Zwz Nduq 24
24
Puj Koij Yaqboahlazhanq Cha Goanz Hoak Mez Yitsaeg
1Zwz naeh, Yaqboahlazhanq haeuz baenz puj jeq, dix daengz zohgoanz hoak gaeng dij Sen goj gumx dix. 2Dix daj puj koij dix, goanz ndaej to'bi nyeuz daengzle, goanz saeh dix gvanx za'hoq daj kaeujpyaek dix naeh, hax: "Gannaeh mawz aeu mungz mawz nyaengx dawj ka'boaj gux, zoq zawh 3gux hawj mawz yuq doqnaj Yez'hoahhuah dij Sen ndaw fax daj dihndin naeh daj gux haxgoak daekgoanq, mawz saeh lug zaiz gux cha mez zwzrawz, hoakrawz goj laek raep puj nyingz Zaznanh dih raeuz yuq gannaeh, hawj dix hoak mez. 4Saeh gux dauh mwz goakrownz gux cha lug bihnongx gux goanz ux, hoak mijmez Yitsaeg." 5Gaj goanz puj koij dix hax: "Jixzawh goanz nyingz naeh mboq venq ni rownz dix daj gux zaemh daeuj inxnaeh, gux hoak rawz hoak mawj? Hawj gux zowz lug zaiz mawz daeuq dauh mwz goakrownz mawz zux baenz mah?" 6Yaqboahlazhanq yaeng: "Mboq baenz oah, mboq baenz oah! Mawz laek zowz lug zaiz gux dauh mwz dih naeh. 7Yez'hoahhuah, dij Sen ndaw fax naeh, hawj gux ni bihnongx gux, ni dih goakrownz gux. Dix ndaej daj gux haxgoak daekgoanq, dix hax dix aeu dih inxnaeh hawj luglan gux. Dij Sen rux nemz bin dix mwz daekgoanq mawz, hawj mawz yuq dih naeh saeh lug zaiz gux raep goanz mijmez ux. 8Jixzawh goanz nyingz naeh mboq venq daj mawz zaemh daeuj, goj mboq zawh gvaiq mawz, yaq gaenq gux hawj mawz daj gux haxgoak daekgoanq naeh daj mawz goj mboq miz gaeng gah. Gaj mawz hoak rawz goj laek zowz lug zaiz gux dauh mwz dih naeh oaj." 9Yaq goanz puj koij Yaqboahlazhanq zoq aeu mungz dix nyaengx dawj ka'boaj zaeuj dix Yaqboahlazhanq, hoakzaq Yaqboahlazhanq saengq dix naeh haxgoak daekgoanq.
10Goanz puj koij naeh aeu loahtoah zaeuj dix Yaqboahlazhanq maz sip do, dah za'hoq zaeuj dix Yaqboahlazhanq gaj gaenq ndae gangq, mwz Maexsoahbuqdahmixyaq, mwz taeng dih aen chaenh Nahhowh ndowj naeh. 11Sowh gau tang'vaenz zaekgaj doak naeh, sowh gau naeh zawh sowh gau puj nyingz daeuj daek naemx naeh, goanz puj koij naeh zoq hawj loahtoah yuq dih aen mboq yuq haenz chaenh naeh ced. 12Dix hoakzaqnaeh vanz dij Sen: "Yez'hoahhuah, dij Sen zaeuj gux Yaqboahlazhanq aj, vanz mawz zaemh nwh laeng zaeuj gux Yaqboahlazhanq, hawj sowh gaenq gux daz hoak naeh hoak baenz ndaej. 13Gux gannaeh in yuq haenz mboq, puj nyingz ndaw chaenh og daeuj inxnaeh daek naemx. 14Gux daj paenqdix goanz ux hax: ‘Aeu doangj naemx mawz nyaengx daeuj, yaq aeu naemx hawj gux dex ndut i ux gaz.’ Jixzawh dix hax: ‘Awh, mawz ndut mah. Ndut gah, gux bae daek naemx hawj loahtoah mawz ndut ndoij.’ Gux ngwz goanz nyingz naeh zawh goanz mawz lowg nyaengxtaj hawj puj koij mawz Yitsaeg hoak mez. Hoakzaqnaeh gux zoq ruxndeq mawz nwh laeng zaeuj gux eh." 15Dix naengz hax mboq nauq, lez, Liqbowhzaz haeuz daeuj henz mboq, rongzmbaq mbeg ka doangj ux. Gaenq dix zawh lug nyingz Pihtuxliq, Pihtuxliq zawh lug zaiz Nahhowh daj Mihzaz naeh. Nahhowh zawh nongx zaiz Yaqboahlazhanq.
