Jowǎ̤ni̤ 17
17
Běcǎ Ye̤shǔ kwisaba tû̌ aya
1Běcǎ Ye̤shǔ hî̌hto htǒo dě a ò̌tò̤mò̤htò̌ mǒkhû̌ a kwisaba dě a kwi htǒo,
“Kǒ pha, akhîakha hèto̤hǒ. Ma̤pûhǐ he dǔlṳhtò̌ na sîrîdû̌sîrîhtûnu, dǔlṳhtò̌ mò̌ na phû̌khû asîrîdû̌sîrîhtû htǒo. 2Ma̤tè̤hî̌dě ma̤pûhǐ kòyò lǒ̤꤮ bò htě na ǐ he toǒ nî̤bǎ yolahtûpwa̤ tûjûpwa̤ ayanu, na ǐhtobò he ta̤sîrîshû̌sho dě he glè pǒǐbò kòyò htǒotoǒ hǒ. 3Cǒmara mî̌tû̌ na tapwǎ̤pa, kòyò htě a sî̌ya na dě a sî̌ya ta he mî̌ Ye̤shǔkhrî̌stu htě na sûhè yǎ tapwa̤ numî̌, mè̤pwǎ ta̤sî̌ya htě a ǐ asî yolahtûpwa̤ tûjûpwa̤nu. 4He ma̤htobò bǎ na ta̤ma̤ htě na noma̤ henu toǒ akhû̌akhî, he dǔlṳ na ta̤sîrîdû̌sîrîhtû dě hǎkhû̌bǎo hǒ. 5Kǒ꤮ pha, pwǐ he ta̤sîrîdû̌sîrîhtû ǒkû̌dǒ ta na dě hǎkhû̌ htûhtò̌ hǒtò̤pe akhanu, ǐmò̌ he ta̤sîrîdû̌sîrîhtû dě nalo̤mo̤ khònò̤htǒonu.”
Běcǎ Ye̤shǔ kwisaba bǎ akhophijaû̌ toǒ aya
6“Kòyò htě na wû̌htò̌khǒ asî hǎkhû̌bǎo dě na ǐ yǎta he toǒnu he dǔlṳ asî ta na hǒ. Asî toǒ numî̌ na ǐ yǎta he dě asî gana̤de lǒkho nayo̤. 7Khònò̤dě ta̤ lǒ̤꤮ bò htě hehî̌hema̤ htǒotoǒnu, a ǒ naǒ dě a hè pwǎnu asî sî̌ya hǒ. 8Ma̤tè̤hî̌dě, ta̤wi̤ta̤kè̌ htě na ǐ he toǒnu, he ǐ yǎta asî dě asî phî̌shǔ htohǒ. Asî sî̌ya te̤mǎ ta he ǒbǎ na ǒ hè dě asî yṳǎ ta na nohè he. 9He kwisaba bǎ asî aya. He kwisaba bǎ kòyòhǎkhû̌phû̌nu toǒ aya mè̤tò̤. Pwǎ̤tadě kòyò htě na ǐ he toǒnu, nata akhû̌akhî, he kwisaba bǎ asîya. 10Ta̤lǒ̤꤮ bò a ǒ ta he toǒnu, nata hǒ, lǒ̤bò a ǒ ta na toǒnumî̌, heta hǒhǒ. Ta̤lǒ̤bòhtǒonu adǔlṳ he ta̤sîrîdû̌sîrîhtû hǒ. 11He ǒsělěpe bǎ hǎkhû̌bǎo tò̤, pwǎ̤tadě asî htǒotoǒ ǒkèpe dě hǎkhû̌bǎo pě. Hedě, he getîkhîsǒ dě naǒ pě. Kǒ꤮ pha cahtǐ! Ma̤pûhǐ asî ǒnû̌û ta sò̌phlǒ tamapa pwǐ he ta na ǒnû̌û ta sò̌phlǒ tama akûnu, ma̤kwaǐnṳtû̌ asî ta nami̤ apo̤aphǎ, nami̤ htě na ǐ he htǒonu nî̌꤮. 12Bǎ he ǒkû̌dǒ ta asî akhanu, he ma̤kwaǐ asî hǒ, he ǒpo̤ kè̌ǐkhwè̌ǐ asî ta mi̤ htě na ǐ henu hǒ. A hǎmǎkè nǒ dǐpwǎ̤꤮ tò̤. Ma̤pûhǐ lî̤cahtǐ behtò̌belò̤ ayanu, a hǎmǎkè tǒ̤pwǎ kòyònu tapwa̤ htě kò bè̌nǎ yǎ dě a pî̌nò pěnu tapwa̤ tû̌ pwǎ.”#Ta̤htû̌sò̌ǐ 41:9; Jowǎ̤ni̤ 13:18
