Luhzaz 21

Yah Po Haeuz Tai Yaq Luk Taeuq Naeh Aeu Hawj Gajrawz

1 Yezsuz ngangh to lez, dix taen sowh puj baenzsaq naeh aeu ngaenzjenz nyaengx bae aen aeu hawj dij Sen naeh. 2Dix goj taen yah ux po dix haeuz tai yaq luk taeuq naeh aeu nyaengx bae song mbaw jenzdongz ix. 3Yezsuz zoq hax: "Gux haxdoq su swhlit, yah po dix haeuz tai yaq luk taeuq naeh, gaenq jenz dix aeu hawj naeh, hawj lai nyeuz daengzle. 4Unj, puj ndai gawz goj aeu gaenq low paenqdix hawj, gaj yah po dix haeuz tai yaq naeh hoakri dix naengz mboq doh, dix miz gajrawz zoq aeu hawj gajrawz nauq."

Rownz Dij Sen Rux Zoah Lid

5Doaklaeng miz dij goanz koanx, hax rownz dij Sen zawh aeu tin yawz daj sowh za'hoq ndae daenh aeu maz hawj dij Sen naeh zang. 6Yezsuz zoq hax: "Sowh gaenqsu leztaen naeh, taeng zwz maz, mboq miz saek kvaix tin yuq now kvaix ndai, gaj kvaix gaj zoah lid nauq."

Zaekgaj Taeng Vaenz Mowd Rux Baenzzaqrawz

7Paenqdix cham dix: "Lauxswz, zwzrawz miz sowh saeh naeh? Zaekgaj miz sowh saeh naeh zwzrawz log gaeng hawj piu ruxndeq?" 8Yezsuz hax: "Gaenqsu yauq caqsiq hem, laek hawj daenh yai zoah. Mwznaj rux miz dij goanz daeuj yai daenh hax paenqdix zawh Jizduz, yai daenh hax taeng zwz yah, gaenqsu laek nowngz paenqdix. 9Gaenqsu ruxnyinz baih rawz daj baih rawz dungzsaeuh, ruxnyinz daenh fanq puj saeq paenqdix, mwz saeuh puj saeq paenqdix, su goj laek mbu, sowh naeh cauz mboq rux ndaej, gaj naengz mboq cenq zawh vaenz mowd naeh."

10Yaq Yezsuz daeuq daj paenqdix hax: "Baih lej mwz saeuh baih, goh lej mwz saeuh goh, 11rux miz diqzaenq dwx, dih jenjyaeg miz lai, sowh aen chaej rux dungzbiad naeh miz lai. Ndaw fax miz sowh saeh hawj daenh mbu taeuq naeh, ndaw fax log sowh saeh mboq sanz taen naeh. 12Gaj daekgoanq sowh saeh naeh, miz dij goanz cholaeng su zawh dij goanz gux, zoq gaep su, gaemh su, aeu su mwz hawj rownzndawcowq, naengz rux aeu su kaeng bae ndaw lauz, laeg su mwz doqnaj laux hongz daj saeq dwx. 13Taeng zwz naeh, gaenqsu zoq miz jizhoiq aeu gaenq gux laemh dwk daenh. 14Baenzzaqnaeh zaw su yauq vwnxcih, laek nwh daz hoakrawz saeh hoakri hax. 15Unj, taeng zwz naeh, gux hawj su baegmyaeg, hawj su miz aen gvai, hawj sowh puj daj su hoak dangqbaih naeh gaemz yaeng mboq miz, hax mboq bex su. 16Daengz bohmeh su, bihnongx ndiang su, bihnongx su, dungzbownh su, naengz rux aeu su mwz hawj puj saeq. Gaenqsu mbangj goanz goj rux zoah paenqdix haiq tai. 17Gaenqsu cho zwh gux, rux zoah daenh hwnq. 18Gaj gaenqsu daengz laenj koanto ux naengz mboq hawj baenzrawz. 19Gaenqsu goq gaemx gaemx, aen mingh su zoq ndaej jeuq.

