Luhzaz 20

Jinj Yezsuz Pinh Gaeng Hoak Sowh Saeh Naeh

1Miz vaenz ux, Yezsuz yuq rownz dij Sen zau daenh, koanx kauqfaengz dij Sen dwk daenh, sowh goanz gvanx puj mbud dij Sen naeh, sowh lauxswz zau Sw Dij Sen naeh daj sowh puj saeq gvanx dij goanz Yaeuhtaiq naeh daeq maz henz Yezsuz, 2cham Yezsuz: "Mawz haxdoq piu, mawz pinh qenhliq gaeng hoak sowh saeh naeh mux? Zawh gawz aeu sowh qenhliq naeh hawj mawz?" 3Yezsuz yaeng paenqdix: "Gux goj cham su gaemz ux, su haxdoq gux. 4Su ruxndeq Yezhanq goanz saeh daenh hoak diauq zauh soiq naeh. Sowh gaenq zauh soiq dix hoak naeh zawh tw'zaw dij Sen hoak? Raj zawh tw'zaw dij goanz hoak? Yezhanqzawh puj zawxkauq dij Sen zaeh mbaeuq?" 5Paenqdix zoq dungzcham: "Jixzawh gaenqraeuz hax: ‘Zawh tw'zaw dij Sen hoak,’ dix toj rux hoakzaqnaeh hax raeuz mboqyaq, dix hax: ‘Haenx, gaenqsu baenzrawz naengz mboq sinq dix mah?’ 6Jixzawh gaenqraeuz hax: ‘Sowh gaenq Yezhanq zauh soiq naeh zawh tw'zaw dij goanz hoak,’ goanzlai rux aeu tin saeuh raeuz tai, unj, goanzlai gawz goj sinq Yezhanq zawh puj zawxkauq dij Sen zaeh." 7Yaq paenqdix zoq yaeng Yezsuz: "Gaenqpiu mboq ruxndeq." 8Yezsuz hax: "Haenx, gux goj mboq haxdoq su gux pinh qenhliq gaeng hoak sowh saeh naeh."

Zaeuj Sown Maegkaeu'it Daj Sowh Puj Su Oax Maegkaeu'it Naeh

9 Yezsuz laemh aen bixliq ux hawj daenh biak, dix hax: "Miz goanz ux, ndaem oax maegkaeu'it ux, dix aeu oax sown naeh su hawj daenh, hoakri dix zoq bae goh ndai ndowj ndowj taeuq. 10Taeng zwz baenz caeu, dix zoq yaix goanz puj koij ux maz daj sowh puj su oax maegkaeu'it dix naeh aeu gaenq sownq dix hoj ndaej naeh. Gaj sowh puj su oax maegkaeu'it dix naeh dup goanz puj koij dix yaix maz naeh, hawj goanz puj koij dix naeh mungzbyaeuq dauh bae. 11Zaeuj oax maegkaeu'it naeh daeuq yaix goanz puj koij ux maz. Sowh puj su oax maegkaeu'it naeh dup goanz puj koij naeh, yaq paenqdix naengz hawj goanz puj koij naeh laizlom taeuq, goj hawj goanz puj koij naeh mungzbyaeuq dauh bae. 12Zaeuj oax maegkaeu'it naeh daeuq yaix goanz puj koij ux maz, sowh puj su oax maegkaeu'it dix naeh dup goanz puj koij dix chaej naek, daem goanz puj koij dix og nog. 13Zaeuj oax maegkaeu'it naeh hax: ‘Hoakzaqrawz hoak nix? Gux ngaiq lug zaiz gux, gux nemz dix mwz, mbangjbaez paenqdix zaenzzungq lug zaiz gux.’ 14Gaj sowh puj su oax maegkaeu'it naeh leztaen lug zaiz dix, zoq hoakzaqnaeh dungzlaemh: ‘Mwznaj dez dix aeu oax sown naeh hawj dix. Jixzawh gaenqraeuz kaj dix, oax sown naeh zoq baenz oax raeuz.’ 15Yaq paenqdix zoq laeg dix bae baihnog oax sown naeh kaj. Hoakzaqnaeh, su ruxndeq zaeuj oax maegkaeu'it naeh hoakzaqrawz doiq paenqdix vah? 16Dix daeuj ndaep sowh puj su oax maegkaeu'it dix naeh mboqyaq, yaq daeuq aeu oax maegkaeu'it dix su hawj puj ndai." Sowh puj ruxnyinz naeh zoq hax: "Ah, mboq rux baenzzaqnaeh naeujbojleh!" 17Yezsuz lez paenqdix, hax: "Ndaw Sw Dij Sen hoakzaqnaeh hax:

"Kvaix tin puj hoak zangh aeu viangh naeh,

haeuz baenz tin'dinsaeu kvaix zungqyauq nyeuz daengzle naeh.

