Luhzaz 12

Hem Fahfaenx Dij Goanz Fahliqsaiq

1Zwz naeh, dij goanz maz haenz Yezsuz baenz tiang baenz fanh, dik daengz goanz lej nyanx zoah goanz saw. Yezsuz daj cohsaenz dix hax: "Gaenqsu hem fahfaenx dij goanz Fahliqsaiq ixux, paenqdix baeg daj zaw mboq dungzlumj, laek hawj paenqdix biad zoah. 2Gaeng gojvenj, daengz aeu yaz ndae gajrawz goj rux miz dij goanz taen, gaeng goj venj, daengz aeu gowx ndae gajrawz goj rux miz dij goanz ruxndeq. 3Baenzzaqnaeh, sowh gaenq su mbuhmbih mbuhmbih naeh, mwznaj toj miz goanz lai ruxnyinz mboqyaq, sowh gaenq su yuq ndaw ruk supsaeb naeh, mwznaj toj miz dij goanz yuq nyiangzrownz caqsiq hax og daeuj mboqyaq."

Hoj Mbu Gawz

4"Boangx dungzbownh aj, gux haxdoq su, sowh puj kaj goanz yaq mboq rux hawj minghkoan dij goanz baenzzaqrawz naeh, gaenqsu laek mbu. 5Gux haxdoq su baenz mbu gawz: Hoj mbu dij Sen, laux kaj goanz yaq, naengz rux aeu minghkoan dij goanz viangh bae dih dix aeu hoak dih chaenxfah naeh. Gux haxdoq su, hoj mbu dix. 6Haj do noagzog zux kai ndaej dit jenz ux, gaj dij Sen mboq rux lumz do rawz. 7Daengz koanto su dix naengz anq yaq. Laek mbu, gaenqsu biangz nyeuz noagzog lai."

Yuq Doqnaj Daenh Yinq Yezsuz

8"Gux haxdoq su, nanghgaj gawz yuq doqnaj dij goanz yinq gux hoak Zaeuj, mwznaj gux Lug Dij Goanz yuq doqnaj bin dij Sen goj yinq dix hoak dij goanz gux. 9Gawz yuq doqnaj dij goanz mboq yinq gux hoak Zaeuj, mwznaj gux yuq doqnaj bin dij Sen goj mboq yinq dix hoak dij goanz gux. 10Gawz mang Lug Dij Goanz goj naengz rux ndaej yangq, gaj gawz laiq Minghkoan dij Sen zawh mboq ndae, gawz zoq mboq ndaej yangq. 11Daenh laeg su mwz rownzndawcowq, mwz doqnaj puj saeq daj puj miz najta gauq su zwzrawz, gaenqsu laek pyej hoakrawz yaeng. 12Taeng zwz naeh, su hoj hax gaeng, Minghkoan dij Sen zoq yaix su hax gaeng."

Aen Bixliq Goanz Puj Saq Naeh

13Dih goanzlai naeh miz goanz ux daj Yezsuz hax: "Lauxswz, vanz mawz yaix goz gux baen sownq gux hawj gux." 14Yezsuz hax: "Mawz ah, gawz yaix gux hoak puj saeh su dungzbaen ah?" 15Yaq Yezsuz zoq daj daengzle hax: "Gaenqsu yauq caqsiq hem, laek maeux. Unj, daengz ngaenzjenz miz lowlaq, goj mboq rux hawj dij goanz do zaeu ndowj nyeuz." 16Dix zoq daj paenqdix koanx aen bixliq ux: "Miz goanz puj saq ux, raehnaz dix yawz taeuq, 17ndaw zaw dix nwh: ‘Kaeujpyaek gux lai gvaq, dih aeu nyaengx mboq miz, hoakrawz hoak nix?’ 18Daeuq hax: ‘Gux hoakzaqnaeh hoak: Gux lid sowh rownz mbaednduq gux aeu nyaengx kaeujpyaek naeh, daeuq daengj aen dwx tem, hoakzaqnaeh zux miz dih aeu daengzle kaeujpyaek daj za'hoq gux nyaengx. 19Yaq, gux daj hoakri hax: "Bohjeq aj, mawz miz za'hoq ndae lai taeuq, doh mawz jin lai bi taeuq yah, jin vangqdangh, ngaiq jin ngaiq nyaeux, gvaq ngaihngez!"’ 20Gaj dij Sen daj dix hax: ‘Puj uaj aj, haemh naeh aeu aen mingh mawz, gaenq gaenqmawz hoak nyaengx naeh zawh gaenq gawz mux?’ 21Gawz saeh hoakri leux ngaenzjenz nyaengx dihndin, gaj mboq aeu ngaenzjenz hoak sowh gaenq kaeujzaw dij Sen naeh, gawz goj baenzzaqnaeh."

