Zwz Nduq 27
27
Yaqgowh Yai Yitsaeg Hax Dix Zawh Yixsaux
1Gannaeh Yitsaeg baenz puj jeq, ta dix haeuz mboq saw, lez mboq taen gaeng. Dix rongx lug zaiz to dix Yixsaux maz, daj dix hax: "Lug gux aj!" Yixsaux yaeng: "Gux yuq inxnaeh." 2Yitsaeg hax: "Mawz lez gannaeh gux haeuz baenz puj jeq, mboq ruxndeq vaenz rawz tai. 3Gannaeh mawz tw naqgoang mwz ndaw bo, saeuh do'bo daeuj hawj gux. 4Gux ngaiq jin sowh rawz, mawz zoq hoak sowh rawz maz hawj gux jin. Hoakzaqnaeh sowh zwz gux naengz mboq tai naeh, gux vanz dij Sen gumx mawz."
5 Liqbowhzaz ruxnyinz suq kauq Yitsaeg daj Yixsaux hax naeh. Sowh gau Yixsaux mboq yuq rownz, bae baihnog saeuh do'bo naeh, 6Liqbowhzaz zoq daj lug zaiz dix Yaqgowh hax: "Gux hiamq ruxnyinz dez mawz daj goz mawz Yixsaux hax: 7‘Mawz bae saeuh do'bo, hoak sowh gaenq gux ngaiq jin naeh. Gannaeh gux naengz mboq tai, gux yuq doqnaj Yez'hoahhuah vanz Yez'hoahhuah gumx mawz.’ 8Lug gux aj, mawz caqsiq biak, biak kauq gux bae hoak. 9Mawz bae dih dij mbej yuq naeh zung dij mbej maz, zung sowh lug oanq naeh maz song lug, gux hoak sowh pyaek dez mawz ngaiq jin naeh. 10Yaq mawz aeu mwz hawj dez mawz jin. Gannaeh dix naengz zaeu, hawj dix saeh mawz vanz dij Sen gumx mawz." 11Gaj Yaqgowh daj meh dix Liqbowhzaz hax: "Mawz ruxndeq goz gux Yixsaux daengz ndang kwnj koan, gaj gaenqgux daengz ndang myaegload. 12Jixzawh dez gux lumh zoah gux, ruxndeq gux haxyai dix, taeng zwz naeh, dix vanz dij Sen zoq zawh vanz dij Sen fah gux, mboq zawh vanz dij Sen gumx gux" 13Meh dix yaeng: "Lug gux ah, jixzawh dix vanz dij Sen fah mawz, gux venq saeh mawz tw. Mawz yumq biak kauq gux bae hoak, bae zung dij mbej maz hawj gux."
14 Yaqgowh zoq bae zung dij mbej maz hawj meh dix. Meh dix zoq hoak sowh pyaek dez dix ngaiq jin naeh. 15Yaq Liqbowhzaz aeu sowj Yixsaux goanz zaiz to naeh, aeu sowh gongz yuq ndaw rownz naeh, gongz rawz ndae nyeuz aeu gongz rawz daeuj hawj Yaqgowh goanz zaiz nongx nungh. 16Yaqgowh nungh sowj Yixsaux yaq, song qen dix daj goakhoz dix naengz meq, myaegload se. Meh dix Liqbowhzaz zoq aeu naeng dij mbej ix toq song qen dix daj goakhoz dix. 17Yaq Liqbowhzaz aeu pyaek van gaenqdix hoak naeh daj binx hawj Yaqgowh.
