GENESIS 18
18
1Ma tha Jihova ka fula fatai isana i la fanua dedema tha Mamari ki: ma nia ka ono bana isana maana olofolo ana biui‐maku asi maṉa thato ka thatofifi; 2Ma nia tafoa maana, ka lio, ma rikia fasi, ulu nonii wane keka takwe isana: me rikida naa, ka bii fita mai faisia maana olofolo biui‐maku eri, ka gwau toli uri theegano, 3Ka una eri, Arai ena ae, mado so riki nau ka lea, nau ku thathamia sa osi tona tatha kau faisia wane ni ra oe nei: 4Nau ku thathamia soki alamatanida keki ṉalia mai ta kasi kafo, muka taua ’a’aemulua, sui muki mamalo i nuuna ’ai nei: 5Ma ni nau kwai ṉalia mai kasi berede, muki faainamarukia ruruumulua; buriana si ade la eri muki bii tatha amulua: sulia uria si kula eri mulu fula mai sana wane ni ra kamulua nei. Ma keka una eri, Oki ade sulia si ade la eri no sorea na ba. 6Ma tha Aberahamo ka lakwasia kau uri la biui‐maku isani Sera, ka una eri, Oko kwaimaasi ana ulu ma’e do ana mila maemaea, oko kumua, oko biia tei kali fa lofu i la era. 7Ma tha Aberahamo ka fita kau isana aini buloka, ka nalia mai tee fa kalee buloka ne mamaguru ma ka lea, ka falea i abana tee wane bii baita, ma wane eri ka lae fofoa uri beta lana. 8Ma nia ka ṉalia mai ta si bata, ma ta si susu, ma kalee buloka eri ne betaa, ka alua inaofada; ma nia ka takwe isada i nuuna ’ai eri, keka rere ada.
9Ma keka soree isana, Nifei nia kwaimu na ni Sera? Ma nia ka una eri, Rikia fasi, nia e ni la biui‐maku nei. 10Ma ṉi nia ka una eri isana, Kwai oli lau mai isamu, mamana boo, asi maṉa ne farana kini nei; ma, lio fasi, kwaimu na ni Sera kai tharea kaluwane nia. Ma ni Sera, ka roṉoa ṉata lana i maana olofolo ana biui‐maku eri ne ni mai buriana. 11Ma tha Aberahamo ma ni Sera kero arai ki naa; ma biraṉana kini ki ka a’i naa faisia ni Sera. 12Mania ni Sera ka waela ana i la ruruuna, ka una eri, Asi maṉa eri na nau ku waro naa, kwai rikia mamana boo si do lea eri, si maṉa na arai nau e arai naa lau boo, mado? 13Ma tha Jihova ka soree isatha Aberahamo, Uria ta na ni Sera ka waela, ka una eri, Do mamana neri, ni nau kwai thare‐wela, nau na ku waro naa? 14Ta si do ka afetai atha Jihova? Lalae fula asi maṉa nau ku gwalua na ba, kwai oli lau mai isamu asi maṉa ne farana kini nei, ma ni Sera kai tharea kaluwane nia. 15Sui ni Sera ka tofe, ka una eri, Nau e a’i kwasi waela; uria ne mau neri. Ma ni nia ka una eri, E a’i; o waela boo.
16Ma wane eki keka tatae faisia si kula eri, keka lio uri Sodoma: ma tha Aberahamo ka lae bida fasi kai talaida kau. 17Ma tha Jihova ka una eri, Mado e a’i, kwasi thaufunia faisia tha Aberahamo si do na nau kwai ilia; 18Uria na tha Aberahamo ṉa maka totonao mamana boo ana kulee toa baita ma ka rigita, ma ani nia keki alua lea la ifana kulee toa eki sui bana na ni fanua na i iano. 19Uria nau ku thaitoomana ni nia na wane na kai ṉata fifi isana kwalafana ma toa na i maafera nia iburiana, ma keki lae nada sulia tala tha Jihova, keki ilia kokoto la ma oolo la; fasi tha Jihova kai adea kai mamana fafia tha Aberahamo si ade la eri ne ṉata sulia na ba suli nia. 20Ma tha Jihova ka sorea, Uria na ’ai lana toa i Sodoma ma Gomora e baita, ma abula taa lada e kulua faamau; 21Nau kwai sifo si kau si maṉa eri, kwai rikia sa mado e a’i kera ade mamana boo sulia si ade la ne ’uria ’ai la eri ne tae mai isaku; mada se a’i si mamana, ni nau kwai thaitoomana. 22Ma ro wane eki keko akeletai nia maadaroa faisia fanua eri, keko tatha nadaroa uri Sodoma: tha Aberahamo molo ka takwe u bana inaofatha Jihova.
23Ma tha Aberahamo ka idu karaṉi nia, ka una eri, Oki thau labatai ṉia lau boo toa kokoto ki bia toa taa ki, mado? 24Mado e a’i lima akwalee wane kokoto ki keka to bada i la toaa susu eri: oki thau labatanida lau bada, mado? osi suusia taa la faisia toaa eri inunufana lima akwalee wane kokoto eki na kera ni iei? 25Si ade la ne a’i si faramu neri, soki ade una eri, soki thauṉia toa kokoto ki ofu bia toa taa ki, sa toa kokoto ki keki totoo bia toa taa ki; si ade la ne a’i si faramu neri: nia na ka ṉata oolo sulia toa na fanua na i iano sui boo kai ilia si do ne kokoto, mado? 26Ma tha Jihova ka sorea, Mada sa kwa fulatoona i Sodoma lima akwalee wane kokoto ki la toaa susu eri, kwai bii suusia taa la faisia toaa eri sui boo inunufada. 27Ma tha Aberahamo ka luua, ka una eri, Rikia fasi si maṉa eri, ni nau ku seeraraa kwai ṉata isana Arai Lo, ni nau ṉa do asi gegeona theegano ma foa; 28Mado e a’i lima akwalee wane kokoto eki kesi fono; lima nonii wane kesi to bada isada: oki faafunuia toaa susu eri sui boo uria na lima nonii wane eki kesi ni iei, mado? Ma nia ka sorea, Mada sa kwa fulatoona fai akwalee wane kokoto ki ma lima wane, nau sa kwa faafunuia e a’i. 29Ma ula lau nia ka ṉata isana, ka una eri, Mado e a’i keki fulatoona fai akwala iei. Ma ni nia ka sorea, Inunufana fai akwala eki, nau sa kwa faafunuia e a’i. 30Ma nia ka una eri, Arai Lo ae, osi rakeiri, ma ni nau kwai ṉata si lau: mado e a’i keki fulatoona ulu akwala iei. Ma nia ka sorea Mada sa kwa fulatoona ulu akwala iei, nau sa kwa ilia e a’i.
31Ma nia ka una eri, Rikia fasi si maṉa eri, ni nau ku seeraraa kwai ṉata isana Arai Lo: Mado e a’i keki fulatoona ro akwala iei. Ma ni nia ka sorea, Inunufana ro akwala eki, nau sa kwa faafunuia e a’i.
32Ma nia ka una eri, Arai Lo ae, osi rakeiri, ma ni nau talitoona tee fa ṉata la kwai ṉata si lau: Mado e a’i keki fulatoona tee akwala iei. Ma ni nia ka sorea, Inunufana tee akwala eki, nau sa kwa faafunuia e a’i. 33Me tamani bia tha Aberahamo e sui, tha Jihova ka bii lae; ma tha Aberahamo ka oli kau uria si kula nia.
Currently Selected:
GENESIS 18: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
