GENESIS 27
27
1Ma lalae mai, si mana na tha Aesiki e arai naa, ma maana ka rodo naa ka a’i si rikia fanua, nia ka ailia mai kaluwane inao nia na tha Iso, ka una eri isana, Kaluwane nau ae: ma nia ka sorea, Rikia fasi, ni nau neri. 2Ma nia ka una eri, Rikia fasi si maṉa eri, nau ku arai naa, ku dora ania fa boṉi na kwai mae. 3Mania, nau ku thathamia oki ṉalia rauma oe ba ki si maṉa eri, na afui‐io oe ma basi oe, oko lae fasi uri masuu, oko basia mai ta si do ni ania ifaku; 4Oko naarea si faṉa na ani lana ka lea, si do ku thathamia neri; ṉalia mai, kwai ania; sui ruruuku kai bii alua lea la fafi oe si maṉa kwai to bakua kwasi mae u. 5Ma ni Ribeka ka roṉoa si maṉa na tha Aesiki kai ṉata isana kaluwane nia na tha Iso. Ma tha Iso ka lae nana uri masuu fasi kai basia do maruki ne kwasi, kai ṉalia mai. 6Ma ni Ribeka ka ṉata isana kaluwane nia na tha Jekofo, ka una eri, Rikia fasi, nau ku roṉoa ṉata lana maka oe isana thoomu na tha Iso, ma nia ka una eri, 7Ṉalia mai siina do oki basia, oki naarea si faṉa ani lana ka lea, fasi kwai ania, sui kwai alua lea la fafi oe inaofatha Jihova so maṉa kwai to bakua, kwasi mae u. 8Mania, kaluwane nau ae, oki ade sulia bae laku si maṉa eri, asi do kwai ṉata fifi sulia isamu. 9Lae fasi isana aini sifi si maṉa eri, o fula, oko bii filia mai faisia si kula eri ta ro kali gota lea ki; ma ni nau kwai naarea, si faṉa na ani lana ka lea ifana maka oe, si do ne thathamia. 10Ma ni oe oki ṉalia mai ana maka oe, fasi kai ania, kai bii alua lea la fafi oe si maṉa nia kai to bana, e a’i si mae u. 11Ma tha Jekofo ka soree isana thainana na ni Ribeka, Rikia fasi, thooku tha Iso na ṉa wane rurumua, ma ni nau wane seeku ka dodoloa. 12Mado e a’i maka nau kai thamatooku, ma manatana kai sorea ni nau wane ni lole la; sui kwai adea taa la kai to fafi nau, ma lea la ka a’i. 13Ma thainana ka una eri isana, Kaluwane nau ae, ni nau na taa la oe eri kai to fafi nau: talitoona bana oki ade sulia ṉata laku; lae si amua, oko ṉalia mai ro do eki ifaku. 14Ma nia ka lae, ka raua, ka ṉalia mai sana thainana: ma thainana ka naarea si faṉa ani lana ka lea, si do maka nia e thathamia. 15Ma ni Ribeka ka ṉalia tooni lea kaluwane inao nia na tha Iso ki, na si do ne ni ki mai isana i maafera, ka faatoonia kaluwane buri nia na tha Jekofo: 16Ma nia ka alua uṉana ro kali gota eki fafia ro aba nia ki, ma fafia luana ne dodoloa: 17Ma nia ka falea mai si faṉa eri ani lana ka lea, ma si berede, ne betaa naa, i abana kaluwane nia na tha Jekofo. 18Ma wane eri ka lae isana maka nia, ka una eri, Maka nau ae: ma nia ka sorea, Ni nau nei; kaluwane ṉau ae, ni oe ni tei? 19Ma tha Jekofo ka soree isana maka nia, Ni nau kaluwane inao oe na tha Iso; ku ade naa sulia si do no ṉata sulia isaku na ba: ku thathamia oki tatae, oko ono, oko ania siina do ku basia mai, fasi ruruumu ka alua lea la fafi nau. 20Ma tha Aesiki ka soree isana kaluwane nia, Kaluwane nau ae, nifana ade lana oko fulatoona fofoa mai? Ma nia ka una eri, Uria na God oe tha Jihova e talaia mai isaku. 21Ma tha Aesiki ka soree isatha Jekofo, Kaluwane nau ae, ku thathamia oki idu karaṉi mai fasi kwai thamatoomu, kwai thaitoomana sa mado e a’i ni oe kaluwane nau na tha Iso mamana boo. 22Ma tha Jekofo ka idu karaṉia maka nia na tha Aesiki; ma nia ka thamatoona, ka una eri, Liṉana nata lamu na ṉa liṉana ṉata lana tha Jekofo, una ena mena, ro aba oe ki na ṉa ro aba tha Iso. 23Ma nia e a’i si thaitoomana maalutana wane eri, uria na ro aba nia ki e ifula alafana ro aba thoona na tha Iso: mania, ka alua lea la fafi nia. 24Ma nia ka una eri, Kaluwane nau na tha Iso mamana boo ni oe, mado? Ma nia ka sorea, Nau bonaa neri. 25Ma nia ka una eri, Ṉalia mai ka to karaṉi nau, fasi nau kwai ania siina do kaluwane nau e basia mai, fasi ruruuku kai bii alua lea la fafi oe. Ma tha Jekofo ka ṉalia mai ka to karaṉi nia, ma nia ka ania siina: sui ka ṉalia mai si waene, nia ka kuufia. 26Ma maka nia na tha Aesiki ka soree isana, Kaluwane nau ae, idu karaṉi mai si maṉa eri, oko nonoia fasi maaku. 