GENESIS 29
29
1Sui tha Jekofo ka lae nana, lalae ka fula i fanua toa ana bali tae lana thato. 2Ma nia ka lio, ma, rikia fasi, tee malaui kafo i masuu, ma, lio fasi, ulu feree sifi keki teo isana; uria na faisia malaui kafo eri keka faakuufia feree sifi eki: ma tee gwa fau baita ka ni fafia maana malaui kafo eri. 3Ma keka ofua feree sifi ki sui bana uriei: sui keki bii abulisia kau gwa fau eri faisia maana malaui kafo, keki faakuufia aini sifi eki, sui keka alua lau gwa fau eri i fuila fafia maana malaui kafo eri. 4Ma tha Jekofo ka soree isada, Doora kera, fanua ifei na ni kamulua mulu too mai iei, muka lae mai? Ma keka una eri, Kamilia toa i Harana. 5Ma nia ka soree isada, Mulu thaitoomana tha Lebana, kaluwane tha Neho, mado? Ma keka una eri, Mili thaitoomana boo. 6Ma nia ka soree isada, Kai to lea bana, mado? Ma keka una eri, Nia kai to lea bana: ma, rikia fasi, thari nia na ni Resela ka lae na mai bia feree sifi eki. 7Ma nia ka una eri, Lio fasi, fanua kai thato lea u bana, ma si maṉa ana ofu lana katele ki ka a’i u: faakuufia fasi aini sifi nei ki, sui muka lae amulua, muka thareda. 8Ma keka sorea, Kamilia misi talaana ili lana, maakwalia si maṉa na toto kera ofua naa feree sifi eki sui bana, ma keki abulisia gwa fau faisia maana malaui kafo nei; sui mika bii faakuufia sifi nei ki. 9Si maṉa na nia kai ṉata u bana isada, ni Resela ka fula mai bia feree sifi maka nia; uria na thari eri kai fono toi kalida. 10Ma lalae mai, si maṉa na tha Jekofo e rikia naa ni Resela, thari tha Lebana na waiwaena thainana, tha Jekofo ka bii idu karaṉi mai, ka abulisia gwa fau eri faisia maana malaui kafo, ka faakuufia feree sifi tha Lebana ki na waiwaena thainana. 11Ma tha Jekofo ka nonoia ni Resela, ka ’ai baita ana aṉi la. 12Ma tha Jekofo ka faaroṉoa ni Resela na ni nia ina lana maka nia, ṉa kaluwane ni Ribeka: ma thari eri ka fita kau, ka faaroṉoa maka nia. 13Ma lalae mai, si maṉa na tha Lebana e roṉoa naa si faaroṉoa eri sulia kaluwane waiwaena nia, na tha Jekofo, nia ka fita mai fasi kai toda ania, ka kalilua bia, ka nonoia, ka talaia uri maafera nia. Ma nia ka faaroṉoa tha Lebana asi do eki sui bana. 14Ma tha Lebana ka soree isana, Si ogi ana ogiku na ni oe mamana boo, ma seemu na si kula ana seeku. Ma nia ka to isana wane eri sulia tee fa madami laulau. 15Ma tha Lebana ka soree isatha Jekofo, Ina laku na ni oe; soki tona ra ifaku uria si kula eri e a’i too. Faaroṉo nau fasi, si ta na kwai falea ana foli lamu? 16Ma tha Lebana ana ro thari nia ki: thatana ai inao na ni Lia, ma thatana susu buri na ni Resela. 17Ni Lia maane lio ni mamasoroa; ni Resela molo, riki lane lea, ma seena ka lea asia naa. 18Ma tha Jekofo ka liothau ani Resela, ka una eri, Nau kwai ra ifamu sulia fiu fa ṉali, sui oko bii falea mai thari buri oe na ni Resela. 19Ma tha Lebana ka sorea, Lea ka tatha kwai falea iamu; e a’i si lea sa kwa falea ata wane eeta lau: oki to bi nau. 20Ma tha Jekofo kai ra ifana sulia fiu fa ṉali inunufani Resela; ma fa ṉali eki e ’uria bana ta ṉada fa boṉi, sulia liothau la nia eri ne liothau ania. 21Ma tha Jekofo ka soree isatha Lebana, Falea mai ai nau ba, kwai tolea, uria na fa boṉi nau eki e mamana naa, fasi kwai ofu bi nia. 22Ma tha Lebana ka figua mai wane eki sui bana i fanua eri, ka thasi faṉa. 23Ma lalae mai fanua ka rodo naa, nia ka talaia thari nia na ni Lia, ka tolea mai isana; ma nia ka ofu bia thari eri. 24Ma tha Lebana ka falea thari ni ra nia na ni Silifa ifana thari nia na ni Lia, fasi kai ra ifana. 25Ma lalae mai, fanua ka dani, rikia fasi, ni Lia neri: ma tha Jekofo ka soree isatha Lebana, Si ta no ilia iaku neri? nau ku ra sui naa ifamu fasi oko falea mai ni Resela, mado? mania, o lole nau uria ta? 26Ma tha Lebana ka una eri, Si do kera lufia faamau i fanua kamilia, sa keki falea susu buri si maṉa na kesi falea u ai inao. 27Oki faasuia uiki nia, ma miki bii falea thari nei iamu lau boo i maana ra oe noki ra ania ifaku sulia ta fiu fa ṉali lau. 28Ma tha Jekofo ka ade boo sulia si ade la eri, ka faasuia uiki nia: ma tha Lebana ka bii falea thari nia na ni Resela iana lau boo fasi kai ofu bia. 29Ma tha Lebana ka falea thari ni ra nia na ni Bila ifana thari nia na ni Resela, fasi kai ra ifana. 30Ma tha Jekofo ka ofu lau boo bia ni Resela, ma nia ka liothau lau boo ani Resela ka tatha ani Lia; sui kai ra lau ifana wane eri sulia fiu fa ṉali lau.
31Ma si maṉa na tha Jihova e rikia na kera rikia ni Lia ka taa, nia ka falea mai wela i rakena: ni Resela molo e abaato. 32Ma ni Lia ka iana, ka tharea kaluwane nia, ka alaṉia thatana atha Rubeni: uria ne una eri, Tha Jihova e lio mamana boo uria liodilaa nau; mania asi maṉa eri arai nau kai thathami nau boo. 33Ma nia ka iana lau, ka tharea lau ta kaluwane; ka una eri, Uria na tha Jihova e ronoa na kera riki nau ka taa, uria si kula eri ni nia e falea mai kaluwane nau nei ifaku: ma nia ka alaṉia thatana atha Simiona. 34Ma nia ka iana lau, ka tharea lau ta kaluwane; ka una eri, Asi mana eri u boo arai nau kai lado bi nau, sulaania ni nau ku tharea naa ulu fa kaluwane ifana: mania kera alaṉia thatana atha Lifae. 35Ma nia ka iana lau, ka tharea lau ta kaluwane: ma nia ka una eri, Asi maṉa eri kwai taṉoa thatana tha Jihova: mania ka alaṉia thatana atha Juda; sui ka a’i si thare wela lau.
Currently Selected:
GENESIS 29: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
