GENESIS 17
17
1Ma si maṉa na sikwa tafulu fa ṉali ma sikwa fa ṉali e sui atha Aberamo, tha Jihova ka fula fatai isatha Aberamo, ka soree isana, Ni nau ṉa God Rigita ka Tatha; oki lae inaofana maaku, ma abula lamu kai oolo teefau. 2Ma ni nau kwai kania alaofua nau eri imaalutaku ma ni oe, kwai adea kwalafamu kai oro alaa. 3Ma tha Aberamo ka aru fafia maana: ma tha God ka ṉata bi nia, ka una eri, 4Ma ni nau, rikia fasi, alaofua nau eri ku kania naa bi oe, ma ni oe ṉa maka totonao ana kulee toa oro ki. 5Me a’i kesi alaṉi oe lau ana thatamu na tha Aberamo, keki alaṉia thatamu atha Aberahamo; uria ni nau ku alu oe naa na maka totonao ana kulee toa oro ki. 6Ma ni nau kwai alua kwalafamu kai oro faamau ka lae alaa, ma nau kwai adea na kulee toa ki keki ita mai ani oe, ma kiṉa ki keki ita mai ana seemu. 7Ma ni nau kwai kania alaofua nau kai ṉado imaalutaku ma ni oe, ma kwalafamu iburiamu sulia unii wane kera ki, alaofua neri na kai toto si sui, sorea ni nau ṉa God ifamu, ma ifana kwalafamu iburiamu. 8Ma ni nau kwai falea ifamu ma ifana kwalafaa oe ki iburiamu, fanua nei noko to ni laea iei, fanua i Kenana ni sui bana neri, ṉa fanua kamulua u boo toto si sui; ma God kera na ni nau. 9Ma tha God ka soree isatha Aberahamo, Mania, oki ade sulia alaofua nau nei, ni oe, ma kwalafaa oe ki iburiamu sulia unii wane kera ki. 10Alaofua nau eri, na muki ade sulia, imaalutaku ma ni oe, ma kwalafaa oe iburiamu nai nia, wela wane ki sui bana imaalutamulua, keki kwai kalida. 11Ma muki kwai kalia doṉana seemulua; ma si ade la eri na fafuilalaa ana alaofua eri imaalutaku ma ni kamulua. 12Ma si maṉa na kera bii thareda imaalutamulua ma kwalu fa boṉi e sui iada, keki kwai kalia wela wane eki sui bana ana unii wane kamulua ki, wela wane ne futa mai i maafera, mado keka usia mai faisia atona bana ta wane eeta na kwalafamu e a’i. 13Wane ne futa mai i maafera oe, ma wane no usia mai ana malefo oe, e a’i si e’i boo keki kwai kali nia: ma alaofua nau eri kai to bonaa i seemulua, na alaofua na kai toto si sui. 14Ma wela wane na kesi kwa’i kali nia, kesi kwa’i kalia doṉana seena neri, keki lalakwatai nia faisia i maalutana toa nia ki; wela wane eri e musia alaofua nau eri. 15Ma tha God ka soree isatha Aberahamo, Ma kwaimu, na ni Serai, osi alaṉia thatana lau ani Serai; thatana na ni Sera. 16Ma ni nau kwai alua lea la fafi nia, kwai falea lau boo tee fa kaluwane iamu ani nia: iu, ni nau kwai alua lea la fafi nia, ma ni nia na thaina totonao ana kulee toa ki; kiṉa ki ana kulee toa eki keki ita mai ani nia. 17Sui tha Aberahamo ka aru fafia maana, ka waela, ka soree i ruruuna, Wela wane kai futa mai ana wane na tee taleṉee fa ṉali e sui ani nia, mado? ma ni Sera, kini eri na sikwa tafulu fa ṉali e sui ania, kai thare‐wela, mado? 18Ma tha Aberahamo ka soree isatha God, Nau ku thathamia faamau sa tha Isimela ka maruki bana inaofamu! 19Ma tha God ka una eri, Kwaimu na ni Sera kai tharea ta wela wane ifamu mamana boo; ma oki alaṉia thatana atha Aesiki: ma nau kwai kania alaofua nau eri kai nado ifana, na alaofua na kai toto si sui, bi nia ma bia kwalafana iburiana. 20Ma sulia tha Isimela, nau ku roṉoa naa foa la oe ba: rikia fasi, nau ku alua naa lea la fafi nia, kwai adea kwalafana keki oro, keki oro faamau ka lae alaa; nia kai kwalafia tee akwala ma ro wane gwauwai ki, ma nau kwai adea kulee toa ne inoto faamau kai thafali mai ani nia. 21Ma sui alaofua nau eri kwai kania kai ṉado bia tha Aesiki ṉa wane na ni Sera kai tharea ifamu asi maṉa eri na kera gwalua naa afa ṉali lo mai. 22Ma nia ka faasuia ṉata lana isana, ma tha God ka tae kau faisia tha Aberahamo.
23Ma tha Aberahamo ka talaia kaluwane nia na tha Isimela, ma wane eki sui bana na kera futa mai maafera nia, ma wane eki sui bana ne usida mai ana malefo nia, wane eki sui boo ana toa na i maafera tha Aberahamo, ka kwa’i kalia doṉana seeda afa boṉi eri boo, sulia si ade la na tha God e ṉata sulia isana. 24Ma sikwa tafulu fa ṉali ma sikwa fa ṉali e sui atha Aberahamo, asi maṉa na kera kwa’i kalia doṉana seena. 25Ma tee tafulu fa ṉali ma ulu fa ṉali e sui ana kaluwane nia na tha Isimela asi maṉa na kera kwa’i kalia doṉana seena. 26Ana tee fa boṉi eri boo kera kwa’i kalidaroa, tha Aberahamo ma kaluwane nia na tha Isimela. 27Ma wane eki sui bana na i maafera nia, wane na kera futa mai maafera eri, ma wane ne usida mai ana malefo faisia wane eeta ki, wane eki kero kwa’i kalida ofu bi nia.
Currently Selected:
GENESIS 17: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