27Ma nia ka idu karani mai, ka nonoia: ma makwa lana tooni nia ki ka makwafi nia; sui ka alua lea la fafi nia, ka una eri, Lio fasi, makwa lana kaluwane nau e ’uria makwa lana masuu na tha Jihova e alua lea la fafia: 28Mania, tha God kai falea si oru i thalo lo ifamu, ma suula fanua na i iano, ma si koni, ma si waene kai oro ifamu. 29Ina lana toa ki keki ra ifamu, ma kulee toa keki agwaoro iano isamu: oki inoto fafia dooramu kera, ma kaluwane thainamu ki keki agwaoro iano isamu: taa la kai to fafia ni tei na kai alua taa la fafi oe, ma lea la kai to fafia ni tei na kai alua lea la fafi oe. 30Ma lalae mai, si maṉa eri u boo na tha Aesiki e alua sui naa lea la eri fafia tha Jekofo, ma tha Jekofo e lae si tau u faisia inaofana maka nia na tha Aesiki, thoona, na tha Iso, ka bii kotho mai faisia basi lana do ne i masuu. 31Ma ni nia lau boo e naarea ta si faṉa na ani lana ka lea, ka ṉalia mai sana maka nia, ka una eri sana maka nia, Maka nau ae, tatae fasi, oko ania siina do kaluwane oe e basia mai nai nia, fasi ruruumu kai alua lea la fafi nau. 32Ma maka nia na tha Aesiki ka soree isana, Ni oe ni tei? Ma nia ka una eri, Ni nau kaluwane oe, ulunao oe ba na tha Iso. 33Ma tha Aesiki ka leleba ana leleba la baita, ka una eri, Ni tei? nifei nia wane eri ne basia mai do i masuu, me ṉalia mai ifaku, ma nau ku ania naa siina do eri sui bana si maṉa osi fula u mai, ku alua naa lea la fafi nia? iu, ma lea la kai to mamana boo fafi nia. 34Me roṉoa naa bae lana maka nia, tha Iso ka aṉi ana aṉi la baita, ma ka ṉata kwaitakoi asia naa, ka soree isana maka nia, Maka nau ae, alua fasi lea la fafi nau, ni nau lau boo. 35Ma nia ka sorea, Thasimu e lae mai asi lio ni lole la, me ṉalia naa lea la eri sa kwai alua fafi oe. 36Ma tha Iso ka una eri, Kera alaṉi kokoto ana thatana na tha Jekofo, uria ne faataofai nau ro si maṉa neri: e ṉalia kau do nau so kwa tae fuli ania ani oe; ma, rikia fasi, si maṉa eri e ṉalia naa lea la nau eri soki falea iaku. Ma nia ka una eri, O betaa ta si do lea lau ifaku, mado? 37Ma tha Aesiki e luua, ka soree isatha Iso, Rikia fasi, nau ku alu nia ṉa wane inoto oe, ma doorana kera sui bana nau ku falea naa ifana ana toa ni ra nia ki; ma nau ku thare nia naa asi koni ma si waene: ma sui si maṉa eri ta si ta na kwai ilia ifamu, kaluwane nau? 38Ma tha Iso ka soree isana maka nia, Maka nau ae, talitoona bana tee si do lea ni isamu, mado? alua fasi lea la fafi nau, ni nau lau boo, maka nau ae. Ma tha Iso ka ’ai baita ana aṉi la. 39Ma maka nia na tha Aesiki e luua, ka soree isana, Rikia fasi, fulii to la oe na si kula ana suula fanua na i iano, ma si oru i thalo lo mai; 40Ma oki to bamua sulia nini oe ana firua, oki ra ifana thasimu; ma lalae mai si maṉa sii oe toto kai tatha, oki bii kwaemusia ioke nia faisia luamu. 41Ma tha Iso e rikia tha Jekofo ka taa sulaania lea la eri na maka nia e alua fafi nia: ma tha Iso ka una eri i ruruuna, Fa boṉi eki na toto kuki tatao fafia maka nau ka kwaikaraṉi naa; afa boṉi eki kwai bii thauṉia thasiku na tha Jekofo. 42Ma kera faaroṉoa ni Ribeka ana ṉata lana kaluwane inao nia na tha Iso; ma nia ka kwaiarasi, ka ailia mai kaluwane buri nia na tha Jekofo, ka soree isana, Rikia fasi, thoomu na tha Iso ka faababatooa manatana suli oe, e sorea toto kai thauṉi oe. 43Uria si kula eri, kaluwane nau ae, ade fasi sulia bae laku; tatae, oko thaka isana waiwaena nau na tha Lebana i Harana; 44Oki to si amua bi nia sulia ṉadee fa boṉi, maasia si maṉa na rakeaṉoṉoa thoomu kai bulasi faisi oe; 45Maasia si maṉa na kera bulasia rakeiria thoomu faisi oe, ma liona ka dora asi ade la no ilia iana na ba: sui ni nau kwai kwaiarasi iburiamu, oki oli mai faisia fanua eri: ni nau kwa inamae ani kamaroa ana tee fa boṉi eri boo uria ta?
46Mai ni Ribeka ka soree isatha Aesiki, Nau ku feda naa ana to laku sulia ro kini eki na thari tha Hete ki: mada sa tha Jekofo kai tole kini ana thari tha Hete ki, na keki ’uria ro kini nei ki ana thari fanua nei ki, kai ufita fasi to laku kai lea lau?
Currently Selected:
GENESIS 27: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
