Luke 14
14
Engipamapteng Si Jesus Na Dahi Nonta Sabbath
1Idi sa-kin Sabbath a akow na pan-inana na Hodjos, kimowan si Jesus a mekidihob cha baliy na afo na Pharisees. Idi gwared man, sema iren too, biyantayan chen chili say amtaen cha no nengoy pesing to. 2Gwara ngod man i toon dimarag i diwa tho tan seki thon kimowan a imakgwat cha sangoanan Jesus. 3Et iyansalodsod si Jesus ired ma Pharisees tan mamaistoro na dinteg i “Iyaytolok cha dinteg tayon pemapteng na mansekit na Sabbath, ono enchi?” 4Nem imeke-eket ira. Et kiyapkap Jesus iwa mansekit a inpamapteng to, et inpabtik to. 5Et kigwan Jesus cha echom i “No bilang i gwariy anak mo ono baham a iya-kas cha ebot no timpo na Sabbath. Sigoradon onkowan kayon chakos a mengiawas.” 6Et nagwariy songbat cha.
Mapteng No Ekombaba Kiya
7Miten Jesus a sema iren echom a toon ainbitar chiwa baliy na Pharisee, pinispis chen ontokkong chiwa tokkongan a iyaydasin para cha ainportantin tothoo. Isonga, engiarig a kigwan to i 8“No gwariy menginbitar kayon mekiatindar na kasal, enog i tokkong cha tokkongan a iyaydasin para cha ainportantin tothoo. Tep gwara emoy toon ainbitar a mas ainportanti iy say si-kayo. 9Et sema enginbitar cha si-kayon chegwa, onkowan cha si-kam a konen to i ‘Alis ka pangod echom a tokkongan say ontokkong iya tood tan.’ Et mebaingan ka et onkowan ken mekika-chom ired ma ebaba. 10Nem no mainbitar ken mekidihob, pekitokkong ka ired ma ebaba. Et no onkowan iwa enginbitar cha si-kam, konen to i ‘Ahi, kowan ka di say ontokkong ked mas mapteng a tokkongan.’ Mechejaw ka wed sangoanan na echom a ekidihob. 11Tep sema toon mengikayang na angel to, maykombaba, tan sema ngon toon mengikombaba na angel to, maykayang.”
12Et kigwan Jesus chiwa toon enginbitar i “No pekanen moy chakel a too, enog i ininbitar bengat i kakajem mo, aahim, bobonat mo, tan babaknang a kaarobam. Tep inbitaren chaka ngo no pekanen chiy chakel a too, et mesobalithan ka. 13No diket no pekanen moy chakel a too, inbitar mo ngo ira ma iyangkebitheg, iyangkepilay, iyangkekorab, tan sema iren gwariy echaral a parti na angel cha. 14Et kagol a nat kabaalan chen mansobalit cha si-kam, magesat ka. Tep si Afo Chiyos i mansobalit cha si-kam no akow a pengipawil to iren ma mangkaronong a too.”
Sema Iren Toon Mekidihob Cha Pantorayan Afo Chiyos
(Matthew 22:1-10)
15Sema sa-kin toon ekidihob, idi inki-ngelan to man, kigwan tod Jesus i “Magesat iwa toon mekidihob cha pantorayan Afo Chiyos!” 16Nem insongbat Jesus i “Gwariy sa-kin toon iyanparti et ininbitar toy chakel a too. 17Idi mimothok i timpo na sipinanganan, engito-no na bagaen ton mengowan ired ma ainbitar i ‘Gwali jo wa, esaganen emiin.’ 18Nem iyanpangbal iren emiin. Kigwan na sa-ki i ‘Nat mebedin a onkowanak da tep enongkalak na payow et mesepol a si-nengen ko. Pasinsiya ka.’ 19Kigwan pay na sa-ki i ‘Nat mebedin a onkowanak da tep enongkalak na sampolon baha et iparas ko iren mengaracho. Pasinsiya ka.’ 20Et gwara mowan i sa-kin engowan i ‘Nat mebedin a onkowanak da tep ahay pengimbaliy ko.’ 21Et imoli ma bagaen et ingwanggwang toy emiin cha afo to. Bimonget a pasiyay afo ton kigwan tod bagaen to i ‘Kanoim et tahed ma kalkalsared siyodad et olop mo diy iyangkebitheg, iyangkekorab, iyangkepilay, tan sema iren gwariy echaral a parti na angel cha.’ 22Idi engkay, imoli mowan iwa bagaen, et kigwan tod afo to i ‘Afo, imag ko ma kigwan mo, nem gwara pay i bahanti para cha echom a too.’ 23Et kigwan mowan na afo to i ‘Tahed ma chala-chalan cha awas na siyodad et awis mo iriy toon onkowan ali say mepno ja baliy ko. 24Tep konen kod si-kayo i sema iren ainbitar a sigod, nagwared si-kariy onnamat na mekan a insaganak.’ ”
Sema Mesepol A A-magen Na Too No Piyan Ton Manbalin Na Disipolon Jesus
(Matthew 10:37-38)
25Chakel i toon ekiolo-olop cha Jesus, et singo tho iren kigwan to i 26“Sema toon piyan ton manbalin na disipolok, mesepol a sema semek tod si-kak, mas banay iy say semek tod awa tan ineto, sema imbaliy tan aanak to, sema bobonat to, tan angken sema biyag to. Tep no nat a-magen to man, nat mebedin a manbalin na disipolok. 27Mesepol ngon sakbathen toy koros to et may-odop cha si-kak. Tep no nat a-magen to, nat mebedin a manbalin na disipolok.
28“No bilang i sa-kid si-kayoy piyan ton mengitgwen na banay a baliy. Nat ontokkong nin aya et kowintaen to no piyay kastosen to say amtaen to no on-anay i pilak to ingkathod mekcheng? 29Mapteng no pesing to man, nahol ni no kekchengen ton mengitegwen na tohod, ma-pos emo waliy pilak to, et nat mebedin a kekchengen toy baliy to. Et emiin a meni-neng, ngi-ngian chen 30konen cha i ‘Inchogin ma toon mengitegwen na baliy to, nem nat mahakecheng to.’
31“Et no bilang i gwariy arin sampolon dibo bengat i solcharo tho et piyan ton debanen i sa-kin arin chegwen polon diboy solcharo tho. Nat podno aya i ontokkong nin et nemnemnemen to no mebedin a egwahen to ma arin mas chachakel i solcharo tho? 32No nemnemnemen to i nat mebedin a a-gwahen to, ito-no thoy too thon mengaspol niwa sa-kin ari tan solcharo tho iy maramen iyay-aragwi pay ira say mekitolagan ira na talna. 33Isonga, pannemnemnem kayon chili. Tep no piyan jon manbalin na disipolos ko, mesepol a bebnekan joy emiin a gwared si-kayo.”
Sema Iren Disipolos Jesus, May-arig Cha Asin
(Matthew 5:13; Mark 9:50)
34Kigwan pay Jesus i “Mapteng i asin, nem no ondamsis, ngoy pesing ton may-oliy namnam to? 35Nagwara wiy silbi tho, angken maydaok cha pithek ono maosal a abono. Mesepol a maykepil. Si-kayon manki-ki-ngel, nemnem jon pasiyay inki-ngelan jo.”
Currently Selected:
Luke 14: KAR
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.
