GENESIS 26
26
1Ma unii thaofaa ni lau boo i fanua eri, buriana unii thaofaa ba ne to afa boṉi tha Aberahamo ki. Ma tha Aesiki e lae nana isatha Abimileka ṉa kiṉa Filisitaene ki i Gira. 2Ma tha Jihova ka fula fatai isana, ka una eri, Ada oko sifo kau uri Ijifi; oki to amua i fanua na ni nau kwai faaroṉo oe mania: 3Oki to ni laea i fanua nei, ma ni nau kwai to bi oe, kwai alua lea la fafi oe; uria ni nau kwai falea fanua nei ki sui bana ifamu, ma ifana kwalafamu, ma ni nau kwai ade sulia othi la na nau ku othia na ba isana maka oe na tha Aberahamo. 4Ma ni nau kwai adea kwalafaa oe kai oro alaa, alafana fa bubulu lo i thalo ki mai, ma kwai falea fanua nei ki sui bana ifana kwalafaa oe ki; ma ana kwalafaa oe keki alua lea la ifana ina lana toa eki sui bana na ni fanua na i iano; 5Sulaania tha Aberahamo e ade sulia ṉata laku, me roo sulia si faaroṉoa nau, ma si ṉataa fifi nau ki, ma si do ku gwaludaki naa, ma lo nau ki. 6Ma tha Aesiki ka to bana i Gira: 7Ma wane ki i fanua eri keka soetoona sulia kwaina; ma nia ka una eri, Waiwaena nau nai nia: uria ne mau ana sore lana, Ai nau na ni nia; ada (bae lana neri) wane ki i fanua nei keka thauṉi nau kwa mae fafia ni Ribeka: uria na riki lana kini eri e lea asia naa. 8Ma lalae mai, buriana ne toto ka tau naa i fanua eri, tha Abimilieka ṉa kiṉa Filistaene ki ka lio kau i maana olofolo, ma rikia fasi, nia ka rikia tha Aesiki na kai kakale ana bia kwaina na ni Ribeka. 9Ma tha Abimileka ka ailia mai tha Aesiki, ka una eri, Rikia fasi, nia kwaimu mamana boo: ma nifana ade lana no sorea na ba, Waiwaena nau nai nia? Ma tha Aesiki ka soree isana, Uria ni nau ku una eri, Ada kwa mae inunufana. 10Ma tha Abimileka ka sorea, Si ta neri no ilia iamilia? mado e a’i ta wane ana toa nei ki so ka tona teo isana kwaimu, soki ṉalia mai abula taa la, keki alaṉi kamilia ania. 11Ma tha Abimileka e ṉata fifi isana toa nia ki sui bana, ka una eri, Ni tei na kai suana wane nei mado kwaina, e a’i si e’i keki thauṉi nia kai mae. 12Sui tha Aesiki ka afusia foee do ki i fanua eri, ka fulatoona too tee taleṉee do fuliṉana si do ne fasidaki: ma tha Jihova ka alua lea la fafi nia. 13Ma wane eri ka sukwai alaa, lalae ka baita faamau, inotoa nia ka tae, ka baita ka tatha: 14Uria ne rikii do ana feree sifi, ka rikii do ana katele, ma toa na i maafera nia kera oro ka tatha: ma Filisitaene eki keka ugali nia. 15Uria na malaui kafo eki na wane ni ra maka nia kera ’ilia afa boṉi eki na maka nia na tha Aberahamo e to u na ba, Filisitaene ki kera bokosia, kera kikia si theegano ka fuṉu iei. 16Ma tha Abimileka ka soree isatha Aesiki, Lae kau faisi kamilia; uria na inotoa oe e baita ka tatha faamau ani kamilia. 17Ma tha Aesiki ka lae kau faisia fanua eri, ka kasia biui‐maku nia asi kula dedema i Gira, ka to bana iei. 18Ma tha Aesiki ka ’ilia lau bana malaui kafo ba ki na kera ’ilia inao mai afa boṉi eki maka nia na tha Aberahamo; uria na Filisitaene ki kera bokosia buriana tha Aberahamo e mae: ma nia ka alaṉia malaui kafo eki ana thata eki boo na maka nia e falea totonao. 