GENESIS 31
31
1Ma nia ka roṉoa bae lana kaluwane tha Lebana ki, na keka una eri, Tha Jekofo e ṉalia ogogoṉia maka kulu ni sui boo; ma asi do na maka kulu e ririkidaki nia e fulatoona inotoa nei sui bana. 2Ma tha Jekofo e lio uria maana tha Lebana, ma, rikia fasi, wane eri e a’i si riki nia ka lea alafana si ade la ne ililia i dini. 3Ma tha Jihova ka soree isatha Jekofo, Oli kamua uria fanua maka oe na inao ki, ma uria ina lamu kera; ma ni nau kwai lae bi oe. 4Ma tha Jekofo kai kwaiarasi, ka ailia mai ni Resela ma ni Lia uri masuu isana feree sifi nia, 5Ka soree isadaroa, Nau ku rikia maana maka kamaroa, e a’i si riki nau ka lea alafana si ade la ne ililia i dini; ma sui God maka nau e to bana bi nau. 6Ma ni kamaroa moro thaitoomana boo si kula eri, Ana sukwaia nau sui bana nau ku ra ifana maka kamaroa na ba. 7Ma maka kamaroa e lole nau, me talaa foli laku ana tafulu si maṉa; una ena mena, tha God e a’i si alamatai nia si faare taa iaku. 8Si maṉa ne una eri, Foli lamu na ṉa do karua ki; feree do eki sui bana kera tharea do karua ki: ma si mana ne una eri, Foli lamu na ṉa do na kera ulili foloa; feree do eki sui bana keka bii tharea do na kera ulili foloa. 9Mania tha God ana e ṉalia feree do maka kamaroa ba ki, na ka falea mai iaku. 10Ma lalae mai, si maṉa na feree do eki kera iana, nau ku tafoa maaku, ku lio i la moosubolea, ma, rikia fasi, do wane eki na kera lofo fafia feree do eki na ṉa do na kera ulili foloa, ma do karua ki, ma do melamelaa ki. 11Ma angel tha God e ṉata mai isaku ana moosubolea, ka una eri, Jekofo ae: ma ni nau ku sorea, Ni nau neri. 12Ma nia ka una eri, Tafoa fasi maamu si maṉa eri, oko rikia fasi, do wane ki sui bana na keka lofo fafia feree do eki na ṉa do na kera ulili foloa, ma do karua ki, ma do melamelaa ki: uria ni nau ku rikia naa si ade la eki na tha Lebana e ilia iamu na ba. 13Ni nau ṉa God i Bethele, si kula no gwaia beta ba iei, mo alaṉai isaku ana othi la na ba: tatae fasi si maṉa eri, lae kamua faisia fanua nei, ma oki oli uria fanua ina lamu kera. 14Ma ni Resela ma ni Lia kero luua, keko una eri isana, E a’i ta si do thatamarea si to ifamarea i maafera maka kamarea, me a’i ta si do sa meki tae fuli ania, mado? 15Nia e manata suli kamarea ’uria sa mere ro ai eeta ki, mado? uria ne usi ani kamarea, me lagu teefau ana malefo kamarea lau boo. 16Sulia ogogonia eki sui boo na tha God e ṉalia faisia maka kamarea, do kamarea ki neri, ma do wela kamarea ki: sui si maṉa eri atona bana ta si do na tha God e soree isamu, oko ilia bamua. 17Sui tha Jekofo e tae, ka finua kaluwane nia ki ma ai nia ki keka ono i suila kamela ki; 18Ma nia ka talaia kau katele nia ki sui boo, ma ogogonia nia ne todadaki, ṉa katele ana foli lana ne todaa i Bedanerama, fasi kai lae isana maka nia na tha Aesiki i fanua eri i Kenana. 19Ma tha Lebana e lae nana fasi kai sufia ifuna sifi nia ki: ma ni Resela e bilia naa gwa wane eki na ṉa do maka nia. 20Ma tha Jekofo e lae thaufuni; tha Lebana, na wane eri i Siria, e a’i si thaitoomana lae lana, uria ne thaka kau, e a’i si faaroṉo nia ania. 21Mania e thaka ana fafia ogogonia nia ni sui bana; ma nia ka tatae, ka ulufolo ana kafo baita eri, ka alua maana kai lio uria gwa tolo eri i Giliata.
