Lucas 19

Jesús len Zaqueo

1Jesús gyaazie yëdz Jericó len gzulau'e rde' lu yëdz ni. 2Na' gzue' tue' bënni le' Zaqueo len de'tzka kie' dumi, le' nake xan'ke bënni tukiixhj'ke laaz'sua'ke ki Roma. 3Zaqueo re'en'de umbe'e Jesús len ti rde'li'de gle'i'de le' koma rë'tzka bunach, len le' nake bënni we'en'du. 4Lena'a kxiti'e gnëëre, na' greene tu yaag xhën, ga'la'z ga rala tëëde Jesús, naar gde'li'de gle'i'de le'. 5Kati Jesús gdëëde ni', byue' zga ra'al len gudxe le':

—Zaqueo ziuub'zu bëtj, koma na'dza rala jga'ana liidxu.

6Zaqueo ziuub'ze bëtje len gdu laadxe'e gxhi'e Jesús. 7Kati gulale'i'de le guk ni, yugute'ke gulazulau'ke tanéke kie' Jesús, le zajga'ane liidxe tue' bënni dula. 8Zaqueo gzui'de gudxe Xan'ru:

—Xan, gatzj le de kia' gnëëdzja kieke bënni yechi len xhki nu bënni glaana le de kie', neda unëëdzja kie' ye tap ka.

9Jesús gudxe le':

—Na'dza bdxin yëla ruslá nu'yu'u ni, koma bënni ni lekz'ka' nake xi'in'xhzue' Abraham. 10Koma Le' Xi'ine Bënni biide dudiilje len dusle' le chi na'nit.

Diidza le run lsaki'i ki dumi

11Bunach tayëën'de le rne' Jesús len blaabe tu diidza le run lsaki'i, le chi zue' ga'la'z ga de yëdz Jerusalén len leke taki'de ki yëla rnabe' kie' Dios chi zua'te glui' lau'i.

12Gudxe leke: «Gzue' tue' bënni blou, ziije zitu tu yëdz yubl, naar lui'e le' yëla rnabe' len chi nak ka wëëde. 13Kati chi zua tziije bliidze chi'ke bënni wendxin kie', len be'e leke tu tue' zxhëni dumi len gudxe leke: “Gulugun dxin len dumi ni tzal neda wëëda”. 14San bunach laadze'a talei'de le', len gulusë'la'ke gbaaz kieke ga ziije ki lanáke: “Ti re'eni'tu ki bënni ni gnabe'i'de netu”.

15»Kati chi gxhi'lu'ne'e yëla rnabe' ni, budxiine laadze. Kati budxiine, psë'le'e nu tzajliidz leke bënni wendxin kie' bënni'a bnëëdzje kieke dumi, naar gnëëz'de gaka chi gluune ikji tu tue'. 16Bënni zia'al bdxiine lau'e len gne': “Xan, dumi kiu' ni chi ben ikji ye chi kë' ka'” 17Xaane'a bubi'e diidza: “Dxia'a'te beenu, naku tue' bënni wendxin tzawi, zala lati'iz gxhi'u naku kxënilaadxa'a li', lena'a guuna ga gnabe'u chi yëdz”. 18Bdxiine lau'e ye tue' bënni wendxin kie' len re' le': “Xan, dumi kiu' ni chi ben ikji ye ga'yu' kë' ka'.” 19Len lekz'ka' gudxe bënni ni: “Li gnabe'u ga'yu' yëdz”.

20»Ati bdxiine lau'e ye tue' len re' le': “Xan, ni de dumi kiu'. Ben'chi'a, ptul'da ley laari; 21beena ki le guudxi'da li', koma naku tue' bënni bixhj, ki ruzi'u le ti nunëëdzju len rla'pu ga ti guuzu.” 22Na'ar Xaane'a re' le': “Ti naku bënni wendxin dxia'a, nia'a ki diidza le buudx be'u ka' ksaka'a li'. Xhki nëëz'du ki naka bënni bixhj, ki ruzi'a le ti bnëëdzja len rla'pa ga ti guuza, 23¿Bixhkia' ti yajlu'u dumi kia' ga rak'chi'i dumi, na'ar kati udxiina uzi'a ley gdu len ikji?” 24Len gudxe bënni'a nakua'ke na': “Gulkua dumi'a len gulunëëdzj kie' bënni'a beene ikji ye chi kë' ka dumi.” 25Gle'ke le': “Xan, ¡bënni'a chi de kie' chi kë' ka dumi!” 26Len Bënni rnabe' ni bubi'e diidza len gne': “Rgixhji'da lbi'ili ki bënni'a de kie', uzi're zxhëni; len bënni'a ti de kie', zala lati'du'z le de kie' ulaguáke. 27Ati bënni'a ti tale'i'de neda dxia'a len ti gle'en'de ki neda gnabe'a, gultzajxi'ke ni len guludëëd'de lau'a ni.”»

