Luke 17

Sema Maypangkep Na Basol

(Matthew 18:6-7,21-22; Mark 9:42)

1Et kigwan Jesus ired ma disipolos to i “Sigoradon gwara diy solisog a onmothok cha tothoo, nem sema toon mengipabasol, kakaasi ngon chili tep si-kathoy panchedanan niwa solisog! 2Magangkana koma no mayba-jat i enbel-at a bathod bokdow to, et iba-tok ched baybay say metiy iy say sema mengipabasol na angken sa-ki iren ja iyangkebaben too. 3Isonga, tanchaani yoy a-magen jo.

“No panbasolan toka na echom mo, iseg-ang mo, et no manbabawi, pakawanim. 4Angken no meminpithon manbasol cha si-kam na sa-kin akow, et meminpithon onkowan cha si-kam a konen to i ‘Manbabawiak,’ pakawanim.”

Sema Maypangkep Na Pamati

5Kigwan iren ma apostolis cha Jesus i “Pekedsang moy pamati wi!” 6Insongbat Jesus i “Angken no otik i pamati yon inges toy bothil na mostard a kaotihan cha emiin a bothil, mebedin a konen jod ja banay a kejow i ‘Dipnot moy angel mo et taha wed baybay say chiwan i kaytaneman mo,’ et patien to kayo.”

Sema Maypangkep Na Pansilbi

7Kigwan ngon Jesus i “Nem bilang i gwariy sa-kid si-kayon gwariy bagaen ton naiyan-aracho tan naiyanbantay ira na kalniro tho. No onbetik alid payow, konen mo aya i ‘Gomali wa et tokkong ken mengan’? 8Enchi! Nem konen mo kitdid si-katho i ‘Isaganam i kakanen ko, et pansa-dat ka na edinis say itolod mo did si-kak i kakanen tan inomen ko. No mekcheng men menganak, mebedin men mengan ka.’ 9Salamathan mo ayay bagaen mo tep imag toy kigwan mo? Enchi chechan. 10Inges tod si-kayo. No a-magen jo wen emiin i kigwan Afo Chiyos, kowan jo i ‘Bagaen kawi bengat a nat maykarin mechejaw tep imag mi bengat i obda wi.’ ”

Inpamapteng Jesus I Sampolon Dalekin Gwariy Epaladon Kolid Cha

11Idi mankokowan si Jesus cha Jerusalem, chidan toy iyankinaw-an na sahop na Samaria tan Galilee. 12Idi mimothok cha sa-kin siyodad, gwariy sampolon toon epaladoy kolid chen kimowan a mengaspol. Imakgwat ired ma aragwi, 13et kimeljaw iren kigwan cha i “Jesus, Afo, kaasii mo kawi!” 14Idi mita iren Jesus, kigwan to i “Jo iparang i angel jo ired ma pari say paneknekan cha i iya-kal i sahit jo.” Idi mankokowan ira, mimapteng ira. 15Et sema sa-kid si-kara, idi iyamtaan to i iya-kal i sahit to, imolid kad-an Jesus a inpekes toy esel ton iyanchayaw cha Afo Chiyos. 16Iyantalimohod cha sekian Jesus et iyansalamat cha si-katho. Sema too, i-Samaria. 17Et kigwan Jesus i “Ampet siya iy gwariy sampolon mimapteng? To la iriy siyam i? 18Apay nga sema sa-kin imoli din mansalamat cha Afo Chiyos, seja i-Samaria bengat?” 19Et kigwan Jesus cha si-katho i “Akgwat ka wa et taha. Mimapteng ka wa kagol na pamatim cha si-kak.”

Sema Imothok Ali Na Pantorayan Afo Chiyos

(Matthew 24:23-28,37-41)

20Idi pinsak, gwariy echom a Pharisees a inbaga red Jesus i “Empiyan aliy timpon imothok na pantorayan Afo Chiyos chiya dobong?” Insongbat Jesus i “Nagwariy sinjal a mengibiybiy na timpon imothok ali na pantorayan Afo Chiyos. 21Nagwara ngoy mengowan i ‘Matha yo di, ajed ja a!’ tan ‘Amed ma a!’ tep sema pantorayan Afo Chiyos, ija waled si-kayo.” 22Et kigwan Jesus ired ma disipolos to i “Manmomothok ma diy timpo na pandigat, et piyan jon metaen i pantorayan kon Anak na Tood ja dobong, angken sa-kin akow bengat, nem eg jo nin metaen tep aneng aliy timpo tho. 23Gwara iriy mengowan i ‘Matha yo, aman i Anak na Too!’ tan ‘Matha yo, ajed ja a!’ Nem enog i iyonod ira. 24Tep say iolik alin Anak na Too, inges toy bakilat a manki-dat a menilow na intiron iyaykayang cha iyanpiniig. 25Nem say pilmiro, mesepol a da-kaman koy chakel a diga-digat, et sema tothoo niman, bebnekan chaak.

26“No timpo na iolik alin Anak na Too, say niyan-amaga na tothoo, inges to ngoy niyan-amaga na tothoo nonta timpon Noah. 27Sema iren too, kekinakan, kaininom, tan kainimbaliy ingkathod akow a insekep Noah cha bapor a imag to. Et ejowjow i dobong et etiy a emiin i too. 28Inges to ngo ma timpon Lot. Nontan a timpo, kekinakan tan kaininom i tothoo. Ketinongkal tan kedinaho ira. Ketinamen tan ketinegwen ira na baliy. 29Nem idi mimothok aliy akow a bintihan Lot i Sodom, imoran na afoy tan sulfur, et etiy a emiin i too. #17:29 Sema sulfur, kilasi na bathon yellow a onchalang. #17:29 Sema istoriya maypangkep na inpangomas Afo Chiyos na i-Sodom, naebased Genesis 19:1-29. 30Inges niwan ngoy mepesamak no akow a manparangak a Anak na Too.

31“No onmothok ali ma akow, sema toon gwared bo-dayan na baliy to, mesepol a eg onsekep cha baliy ton mengeda na kokowa tho, nahol ni metaktak. Inges to ngod ma toon gwared payow. Mesepol a nat onkowan cha baliy to. 32Nemnemnem joy epasamak cha imbaliy Lot. #17:32 Sema istoriya maypangkep na imbaliy Lot, naebased Genesis 19:15-26. 33Tep sema toon menepi na biyag to, ma-tiw cha si-katho, nem sema toon metiy kagol na pamati thod si-kak, may-i-kanan na biyag a nagwariy pengingkaan to. 34Konen kod si-kayo i no kalebiyan i imothok ko di et gwariy chegwen manchacharog cha sa-kin katiri, ma-diy sa-ki tan mepejas ngoy sa-ki. 35No gwara pay i chegwen bibiin kekiniling, ma-diy sa-ki tan mepejas ngoy sa-ki. 36Tan no gwara pay i chegwen dalekin man-ob-obded payow, ma-diy sa-ki tan mepejas ngoy sa-ki.” 37Et inbaga iren ma disipolos to i “Afo, toy kepasamahan niwan i?” Insongbat Jesus i “Sema kawad-an na iyangketiy, chiwan ngoy kawad-an na naesa-sa-nofan na titit a naengan cha si-kara.”

Currently Selected:

Luke 17: KAR

Highlight

Copy