Jowǎ̤ni̤ 16
16
1“Ma̤pûhǐ sî wîkè pûma̤ sî ta̤yṳta̤nǎ ma̤nu, he pwe̤ǐlṳbòhto bǎ sî ta̤htǒotoǒ hǒ. 2Kò wṳ̂hǎhtò̌kè sî dě ta̤sabahǐ toǒ akhlo pě. Kòyò htě a ma̤si sî toǒnu a gènè̤ ana̤ ta, ‘Pa ma̤ Cǒmara ata̤ma̤ hǒ,’ akhîakha htǒonu, a hèto̤ pě. 3A cû̌ ma̤tǒ̤ lǒkho pwǐhè̌o ma̤tè̤hî̌dě asî sî̌yanǒ he ta pha dǐkhò̌꤮ tò̤. 4Htû̌꤮ ta̤akhîakha hèto̤ pě akhanu, sî khòbǎ ta̤jîta̤jû toǒ pě. Ma̤pûhǐ sî sî̌yahtò̌bǎ to̤ ta̤htě he ǐsè̌rè̌nǎ sî ta̤htǒotoǒ ayanudě, he pwe̤ǐnǎ bǎ sî khònò̤htǒo hǒ. Dě akòshî̌kha numî̌ he ǒkû̌ta sî akhû̌akhî, he pwe̤ǐlṳnǒ bǎ sî hǒtò̤.”
Běcǎ sǎcahtǐ ata̤ma̤
5“Khònò̤dě, he glè ge dě pwa̤htě a nohè he htǒotapwa̤ a ǒ hǒ. ‘Na glè̌ cû̌bǎtè tò̤glòtè pěnu,’ sî gwè he dǐpwǎ̤꤮ tò̤. 6He pwe̤ǐlṳ bǎ sî htǒo dě sî sǎpla̤sǎyṳ lǒ̤꤮ bò. 7Dè hî̌ bòbò yo̤sǎ mî̌, he cû̌kè sîla̤ mî̌ awǒkhlo sîya, ma̤tè̤hî̌dě he dè cû̌ tò̤ hî̌nu, pwa̤ma̤jè Běcǎ sǎcahtǐ htǒotapwa̤ hè sîǒ tò̤. Pwǎ̤tadě he dè cû̌ hî̌nu, he nohèlò̤lè̌ yǎ dě sîǒ pě. 8Bǎ Běcǎ sǎcahtǐ hèto̤ pě akhanu, a ǐsî̌ya bǎ kòyòhǎkhû̌phû̌ toǒ ta asî ma̤ ta̤sǔ pě, htodě a ǐsî̌yapo̤ bǎ asî ta̤cǒta̤tè̤ aklè̌ pě. Htohǒtò̤, a ǐsî̌ya bǎkû̌po̤ asî ta Cǒmara cèrò asî pě. 9Dě asî yṳǎ he tò̤ akhû̌akhî, a ǐsî̌ya asî ta asî ta̤sǔ ǒ hǒ. 10Ma̤tè̤hî̌dě, he ge dě pha a ǒ pě dě sî kè̌shǐpe he tò̤ akhû̌akhî, Běcǎ sǎcahtǐ ǐsî̌yaphlo bǎ asî ta ta̤te̤ta̤mǎ aklè̌aklò pě. 11Cǒmara cèrò khînǎmo̤pha hǐkǒdû̌ Sehto htě a pǒǐ hǎkhû̌ htǒotado akhû̌akhî, a ǐ sî̌yaphlo bǎ kòyòhǎkhû̌phû̌ toǒ ta Cǒmara cèrò asî pě.
12“Ta̤ htě he sò̌yṳ hî̌po̤ sî toǒnu a ǒplṳ̂pe, pwǎ̤tadě sî sî̌yaphlobò̌ bòpè̤ yǎhǒtò̤. 13Bǎ Běcǎ sǎcahtǐ htě a dǔlṳ ta̤te̤ta̤mǎ htǒo hèpě akhanu, a yṳ̂klè̌nè̌klòbò bǎ sî ta ta̤te̤ta̤mǎnu toǒ pě. A glè pwe̤ǐlṳ bǎ sî ta a ta̤gènè̤ tû̌nu mè̤tò̤. A pwe̤ǐlṳ bǎ sî pwǐ a gana̤de hè dě Cǒmara a ǒnu toǒ pě. A glè dǔlṳ bǎ sî ta ta̤htě a htûhtò̌ hǒtò̤nu toǒ pě. 14Dě a hè pwe̤ǐlṳ bǎ sî ta a gana̤debò ta̤ dě heǒnu toǒ akhû̌akhî, a glè dǔlṳ he ta̤sîrîdû̌sîrîhtû pě. 15Ta̤ lǒ̤꤮ bò htě a ǒ ta pha toǒ numî̌ hetabò hǒ. Htodě he hî̌ bǎ sî ta Běcǎ sǎcahtǐ glè hè pwe̤ǐlṳbò bǎ sî ta a gana̤de ta̤ dě heǒnu toǒ pě, hǐnu.”