18 Yaqgowh mwz taeng dih dez dix naeh, rongx: "Dez." Dez dix cham: "Hoiz, gux yuq inxnaeh, lug gux aj, mawz zawh goanz rawz ah?" 19Yaqgowh daj dez dix hax: "Gux zawh lug zaiz to mawz Yixsaux. Suq mawz nemz gux hoak naeh, gux gaj yowngh gaj hoak ndae. Mawz dwnq maz naengh, jin gaenq pyaek gux bae baihnog saeh mawz saeuh maz naeh, yaq mawz goanq vanz dij Sen gumx gux." 20Yitsaeg hax: "Lug aj, mawz hoakrawz saeuh ndaej kvaiq baenz nah?" Yaqgowh yaeng: "Yez'hoahhuah, dij Sen mawz, hawj gux mex do'bo ngaihngez." 21Yitsaeg daj Yaqgowh hax: "Lug aj, daeq maz henz gux, hawj gux lumh mawz, lez mawz zawh mboq zawh lug zaiz to gux Yixsaux." 22Yaqgowh daeq bae henz dez dix Yitsaeg, Yitsaeg lumh dix, yaq Yitsaeg nwh: "Hiang dix zawh hiang Yaqgowh, gaj mungz dix lej zawh mungz Yixsaux." 23Mungz Yaqgowh aeu naeng dij mbej ix toq, mungz dix zoq daj mungz Yixsaux dungzlumj miz koan. Baenzzaqnaeh Yitsaeg zoq mboq ruxndeq zawh Yaqgowh. Sowh gau dix zaekgaj vanz dij Sen gumx Yaqgowh naeh, 24dix jinj Yaqgowh: "Mawz zawh lug zaiz to gux Yixsaux zaeh vah?" Yaqgowh yaeng: "Unh. Gux zawh." 25Yitsaeg hax: "Aeu gaenqjin yenh maz hawj gux. Gux jin pyaek do'bo mawz saeuh daeuj naeh yaq, gux zoq vanz dij Sen gumx mawz." Yaqgowh zoq aeu gaenqjin yenh hawj dix, dix zoq jin. Yaqgowh daeuq aeu laeuj hawj dix, dix goj ndut.
26Yaq dez dix Yitsaeg daj dix hax: "Lug aj, mawz daeq maz zup gux." 27Yaqgowh zoq daeq mwz zup Yitsaeg. Yitsaeg daeh maen zoah yai sowj gongz Yaqgowh nungh naeh, yaq dix zoq hoakzaqnaeh hax:
"Ndang lug gux maen hom zaeh,
maen hom daj yai sowh doangh Yez'hoahhuah gumx naeh dungzlumj!"
Hax gaemz naeh yaq, dix zoq daj Yaqgowh hoakzaqnaeh hax:
28"Ngwz dij Sen gumx mawz, hawj naemxpaen ndaw pumhfax daeuj zoah zwz hoj,
hawj raehnaz mawz namh yawz taeuq,
hawj mawz bi rawz goj ndaej kaeujpyaek lai,
bi rawz goj miz laeuj mawq lai.
29Ngwz dij goanz dihndin kvej hawj mawz,
Ngwz puj gaeng goj gvih maz doq mawz.
Ngwz mawz hoak zaeuj bihnongx mawz,
Ngwz bihnongx ndiang mawz gvih maz doq mawz.
Gawz vanz dij Sen fah mawz, ngwz dij Sen fah dix.
Gawz vanz dij Sen gumx mawz, ngwz dij Sen gumx dix!"
