Lucas 20

Yëla rnabe' kie' Jesús

(Mt 21:23-27; Mr 11:27-33)

1Tu dza, tzal Jesús zue' lu gdou' rseed'de bunach len rgixhji'de leke diidza kub dxia'a, guladxiine bënni'a tunabe'i'de pxuuz len bënni useed xhba kie' Dios, nadzaag'ke bënni guul tuzeajni'i'de, 2len gle'ke le':

—¿Len bixh yëla rnabe' ruunu le ni? ¿Nuxh nunn kiu' yëla rnabe' ni?

3Jesús bubi'e diidza:

—Lekz'ka' neda unaab'da lbi'ili, gulubi'i kia' diidza: 4¿Nuxh psë'la le' Juan jkiile nis, Dios u bunach?

5Larakz leke glun'ke diidza len tanáke: «Xhki gnaaru ki Dios psë'le'e le', gie'e ro'u: “¿Bixhkia' ti gyajle'li'ne?” 6Len xhki gnaaru ki bunach gulusë'le'e le' bunach uludëëd'de ro'u tzka'ti'ga lulaadxi'ke ro'u giaj, koma nëëzi'kde ki Juan be'e diidza ulaaz kie' Dios.» 7Lena'a gulubi'e diidza gle'ke le': ti nëëzi'tu nuxh psë'la le' Juan jkiile nis. 8Na'ar Jesús gudxe leke:

—Lekz'ka' neda ti kixhji'da lbi'ili len bixh yëla rnabe' ruuna le ni.

Diidza run lsaki'i kieke bënni xhe'e taaze uva

(Mt 21:33-44; Mr 12:1-11)

9Gzulau'tie' Jesús blaabe kieke bunach tu diidza run lsaki'i:

—Tue' bënni guuze uva layeel kie', len pka'ane lu naa'ke bënni luune dxin len gze'e ziije zitu. 10Kati chi guluchiibe uva ni, psë'le'e ye tue' bënni wendxin kie' tzajnaabe le rala laaze ki le guluchiibe bënni'a glaaze uva ni; ati leke glutie' le' len gulusë'le'e le' kakz'ka. 11Na'ar bënni xaani layeel ni psë'le'e ye tue' bënni wendxin kie'; ati lekz'ka' gulutzag'yuudxe le' diidza len glutie' le' len gulusë'le'e le' kakz'ka. 12Psë'le'e bënni yubl, ati bënni'a glaaze uva ni lekz'ka' gluun'de le' zi' len gulubiije le' layeel'a.

13»Na'ar bënni xaani layeel ni gne': “¿Bixh guuna?” Usë'la'ne bënni xi'ina nadxi'i'tzki'da'ne, naxhka lui'e le' yëla bala'an. 14Len kati bënni'a glaaze uva ni gulale'i'de le', te' lza'a'ke: “Ni' ze'e bënni xi'ine bënni'a nake xaani layeel ni, guldá gdëëdi'ru'ne, naar gaki kieeru layeel kie' ni.” 15Na' gulubiije le' layeel'a len guludëëd'de le'.

»¿Ati bixh rsaka'ali lbi'ili guune bënni xaani layeel'a kieke? 16Uyiije len gdëëd'de bënni'a glaaze uva ni len gnëëdzje layeel kie' lu naa'ke bënni yubl.

Kati gulayëën'de le ni, gulanake:

—¡Dios ti ksaane netu!

17Ati Jesús byue' leke len gne':

—¿Bixh re'e'ni gna' Diidza La'ay ni?:

“Giaj'a ti gulayazlaadxi'ke bënni'a tuune yu'u

na'a chi nak giaj blou.”

18Nu'ti'teez nu gbixh lau'i giaj ni, watzj; len dëz kë' nu tzajbaaga ley giaj ni.

19Bënni tunabe'i'de pxuuz len bënni useed xhba kie' Dios gle'en'de lazëëne Jesús na'teez, koma gulak'be'i'de ki len diidza run lsaki'i ni, gne' kieke. San glaadxi'de bunach nakua'k ni'.

Yëla rnaab ki laaz'sua'ke

(Mt 22:15-22; Mr 12:13-17)

20Gulusë'le'e bënni lauyuudxe Jesús, lun'ke lua' nak'ke bënni dxia'a, naar luune ga gne' Jesús diidza le ti layaazlaadxi'ke ki ludëëde le' lu ne'e bënni rnabe'i'de leke. 21Bënni ni gulunaab'de Jesús:

—Bënni Useed, nëëzi'tu ki le li' rnou' len le rseed'du nak dxia'a, len ti rbiaj'je'idu bunach. Li' rseed'du ka'teez nak nëëz kie' Dios. 22¿Ba nak dxia'a kiixhj'tu laaz'sua'tu kie' César#20:22 César: Gxhi' le' César bënni rë'e Roma rnabe'e yëdz'lyu. u ti nak?