Laek Pyej, Aeu Gaenq Jihzaq Nyaengx Ndaw Fax

22 Yezsuz daj cohsaenz dix hax: "Baenzzaqnaeh, gux haxdoq su, laek pyej jin gaeng, goj laek pyej ndang hoakri nungh gaeng. 23Unj, aen mingh zungqyauq nyeuz gaenqjin lai loh, ndang zungqyauq nyeuz ndangnungh lai loh. 24Gaenqsu lez dij a: paenqdix mboq ndaem goj mboq caeu, goj mboq miz riangxkaeuj, dij Sen goj naengz zowngx paenqdix zaeu, gaenqsu biangz nyeuz dij noag lai loh. 25Gaenqsu miz saek goanz rux cholaeng ndaw zaw pyej ej hawj hoakri do zaeu gau ux mux? 26Daengz hawj hoakri do zaeu gau ux, dit saeh naeh naengz hoak mboq taeng, gaenqsu naengz pyej yowngh ndai hoak gaeng mux? 27Gaenqsu lez ndog'va, dix mboq kux, goj mboq yod'paij, gaj gux haxdoq su, daengz sowh ndangnungh yawz laux hongz Soaxloahmaenh nungh naeh naengz mboq ndeu sowh ndog'va naeh ndog ux. 28Zaw su sinq dij Sen ix gvaq loh! Ndog'va ndaw doangh, vaenznaeh naengz yuq, vaenzbig zoq aeu viangh bae ndaw faez, gaj dij Sen goj naengz zang paenqdix, hawj paenqdix ndog yawz baenzzaqnaeh, dij Sen hoakrawz mboq zang gaenqsu mux? 29Gaenqsu laek nwh jin gaeng, ndut gaeng, laek pyej gaeng. 30Unj le gaenqnaeh zawh dij goanz dihndin, zawh sowh puj mboq sinq dij Sen naeh nwh niakniak, gaj gaenqsu, Dez ndaw fax su ruxndeq su aeu gaeng. 31Gaenqsu aeu Goh dij Sen nyaengxzaw nyeuz daengzle, dix haeggaj rux aeu gaenqjin, gaenqnungh hawj su. 32Boangx ix inxnaeh aj, Dez ndaw fax su venq aeu goh dix hawj su, zoq zawh hax goh dij Sen daengzle zawh gaenq su, baenzzaqnaeh su laek qiq. 33-34Gaenq jihzaq su yuq rawz, zaw su zoq yuq rawz. Baenzzaqnaeh, gaenqsu kai sowh gaenq gaenqsu miz naeh aeu hawj puj baenzluk, hoakzaqnaeh zoq zawh aeu nyaengx hawj hoakri, sowh gaenq jihzaq naeh zoq mboq rux naeuh, zoq mboq rux mowd. Hoakzaqnaeh gaenq biangz gaenq jihzaq zoq aeu nyaengx ndaw fax, zoq zawh dih puj laek mboq rux maz haenz, dih dij noan mboq rux gaet naeh.

Aen Bixliq Jijgaj Yowngh Puj koij Naeh

35"Gaenqsu dox ndae'ndowq, diamj daeng, 36daj puj koij taj zaeuj hoakri bae hoak qiag raep loz dauh maz dungzlumj. Zaeuj dauh maz rownz, rongx paenqdix aj du gaurawz, paenqdix cenq aj du hawj dix. 37Zaeuj dauh maz taeng, leztaen puj koij jinh, sowh puj koij naeh zoq faengz yah. Gux haxdoq su, zaeuj toj qingj paenqdix jinkaeuj mboqyaq, dix koaxraengx qiat mbenghyauz, haeggaj kvej hawj paenqdix. 38Zaeuj byonghhwnz dauh maz gojndae, fax zaekgaj rungh dauh maz gojndae, jixzawh dix leztaen puj koij dix jinh, dix zoq doiq puj koij dix ndae mboqyaq. 39Gaenqsu ruxndeq, jixzawh zaeujrownz ruxndeq puj laek gaurawz maz, dix toj mboq rux hawj puj laek maz rownz. 40Baenzzaqnaeh gaenqsu goj baenz dox ndae'ndowq taj. Baenzzaqrawz mah? Sowh zwz gaenqsu nwh mboq taeng naeh, Lug Dij Goanz zoq daeuj."