30 Yitsaeg vanz dij Sen gumx Yaqgowh yaq, Yaqgowh hiamq daeq dih dez dix og daeuj naeh gau ixux yaq, goz dix Yixsaux zoq mwz saeuh do'bo dauh maz. 31Yixsaux goj zaemh hoak pyaek van, aeu maz hawj dez dix, hax: "Dez, dwnq maz naengh, jin gaenq pyaek do'bo gux saeuh maz naeh, mawz goanq vanz dij Sen gumx gux." 32Dez dix Yitsaeg cham dix: "Mawz zawh gawz?" Yixsaux yaeng: "Gux zawh lug zaiz to mawz Yixsaux." 33Yitsaeg daengz ndang saenq nauq, cham dix: "Haenx, goanz gaunduq bae saeuh do'bo, yaq aeu pyaek do'bo maz hawj gux jin naeh zawh gawz? Mawz naengz mboq maz, gux haeuz jin yaq, gux goj haeuz vanz dij Sen gumx dix. Mwznaj dij Sen gumx dix mboqyaq." 34Yixsaux daeh ruxnyinz gaemz kauq dez dix, zoq haej vauhvauh, hax: "Dez gux aj, vanz mawz goj vanz dij Sen gumx gux!" 35Yitsaeg yaeng: "Nongx zaiz mawz haeuz hoakgoix yai gux, longx gaenq dij Sen gumx mawz naeh." 36Yixsaux hax: "Baez naeh zawh dix baez daih ngih yai gux, sangh minxzwh dix nyaek hoak Yaqgowh.#27:36 Yaqgowh zoq zawh hax: "oangjjeuj," goj zawh hax "yai daenh." Koax daekgoanq dix longx gux hoak lugzaizto, mawz lez, gannaeh daeuq longx gaenq gaenqmawz vanz dij Sen gumx gux naeh." Yixsaux cham dez dix: "Mawz vanz dij Sen gumx gux mboq baenz saek yowngh ejraj?" 37Yitsaeg yaeng: "Gux haeuz hawj dix hoak zaeuj mawz, hawj daengz boangx bihnongx hoakkoij dix. Gux goj vanz dij Sen gumx dix, hawj dix bi rawz goj ndaej kaeujpyaek lai, miz laeuj mawq lai. Lug gux aj, gannaeh gux naengz aeu gaeng hawj mawz baenz mah?" 38Yixsaux naengzgaj vanz dez dix: "Dez, mawz zux vanz dij Sen gumx baenz mbaeddoag naeux? Vanz mawz goj vanz dij Sen gumx gux!" Hax nauq, dix zoq haej vauhvauh.
39Yaq dez dix Yitsaeg hax:
"Mawz mboq ndaej yuq dih raehnaz namh yawz naeh,
Mawz mboq ndaej yuq dih naemxpaen ndaw pumhfax daeuj zoah zwz hoj naeh.
40Mawz zwzrawz goj daj daenh dungzsaeuh,
Mawz hoakrawz goj ndaej biakkauq nongx zaiz mawz,
Taengdiak mawz haen zwzrawz,
mawz zux mboq biak dix."
41Dez dix vanz dij Sen gumx Yaqgowh, Yixsaux zoq hwnq Yaqgowh. Ndaw zaw dix nwh: "Dez gux zaekgaj mboq miz, mboq miz zwzrawz, gux zoq kaj nongx zaiz gux Yaqgowh." 42Miz dij goanz haxdoq Liqbowhzaz Yixsaux goanz zaiz to naeh daz kaj Yaqgowh. Liqbowhzaz zoq rongx Yaqgowh goanz zaiz nongx naeh maz doqnaj dix hax: "Mawz biak gux hax, goz mawz Yixsaux jihdwk mawz taeuq, dix daz kaj mawz. Dix mboq kaj mawz, dix koan hoz mboq laemx. 43Lug gux aj, mawz biak kauq gux hoak. Gannaeh mawz lenhgowx mwz ndaw Hazlanh, mwz haenz goz gux Lazbanz, 44daj dix ndowj ndauj ux, taj taeng goz mawz Yixsaux naeuz mboq kwnz jihdwk mawz. 45Taeng sowh zwz goz mawz naeuz mboq kwnz jihdwk mawz, lumz le mbaed saeh naeh, gux zoq nemz dij goanz mwz raep mawz dauh daeuj. Baenzzaqrawz vaenz doag gux ndoi daengz song goanz su mux?#27:45 Gaemz naeh zoq zawh hax jixzawh Yixsaux kaj Yaqgowh, Yixsaux goj rux zoah daenh kaj."
46Daeklaeng, Liqbowhzaz daj Yitsaeg hax: "Gux ywjhwnq song goanz mijmez Yixsaux, song goanz dij goanz puj Howx naeh. Jixzawh Yaqgowh goj raep dij goanz puj Howx, gux tai naengz ndae nyeuz eh."
Currently Selected:
Zwz Nduq 27: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