Yezsuz Hax Mwznaj Yezluqsaxlaengx Rux Vaihveh

20"Gaenqsu leztaen Yezluqsaxlaengx zoah bin homx zwzrawz, gaenqsu zoq ruxndeq dih naeh zaekgaj vaihveh nauq, zaekgaj baenz dih mowz yah. 21Taeng zwz naeh, gawz yuq mbanj Yaeuhdaq gawz zoq baenz lenh gowx mwz ndaw bo, yuq ndaw chaenh ndowj zoq baenz lenh ni, yuq ka'mowngz ndowj zoq baenz laek mwz ndaw chaenh. 22Unj zwz naeh zoq zawh zwz dij Sen rikdwk chaenxfah dih naeh, hawj sowh gaenq ndaw Sw Dij Sen mai naeh baenz zaeh. 23Ndauj gaengnaeh toj rux miz saeh dwx, miz nanq dwx, dij Sen rik daeuj doq now to dij goanz Yixsowhleh. Baenzzaqnaeh, ndauj gaengnaeh puj nyingz sowh puj bazlug naeh daj sowh puj lug eng naengz jin zuj naeh zoq nanh yah! 24Dij goanz Yixsowhleh laemx dawj remz, zoah daenh gaemh bae goh ndai hoak koij, Yezluqsaxlaengx zoah puj yowngh ndai nyanx mba'mbungj nauq, taj taeng puj yowngh ndai gvanx mowd zwzrawz zux gah.

Lug Dij Goanz Kviq Pajfax Loangz Daeuj

25"Mwznaj, tang'vaenz, aen hai, ndaundiq log sowh saeh mboq sanz taen naeh. Dihndin, goh rawz goj cholaeng hiang naemx ndaw haij fowd chungndae ej yuq mboq vangq mboq dangh. 26Sowh yuq ndaw fax naeh fenz nauq. Dij goanz nwh taeng sowh saeh zaekgaj daeuj naeh, mbu daengz towqkau daeuj saw. 27Taeng zwz naeh, paenqdix leztaen Lug Dij Goanz miz doakriangz lai, miz najta taeuq, kviq pajfax loangz daeuj. 28Daeh miz sowh saeh naeh, zoq zaekgaj taeng sowh vaenz dij Sen jeuq su naeh yah, su hoh zaemz, hoh mboq mbu gaeng, taj dij Sen daeuj jeuq su."

29 Yezsuz daeuq aeu aen bixliq ux daj paenqdix hax: "Aeu maex maeg'vowh daj maex yowngh ndai maz hax, 30gaenqsu leztaen paenqdix sowd nyit zwzrawz, gaenqsu zoq ruxndeq gvaq zwzgoangj zaekgaj taeng zwz'unq yah. 31Mwznaj gaenqsu leztaen sowh naeh baenz zwzrawz, gaenqsu zoq ruxndeq goh dij Sen zaekgaj daeuj yah. 32Gux haxdoq su swhlit, zoh naeh naengz mboq gvaq, gaj yowngh gaj rux baenz mboqyaq. 33Fax daj dihndin rux mboq miz, gaj kauq gux miz daengznauq."

34-35"Ndauj gaengnaeh sowh saeh naeh hoak daeuj now to daengz dij goanz dihndin nauq. Baenzzaqnaeh gaenqsu hem hoakri ixux, yaj sowh zwz su nwh gaj ndut laeuj, ndut imq, ndaw zaw nwh gaj sowh saeh dihndin naeh hawj zaw su moih, cenq zawh ndauj gaengnaeh, daj dij noag zoah kaeuvangh ndaek zoah dungzlumj. 36Gaenqsu gau gau jinh ixux, goq vanz vanz dij Sen, hawj su gowx gvaq sowh saeh naeh, ndaej yuq doqnaj Lug Dij Goanz in."

37 Yezsuz zang'vaenz yuq rownz dij Sen zau daenh, zang'haemh mwz bo maeghit ndowj. 38Zangnaw zaeux daenh zoq mwz rownz dij Sen, biak Yezsuz koanx.

Currently Selected:

Luhzaz 21: ZHN

Highlight

Copy