41 Bihdowh hax: "Zaeuj aj, aen bixliq naeh, zawh daj piu hax rux zawh daj daengzle hax mux?" 42Zaeuj yaeng: "Gaenqsu yauq hoakzaq goanz saeh zaeuj dix gvanx ndaw rownz naeh. Dix zawdoag kvej hawj zaeuj dix, hoak saeh lingj taeuq, Zaeuj dix aeu daengzle puj koij ndaw rownz hawj dix gvanx, hawj dix taeng zwz zoq baen gaenqjin hawj puj koij ndai, hoj hawj gawz gaj rawz zoq hawj gajrawz. 43Zaeujrownz dauh daeuj zwzrawz, leztaen dix hoakzaqnaeh hoak, Zaeuj doiq goanz puj koij naeh ndae mboqyaq. 44Gux haxdoq su swhlit, zaeuj dix toj aeu daengzle hawj dix gvanx nauq. 45Gaj gaenqsu laek hoakzaq goanz puj koij mbowq naeh. Ndaw zaw dix nwh: ‘Zaeuj gux mboq rux dauh daeuj kvaiq baenznaeh,’ yaq dix zoq dup puj koij zaiz, dup puj koij nyingz, yaq jin gaj zonghbaeg, ndut gaj laeuj, daengz laeujmiz saw. 46Gaj gux haxdoq su, sowh vaenz dix nwh mboq taeng naeh, sowh gau dix mboq ruxndeq naeh, zaeuj dix zoq dauh daeuj, zaeuj dix zoq saep dix hoak jijgaj lit, hawj dix daj sowh puj mboq zawdoag kvej hawj zaeuj hoakri naeh zaemh yuq. 47Sowh puj koij ruxndeq zaeuj dix hawj dix hoak gaeng, gaj dix mboq dox taj, goj mboq biak kauq zaeuj dix bae hoak naeh, dix toj zoah dup naek mboqyaq. 48Gaj sowh puj mboq ruxndeq naeh, daengz hoak sowh saeh hoj dup naeh, dix goj cauz zoah dup. Zaeuj do aeu hawj gawz, Zaeuj zoq do daj gawz aeu. Zaeuj do aeu hawj gawz hoak, zaeuj zoq do daj gawz aeu.

Yezsuz Hawj Dij Goanz Daj Dij Goanz Mboq Dungzhoj

49"Gux daeuj zawh aeu faez viangh bae dihndin, gux ngwz dix haeuz oq. 50Mwznaj miz saeh daeuj now to gux, gux baenz hoak sowh ux, daj sowh gau hoak diauq zauh soiq naeh naemx daeuj now to naeh dungzlumj. Mbaed saeh naeh naengz mboq baenz, gux yuqraix taeuq. 51Gaenqsu faeklaih gux zawh daeuj hawj dij goanz dihndin dungzndae mah? Mboq zawh naeuj, gux haxdoq su, gux zawh daeuj hawj dij goanz dihndin dungzdix. 52Daeq vaenznaeh mwz, rownz ux haj goanz rux dungzjeng, sam goanz daj song goanz dungzjeng, song goanz daj sam goanz dungzjeng. 53Paenqdix rux dungzjeng, dez dix lug zaiz, lug zaiz dix dez, meh dix lug nyingz, lug nyingz dix meh, meh dix mijloz, mijloz dix meh."

Hoj Ruxndeq Zoh Naeh Miz Gaeng Saeh

54 Yezsuz daeuq daj daengzle hax: "Gaenqsu leztaen baih tang'vaenz doak miz pajfax, zoq hax: ‘Zaekgaj miz paen dwx yah’ doaklaeng paen dwx daeuj zaeh. 55Gaenqsu leztaen miz laemz daeq baih nanhfangz baeuq maz, zoq hax: ‘Baenzhaeng yah,’ doaklaeng goj baenzhaeng zaeh. 56Sowh puj baeg daj zaw mboq dungzlumj naeh aj, gaenqsu ruxndeq faxbyenq, gaj su baenzzaqrawz mboq ruxndeq sowh saeh hoak hawj zoh naeh lez naeh zawh hax gajraeng mux? 57Gaenqsu baenzzaqrawz mboq saeh hoakri nwh, gaeng zux zawh hoj mux? 58Jixzawh gawz gauq mawz, laeg mawz mwz dih puj saeq naeh, sowh gau naengz yuq doanhloh naeh, mawz baenz caqsiq daj dix dungzlaemh, hoj hoak rawz zoq hoak rawz, yaj dix laeg mawz mwz dih puj saeq naeh, puj saeq aeu mawz hawj bin, bin aeu mawz bae kaeng ndaw lauz. 59Gux haxdoq mawz, jixzawh sowh gaenq mawz zoah chaenxfah naeh, mawz naengz miz saek dit jenz kae mboq nauq, mawz mboq rux ndaej daeq ndaw lauz og daeuj."

Currently Selected:

Luhzaz 12: ZHN

Highlight

Copy