22Ma ana ula fa boṉi keka faaroṉoa tha Lebana atha Jekofo ne thaka naa. 23Ma nia ka talaia ina lana kera bi nia, ka tari buriana ana laea ne talaana fiu fa thato; lalae keka fulatoona i la tolo eri i Giliata. 24Ma tha God e lae mai satha Lebana, na wane eri i Siria, ana moosubolea afa rodo, ka soree isana, Beta suli oe ada oko sorea si do lea isatha Jekofo, mado si do taa. 25Sui tha Lebana ka lae kau, lalae ka fulatoona tha Jekofo. Ma tha Jekofo e kasia biui‐maku nia i la tolo eri: ma tha Lebana bia ina lana kera keka kasia biui‐maku kera ki i la tolo eri i Giliata. 26Ma tha Lebana ka soree isatha Jekofo, Si ta no ilia na ba, no thaufunia lae lamu faisi nau, o ṉalia kau ro thari nau ki, alafana toa omea e lauda ana nini ni firu? 27O thaka thaufuni kau uria ta? uria ta na oko thaufunia lae lamu faisi nau, ma osi faaroṉo nau ania, fasi kwa arasi oe kau asi waela la, ana fa ṉu ki, asi do keka ufia, ma ana tale agaa ki? 28Uria ta nosi alamatai nau sa kwa nonoia kaluwane nau ki ma thari nau ki? asi ade la eri o abula oewanea. 29Sukwaia ni abaku kwa faare taa iamu: ma sui God maka oe e ṉata mai isaku afa rodo eri ne sui na kau, ka una eri, Beta suli oe ada oko sorea si do lea isatha Jekofo, mado si do taa. 30Ma si maṉa eri, e a’i si e’i oko lae mena kau uria na ruruumu e thathamia faamau maafera maka oe, uria ta no bilia god nau ki? 31Ma tha Jekofo e luua, ka soree isatha Lebana, Uria na ni nau ku mau: sulaania nau ku una eri, Mado e a’i oki firu, oki laua ro thari oe ki faisi nau. 32Atona bana ta imole noki rofetoona god oe ki isana, nia sa ka maruki e a’i: inaofana ina lakaroa oki thaitoomana maalutana si do oe na ni ki isaku, oki bii ṉalia ifamu. Uria na tha Jekofo e dora ania ni Resela, ne bilia si do eki. 33Ma tha Lebana ka kotho uri la biui‐maku tha Jekofo, ma i la biui‐maku ni Lia, ma i la biui‐maku ro kini ni ra eki; e rorofe, ka a’i si rofetoona. Sui e lae faisia biui‐maku ni Lia, ka kotho mai la biui‐maku ni Resela. 34Ma ni Resela e ṉalia boo gwa wane eki, ka alua imaalutana si do taala kamela ki, sui ka ono bana ifafona. Ma tha Lebana ka thamatoona biui‐maku eri ta si kula si e’i; una ena mena, e a’i si fulatoona do eki. 35Ma kini eri ka soree isana maka nia, Osi alamatai nia si kula nei si taa iana wane inoto nau, na ni nau ku dora ania tatae la sa kwa takwe inaofamu; uria na biraṉana kini ki ni fafi nau. Ma nia ka rorofe, ka a’i si fulatoona gwa wane eki. 36Ma tha Jekofo e rakeiri, ka sorea tha Lebana: ma tha Jekofo e luua, ka una eri satha Lebana, Si ade la ta neri na nau ku ade garo ania? si ta na ku abula taa ania no tari fofoa iburiaku nania? 37Rofe la no rorofe imaalutana si do nau ki sui bana, si ta no rofetoona asi do eki sui boo ne i maafera oe? alua fasi kunei inaofana dooraku kera na ṉa dooramu kera, fasi keki ṉata kokoto sulia imaalutakaroa. 