23Jesús, guk'be'i'de ki yu'u xhe'e ikj'lau'ke len gudxe leke:

24—Gulului'i'tzki neda tu dumi kieeli. ¿Nuxh lau'rui'i da' ni len nuxh lei' nayoj ni?

Leke gle'ke le':

—Kie' César.

25Jesús re' leke:

—Gulunëëdzj kie' César le nak kie' César, len gulunëëdzj kie' Dios le nak kie' Dios.

26Len ki dera le gne' Jesús ti guladzëël'de diidza ku layaazlaadxi'ke ki lazëëne le', na' gulubaan'de ka rubi'e diidza len tirbi gle'ke le'.

Tunaabe xhki bënni nat tubaane yëla gut

(Mt 22:23-33; Mr 12:18-27)

27Gdëëd'a la'ke bënni saduceos yajyu'ke Jesús. Bënni saduceos ni ti tayajle'ke ki bënni nat uluban'ke, lena'a gle'ke ki Jesús:

28—Bënni Useed, Moisés bzooje lu gich ki xhki nu bënni nutzag'ne'e gatie' len ti gulakua'bi bi kie' len nguul kie', bënni bë'chi' guulje rala si'e'nu ka nguul kie' nguul'a bugan'n uzeeb'nu naar gnëëdzje'bi bi kie', kie' bënni bë'che'e chi gutie'. 29Guk ki, gulakua'ke gaadx bë'chi'ke, bënni naguul ptzag'ne'e, ati gutie' len ti gulakua'bi bi kie'. 30Bënni burop 31len bënni bunn gulakua'leene'nu len lekz'ka' bënni'a ye la'ke, ati gaadx'ke ka glatie' len nutunu bi kieke gulakua'bi. 32Buudx'r na' gut'nu lekz'ka' nguul'a. 33Na' kati bënni nat lubaane lu yëla gut dza zia'a za', ¿Nuxh'lke gak nguul kie' nguul ni xhki gaadx'ke ka gulakua'leene'nu?

34Jesús bubi'e diidza:

—Dza ni zuaaru na'a, bënni len nguul tutzag'naa'ke; 35san bënni'a kueki'xhbei'de kieke Dios ki luzi'ke xhbei yëla naban zia'a za' len lubaane, bënni u nguul tir lutzag'naa'ke, 36koma tir gunn lat'gake. Len ulak'ke ka gbaaz la'ay kie' Dios len lak'ke xi'ine Dios le chi gulubaane lu yëla gut. 37Kuin'kze Moisés, ga nayoj lu gich ki bezka raaxh gi', rlui'de ro'u ki bënni nat tuban'ke lu yëla gut. Na' rna ki Xan'ru nake Dios kie' Abraham kie' Isaac len kie' Jacob. 38¡Len le' ti nake Dios kieke bënni nat, nake Dios kieke bënni ban, lau'e Le' yugute' bunach naban'gak!

39La'ke bënni useed xhba kie' Dios gle'ke le':

—Ka'teez nak gnou', Bënni Useed.

40Len tirbi guluwaaxhj'de bi lunaab'de le'.

¿Nuxh xi'ini nake le' Cristo?

(Mt 22:41-46; Mr 12:35-37)

41Jesús bnaab'de leke:

—¿Bixhkia' rnaali ki le' Cristo nake xi'ine David? 42Xhki kuin'kze David lu gich la'ay ki Salmo gne':

“Xan'ru gudxe Xaana:

Gri'i kuiti le'a yubeel,

43tzal Neda guuna ki bënni'a ti tale'i'de li' dxia'a

lakua'ke xhni'u.”

44¿Nakxh gunn gake le' Cristo xi'ine David, xhki kuin'kze David re' le' Xan?

Jesús ti ryaazlaadxe'e le tuune bënni useed xhba kie' Dios

(Mt 23:1-36; Mr 12:38-40; Lc 11:37-54)

45Yugute'ke bunach nakua'ke tuzenaage, len Jesús gudxe bënni useed kie': 46«Gulun'chi'i kuin'li kieke bënni useed xhba kie' Dios, koma tadaan'de ladáke len xha'ke tun len te'en'de nu ktzaag'lau leke len lazi'ke bala'an lu ye'i. Tagiilje labë'ke lau'it yu'u useed len labë'ke latj dxia'a'te ga ryu'u gwi'i'waagu; 47len taguáke le de kiek'nu nguul uzeeb, len xhtzei takua'ke tui'leene diidza Dios naar nutunu gak'be'i le tun'ke. Leke ulazi'ke yëla rsaka'zi'.»

Currently Selected:

Lucas 20: PZD

Highlight

Copy