Juan 12

Tuunu nguul rlaalj'nu'ne le rla' xhixh Jesús

1Ni ryaadzji xop dza gdxin lni ki Pascua, Jesús gyiije Betania ga zue' Lázaro bënni'a buspaane lu yëla gut. 2Na' gluune tu lni kie' Jesús ki si'e bala'an; Marta rga'a'nu la'wa'gu ati Lázaro rë'e raagu'leene Jesús. 3María nua'nu tu rë'ë'du le yuudz le rla' xhixh naki yaj tu'sen nardo le zaki'i'tzki len glu'u'nu ley ni'e Jesús; chi nak ka buspiidxi'nu ley gitza ikj'nu. Ati gdu nu'yu'a gla'tzka xhixh. 4Na' Judas Iscariote, bënni'a rala gdëëde Jesús lu naa'ke bunach, gne':

5—Gula'l to'u le ni, lunne ki tzka laaxhj'ru ki tson'gayua' dza naar gak'leen'ru'ne bënni yechi.

6San keg tzka rki'i le' gak'leene bënni yechi gne' ki Judas, le nake bënni gban'a, len de' lu ne'e yëxhj dumi ati rbiaj'laane ley. 7Jesús gudxe le':

—Be'nu latj, koma ben'chi'nu ley ki na' gdxin dza jga'cha'a. 8Bënni yechi ulakua'tekze len lbi'ili, san neda ti sua'tekza len lbi'ili.

Tuune diidza nakxh ludëëd'de Lázaro

9Bënni zian bënni Judea gulanëëz'de ki Jesús zue' Betania len yajake ni', keg Jesús'z zajyu'ke lekz'ka' te'en'de lale'i'de Lázaro, bënni'a buspaane lu yëla gut. 10Na' bënni tunabe'i'de pxuuz gluune diidza ludëëd'de Lázaro, 11koma xhtu'le'e le' bënni zian bënni Judea tarooje chop'l len tayajle'ke Jesús.

Jesús ryaazie Jerusalén

(Mt 21:1-11; Mr 11:1-11; Lc 19:28-40)

12Bunach zian yajake Jerusalén lni ki Pascua. Bueikj dza'a gulanëëz'de ki Jesús udxiine yëdz'a. 13Na' gulagitzje zin ati yajtzaag'ke Le': tuskua'ke:

—¡Hosana! ¡La'ay nake bënni ze'e ulaaz kie' Xan'ru, Bënni Rnabe'e Israel!

14Jesús budzëël'de'ba tuuba burru len gdxie'ba, ka rna Diidza La'ay:

15«Ti gaadx'du yëdz Sión;

Bënni Rnabe' kiu' ze'e

dxie'ba tuuba burru'du.»

16Bënni useed kie' ti gulayajni'i'de le ni; san kati le' bubaane lu yëla gut, gyajnei'kde ki yugute' lea gluune kie' nayoj lu Diidza La'ay len rui' diidza kie'.

17Bunach'a nakua'leene Jesús kati bliidze Lázaro yu'e lu ba len buspaane le' lu yëla gut, tulaabe le gulale'i'de. 18Lena'a bunach'a yajtzaag'ke Jesús, koma gulanëëz'de yëla wak xhën le beene. 19San bënni fariseo te' lza'a'ke:

—Chi benn'be' ki tibi sua'kz ga gun'ru. ¡Yugute' bunach yëdz'lyu zjak'leene Le'!

Bënni Grecia tugiilje Jesús

20La'ke bënni Grecia nutza'ke ladj'ke bënni'a yajake Jerusalén tayiijilaadxi'ke Dios lu lni. 21Bënni ni gulabiige'e ga ze' Felipe bënni Betsaida, tu yëdz ki Galilea, len glatayui'de le':

—Xan, re'eni'tu gle'i'tu'ne Jesús.

22Felipe gdixhji'de Andrés len grop'te'ke gulagixhji'de Jesús. 23Na' Jesús gudxe leke:

—Chi bdxin dza kati Xi'ine Bënni gake xhën. 24Le nak'te rea' lbi'ili ki xhki xhsei xhua'xhtiil ti rat kati rëxhj lyu, tibi rbia; san xhki rat, rbia'tzka xhsei 25Bënni nadxi'i'de yëla naban kie', unitie' ley; san bënni gun'gu'un'de yëla naban kie' lu yëdz'lyu ni, usle' ley ki yëla naban tzalzu. 26Xhki nu bënni re'en'de gake bënni wendxin kia', rala giid'leene neda, len ga sua' neda, na' sue' lekz'ka' bënni wendxin kia'. Xhki nu bënni gake bënni wendxin kia', Xuuza unëëdzje kie' bala'an.

