Zwz Nduq 26
26
Yitsaeg Daj Yaqbixmixlowh
1Zwz Yaqboahlazhanq naengz zaeu naeh, miz mbaed ux dih naeh zoah zwz yaeg. Gannaeh dih naeh daeuq zoah zwz yaeg. Yitsaeg zoq mwz ndaw Jizlazex, mwz dih Yaqbixmixlowh laux hongz puj Faezliqseq naeh. 2Yez'hoahhuah hawj Yitsaeg taen, daj dix hax: "Laek bae Aizjih, yuq dih gux yaix mawz yuq naeh ndowj. 3Mawz yuq dih daenh inxnaeh ndowj, gux toj daj mawz zaemh yuq, gumx mawz. Unj gux aeu daengz dih inxnaeh hawj mawz daj luglan mawz. Gux toj hoak diauq gux ndaej daj dez mawz Yaqboahlazhanq haxgoak daekgoanq naeh, 4hawj luglan mawz raengh huhhuh, lai daj ndaundiq pumhfax dungzlumj, goj aeu dih inxnaeh hawj paenqdix. Gux hawj dij goanz dihndin goh rawz goj ndaelaeng luglan mawz. 5Gaenqnaeh zawh cholaeng Yaqboahlazhanq biak kauq gux, biak sowh gaenq gux saengq naeh, biak sowh gaenq gux nemz naeh, biak sowh gaenq gux zauh naeh, biak fahlih gux."
6Yaq Yitsaeg zoq yuq ndaw Jizlazex ndowj. 7Liqbowhzaz goanz mijmez Yitsaeg naeh najta yawz taeuq. Yitsaeg nwh, jixzawh daenh ruxndeq Liqbowhzaz zawh mez dix, daenh rux cho aeu mez dix ej kaj dix. Baenzzaqnaeh zwz rawz miz dij goanz dih naeh cham dix Liqbowhzaz zawh gawz, dix zoq haxdoq daenh Liqbowhzaz zawh nongx nyingz dix. 8Yitsaeg yuq dih naeh ndowj yaengh ndauj. Miz vaenz ux, Yaqbixmixlowh, laux hongz puj Faezliqseq naeh, yuq rownz dix lez bae baihnog, leztaen Yitsaeg daj Liqbowhzaz dungz'umj-dungz'amj. 9Yaqbixmixlowh zoq rongx Yitsaeg maz, daj dix hax: "Dix minhminh zawh mijmez mawz, mawz baenzzaqrawz hax dix zawh nongx nyingz mawz mux?" Gaenqdix yaeng: "Ndaw zaw gux mbu, gux mbu daenh cho aeu dix ej kaj gux." 10Yaqbixmixlowh hax: "Mawz baenzzaqrawz hoakzaqnaeh doiq piu mux? Jixzawh dij goanz dih gux miz dij goanz bae daj mijmez mawz zaemhyuq, zoq zawh mawz hawj piu hoak loang." 11Yaq Yaqbixmixlowh zoq haxdoq dij goanz puj Faezliqseq dix, dix hax: "Mboq hawj gawz chaeg Yitsaeg daj mijmez dix saek'i, gawz chaeg zoah zoq hawj gawz tai."
12Bi gaengnaeh Yitsaeg yuq dih naeh ndaem kaeujpyaek. Dij Sen gumx dix, zoq hawj kaeujpyaek dix ndaej lai nyeuz bi ndai baeg daep. 13Ngaenzjenz dix gaj ndowj gaj miz lai, baenz saq taeuq. 14Dix miz dij moaz, dij mbej, daj puj koij lai yaengh lai. Dij goanz puj Faezliqseq zoq ta'ndaem dix, 15zoq aeu namh moak suq mboq dix nauq. Suq mboq naeh zawh zwz dez dix Yaqboahlazhanq naengz zaeu naeh, Yaqboahlazhanq hawj puj koij mbut. 16Yaqbixmixlowh zoq daj Yitsaeg hax: "Mawz baenz saq daj riangz nyeuz piu lai, mawz ni piu ndeh."