Ta̤sǎpla̤ htûhtò̌ ta̤sò̌le̤sò̌lò̤
16“Yî̤hǒtò̤ pěmî̌ sî kè̌shǐpe nǒ he tò̤ hǒ, pwǎ̤tadě yî̤hǒtò̤ pěmî̌ sî kè̌shǐ gesǒ he pě.”
17Akhophijaû̌ toǒǒnu, a gwè nû̌û tapwa̤ ta tapwa̤ dě a hî̌ lǒkho, “A cû̌ hî̌tǒ̤ ta, ‘Yî̤hǒtò̤ pěmî̌ sî kè̌shǐpe nǒ he tò̤ hǒ, pwǎ̤ta yî̤hǒtò̤ pěmî̌ sî kè̌shǐ gesǒ he pě’ a hî̌ htǒonumî̌ a sò̌yṳhî̌ amûasǎ hî̌tè?” Htodě asî hî̌ lǒkho, “‘Ma̤tè̤hî̌dě he glè̌cû̌ dě pha a ǒ hǒ,’ a hî̌ hǐnumî̌ a sò̌yṳ hî̌ amûasǎ mî̌titè?” 18Dě asî ta asî gwè sadape nû̌û, “‘Yî̤hǒtò̤ pěmî̌,’ a hî̌ htǒotûmû numî̌ a sò̌le̤ hî̌titè? A sò̌le̤ hî̌ mî̌titènu, pa sî̌yaphlo htû̌petò̤ hǒ.”
19Běcǎ Ye̤shǔ sî̌ya ta asî sò̌yṳ gwè nû̌û ta̤wi̤ta̤kè̌ htǒo akhû̌akhî, a hî̌ asî, “He hî̌ bǎ sî ta, ‘Yî̤hǒtò̤ pěmî̌ sî kè̌shǐpe nǒ he tò̤ hǒ, pwǎ̤tadě yî̤hǒtò̤ pěmî̌ sî kè̌shǐ gesǒ he pě,’ htǒonu he sò̌yṳ hî̌ amûasǎ hî̌tènu sî gwè kè̌khînû̌û tapwa̤ ta tapwa̤ amè̤tò̤ya? 20He hî̌ mè̤mè̤̌ sî, bǎ kòyòhǎkhû̌phû̌ toǒ sò̌le̤sò̌lò̤shû̌ pě akhanu, sî guhǎguwo lǒkho pě. Dě he khòbǎ ta̤jîta̤jû akhû̌akhî, sî nî̤bǎ mè̤mè̤̌ ta̤sǎpla̤ pě, pwǎ̤tadě sî nî̤bǎ ta̤sǎpla̤ htǒonu a htûhtò̌ tèplè̌khǒ bǎlè̌ sî ta sî ta̤sò̌le̤ pě. 21Alò̤ta mamǔ phû̌ǒ dě aphushanu pě. Bǎ a phusha akha, a khòbǎ ta̤shuphǔshèwè hǐnudě bǎ aphû̌ǒ akhanu, a shope̤nǎkè a ta̤shuphǔshèwè toǒ, ma̤tè̤hî̌dě aphû̌ǒnṳ phijaû̌phû̌ tapwa̤ hǎkhû̌bǎo akhû̌akhî, a sò̌le̤sò̌lò̤ hè pě. 22Ta̤ htûhtò̌ sǒsǒkû̌ta sî pwǐhè̌onu pě. Khònò̤dě sî nî̤bǎ ta̤sǎpla̤ pě, pwǎ̤tadě he kè̌shǐ gesǒ sî pě dě sî sò̌le̤sò̌lò̤ mè̤mè̤̌ pě. Htohǒtò̤ kò phî̌kèjò sî ta̤sò̌le̤sò̌lò̤ dǐpwǎ̤꤮ pětò̤. 23Bǎnu ti̤ni̤ pěnu, sî gwèpe he dǐcǎ꤮ tò̤ hǒ. He hî̌ mè̤mè̤̌ sî, sî kwi hepha titètè̌ bǎbǎ, sî dè kwi ta hemi̤ hî̌nu, hepha ǐ sî pě. 24Tǒ̤lò̤khònò̤ htǒonu, sî kwi ta hemi̤ dǐcǎ꤮ tò̤. Kwi lǒkho pû, sî nî̤bǎ pě. Dě sî nî̤bǎ lǒbe ta̤sò̌le̤sò̌lò̤ pě.
