Luhzaz 16
16
Aen Bixliq Goanz Gvanx Ndaw Rownz Goanz Zaw Mboq Swh Naeh
1 Yezsuz daj cohsaenz dix hax: "Miz goanz ux, saeh goanz puj baenzsaq ux gvanx ndaw rownz. Miz dij goanz haxdoq zaeuj dix, hax dix langqfaeq ngaenzjenz zaeuj dix. 2Zaeuj dix rongx dix maz, daj dix hax: ‘Miz dij goanz hax mawz langqfaeq ngaenzjenz gux, zawh baenzzaqrawz raeuh mux? Hoakzaqnaeh mawz mboq ndaej saeh gux gvanx ndaw rownz gux yah. Aeu gaenq mawz gvanx naeh, hoak yowngh hoak yowngh laiz maz hawj gux.’ 3Goanz gaeng naeh ndaw zaw nwh: ‘Zaeuj gux mboq hawj gux saeh dix gvanx, gux hoak gaeng ndae nyeuz mux? Hoakgaengx ej mboq miz doakriangz, dexkaeuj ej laizlom! 4Oj! Gux ruxndeq hoakrawz hoak eh, gux hoakzaqnaeh hoak, taj gux mboq miz najgaengx zwzrawz, daenh goj zowz gux mwz rownz paenqdix ndowj.’ 5Yaq dix zoq hoak goanz hoak goanz rongx sowh puj baznij zaeuj dix naeh maz, hoakzaqnaeh cham goanz daekgoanq: ‘Mawz baznij zaeuj gux gajrawz?’ 6Goanz baznij naeh yaeng: ‘Baz baeg mbwnq yuz maeghit ux.’ Dix zoq hax: ‘Mbaw sw baznij mawz yuq inxnaeh, naengh daeuj, gaix dix hoak hajsip mbwnq ndeh!’ 7Daeuq cham goanz baznij mawq: ‘Mawz baz gajrawz?’ Goanz baznij naeh yaeng: ‘Baz baeg daeh kaeujmeg ux.’#16:7 Inxnaeh Baeg daeh kaeujmeg ux naek teq siq fanh lai gaen ux naeh. Dix zoq hax: ‘Mbaw sw baznij mawz yuq inxnaeh, aeu dix bae, gaix hoak biadsip daeh.’ 8Zaeuj dix haenh dix hoaksaeh lingj. Su lez, sowh puj zawh yaiz lug dihndin naeh, paenqdix yuq dihndin hoaksaeh naengz lingj nyeuz sowh puj zawh yaiz lug gaenq rungh naeh. 9Gux haxdoq su, zwz naengz zaeu aeu ngaenzjenz dihndin bae cha dungzbownh, taeng zwz ngaenzjenz mboq miz luq naeh zwzrawz, paenqdix zoq raep su mwz ndaw zangjpungh daengznauq naeh. 10Dij goanz gawz saeh ix dix goj zawdoag hoak, saeh dwx dix goj zawdoag hoak mboqyaq; saeh ix dix naengz mboq zawdoag hoak, saeh dwx dix zoq gajfa mboq zawdoag hoak. 11Jixzawh gaenqsu mboq zawdoag saeh dij Sen gvanx ngaenzjenz dihndin su, dix ndaej vangq aeu gaenq jihzaq zaeh naeh hawj su gvanx ah? 12Jixzawh za'hoq daenh su mboq zawdoag saeh gvanx, gawz naengz aeu gaeng hawj su hoak gaenq gaenqsu ah? 13Goanz puj koij ux kvej song goanz zaeuj mboq baenz, dix toj rux hwnq goanz naeh nyeuz, ngaiq goanz naeh nyeuz, lez goanz naeh naek nyeuz, lez goanz naeh nawj nyeuz. Gawz hoak koij ngaenzjenz, gawz zoq hoak koij dij Sen mboq baenz."
14Dij goanz Fahliqsaiq maeux ngaenzjenz taeuq, paenqdix ruxnyinz suq kauq naeh, zoq kosaemj Yezsuz. 15Yezsuz daj paenqdix hax: "Sowh gaenq dij goanz aeu hoak gaenq jihzaq naeh, dij Sen lez maz zawh gaenq ndoagndaeg. Gaenqsu yuq doqnaj daenh hax hoakri zawh puj swh, gaj dij Sen ruxndeq zaw su.
