GENESIS 28
28
1Ma tha Aesiki ka ailia mai tha Jekofo, ka alua lea la fafi nia, ka ṉata fifi isana, ka soree isana, Ada oko tole kini ana thari na i Kenana ki. 2Tatae fasi, oko lae uria Bedanerama, uria maafera tha Bethuele na maka thainamu; ma oko tole kini faisia si kula eri, ana thari tha Lebana ki na waiwaena thainamu. 3Ma tha God ne Sukwai ka Tatha kai alua lea la fafi oe, kai adea na kwalafamu kai oro faamau ka lae alaa, fasi ina lana toa oro ki keki ita mai ani oe; 4Kai falea lea la eri ifamu ne falea atha Aberahamo na ba, ṉa do fani oe, ma ifana kwalafamu bi oe; fasi oki ṉalia fanua nei no to ni laea iei, do oe bonaa neri, fanua eri na tha God e falea naa ifatha Aberahamo. 5Ma tha Aesiki e arasia tha Jekofo: ma nia ka lae uri Bedanerama isatha Lebana, kaluwane tha Bethuele ṉa wane i Siria, waiwaena ni Ribeka na thainana tha Jekofo ma tha Iso. 6Si maṉa na tha Iso e rikia na tha Aesiki e alua lea la fafia tha Jekofo, me arasia ka lae kau uri Bedanerama fasi kai tole kini faisia fanua eri, ma si maṉa eri ne alua lea la fafi nia, e ṉata fifi isana, ka una eri, Ada oko tole kini ana thari na i Kenana ki; 7Me rikia na tha Jekofo e ade sulia ṉata lana maka nia ma thainana, ma ka lae naa uri Bedanerama; 8Ma tha Iso e rikia na maka nia na tha Aesiki e rikia thari na i Kenana ki ka a’i si ala fafida; 9Sui tha Iso ka lae isatha Isimela, ka safua ro kini nia ba ki ani Mahalatha, thari kaluwane tha Aberahamo na tha Isimela, waiwaena tha Nebaiota; ma nia ka tolea kini eri.
10Ma tha Jekofo ka lae nana faisia i Biasifa, ka lae sula tale uri Harana. 11Ma lalae e fulatoona tee si kula, ka to iei maakwalia fanua kai dani, uria na thato e su naa; ma nia ka ṉalia tee gwa fau ana fau ne ni kula eri ki, ka alua fasi kai bogwau ania, sui ka teo i kula eri, ka biṉa. 12Ma nia ka moosubole, ma, rikia fasi, tee lalaefa kera takwelaṉania i fanua ne i iano, ma gwauna ka tae, ka fula i thalo lo: ma, rikia fasi, angel tha God ki keki tae kau ma keki sifo mai sulia. 13Ma, rikia fasi, tha Jihova ka takwe mai i gwauna, ka una eri, Ni nau tha Jihova, na God kokoo oe na tha Aberahamo, ma God tha Aesiki: fanua nei, noko teo iei, kwai falea ifamu, ma ifana kwalafamu: 14Ma kwalafamu keki ’uria gegeona theegano, ma oki lae tathaa uri bali su lana thato, ma ibali tae lana, ma uri notoa ma uri mutana: ma ani oe ma ana kwalafamu keki alua lea la fafia ina lana toa eki sui bana na ni fanua na i iano. 15Ma, rikia fasi, ni nau kwai to bi oe, kwai beta suli oe asi kula ni sui bana noki lae uria, sui kwai oli fafi oe uri fanua nei, uria na ni nau e a’i kwasi akwasi oe, maasia si maṉa na toto kwai ilia si do ku ṉata sulia isamu na ba. 16Ma tha Jekofo ka tharai faisia biṉa la nia, ma nia ka una eri, Tha Jihova e ni mamana boo i kunei; ma ni nau e a’i kwasi thathaitoomana. 17Ma nia ka mau, ka una eri, Si kula kwaifamaui asia naa nai nia! biu tha God mamana boo nai nia, ma ṉa maethakaa i thalo lo. 18Ma tha Jekofo ka tatae i la si uusuwadia u boo, ka ṉalia gwa fau eri ne alua ka bogwau ania na ba; ma ka ’ili ania ka takwe mala ta beta, ka kikia si gwai i gwauna. 19Ma nia ka alaṉia thatana si kula eri i Bethele: ma thatana toaa susu eri inao mai i Lasa. 20Ma tha Jekofo ka alaṉia ana othi la, ka una eri, Mada sa tha God kai to bi nau, kai beta suli nau sula tala nei na kwai lae kau sulia, ma kai falea akua ta si berede kwa ania, ma ta si maku kwa afisia, 21Fasi lalae kwai oli lau mai uri maafera maka nau ana enenoa; God nau ni bonaa na tha Jihova, 22Ma gwa fau na nau ku ’ili ania ka takwe mala ta beta, nai nia, toto ṉa betana biu tha God: ma asi do eki sui bana na toto oki falea iaku, nau kwai falea boo taṉafula si do eki ifamu.
Currently Selected:
GENESIS 28: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