Gaenqnaeh zawh Zaeuj hoak,

gaenqnaeh hawj raeuz sawz taeuq.#20:17 Le gaemz naeh haeuz yuq ndaw Sw Lownx 118:22-23.#20:17 Gaemz naeh, tinzawh hax Yezsuz, puj hoak zanghzawh hax sowh goanz gvanx puj mbud dij Sen naeh, sowh lauxcwz zau Sw Dij Sen naeh daj sowh puj saeq gvanx dij goanz Yaeuhtaiq naeh.

Le gaemz naeh zawh hax gaeng mux? 18Gawz doak bae now boaj tin naeh, gawz toj nownzcumj mboqyaq. Boaj tin naeh doak bae ndang gawz, toj dip gawz nownzcumj mboqyaq." 19Sowh lauxswz zau Sw Dij Sen naeh daj sowh goanz gvanx puj mbud dij Sen naeh ruxndeq aen bixliq Yezsuz koanx naeh zawh hax paenqdix, paenqdix zawx cenq gaep Yezsuz, gaj paenqdix mbu goanzlai.

Hoj Mboq Hoj Kae Coiq Hawj Kaixsax

20Sowh lauxswz zau Sw Dij Sen naeh daj sowh goanz gvanx puj mbud dij Sen naeh nemz dij goanz bae dih Yezsuz naeh, damq dix. Paenqdix hoakdoi cham kauq zaeh, daz aeu kauq Yezsuz hoak saeh, hoakzaqnaeh zux aeu dix mwz hawj laux saeq gvanx mbanj naeh kaj dix baenz. 21Sowh puj paenqdix nemz mwz naeh zoq cham Yezsuz: "Lauxswz, piu ruxndeq sowh gaenq mawz hax naeh daj sowh gaenq mawz zau naeh yowngh rawz goj hoj, mawz goj mboq lez najta gawz, mawz doiq gawz goj dungzlumj, dij Sen hoakrawz hax, mawz zoq hoakrawz koanx dwk daenh. 22Gaenqpiu cham mawz hawj mboq hawj kae coiq hawj laux hongz Kaixsax?"#20:22 Kaixsax zawh laux hongz Loahmax gvanx lai goh naeh. 23Yezsuz ruxndeq paenqdix goix, zoq daj paenqdix hax: 24"Aeu mbaw dowhnah jenzngaenz ux hawj gux lez, tuh now dix daj minxzwh now dix zawh gawz?" Paenqdix yaeng: "Zawh Kaixsax." 25Yezsuz hax: "Zawh gaenq Kaixsax zoq hoj aeu hawj Kaixsax, zawh gaenq dij Sen zoq hoj aeu hawj dij Sen." 26Paenqdix yuq doqnaj daengzle dih aeu kauq Yezsuz hoaksaeh mboq miz, paenqdix goj mboq naemz Yezsuz rux yaeng baenz naeh, paenqdix zoq mbaet baeg mbaet ndaeng.