Ta̤ma̤pè̤ hǎkhû̌akhû̌ ata̤sîrîshû̌sho
25“He hî̌bǎ bǎ sî ta̤htǒotoǒ ta yo̤sǎkhěkhǒ toǒ. Pwǎ̤tadě akhîakha htě he lo̤bǎ hî̌bǎpe ta yo̤sǎkhěkhǒ tò̤nu, a hèto̤ pě. He pwe̤ǐlîtîklî̌ bǎ sî ta hepha awi̤akè̌ pě. 26Bǎnu ti̤ni̤ pěnu, sî kwisabahtò̌ lǒkho ta hemi̤ pě. Dě he lo̤bǎkwipe bǎ sîya tò̤. 27Ma̤tè̤hî̌dě hepha mo̤ǐ sana̤ sî hǒ. Dě sî mo̤ǐ he, sî yṳǎ he ta he ǒ dě pha a ǒ hè akhû̌akhî, a mo̤ǐ sî hǒ. 28He ǒ dě phaǒ hèlò̤ hǎkhû̌bǎo, khònò̤dě he glè hǎhtò̌ge dě hǎkhû̌bǎo dě he bǎ getîkhîsǒ hepha a ǒ.”
29Htǒotaplǎdě akhophijaû̌ toǒ hî̌ nû̌û, “Khònò̤ dě na hî̌bǎpe ta yo̤sǎkhěkhǒ tò̤ dě a phlowǒ꤮ le. 30Pa gwè na dǐcǎ꤮ hǒtò̤ hǐnudě na sî̌yabòwǐtû̌ ta̤htě pa glè̌ gwè nanu toǒ hǒ. Hǐnudě khònò̤htǒo pa sî̌ya ta na sî̌yabò ta̤pṳ̂̌꤮ tacǎ. Dě na sî̌ya htǒo akhû̌akhî, pa yṳǎ ta na ǒ dě Cǒmara a ǒ hèlò̤ mè̤mè̤̌ hǒ.”
31Dě Běcǎ Ye̤shǔ hî̌geshǔ asî, “Khònò̤ sî yṳǎ mè̤mè̤̌ hǒ ya꤮? 32Bǎ akhîakha hèpěnu sî khlè̌pò̌khlè̌shîbò pě, dě sî gekè lǒkho dě sîhǐ pṳ̂̌꤮ tapwa̤nu, a hèto̤ pě. Hî̌ mè̤mè̤̌ mî̌ a hèto̤ hǒ. Sî pṳ̂̌꤮ tapwa̤ bè̌kè tû̌ he pě. Pwǎ̤tadě he ǒtû̌ mè̤tò̤, ma̤tè̤hî̌dě hepha ǒkû̌ta he.
33“Ma̤pûhǐ sî nî̤bǎ sò̌phlǒ ta̤gûjûkabǎ ayanu, he hî̌htobò bǎ sî htǒotoǒ hǒ. Dě sî htûhtò̌ ta he ta̤tacǎnǔpa akhû̌akhî, sî nî̤bǎ sò̌phlǒ a ta̤gûjûkabǎ hǒ. Dě hǎkhû̌ bǎonu, sî kè̌shǐbǎ ta ta̤pò̤ta̤sha ta̤jîta̤jû pě, pwǎ̤tadě bè̌shû̌bè̌sho lǒkho sî sò̌phlǒ nî̌꤮. He ma̤pè̤hto hǎkhû̌akhû̌ a ta̤sîrîshû̌sho htǒotoǒ hǒ.”
Currently Selected:
Jowǎ̤ni̤ 16: KRC
Highlight
Share
Copy
Want to have your highlights saved across all your devices? Sign up or sign in
Wycliffe USA