19Ma wane ni ra tha Aesiki ki kera ’ilia kilu i la fanua dedema, keka fulatoona ruka‐mauri iei. 20Ma wane na i Gira na kera fono toi kalia katele ki keka firu bia wane ni fono toi la kalia katele tha Aesiki ki, keka una eri, Kafo nei na kafo kamilia: ma nia ka alaṉia thatana malaui kafo eri ana Iseke; uria na kera firu bi nia. 21Ma kera ’ilia lau ta malaui kafo, ma keka firu lau boo fafia kafo eri: ma nia ka alaṉia thatana ana Sina. 22Ma nia ka idu kau faisia si kula eri, ka ’ilia lau ta malaui kafo; ma fafia kafo nei e a’i kesi firu naa: ma nia ka alaṉia thatana ana Riobotho; ka sorea, Uria na si maṉa eri tha Jihova e betaa si kula ifaka, ma kwalafaa kia kai oro ka oli alaa i la fanua nei. 23Ma nia ka tae faisia fanua eri, ka lae uria Biasifa. 24Ma tha Jihova ka fula fatai isana afa rodo eri boo, ka una eri, Ni nau God maka oe na tha Aberahamo: osi mau, uria ni nau kwai to bi oe, kwai alua lea la fafi oe, kwai adea kwalafaa oe kai oro alaa inunufana wane ni ra nau na tha Aberahamo. 25Ma nia ka thauwai nia fulii era ni foa la iei, ka ’ai thatana tha Jihova, ka kasia biui‐maku nia iei: ma asi kula eri wane ni ra tha Aesiki ki keka ’ilia malaui kafo. 26Sui tha Abimileka ka too mai Gira, ka lae isana, ma Ahasatha, tee nonii wane ana toa na kera ado bi nia, ma tha Faekolo ṉa wane inoto ne tatha inaona omea nia. 27Ma tha Aesiki ka una eri isada, Mulu lae mai isaku uria ta, kamulua toa na mulu riki nau ka taa, muka arasi nau kwa lae faisi kamulua? 28Ma keka una eri, Kamilia mili rikia na tha Jihova ka to mamana boo bi oe: ma mili sorea, Othi la kai to si maṉa eri imaalutakulua, miki kania fasi alaofua bi oe; 29Fasi ni oe osi ilia ta si do ne taa uri kamilia, alafana ni kamilia misi sua oe, misi ilia ta si do ne taa iamu, talitoona bana si do ne lea, ma mili arasi oe o lae ana enenoa: si maṉa eri ni oe wane na tha Jihova e alua lea la fafi oe. 30Ma nia ka thasi faṉa ifada, ma keka rere ada, ma keka kuu. 31Ma keka tae i la si uusuwadia ni u boo, keka alaṉai ana othi olili la: ma tha Aesiki ka bii arasida, ma keka lae faisi nia ana enenoa. 32Ma lalae mai, afa boṉi eri boo, wane ni ra tha Aesiki ki keka lae mai, keka faaroṉo nia ana malaui kafo eri na kera ’ilia naa, ma keka soree isana, Kamilia mili fulatoona naa kafo. 33Ma nia ka alaṉia thatana ana Sifa: uria si ade la eri kera alaṉia thatana toaa susu eri ana Biasifa, ka fula itaraena.
34Ma fai tafulu fa ṉali e sui atha Iso si maṉa ne tolea ni Jutithi, thari tha Biri ṉa Hitaete; e tolea lau boo ni Basimatha, thari tha Ilono ṉa Hitaete: 35Ma i la ruruuna tha Aesiki ma ni Ribeka ka taa faamau uri keroa.
Currently Selected:
GENESIS 26: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
