'uel milbil smajt'an a te Diose. El-betel sbiil c'ot yu'un te q'uinal te bit'il Dios la yac' sba ta ilel ta stojol tey a, te c'alal loq'uem tel ta anel ta stojol sbanquil a. 8Tey laj a te Débora sbiil, te wentainot yu'un c'alal to ta yalalil te Rebeca. La smuquic ta yet'al jijte' ta nopol Betel. Te Jacob la yac'bey sbiil: “Jijte' swenta oq'uel”, xi'.
9Te Dios la yac' sba ta ilel yan buelta ta stojol te Jacob te bit'il sujt'emix tel ta Padan-aram, soc la yac'bey bendición. 10Jich la yalbey:
—Jacob ta neelal te abiile, ja'uc me to ma jichuquix; Israel xi' abiil ya xc'otix#Gn 32.28. —xi'.
Te c'alal jelbilix sbiil a te Jacob, 11Dios la yalbey xan:
—Jo'on Dioson te Spisil ya xju' cu'une; esmajan, ayuc me bayal ats'umbal. Muc'ul nación ya xc'oat, bayal me ta jpam lum ya xc'oat ta loq'uel a, bayal ta jtul ajwaliletic ya xloc' a te ats'umbale.
12“Te q'uinal la cac'bey sq'uinalin te Abraham soc te Isaac, ja'at me ya cac'batix aq'uinalin, soc ja' me ya cac'bey sq'uinalin te ats'umbal ta patil baele#Gn 17.4-8. —xi' sc'oplal.
13C'alal laj yo'tan ta c'op soc Dios te Jacobe, bajt' te Diose. 14Jich yu'un te Jacob la stejc'an balal ton ta bay c'oponot yu'un te Diose. La smalbey vino soc aceite ta sba ta swenta xch'ultesel. 15Te banti c'oponot yu'un Dios te Jacob, Betel sbiil c'ot yu'un.#Gn 28.18-19.
Laj Raquel
16Loq'uic bael ta Betel, ay to sc'an te ya xc'otic ta Efrata a te jajch' bayal swocol yu'un alajel te Raquel. 17Te bit'il bayal yac ta woclajel, albot yu'un te mach'a yac ta scanantayele:
—Ma xamel awo'tan, yan querem la awalatayix —xi'. 18C'alal nopol ya xlajix a te Raquel, la slebey jilel sbiil te yale: Benoni sbiil la yac'bey jilel. Yan te state, Benjamín sbiil la yac'bey stuquel.
19Jich laj te Raquel. La smuquic ta bay sbelal Efrata, ja' te Belén. 20Te Jacob la stejc'an jilel balal ton ta smuquenal te Raquel, asta ora yo'tic to tey teq'uel a.
21Been bael te Israel, c'o stejc'an snailpac' ta bay xjejch'elul te toyol balal ts'ajc' Edar sbiile. 22Jalaj ta nainel tey a te Israele. Jich yorail bajt' Rubén ta wayel soc te ants yic'oj yinamin stat, te Bilhá sbiile. La yaiy stojol te Israel, jich bayal ilin yu'un.
Snich'nab Jacob
(1 Cr 2.1-2)
Ay lajchayeb snich'nab te Jacob. 23Te yalatac te Lea: Rubén te sba snich'an, soc Simeón, Leví, Judá, Isacar soc Zabulón. 24Te yalatac te Raquel: José soc Benjamín. 25Te yalatac te Bilhá te scriada Raquel: Dan soc Neftalí. 26Te yalatac te Zilpa, te scriada Lea: Gad soc Aser. Ja' snich'nab Jacob te ayinic ta Padan-aram.
Laj Isaac
27Te Jacob ba yil te Isaac, ja' te state, te ay ta Mamre, te lum te ja' nix sbiilinej Arba soc Hebrón. Tey nix nain te Abraham soc te Isaac.#Gn 13.18. 28Te Isaac balunwinic (180) ya'wilal a te laje. 29Mamalix ta lec a, ac'bot najt' yorail yu'un Dios, ba sjoin te mach'atic neel lajemic yu'une. La yich' muquel yu'un te snich'nabe, ja' te Esaú soc te Jacobe.
Currently Selected:
Génesis 35: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
