GENESIS 25
25
1Sui ruana lau tha Aberahamo e foli kini, ma thatana kini eri ni Ketura. 2Ma nia ka tharea tha Simirana ifana, ma tha Jokasana, ma tha Midana, ma tha Midiana, ma tha Isibaka, ma tha Sua. 3Ma tha Jokasana e kwalafia tha Siba, ma tha Didana. Ma kaluwane tha Didana ki na tha Asurimu, ma tha Litusimu, ma tha Liumimu. 4Ma kaluwane tha Midiana ki; tha Ifa, ma tha Ifi, ma tha Anoko, ma tha Abida, ma tha Iladaa. Wane eki sui bana kwalafaa ni Ketura. 5Ma tha Aberahamo ka falea do nia ki sui bana atha Aesiki. 6Ma ifana kaluwane ai buri eki, na tha Aberahamo e ofu bida, tha Aberahamo ka tona faledo ki, sui ka arasida keka lae kau faisia kaluwane nia na tha Aesiki, si maṉa ne to u bana, keka lae uri bali tae lana thato, uria fanua thato kai tae mai iei. 7Ma fa boṉi eki ana fa ṉali ki ana to lana tha Aberahamo, ne to bana sulia, tee taleṉee fa ṉali, ma fiu tafulu fa ṉali, ma lima fa ṉali. 8Sui tha Aberahamo ka luka ana maṉona, ka mae, buriana ne to ni lea la sulia fa ṉali oro ki, arai naa na ni nia, ma fa ṉali nia ki e oro ka tatha; sui ka to ofu naa bia toa nia ki. 9Ma ro kaluwane nia ki, na tha Aesiki ma tha Isimela, keko alu nia i la maufi ba i Makabila, i la bali gano tha Ifurono, kaluwane tha Soha ṉa Hitaete, na ni otofana i Mamari; 10Bali gano eri na tha Aberahamo e usia mai faisia kaluwane tha Hete ki: kera alua tha Aberahamo iei bia kwaina na ni Sera. 11Ma lalae mai, buriana mae lana tha Aberahamo, tha God ka falea lea la ifana kaluwane nia na tha Aesiki; ma tha Aesiki ka to bana isana malaui kafo eri i Bia‐lahai‐roi.
12Si ade la ne ita mai atha Isimela nai nia, ṉa kaluwane tha Aberahamo, na ni Hega, ṉa kini i Ijifi, kini ni ra ni Sera, e tharea ifatha Aberahamo: 13Ma thatana kaluwane tha Isimela ki, too tee wane iada, sulia si ade la ne ita mai ani kera, nai nida: kaluwane inao tha Isimela na tha Nebaeota; sui tha Kita, ma tha Abila, ma tha Misama. 14Ma tha Misima, ma tha Duma, ma tha Masa; 15Tha Heda, ma tha Tima, tha Jita, tha Nefisi, ma tha Kidima: 16Kaluwane tha Isimela ki neri, ma thatada, sulia toaa kera ki, ma faelaṉi ni toi la kera ki; tee akwala ma ro wane inoto ki, sulia kulee toa kera ki. 17Ma fa ṉali ki ana to lana tha Isimela nania, tee taleṉee fa ṉali, ma ulu tafulu fa ṉali, ma fiu fa ṉali: ma nia ka luka ana maṉona, ka mae; sui ka to ofu naa bia toa nia ki. 18Ma fanua kera to bade iei, oli lana ka thafalia i Hafila, lalae ka fula i Sa, na ni otofana i Ijifi, sulia tala ne lae uria Asiria: ma tha Isimela e mae inaofana doorana kera sui bana.
19Ma si ade la ne ita mai atha Aesiki, kaluwane tha Aberahamo, nai nia: tha Aberahamo e tharea tha Aesiki: 20Ma fai tafulu fa ṉali e sui atha Aesiki, sui ka bii tolea kwaina na ni Ribeka, na thari tha Bethuele na wane i Siria, fanua nia i Bedanerama, ma thari eri waiwaena tha Lebana, wane ba i Siria. 21Ma tha Aesiki ka ṉata kwaitakoi isatha Jihova ifana kwaina, uria ne abaato: ma tha Jihova e ade sulia ṉata lana, ma kwaina na ni Ribeka ka iana. 22Ma ro wela eki keko kwaikwairaui la rakena; ma nia ka sorea, So e una eri, nau kwai to bakua uria ta? Ma nia ka lae nana fasi kai soetoona atha Jihova. 23Ma tha Jihova ka soree isana, Ro kulee toa ni la rakemu, ma ro balii wane na keko eeta kwailiu keki ita mai seemu; ma toa fu keki sukwai ka tatha ana toa lo; ma ulunao kai ra ifana ai buri. 24Ma lalae fula naa afa boṉi nia ana thare wela la, rikia fasi, ro iu ni rakena. 25Ma ai nao ka futa mai, seene memenaa ta si kula si e’i, ’uria tooni na kera thauwai nia ana ifui do ki; ma keka alaṉia thatana atha Iso. 26Ma thasina ka futa mai buri, ma abana ka rau ana bora aena tha Iso; ma keka alaṉia thatana atha Jekofo: ma ono tafulu fa ṉali e sui atha Aesiki asi maṉa na kini eri ka tharedaroa. 27Ma ro wela wane eki kekoi baita alaa: ma tha Iso ka thaitoomana lea basi lana do kwasi ki, nia wane ra nia ni naa i masuu: tha Jekofo molo na ṉa wane kokoto ne to bana i biui‐maku ki. 28Ma tha Aesiki ka liothau atha Iso, uria ne ania siina do ne basidaki: ni Ribeka ka liothau atha Jekofo. 29Ma tha Jekofo ka naarea si sufusufu: sui tha Iso ka lae mai faisia i masuu, karaṉia ka maelia naa fa bula: 30Ma tha Iso ka soree isatha Jekofo, Nau ku thathamia oki falea akua ta sii ana sufusufu memenaa kwai ilufia; uria na karaṉia kwai maelia naa fa bula: mania kera alaṉia thatana atha Idomo. 31Ma tha Jekofo ka una eri, Usi mai itaraena asi do oe noki tae fuli ania ana maka koro, uria no futa inaoku. 32Ma tha Iso ka una eri, Rikia fasi, nau karaṉia kwai mae naa: sui si ta na kwai ṉalia ana adomi laku la sulia si do so kwa tae fuli ania ana maka koro, uria ni nau ku futa inaomu? 33Ma tha Jekofo ka una eri, Alanai nia fasi isaku ana othi la afa boṉi nei; ma nia ka bii alaṉai nia isana ana othi la: ma nia ka usi satha Jekofo asi do nia sa kai tae fuli ania ana maka keroa. 34Sui tha Jekofo ka falea ta si berede atha Iso ma ta si sufusufu ana ledili ki; ma nia ka faṉa, ka kuu ana, sui ka tatae, ka lae nana: asi ade la eri tha Iso ka luka faekwa asi do nia sa kai tae fuli ania ana maka keroa uria ne futa inao.
Currently Selected:
GENESIS 25: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
