Juan 11
11
Yëla gut kie' Lázaro
1Zue' tue' bënni re'i'de le' Lázaro, nake bënni Betania yëdz kieenu María len nguul xhiil'nu Marta. 2María ni nak'nu nguul zaane Lázaro, leenu'a guk'nu nguul'a blaalj'nu le rla' xhixh lu ni'e Jesús len buspiidx'nu ley len gitza ikj'nu. 3Ka guk, na' groptek'nu nguul ni gulunabe'nu tzajëëdx'ke Jesús:
—Xan, bënni'a rdzaag'tzku'ne dxia'a re'i'de.
4Kati byëën'de le ni Jesús gne':
—Baya' ni ti nak le glui'lau'i yëla gut, nak naar glui'lau'i yëla xhën kie' Dios lekz'ka' yëla xhën kie' Xi'ine Dios.
5Zala Jesús nadxi'i'tzki'de Lázaro, Marta len nguul xhiil'nu'a, 6kati gulagixhji'de Le' ki Lázaro re'i'de bga'an're ye chop dza ga zue'a. 7Gdëëd'a gudxe bënni useed kie':
—Gultza' le yubl Judea.
8Bënni useed kie' gle'ke Le':
—Bënni Useed, kati dza'a na'z bënni Judea gle'en'de ludëëd'de Li' tzka luchiije li' giaj, ¿ati na'a yubl re'en'du tziiju ni'?
9Jesús gudxe leke:
—¿Naru keg chin'nu ur nap tu dza? Xhki nu bënni rde' te'dza, ti rtupe, koma rle'i'de yëla yeni ki yëdz'lyu ni; 10san xhki nu bënni rde' reel, rtupe, koma yëla yeni ti zua'leen le'.
11Lekz'ka' gne':
—Lázaro bënni'a rdzaag'ru'ne dxia'a rasie', san utzajspaana'ne.
12Bënni useed kie' gle'ke Le':
—Xan, xhki rasie', re'e'ni gna ki ueake.
13San le gudxe leke Jesús nak ki Lázaro chi gutie', ati bënni useed kie' glaki'de ki ras'ze. 14Na' Jesús gdixhji'de leke dxia'a'tit:
—Lázaro chi natie'. 15Len rudziij'da le ti gzua' ni', koma le ni nak'r dxia'a kieeli, naar tzajle'li. San gultza' tzajyu'ru'ne.
16Na' Tomás, bënni'a te'ke le' Bënni Kuach, gudxe ye la'ke bënni useed'a:
—Gultza' tziaj'ru lekz'ka' ro'u, naar gat'leen'ru'ne.
Jesús nake yëla naban len ruune ga bënni nat lubaane lu yëla gut
17Kati bdxiine, Jesús gnëëz'de ki chi guk tap dza bga'che'e Lázaro. 18Betania zua' ga'la ki Jerusalén, ka gatzj ur nëëz; 19bënni zian bënni Judea yajake yajyu'ke'nu Marta len María, naar luwi'xhën'ke'nu le gutie' bënni zank'nu. 20Kati Marta gnëëzi'nu ki Jesús chi ze'e, broj'nu zajxi'nu'ne; ati María nu'yu'uz bga'an'nu. 21Marta guudx'nu'ne Jesús:
—Nar'la zu' ni Xan, ti gatie' bënni zaana'a. 22San nëëz'da ki le Li' gnaab'du'ne Dios Le' gunne.
23Jesús gudxe'nu:
—Bënni zaanu ubaane lu yëla gut.
24Marta guudx'nu'ne:
—Nëëz'da ki le' ubaane lu yëla gut kati gdxin dza uudx ki yëdz'lyu, kati bënni nat lubaane lu yëla gut.
25Na' Jesús gudxe'nu:
—Neda naka yëla ruban lu yëla gut len Yëla Naban. Bënni rajle'e neda, zala gat'tze, uyu'u yëla naban kie'; 26ati nu'ti'teez bënni, bënni yu'u yëla naban kie' len tzajle'e neda, ti gat'kze. ¿Rajle'u le ni?
27Leenu guudx'nu'ne:
—Xan, neda rajle'a ki Li' naku Le' Cristo, Le' Xi'ine Dios, bënni'a rala'kz giide yëdz'lyu.
Jesús rbëëdxe kuiti ba kie' Lázaro
28Buudx gnaanu ki, Marta yajliidz'nu María nguul xhiil'nu, len baga'chi'z guudx'nu leenu:
—Ni chi ble'e Bënni Useed len rliidze li'.
29María buudx'z byëëni'nu le ni, gyas'nu len yajyu'nu'ne Jesús. 30Jesús ti ryaazi'de lu yëdz'a; ni ze' ga budzaage'nu Marta. 31Bënni Judea bënni'a nakua'ke tuwi'xhëëne'nu kati gulale'i'de ki María gzui'nu len ziubz'nu broj'nu, yajak'leene'nu koma glaki'de ki ziaj'nu zajchëëdx'nu ra baa.