Dij Goanz Tai Yaq Rux Mboq Rux Daeuq Zaeu Zaeh

27Dij goanz baih Saxduzgaiz mboq sanz sinq dij goanz tai yaq rux daeuq zaeu.#20:27 Baih Saxduzgaiz zawh baih puj Yaeuhtaiq ux. Sw Dij Sen, paenqdix sinq gaj haj bwnz sw Moahciz laiz naeh. Paenqdix mboq sinq miz bin dij Sen, miz minghkoan, dij goanz tai yaq rux daeuq zaeu. Paenqdix miz jij goanz ux maz dih Yezsuz naeh, cham Yezsuz: 28"Lauxswz, yuq ndaw Sw Dij Sen Moahciz hoakzaqnaeh laiz: ‘Jixzawh gawz tai yaq, low gaj mijmez dix, mboq miz lug, nongx zaiz goanz tai naeh zoq hoj raep bihnangz dix hoak mez, saeh goz dix suplaeng.’#20:28 Gaemz kauq naeh haeuz yuq Sw Fahlih Daih Ngih 25:5. 29Haenx, gaenqpiu cham mawz: Rownz ux miz jiat bihnongx zaiz, lug zaiz to raep goanz mijmez ux, gaenqdix naengz mboq miz lug haeuz tai. 30Goanz daih ngih naeh daeuq raep bihnangz dix hoak mijmez, 31Goanz daih sam goj ndaej raep bihnangz dix. Daengz jiat goanz dungzlumj, gaj goanz gaj ndaej raep, gaj gawz goj naengz mboq miz lug haeuz tai. 32Doaklaeng goanz nyingz gaengnaeh goj tai. 33Haenx, jiat goanz paenqdix gawz goj ndaej raep goanz nyingz naeh hoak mijmez, vaenz dij Sen hawj dij goanz daeuq zaeu naeh, dix hoak mijmez gawz mawj?" 34Yezsuz hax: "Zoh gaeuq naeh, dij goanz raep niz raep, kai niz kai. 35Gaj sowh puj paeq ndaej mwz zoh mawq naeh, sowh puj paeq ndaej tai yaq daeuq zaeu naeh, paenqdix mboq raep goj mboq kai. 36Unj paenqdix daj bin dij Sen dungzlumj mboq rux tai. Taeng'hax paenqdix daeuq zaeu, paenqdix zoq zawh lug zaiz dij Sen. 37Hax taeng mbaed saeh dij goanz tai yaq daeuq zaeu naeh, daengz ndaw sw Moahciz naengz miz, zwz Moahciz leztaen bungzmaex miz faez naeh, Moahciz hoakzaqnaeh rongx dij Sen: ‘Dij Sen Yaqboahlazhanq, dij Sen Yitsaeg, dij Sen Yaqgowh.’#20:37 Gaemz kauq naeh haeuz yuq Sw Ni Aizjih 3:6. 38Dih dij Sen naeh, dij goanz zawh puj zaeu gangq, baenzzaqnaeh, dij Sen mboq zawh dij Sen puj tai, dix zawh dij Sen puj zaeu." 39Sowh lauxswz zau Sw Dij Sen naeh miz jij goanz ux hax: "Lauxswz, mawz hax ndaej hoj zaeh." 40Daeq mbaed naeh mwz, mboq miz gawz ganz maz chamraix Yezsuz.

Daqvaeq Rongx Jizduz Hoak Zaeuj

41 Yezsuz daj paenqdix hax: "Daenh hax Jizduz zawh luglan Daqvaeq wznoax? 42Daqvaeq hoakri dix haeggaj rongx Jizduz hoak Zaeuj. Gaemz dix rongx Jizduz hoak Zaeuj naeh yuq ndaw Sw Lownx, Daqvaeq hoakzaqnaeh hax:

"‘Dij Sen daj Zaeuj gux hax:

"Mawz naengh baih qensa gux,#20:42 Naengh baih qensa guxzawh hax: "Hawj mawz najta dwx nyeuz daengzle."

43taj gux aeu sowh puj daj mawz hoak dangqbaih naeh hoak sowh daengq sowq dej din mawz naeh."’"#20:43 Gaemz kauq naeh haeuz yuq Sw Lownx 110:1.

44 Yaq Yezsuz cham paenqdix: "Taeng'hax Daqvaeq rongx Jizduz hoak Zaeuj, haenx, su ciq hax, Jizduz hoakrawz ej daeuq zawh luglan Daqvaeq?"

Hem Sowh Lauxswz Zau Sw Dij Sen Naeh

45Gau daengzle biak naeh, Yezsuz daj cohsaenz dix hax: 46"Gaenqsu hem sowh lauxswz zau Sw Dij Sen naeh, paenqdix ngaiq nungh sowj riz daeq bae daeq dauh,#20:46 Jeh Yezsuz naeh, nungh sowjriz zawh hax najta dwx taeuq. ngaiq hawj daenh yuq zang hw goakdwk paenqdix, ngaiq yuq rownzndawcowq naengh aen sung nyeuz daengzle naeh, daj daenh zaemh jin byaeuzngaiz ngaiq naengh pyaeg zongz. 47Paenqdix hoakdoi daj dij Sen hax kauq ndowj yaengh ndowj. Paenqdix jinto sowh yah po haeuz tai yaq naeh, aeu za'hoq paenqdix nauq. Sowh goanz naeh dij Sen haeggaj rux fah paenqdix mboqyaq, zoah naek mboqyaq."

Currently Selected:

Luhzaz 20: ZHN

Highlight

Copy