Jesús rgixhjë'e ki yëla gut kie'

27»¡Ka'teez zuaaru rnëëz'da tu bagi'i xhën! ¿Ati bixh gnia'? ¿Gunn gnia': “Xuuza buslá neda lu bagi'i xhën ni”? ¡Lena'a'kza za'a! 28Xuuza, ben xhën lou'.»

Na' byën tu chi'i za' yewayuba, le rna: «Chi beena ley xhën, len yubl uuna ley xhën.»

29Bunach gulayëën'de'a tanáke ki gziu'a; san la'ke tanáke:

—Tue' Gbaaz La'ay kie' Dios bliidze Le'.

30Jesús gudxe leke:

—Keg nia'a kia' byën chi'i ni, nia'a kieeli'a. 31Chi bdxin dza Dios kchuug'be'e ki yëdz'lyu len na'a ubiije bënni xëwi'a rnabe'e yëdz'lyu ni. 32San kati luchise Neda, guuna ga bënni zian liide ga zua'.

33Len le ni rgixhjë'e nakxh si'e yëla gut kie'. 34Bunach gulubi'e kie' diidza:

—Netu nëëzi'tu ki lu xhba kie' Dios rna ki Le' Cristo ti gat'kze. ¿Ati li' rnou' ki Le' Xi'ine Bënni rala luchise Le'? ¿Nuxh bënni'a Le' Xi'ine Bënni?

35Jesús gudxe leke:

—Yëla yeni uzuaar ye tu chi'i len lbi'ili, san ye tuchi'iz sua. Gultá tzal ni zua len lbi'ili yeni ni, naar ti sën lbi'ili yëla chul koma bënni rde' ga nak chul ti nëëz'de gaxh ziije. 36Gultzajle' yëla yeni tzal ni zua'leen lbi'ili naar gaki'li ki yëla yeni.

Buudx gne' yugute' le ni, Jesús zuwëëje yajkachi'lau'de leke.

Bixhkia' bënni Judea ti gulayajle'ke Jesús

37Bunach ti tayajle'ke Jesús; zala chi ben'tzke yëla wak xhën'te lau'ke 38Koma rala gak le bzooje Isaías bënni be'e diidza ulaaz kie' Dios:

«Xan, ¿nuxh gyajle' xhtiidza'ru?

¿Nuxh ki blui'e Xan'ru yëla wak kie'?»

39Ati ti runn layajle'ke, koma lekz'ka' bzooje Isaías:

40«Dios nusiije lau'ke

len bziidie laadxi'dau'ke,

naar ti gunn lale'i'de

len ti gunn layajni'i'de;

naar ti lubi'i'laadxi'ke len neda,

len neda ti un'ka'ne.»

41Isaías gne' le ni koma chi ble'i'de yëla xhën kie' Jesús ati be'e diidza kie'. 42San bënni zian bënni Judea gulayajle'ke Jesús, lekz'ka' la'ke bënni blou. San ti tagixhjë'ke koma taadx'de bënni fariseo, naar ti lulaag'ke leke ki yu'u useed. 43Tun'le lau yëla ba ki bunach ka yëla ba kie' Dios.

Xhtiidze'e Jesús kchuug'be' ki bunach

44Zidzj gne' Jesús: «Bënni rajle'e neda keg neda'z rajle'e, lekz'ka' rajle'e Xuuz'ru, nu nusë'la neda. 45Ati bënni rle'i'de neda rle'i'de lekz'ka' nu nusë'la neda. 46Neda naka yëla yeni, za'a yëdz'lyu naar bënni layajle'ke neda ti laga'ane ga chul. 47Bënni'a ryëën'de xhtiidza'a len ti rzenaage ley keg neda ruspaaga'ne xhgia'; koma neda ti za'a uspaaga'a xhgia' yëdz'lyu, za'a uslá ley. 48Bënni ti rzi'e neda len ti rzenaage xhtiidza'a, chi nak nu guspaaga le' xhgia': diidza'a chi be'leena lbi'ili guspaaga le' xhgia' dza gdxin lu'uudx ki yëdz'lyu. 49Koma ti za'a guuna le gnaaz kia'; Xuuza psë'le'e neda, gnabe'i'de neda le rala gnia' len le kseed'da. 50Len nëëz'da ki le gnabe'e Xuuza nua' yëla naban tzalzu. Ka' nak, le neda rnia', nak gnabe'i'de neda Xuuza gnia'.»

Currently Selected:

Juan 12: PZD

Highlight

Copy