32Kati María bdxin'nu ga ze' Jesús, bzechu xhiib'nu xhni'e, len guudx'nu'ne:
—Nar'la zu' ni Xan, ti gatie' bënni zaana'a.
33Kati Jesús ble'i'de ki María rbëëdx'nu len lekz'ka' bënni Judea bënni'a guladxin'leene'nu, ben'yechi Le' len bui'i'ni'de, 34ati bnaab'de leke:
—¿Gaxh pka'chi'li'ne?
Gle'ke le':
—Xan, da duyue'.
35Jesús grëëdxe. 36Na' bënni Judea gulanake:
—¡Guluyu'tzka bdxi'i'tzki'de le'!
37San ye la'ke gulanake:
—Bënni ni buune bënni lau'chul, ati ¿Naru ti benn bi guune naar ti gatie' Lázaro?
Lázaro rubaane lu yëla gut
38Yubl bui'i'ni'de Jesús len gbiige'e ra baa. Nak tu bloj giaj ati tu giaj nusiaj ley ga ta'a'ke. 39Jesús gne':
—Gulkua giaj'a.
Marta, nguul zaane Lázaro guudx'nu'ne:
—Xan, chi rle'e zgut, koma chi guk tap dza gutie'.
40Jesús gudxe'nu:
—Baxht guudxa li' ki xhki tzajle'u, ule'i'du yëla xhën kie' Dios.
41Gulaguáke giaj'a, ati Jesús ryue' lu xhba na' gne':
—Xuuza, runna li' yëla dexhken koma chi byëën'du neda. 42Nëëz'da ki Li' ryëëni'tikz'du neda, san le ni rnia', naar bunach nakua' ni layajle'ke ki Li' psë'lu'u neda.
43Buudx gne' le ni, bisku'e:
—¡Lázaro, buroj na'!
44Ati bënni'a gutie', brooje, naaga' ni'a ne'e len laari len lau'rue'e nadu'li tu laari naab'kde. Jesús gudxe leke:
—Guluseedxe len gulusaane wëëje.
Tuune diidza lazëëne Jesús
(Mt 26:1-5; Mr 14:1-2; Lc 22:1-2)
45Lena'a bënni zian bënni Judea bënni'a yajak'leene'nu María len gulale'i'de le beene Jesús, gulayajle'ke. 46Ati la'ke yajyu'ke bënni fariseo len gululaabe kieke yugute' le beene Jesús. 47Na' bënni fariseo len bënni tunabe'i'de pxuuz gulutzaage yugute'ke bënni tabeki'xhbei'de lu gdou', len gulanake:
—¿Bixh gun'ru? Bënni ni run'tzke yëla wak. 48Xhki gui'ru'ne latj, yugute' bunach ulayajle'e Le', ati bënni tunabe'ke Roma udujak'ke len udujenditj'kde gdou' len yëdz xhën kieeru.
49San tue' bënni le' Caifás, bënni nake pxuuz blou iz'a, gudxe leke:
—Lbi'ili tibi nëëzi'li, 50len ti rak'be'i'li ki nak'r dxia'a kieeli ki tuuze bënni gatie' nia'a ki gdu yëdz, ka gdu yëdz xhën jgin'j.
51Ati Caifás ti gne' le gnaaz kie', san, le nake pxuuz blou iz'a gne' diidza'a ulaaz kie' Dios, ki Jesús gatie' nia'a kieke bënni Judea; 52len keg nia'az kieke bënni ni gatie', san lekz'ka' gatie' nia'a kieke yugute'ke bënni xi'ine Dios gap nakua'ke. 53Ati na'teez bënni tunabe'ke bënni Judea gluune diidza ludëëd'de Jesús.
54Lena'a Jesús tir gde' ladj'ke bënni Judea, san brooje ki Judea ati gyiije tu yu ga'la latj yu biidx, tu yëdz nazi' lei' Efraín. Na' bga'ane len bënni useed kie'.
55Lati'iz ryaadzji gdxin lni ki Pascua kieke bënni Judea, lena'a bunach zian ki yugute' yëdz zjake Jerusalén zia'al ki lni' ni, naar luune le chi naleeb'kde tuune kati tupa'a kuin'ke. 56Tadáke tugiilje Jesús, len lu gdou' tunaabi lza'a'ke:
—¿Bixh ruuni lbi'ili? ¿Wiide lni u ti giide?
57Bënni fariseo len bënni tunabe'i'de pxuuz gulunabe'ke ki xhki nu nëëzi gaxh zue' Jesús, kixhjë'e, naar gunn lazëëne Le'.
Currently Selected:
Juan 11: PZD
Highlight
Share
Copy
Want to have your highlights saved across all your devices? Sign up or sign in
© Sociedad Biblica de México AC