16 Liqbowhzaz zawh ndiq saureauh ux najta yawz taeuq. Dix naengz mboq baenzrownz, naengz mboq sanz daj puj zaiz gawz zaemhnoanz. Dix loangz daeuj henz mboq, aeu doangj dix laep naemx daem zoq kwnj maz. 17Goanz puj koij naeh lenh bae doqnaj dix, daj dix hax: "Vanz mawz aeu naemx ndaw doangj mawz hawj gux dex ndut i ux gaz." 18Dix hax: "Zaeuj aj, mawz ndut mah!" Dix cenq aeu doangj naemx rongzmbaq dix naeh nyaengx daeuj ndaw mungz, hawj goanz puj koij naeh ndut. 19Goanz puj koij naeh ndut imq, Liqbowhzaz hax: "Gux daek naemx hawj loahtoah mawz ndut ndoij, hawj paenqdix ndut imq dwngq." 20Dix cenq aeu naemx ndaw doangj zoaj bae ndaw rangz naemx, yaq daeuq lenh bae ndaw mboq daek naemx. Hoakzaqnaeh dix hawj daengzle loahtoah ndut imq nauq. 21Gau Liqbowhzaz daek naemx naeh, goanz puj koij naeh yumq jem daengzhwx, gaeng goj mboq hax, zawx ruxndeq Yez'hoahhuah hawj sowh gaenq dix daz hoak naeh hoak baenz ndaej mbaeuq.
22 Loahtoah ndut imq yaq, puj koij Yaqboahlazhanq zoq aeu goangh jim ux daj aeu guh koanq jim ux hawj Liqbowhzaz. Goangh jim naeh naek mbengj cowxkowhlowh ux, guh koanq jim naeh naek sip cowxkowhlowh. 23Puj koij Yaqboahlazhanq cham dix: "Mawz haxdoq gux, dez mawz zawh gawz? Rownz dez mawz miz dih hawj piu ndowj mbaeuq?" 24Dix yaeng: "Dez gux zawh Pihtuxliq. Yeh gux zawh Nahhowh, naiz gux zawh Mihzaz." 25Liqbowhzaz daeuq hax: "Rownz gux miz dih hawj su ndowj, miz dih hawj loahtoah ced, gaenq hawj loahtoah jin goj miz lai." 26Yaq puj koij Yaqboahlazhanq gvih bae dihndin biangz Yez'hoahhuah. 27Dix hax: "Biangz Yez'hoahhuah, dij Sen zaeuj gux Yaqboahlazhanq, dix zwzrawz goj nwh laeng zaeuj gux Yaqboahlazhanq, dix ndaej daj zaeuj gux hax rawz dix zoq hoakrawz. Zawh dix yuq ka loh lingz gux, hawj gux maz taeng rownz bihnongx zaeuj gux."
28Ndiq naeh lenh mwz rownz, haxdoq meh dix daj dij goanz ndaw rownz dix. 29-30Liqbowhzaz miz goanz goz ux rongx hoak Lazbanz. Lazbanz leztaen goangh jim naeh daj guh koanq jim nongx dix tw naeh, yaq Liqbowhzaz goj laemh dwk paenqdix, dij goanz puj koij Yaqboahlazhanq naeh daj dix hax gaeng raeuh. Lazbanz ruxndeq suq naeh yaq, zoq lenh bae henz mboq, bae doqnaj goanz puj koij Yaqboahlazhanq naeh, leztaen dix naengz in yuq henz mboq, in yuq henz loahtoah. 31Lazbanz daj dix hax: "Goanz Yez'hoahhuah gumx naeh aj, maz rownz gux ndeh. Yuq baihnog in hoak gaeng ah? Rownz gux dih hawj su ndowj goj miz, dih hawj loahtoah ced goj miz." 32Goanz puj koij Yaqboahlazhanq zoq mwz rownz Lazbanz.