Jesús ryaazie Jerusalén

(Mt 21:1-11; Mr 11:1-11; Jn 12:12-19)

28Kati buudx gne' ki Jesús, bugie'le'e nëëz ziije yëdz Jerusalén. 29Kati chi bdxiine ga'la ga de yëdz Betfagé len Betania, kuiti Gia'a Ki Olivos, Jesús psë'le'e chope' bënni useed kie', 30len gudxe leke:

—Gultziaj yëdz'du de ni', len kati gdxin'li ni' tzajxaka'li'ba tuuba burru naaga'ba, bua' ni nutunu rbii'ni leeba. Guluseedx'ba len gultzajxi'ba ni. 31Len xhki nu gnaabi lbi'ili bixhkia' rseedx'li'ba, giek'li'ne ki Xan'ru ryaadzj'de'ba.

32Bënni useed kie' yajake len yajxaka'ke ka'teez gudxe leke Jesús. 33Tzal tuseedxe'ba burru ni, bënni xama gulunaab'de leke:

—¿Bixhkia' rseedx'li'ba?

34Leke gulanake:

—Xan'ru nayaadzj'de'ba.

35Len guluxua'ke xha'ke kuudzu'ba, guluche'ke'ba ga zue' Jesús len gluune ga gdxie'ba. 36Ka ziije rdëëde Jesús, bunach tuchiilj'ke xha'ke la nëëz ga rala tëëde. 37Kati chi bdxiine ga'la ga zua ldinn ki Gia'a Ki Olivos, yugute'ke bënni zjak'leene le' gulazulau'ke tuskua'ke yëla rudziiji len tagu'e ba Dios ki dera yëla wak xhën le chi gulale'i'de. 38Len tanáke:

—¡La'ay nake bënni rnabe' ni ze'e ulaaz kie' Xan'ru! ¡Yëla rë'dxi zua lu xhba len yëla ba yewayuba!

39Na' la'ke bënni fariseo nu'tza'ke ladj bunach zian'a gle'ke le':

—Bënni Useed, gdil'leen'ke bënni'a zak'leene li'.

40Len Jesús re' leke:

—Rgixhji'da lbi'ili ki xhki leke luzuadxi'ke lagu'e neda ba, yugu giaj uluskua'.

41Kati bdxiine ga'la Jerusalén, len ble'i'de yëdz ni, Jesús grëëdxe ki, 42len gne': «¡Nar'la na'dza li' tzajni'i'du le gun gunn kiu' yëla rë'dxi! San na'a nuka'chi' lau'i li' len ti runn gle'i'du. 43Len uladxin kiu' dza ti nakgak dxia'a, len bënni ti tale'i'de lbi'ili dxia'a ulun'ke tu zë'ë gdu ga zelau zuaali, ulagu'e lbi'ili li'aj, uladil'e len lbi'ili gati'il zua latj, 44len ulukin'je li' gdu ka naku. Uludëëd'de bënni yëdz kiu', len ti luka'ane tu giaj lau'i ye tu giaj, le ni gak koma ti guk'be'i'li kati Dios biide duyue' lbi'ili.»

Jesús rpe'e yu'u gdou'

(Mt 21:12-17; Mr 11:15-19; Jn 2:13-22)

45Gdëëd le ni, Jesús gyaazie lu gdou' len gzulau'e rubiije bënni'a tuti'i'ke ni, 46len gudxe leke:

—Lu Diidza La'ay rna ki: “Liidxa gak tu yu'u ga bunach lui'leene diidza Dios”, ati lbi'ili chi nun'li ley tu latj ga tuka'chi' lau'ke bënni gban.

47Yugu dza Jesús rseed'de bunach lu gdou', len bënni nakua'ke lau'i kieke pxuuz, bënni useed xhba kie' Dios len lekz'ka' bënni nakua'ke lau'i yëdz tadáke tugiilje nakxh luune ludëëd'de le'. 48Ati ti tadzëël'de nakxh luune, koma yugute' bunach nakua'ke tuzenaage xhtiidze'e.

Currently Selected:

Lucas 19: PZD

Highlight

Copy