38Sulia ro tafulu fa ṉali nei ki nau ku toto isamu na ba; sifi kini oe ki ma gota kini oe ki e a’i kesi luka faekwa ana kalee do kera ki, ma ni nau e a’i kwasi ania do wane ki ana feree do oe. 39Si do eki na kera thau maala ania, nau e a’i kwasi ṉalia isamu; mamana lana ni nau neri; o thathamia kwa duua ana abaku, do kera laua afa thato neri, mado do na kera laua afa rodo. 40To laku e una eri; afa thato fanua e a’i ta kafo iei ka faafeda nau, ma gwagwaria ka thauṉi nau afa rodo; ma ta si biṉaa si liu boo i maaku. 41To laku e una eri sulia ro tafulu fa ṉali i maafera oe; nau ku rara ifamu sulia tee tafulu fa ṉali fai fa ṉali maana ro thari oe ki, ma sulia ono fa ṉali maana katele oe ki: ma tafulu fa tatala la, o talaa foli laku. 42Mada sa God maka nau e a’i si to bi nau ṉa God tha Aberahamo na tha Aesiki e faare baita ania, o arasi nau kwa tona lae mamana boo. Tha God ana e rikia naa taa la nau ku toto ania na ba, ma ra nau ku ulafu ania ana ro aba nau ki, me sore oe fafia afa rodo eri ne sui na kau. 43Ma tha Lebana e luua, ka soree isatha Jekofo, Kini nei ki na ṉa thari nau ki, ma kaala wela nei na ṉa wela nau ki, ma feree do nei ki na ṉa feree do nau ki, ma si do noki rikidaki sui boo na si do nau ki: ma nau kwai abula taa ufita ana thari nau nai nida, mado ana wela keroa ki na kero thareda? 44Mania, lae si mai, koro kania alaofua; ma si do eri na ṉa do ni faamamane la imaalutakaroa. 45Ma tha Jekofo ka ṉalia tee gwa fau, ka takwelaṉania mala ta beta. 46Ma tha Jekofo ka una eri isana ina lana kera, Ofua fasi tei gwa fau; ma keka ṉalia tei gwa fau, keka ofua ka tae: ma keka rere ada ifafona gwa fau eki na kera ofua. 47Ma tha Lebana ka alaṉia ofu lana gwa fau eki ana Jega‐sahadutha: ma tha Jekofo ka alaṉia ana Galiti. 48Ma tha Lebana ka una eri, Ofu lana gwa fau nei ki na ṉa do ni faamamane la imaalutakaroa afa boṉi nei. Sulia si kula eri kera alaṉia thatana ana Galiti, 49Ma Misiba; uria ne una eri, Tha Jihova kai fono toi imaalutakaroa si maṉa na koki ni da faisi koro kwailiu. 50Mado soki faare taa ana thari nau nei ki, mado oki tolea lau tei kini na keki safua thari nau nei ki, e a’i ta wane lau si ni sakaroa; rikia fasi, tha God ana kai faamamanea si do ne thaitoomana suli nau ma ni oe. 51Ma tha Lebana ka una eri satha Jekofo, Rikia fasi ofu lana gwa fau nei ki, ma rikia fasi beta nei na ni nau ku alua imaalutakaroa, nai nia. 52Ofu lana gwa fau nei ki na ṉa do ni faamamane la, ma beta nei na na do ni faamamane la, fasi nau toto kwasi tatha kau ana ofu lana gwa au nei ki, kwasi lae isamu, ma ni oe osi tatha mai ana ofu lana gwa fau nei ki ma beta nei, osi lae mai isaku, uria si ade la na kai taa. 53God tha Aberahamo ma God tha Neho, na ṉa God maka keroa, kai ṉata kokoto sulia imaalutakaroa. Ma tha Jekofo ka alaṉai ana othi la ana thatana ni nia na maka nia na tha Aesiki e faare baita ania. 54Sui tha Jekofo ka thauṉia do ni foa la ki i la gwa tolo eri, ka laefia ina lana kera fasi keki ania ta si berede: ma kera ania boo ta si berede, keka to bada i la gwa tolo eri sulia fa rodo eri laulau. 55Ma i la si uusuwadia u boo, tha Lebana ka tatae, ka nonoia kaluwane nia ki ma thari nia ki, ka alua lea la fafida: sui tha Lebana ka lae nana, ka oli naa uri fanua nia.
Currently Selected:
GENESIS 31: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