16"Daeq zwzndowj daeuj taeng jeh Yezhanq goanz saeh daenh hoak diauq zauh soiq naeh, miz sw fahlih dij Sen daj sw puj zawxkauq dij Sen. Yaq daeq jeh Yezhanq naeh maz zoq miz dij goanz aeu kauqfaengz goh dij Sen koanxdwk daenh, caqsiq qingj daengzle mwz goh dij Sen.#16:16 Gaemz kauq naeh mbangjzwz goj rux hax gaenqnaeh: Gaj goanz gaj dungzlongx mwz goh dij Sen. 17Fahlih dij Sen ndaej hoakzaqrawz hax zoq hoakzaqrawz hax, mboq rux byenq saek'i, daengz hawj fax daj dihndin mboq miz, naengz mboq byenq fahlih saek ngved saek diak. 18Gawz mboq aeu mijmez hoakri, daeuq raep yah mawq, dix zoq suanq zawh naengh puj ndai. Gawz raep sowh yah zoah po dix mboq aeu naeh, gawz goj suanq zawh naengh mijmez daenh.
Goanz Puj Baenzsaq Ux Daj Lazsazluq
19"Miz goanz puj saq ux, ndangnungh nungh gaj gaenq ndae gaenq biangz gangq,#16:19 Mbaed nduq inxnaeh zawh hax: Nunghsowj zaemq riz daj sowj mae'banq liak. gaenqjin jin lowlaq. 20Daeuq miz goanz puj dexkaeuj ux, minxzwh rongx hoak Lazsazluq, daengz ndang baenzmbaed miz nong, zoah daenh aeu dix nyaengx haenz baegdu rownz goanz baenzsaq naeh. 21Dix zawx zaep sowh gaenqjin doak haenz zongz rownz goanz baenzsaq naeh yaiyaeg, daengz dij ma naengz maz laix aen mbaed dix. 22Doaklaeng goanz dexkaeuj naeh tai, zoah bin dij Sen zowz dix mwz haenz Yaqboahlazhanq. Goanz puj saq naeh goj tai, aeu moak yaq. 23Goanz puj saq naeh yuq dihndaem yuqraix taeuq, dix ngangh to lez, leztaen Yaqboahlazhanq yuq gvae taeuq, Lazsazluq daj Yaqboahlazhanq zaemh yuq. 24Goanz puj saq naeh zoq rongx: ‘Puj jeq rownz gux Yaqboahlazhanq, zawchaej gux mah! Gux yuq ndaw faez inxnaeh yuqraix taeuq, vanz mawz nemz Lazsazluq aeu byai mungz yup i naemx ux daeuj daz linx gux, hawj linx gux zumx ixux mah.’ 25Yaqboahlazhanq hax: ‘Lug aj, mawz hoj nwhndaej zwz mawz naengz zaeu naeh gaenq ndae gaenq zaih mawz, mawz haeuz ndaej nauq, gaj Lazsazluq ndaej jinkaem, gannaeh dix ndaej yuqndae, gaj mawz ndaej yuqraix. 26Ka'ux, gaenqpiu daj gaenqsu goj miz ndoang ndaek dungzjeg, gawz zawx daeq inxnaeh kamj bae zawj su goj bae mboq baenz, gawz zawx daeq zawj su kamj maz zawj piu goj maz mboq baenz.’ 27Goanz puj saq naeh hax: ‘Puj jeq rownz gux aj, haenx, vanz mawz nemz Lazsazluq bae rownz gux, 28saengq haj bihnongx zaiz gux, yaj paenqdix goj maz dih yuqraix inxnaeh.’ 29Yaqboahlazhanq hax: ‘Paenqdix haeuz miz Sw Fahlih Moahciz daj Sw puj zawxkauq dij Sen, nanghgaj paenqdix venq, paenqdix biak baenz.’ 30Goanz puj saq naeh hax: ‘Puj jeq rownz gux Yaqboahlazhanq aj, hoakzaqnaeh baenz mboq ndaej. Jixzawh miz dij goanz tai yaq daeuq zaeu, bae dih paenqdix naeh, paenqdix zoq gaix.’ 31Yaqboahlazhanq hax: ‘Jixzawh paenqdix mboq biak kauq Moahciz daj puj zawxkauq dij Sen, daengz miz dij goanz tai yaq daeuq zaeu bae saengq paenqdix, paenqdix goj mboq venq sinq.’"
Currently Selected:
Luhzaz 16: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