17Yaq Yitsaeg zoq ni dih naeh mwz dih piang Jizlazex, yuq dih naeh daengj zangjpungh, yuq dih naeh ndowj. 18Sowh aen mboq zwz Yaqboahlazhanq naengz zaeu dix hawj puj koij dix mbut naeh, daeklaeng dix tai yaq, suq mboq naeh zoq zoah dij goanz Faezliqseq aeu namh moak nauq. Gannaeh Yitsaeg zoq daeuq mbut, minxzwh suq mboq naeh goj naengz rongx daj zwz dez dix nyaek naeh dungzlumj. 19Puj koij Yitsaeg yuq dih piang mbut ndaej aen mboq ux, aen mboq naeh og naemx lai taeuq, laiq daeuj haenz dix. 20Puj dawzmbej Jizlazex daj puj dawzmbej Yitsaeg zoq dungzlongx. Gaj baih gaj hax: "Naemx inxnaeh zawh naemx piu." Paenqdix yuq dih naeh dungzlongx, Yitsaeg zoq rongx aen mboq naeh hoak Aizsowh. "Aizsowh" zoq zawh hax: "Dungzlongx." 21Puj koij Yitsaeg daeuq mbut aen mboq ux. Puj dawzmbej Jizlazex daj puj dawzmbej Yitsaeg daeuq cholaeng aen mboq naeh dungzjeng. Yitsaeg zoq nyaek aen mboq naeh hoak Ciztihnah. "Ciztihnah" zoq zawh hax: "hwnq." 22Yitsaeg ni dih naeh bae dihndai daeuq mbut aen mboq ux. Mbaed naeh mboq miz gawz maz longx. Dix daj dij goanz dix hax: "Dij Sen hawj raeuz dih ux gvangjchaeg, raeuz yuq dih inxnaeh gaj ndowj gaj raengh." Yaq dix zoq rongx aen mboq naeh hoak Liqhoahboah. "Liqhoahboah" zoq zawh hax: "Gvangjchaeg."
23Gvaq ndaej ndauj ux, Yitsaeg ni dih naeh ban mwz Behsowqbaz. 24Haemh gaengnaeh, Yez'hoahhuah daeuj henz dix, daj dix hax: "Gux zawh dij Sen dez mawz Yaqboahlazhanq, gux daj mawz zaemh yuq, mawz laek mbu. Cholaeng puj koij gux Yaqboahlazhanq, gux gumx mawz daj luglan mawz, hawj luglan mawz raeng huhhuh." 25Yitsaeg zoq yuq dih naeh daengj aen kuq tin mbud dij Sen ux, aeu Yez'hoahhuah hoak dij Sen maengx. Yaq dix yuq dih naeh daengj zangjpungh. Puj koij dix yuq dih naeh mbut aen mboq ux.
Yitsaeg Daj Yaqbixmixlowh Dungzdingq
26 Yaqbixmixlowh daj Yaqfuqsax goanz nowngz dix hoak saeh naeh, yaq Faezgoah goanz saeh dix gvanx bin naeh, sam goanz paenqdix daeq Jizlazex maz dih Yitsaeg yuq naeh. 27Yitsaeg daj paenqdix hax: "Gaenqsu hwnq gux, nemz gux ni. Baenzzaqrawz daeuq maz dih gux inxnaeh mawj?" 28Paenqdix yaeng: "Gannaeh piu ruxndeq Yez'hoahhuah gumx mawz singjringh. Gaenqpiu lez maz, gangzmaz gaenqraeuz daengz song baih haxgoak daekgoanq, daengz song baih dungzdingq. 29Gaenqpiu hawj mawz haxgoak daekgoanq, laek haiq piu daj piu mboq sanz haiq mawz dungzlumj. Koax daekgoanq gaenqpiu doiq mawz ndae, hawj mawz ni vangq vangq dangh dangh. Gannaeh gaenqpiu ruxndeq Yez'hoahhuah gumx mawz." 30Paenqdix hoakzaqnaeh hax nauq yaq, Yitsaeg zoq hoak yaengh zongz pyaek daj paenqdix zaemh jin, zaemh ndut. 31Vaenzlaeng, paenqdix haxgoak daekgoanq. Daengz song baih haxgoak daekgoanq yaq, Yitsaeg soangq paenqdix bae. Paenqdix bae vangqdangh. 32Vaenz gaengnaeh, puj koij Yitsaeg maz daj Yitsaeg hax paenqdix mbut mboq cha mex naemx. 33Yitsaeg zoq rongx aen mboq naeh hoak Behsowqbaz. "Behsowqbaz" zoq zawh hax: "Aen mboq dungzdingq." Aen chaenh yuq henz mboq Behsowqbaz naeh zoq rongx hoak Behsowqbaz. Taengdiak gannaeh goj naengz hoakzaqnaeh rongx.
Yixsaux Raep Song Yah Mez
34Zwz Yixsaux ndaej siqsip bi naeh, dix miz song yah mez. Daengz song yah mez dix zawh dij goanz puj Howx. Miz yah ux zawh lug nyingz Bixliq minxzwh hoak Yaeuhdih. Miz yah ux zawh lug nyingz Yixlunh, minxzwh hoak Bazswhmoah. 35Song yah mez Yixsaux kwnz hawj Yitsaeg daj Liqbowhzaz moih taeuq.
Currently Selected:
Zwz Nduq 26: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
