Luke 15
15
Sema Arig Na Kalniron Iya-tiw
(Matthew 18:12-14)
1Sema chakel a toon para singil na binis tan sema echom a toon nakigwan cha i mabesol, kimowan iren manki-ngel na niyankonen Jesus. 2Nem sema iren Pharisees tan mamaistoro na dinteg, manririri iren kigwan cha i “Seja too, naekikadgwa ired ma mabesol a too, tan naekidihob pay cha si-kara.” 3Et kigwan Jesus cha si-kara iya arig.
4“Nem bilang i gwariy sa-kid si-kayon gwariy sandasos a kalniro tho et gwariy sa-kin aathiw. Nat ipayas to aya ma siyam a polo tan siyam a kalnirod ma pastolan, et a-nafen to ma sa-kin aathiw ingkathod sepolen to? 5Et no sepolen to wa man, man-imdeng et sakbathen ton 6mengibetik. No onmothok med man, ta-gwayen to iriy kakajem tan kaaroba thon konen to i ‘Pekiimdeng kayod si-kak tep sipol ko ma kalniron iya-tiw.’ 7Konen kod si-kayo i inges niwan i mepesamak cha dangit. Tep sema iren gwared dangit, mas banay i imdeng ched ma sa-kin mabesol a manbabawi iy say imdeng ched siyam a polo tan siyam a toon maronong a nat mesepol a manbabawi.”
Sema Arig Na Palaten Iya-tiw
8Intoloy Jesus a engowan i “Nem bilang i gwara ngoy biin gwariy sampolon papalata tho et iya-tiw i sa-ki. Eg to aya silowan i intohan a si-sian toy baliy, et anafen ton si-pet ingkathod sepolen to? 9Et no sepolen to wa, ta-gwayen to iriy kakajem tan kaaroba thon konen to i ‘Pekiimdeng kayod si-kak tep sipol ko ma palaten iya-tiw.’ 10Konen kod si-kayo i inges niwan i mepesamak cha dangit. Tep sema iren anghilis Afo Chiyos, man-imdeng ira no angken sa-kin mabesol bengat a manbabawi.”
Sema Arig Na Anak A Iya-tiw
11Et kigwan Jesus mowan i “Gwariy sa-kin toon gwariy chegwen dalekin anak to. 12Kigwan na orichiyan cha aweto i ‘Awa, i-kani moak na itawid mod si-kak.’ Et biningay na awechiy itawid tod chegwen anak to. 13Idi epalabas i piyen akow, indaho niwa orichiyan i tawid to, ida thoy pilak to, et kimowan cha aragwin ili. Nontan a gwared man, kiyastos toy pilak tod dinodohon panbiyag. 14Idi iya-pos i emiin a pilak to, mimothok i epaladon bithil chiwa ili, et kolang miy mesepol to. 15Isonga, iyandagbod sa-kin toon naiyan-iyan chiwa ili, et into-non ma tood ma payo-payow to say pekanen to iriy kechel to. 16Aofen chili ma balodahi et piyan ton kakanen iwa niyankakana na kechel, nem nagwariy engi-kan na kakanen to. 17Et niyemnemnem to ma ima-imag ton kigwan to i ‘Emiin a naiyan-obda para cha awak, esolok i nakiyakan cha iy ajaak mangon chanchanin metiy na ofa tho! 18Isonga, onbetihak cha kad-an awak, et konen kod si-katho i “Awa, iyanbasolak cha Afo Chiyos tan si-kam. 19Nat maykariak men maybilang a anak mo, nem no mebedin, pangpangaasim, itolok mon mandagboak cha si-kam.” ’ 20Et imekal a on-olid kad-an aweto.
“Nontan a aragwi pay laeng iwa balodahi, sini-neng na aweto et kiyaasian to. Et iyanbetik a mengaspol na anak ton igwang to et iyongoan to. 21Et kigwan na anak to i ‘Awa, iyanbasolak cha Afo Chiyos tan si-kam. Nat maykariak men maybilang a anak mo.’ 22Nem kigwan na aweto ired bagaen to i ‘Kanoi yo et ala kayo na kamaptengan a baro, et ipabaro jod si-katho. Singsingi yo pay tan sapathosi yo. 23Et jo ala ma kilaw na bahen inpatagwa thayo et parti yo say mengan kiya tan mansilibrar kiya. 24Tep seja anak ko, singen etiy da et iyanpawil ma. Iya-tiw da et bimetik ma di.’ Et inchogi ren mansilibrar.
25“Nontan a oras, sema pangodowan a anak, gwared payow. Idi manbebetik et man-eesop cha baliy, gwariy inki-ngelan ton mosiko tan toon kesinada. 26Et tiya-gway toy sa-kin bagaen cha et inbagaan to no nengoy emangkepasamak. 27Insongbat na bagaen i ‘Mimothok i orichiyan mo et inpartian na awam niwa bahen inpatagwa thayo tep bimetik alin nagwariy ngaaw a epasamak cha si-katho.’ 28Bimonget iwa pangodowan et nat piyan ton onsekep. Isonga, imawas i aweto et iyanpakpakaasin onsekep cha baliy. 29Nem insongbat na pangodowan cha aweto i ‘Palado tan! Piyen tawen malen iyan-ob-obdaak para cha si-kam a inges toy sa-kin bagaen mo, et imag kon emiin i nakigwan mo? Nem eg ka engi-kan na angken sa-kin ngalobon kanching say ipartian ko ngo iriy kakajem ko. 30Nem seta anak mo ngo, idi bimetik alin engastos na emiin a intawid mod pekibii-bii tho, inpartian mon ma bahen inpatagwam!’ 31Et kigwan na aweto i ‘Anak ko, gwara ka na olay cha si-kak, et emiin a gwared si-kak, kegwen mo. 32Nem iyaybagay a manchadsak kiya tan mansilibrar kiya. Tep seta ahim, singen etiy da et iyanpawil ma. Iya-tiw da et imoli wa di.’ ”
Currently Selected:
Luke 15: KAR
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.