Mwz taeng rownz Lazbanz yaq, Lazbanz yaeuj dah loahtoah daeuj, aeu gaenqjin daeuj kun loahtoah, aeu fangz bangq dihndin hawj loahtoah noanz. Yaq daeuq aeu naemx hawj puj koij Yaqboahlazhanq daj puj nowngz goanz puj koij Yaqboahlazhanq maz naeh soiq din. 33Lazbanz aeu kaeujpyaek baiz zongz ndae yaq, rongx goanz puj koij Yaqboahlazhanq maz jin. Gaj goanz puj koij Yaqboahlazhanq hax: "Laek gah goanq, taj gux laemh saeh gux ndae yaq, gux zux jin." Lazbanz hax: "Awh, mawz laemh mah."
34Goanz puj koij Yaqboahlazhanq hax: "Gux zawh puj koij Yaqboahlazhanq. 35Yez'hoahhuah gumx zaeuj gux taeuq, hawj dix baenzsaq, miz dij mbej, miz dij moaz, miz ngaenz, miz jim, miz puj koij, miz loahtoah daj dij loix. 36Mez zaeuj gux Sazlaz, zwz dix baenz puj jeq naeh saeh zaeuj gux zowngx goanz lug zaiz ux. Zaeuj gux aeu daengzle hawj goanz lug zaiz dix naeh. 37Zaeuj gux hawj gux daj dix haxgoak daekgoanq, dix mboq hawj gux yuq Zaznanh dih dix ndowj naeh saeh lug zaiz dix cha mez. 38Dix hawj gux bae dih goakrownz dix naeh, yuq boangx bihnongx dix naeh saeh maeng lug zaiz dix Yitsaeg cha goanz mez ux. 39Gux zoq cham dix, jixzawh goanz nyingz naeh mboq venq daj gux dauh maz, gux hoak rawz hoak. 40Dix zoq hoakzaqnaeh yaeng gux: ‘Dij Sen gux daengz zohgoanz daeq ka loh dix naeh haeggaj rux nemz bin dix daj mawz zaemh bae, hawj mawz hoak baenz. Hawj mawz yuq changz rownz gux, cha luglan dez gux goanz ux hoak mijmez lug zaiz gux. 41Nanghgaj mawz bae dih changz rownz gux naeh, mawz daengz hoak baenz mboq baenz gux goj mboq gvaiq mawz. Jixzawh paenqdix mboq aeu ndiq nyingz rawz hawj mawz, gux goj mboq gvaiq mawz, sowh gaenq gux hawj mawz daj gux haxgoak daekgoanq naeh zoq yumq yaq daengzhwx.’ 42Yaq vaenznaeh gau gux maz taeng henz mboq naeh, gux hoakzaqnaeh vanz dij Sen: ‘Yez'hoahhuah, dij Sen zaeuj gux Yaqboahlazhanq aj, vanz mawz hawj sowh gaenq gux daz hoak naeh hoak baenz ndaej. 43Gannaeh gux in yuq henz mboq. Taeng sowh gau puj nyingz daeuj daek naemx naeh, gux daj ndiq saureauh ux aeu naemx ndut. 44Jixzawh dix aeu naemx hawj gux ndut, yaq daek hawj daengz loahtoah gux ndut ndoij, gux ngwz ndiq saureauh naeh zawh Yez'hoahhuah saeh lug zaiz zaeuj gux Yitsaeg lowg nyaengxtaj hoak mez.’ 45Gau gux naengz hoakzaqnaeh vanz dij Sen, Liqbowhzaz zoq daeuj taeng henz gux, rongzmbaq mbeg ka doangj ux bae daek naemx. Gux zoq daj dix aeu naemx ndut. 46Dix cenq yaeuj doangj naemx rongzmbaq daeuj hawj gux ndut. Gux ndut yaq, dix goj daek naemx hawj loahtoah gux ndut. 47Yaq gux cham dix dez dix zawh gawz. Dix haxdoq gux dez dix zawh Pihtuxliq. Dez dix zawh lug zaiz Nahhowh daj Mihzaz. Gux zoq aeu goangh naeh doj mwz aen ndaeng dix, aeu guh koanq tw mwz song mungz dix. 48Zawh Yez'hoahhuah, dij Sen zaeuj gux Yaqboahlazhanq saeh gux, yaix gux cha mex lan nyingz nongx zaeuj gux ngaihngez. Liqbowhzaz zawh goanz ux hoj hoak mez lug zaiz zaeuj gux. Gux zoq gvih bae dihndin biangz Yez'hoahhuah. 49Gannaeh ngwz su zaemh nwh zaeuj gux laeng, aeu Liqbowhzaz hawj lug zaiz zaeuj gux hoak mez. Jixzawh su hawj mboq baenz, goj vanz su haxdoq gux swhlit. Hoakzaqnaeh gux zux ruxndeq hoak rawz hoak."