13“He hè dě naǒ khònò̤ hǒ. Ma̤pûhǐ asî ǒbehtò̌belò̤ ta ta̤sò̌le̤sò̌lò̤ ayanu, bǎ he ǒpe hǎkhû̌bǎo akha, he pwe̤ǐlṳ bǎ asî ta ta̤htǒotoǒ hǒ. 14He ǐsî̌ya bǎ asî ta nale̤nayo̤, kòyò htě a yṳǎ he tò̤ toǒnu, a sò̌khěkhû̌khwèbò asî, ma̤tè̤hî̌dě pwǐ he ǒhtudǒ ta kòyòhǎkhû̌phû̌ tò̤nu, asî sǒsǒta he akhû̌akhî, kò sò̌khěkhû̌khwèbò asî. 15He kwisaba ta phî̌htò̌ tephekè asî ta hǎkhû̌bǎo hǐnu mè̤tò̤. Mî̌tanu, he kwisaba ta na glè ma̤kwaǐnṳ asî ta kòyòjono̤ kòyòphû̌mò̤ htě kò kaǎ nû̌ûta khînǎmo̤pha Sehto htǒonu tado. 16Pwǐ he ǒhtudǒ ta kòyòhǎkhû̌phû̌ tò̤nu, asî sǒsǒta he hǒ. 17Ma̤wî̤ma̤cahtǐ khǒtû̌ asî ta nale̤nayo̤ htě acǒatè̤ htǒonu nî̌꤮. 18Pwǐ na nohè he dě hǎkhû̌ bǎonu, he nocû̌ dò̌ǔ asî dě kòyòhǎkhû̌phû̌ toǒ akla hǒ. 19Ma̤pûhǐ asî ma̤wî̤ma̤cò lǒkho ana̤ ta nale̤nayo̤ a ta̤te̤ta̤mǎ htǒonu dě, he ǐlò̤ bòmṳ̂sîglîhto he ta̤htûpwa̤ ta asî agûla̤ hǒ.”
Běcǎ Ye̤shǔ kwisaba bǎ pwa̤yṳǎphû̌ toǒ aya
20“He kwisaba bǎ tû̌ he khophijaû̌ htǒotoǒ ayanu mè̤tò̤. Asî htǒotoǒ cû̌ khòlṳ pě dě kòyò htě a gana̤de ta a yṳǎna̤ǎge he pě toǒ ayabǎbǎ, he kwisaba kû̌dǒbò asîyaya. 21Kǒ꤮ pha, pwǐ na ta he glè htû nû̌û tacǎnǔpanu, ma̤pûhǐ asî lǒ̤꤮ bò htûhtò̌ nû̌û tacǎnǔpanu dě, he kwi gwèbǎǐhtò̌ na hǒ. Htohǒtò̤ ma̤pûhǐ kòyòhǎkhû̌phû̌ toǒ yṳǎ ta na nohèlò̤ he nudě, he kwisaba ta asî ǒhtûhtò̌ nû̌û tacǎnǔpanu nî̌꤮. 22Ma̤pûhǐ asî ǒnû̌û ta sò̌phlǒ tamapa jǔ pwǐ he ta na ǒnû̌û ta sò̌phlǒ tamapa akûnu dě, he dǔlṳ asî ta̤sîrîdû̌sîrîhtû htě na ǐ he htǒonu hǒ. 23He sò̌yṳ ta asî glè htûnû̌û tacǎnǔpa pwǐ he ta asî htûnû̌û tacǎnǔpa dě he ta na htûnû̌û tacǎnǔpanu. Htohǒtò̤ ma̤pûhǐ kòyòhǎkhû̌phû̌ toǒ sî̌yahè ta na nohèlò̤ he, dě na mo̤ǐ pwa̤htě a yṳǎ he toǒnu, he dǔlṳ asî ta̤sîrîdû̌sîrîhtû htě na ǐ henu hǒ.
24“Kǒ꤮ pha, kòyò htě na ǐ yǎta he htǒotoǒnu, he ǒ bǎtè tò̤glònu, he sò̌yṳ kaǎ ǒkû̌ asî bǎnu. He sò̌yṳ ta asî glè kè̌shǐ he ta̤sîrîdû̌sîrîhtû htě na ǐ he htǒotoǒ, ma̤tè̤hî̌dě, na mo̤ǐpe he dě na bǒlò̤ hǎkhû̌ hǒtò̤ akhanu pe.”
25“Kǒ꤮ ta̤cǒta̤tè̤ Běca pha, kòyòhǎkhû̌phû̌ toǒ sî̌ya na tò̤ hǐnudě he sî̌ya na, htohǒtò̤ kòyò htě a yṳǎ he htǒotoǒ sî̌ya ta na nohè he. 26Ma̤pûhǐ na ta̤mo̤ǐ hehtǒo ǒ dě asî sò̌phlǒkû, htohǒtò̤ ma̤pûhǐ he ǒkû̌ta asî sò̌phlǒkû ayanu, he ǐsî̌ya bǎ asî ta na, dě he ǐsî̌ya sělěhèpo̤ bǎ asî ta na pě,” Běcǎ Ye̤shǔ kwisaba dě a hî̌ hǐnu.
Currently Selected:
Jowǎ̤ni̤ 17: KRC
Highlight
Share
Copy
Want to have your highlights saved across all your devices? Sign up or sign in
Wycliffe USA