50 Lazbanz daj Pihtuxliq zaemh yaeng: "Sowh naeh zawh Yez'hoahhuah hoak, gaenqpiu gaemz hax mboq miz. 51Mawz lez, Liqbowhzaz yuq inxnaeh, mawz zowz dix bae, hoakzaq gaemz Yez'hoahhuah hax naeh, hawj dix hoak mijloz zaeuj mawz." 52Puj koij Yaqboahlazhanq ruxnyinz suq kauq naeh, zoq gvih bae dihndin biangz Yez'hoahhuah. 53Yaq dix aeu za'hoq ngaenz, za'hoq jim, sowj hawj Liqbowhzaz, daeuq aeu gaenq ndae gaenq biangz soangq hawj goz Liqbowhzaz daj meh Liqbowhzaz. 54Yaq goanz puj koij Yaqboahlazhanq naeh daj puj daj dix zaemh maz naeh zux jin byaeuz, yuq dih naeh ndowj hwnz ux.
Nawlaeng zaeux paenqdix dwnq maz, goanz puj koij Yaqboahlazhanq daj rownz Liqbowhzaz hax: "Hawj gux dauh mwz dih zaeuj gux naeh." 55Gaj goz Liqbowhzaz daj meh Liqbowhzaz hax: "Hawj dix daj piu do yuq jij vaenz ux, cauz gajrawz goj sip vaenz yaq goanq hawj dix bae." 56Gaj goanz puj koij Yaqboahlazhanq hax: "Gaenqsu laek lanx gux ej. Yez'hoahhuah saeh gux, hawj gux hoak baenz kvaiq lij. Hawj gux dauh bae dih zaeuj gux ndeh." 57Paenqdix yaeng: "Haenx, gaenqpiu rongx Liqbowhzaz maz, cham dix hoak rawz hax." 58Yaq paenqdix zoq rongx Liqbowhzaz maz, cham dix venq gannaeh daj goanz puj koij Yaqboahlazhanq zaemh bae mbaeuq. Liqbowhzaz goj hax dix venq gannaeh daj paenqdix zaemh bae. 59Yaq rownz Liqbowhzaz zoq soangq Liqbowhzaz, yah kun zuj Liqbowhzaz dwx naeh daj goanz puj koij Yaqboahlazhanq, daj daengz paenq zaemh maz naeh zaemh bae. 60Rownz Liqbowhzaz daj Liqbowhzaz hax: "Ngwz luglan mawz raengh huhhuh, ngwz paenqdix saeuh bex baih daenh." 61Liqbowhzaz daj le goanz puj koij nyingz dix naeh, kviq mwz now loahtoah. Puj koij Yaqboahlazhanq zoq zowz Liqbowhzaz bae.
Yitsaeg Raep Liqbowhzaz Hoak Mijmez
62Laemh zwz naeh, Yitsaeg daeq henz aen mboq rongx hoak Lazhaixlaih naeh ban daeuj ndaw Nanhdiq, yuq dihnaeh ndowj. 63Sowh gau tang'vaenz zaekgaj doak naeh, Yitsaeg yuq ndaw doangh nwh. Dix ngangh to lez, leztaen miz boangx loahtoah ux maz. 64Liqbowhzaz daeh leztaen Yitsaeg, zoq cenq loangz now loahtoah daeuj. 65Dix cham puj koij Yaqboahlazhanq: "Goanz yuq ndaw doangh daeq maz doq raeuz naeh zawh gawz ah?" Puj koij yaeng dix: "Zawh zaeuj gux Yitsaeg." Liqbowhzaz zoq aeu kvaix paeng ux yaz naj. 66Goanz puj koij naeh zoq aeu suq saeh dix hoak naeh haxdoq Yitsaeg. 67Yitsaeg zoq zowz Liqbowhzaz ndonj mwz aen zangjpungh koax daekgoanq meh dix Sazlaz ndowj naeh, raep dix hoak mez. Liqbowhzaz zoq baenz mez Yitsaeg. Yitsaeg ngaiq Liqbowhzaz. Meh dix tai yaq taengdiak gannaeh, ndaw zaw dix zux daeuq yuqndae nyeuz ixux.
Currently Selected:
Zwz Nduq 24: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
