GENESIS 32
32
1Ma tha Jekofo ka lae nana sulia tala nia, ma angel tha God ki keka toda ani nia. 2Ma si mana ne rikida naa, tha Jekofo ka una eri, Omea baita tha God nai nia: ma nia ka alania thatana si kula eri ana Mahanema.
3Ma tha Jekofo ka arasia kau wane ni ṉali‐ṉataa ki sana thoona na tha Iso uri fanua i Sia, bali fanua tha Idomo neri. 4Ma nia ka ṉata fifi isada, ka sorea, Muki una eri isana wane inoto nau na tha Iso, Tha Jekofo, na wane ni ra oe, e ṉata ka una eri, Nau ku to ni laea bia tha Lebana, ku to i kula eri ka fula asi maṉa eri: 5Ma nau ku rikii do ana buloka ki, ma ase ki, ma feree sifi ki, ma wane ni ra ki, ma kini ni ra ki: ma nau ku kwaiarasi kau fasi kwai faaroṉoa wane inoto nau ania, fasi kwai fulatoona kwaiofei la i maamu. 6Ma wane eki ni ṉali‐ṉataa keka oli lau mai satha Jekofo, keka una eri, Kamilia mili fula boo isana thoomu na tha Iso, ma nia kai lae lau bomai fasi kai toda ani oe, ma fai taleṉee wane keki lae mai bi nia. 7Sui tha Jekofo ka mau faamau, ma ka isi fulfuli: ma nia ka ukalia toa eki na kera to bi nia, ma feree sifi ki, ma katele ki, ma kamela ki, ana ro bali laea ki; 8Ma nia ka sorea, Mada sa tha Iso kai fula isana tee bali laea kai thauṉida, sui ruana bali laea na keka to, keka thaka ada, fasi keka maruki. 9Ma tha Jekofo ka una eri, God ae, na God maka inao nau eri na tha Aberahamo, ma God maka nau na tha Aesiki, ni oe tha Jihova no soree isaku na ba, Oli kamua uri fanua oe, ma uria isana ina lamu kera, ma ni nau kwai ade lea iamu: 10Nau e a’i kwasi farana si do ne faekwa asia boo faisia tatakomi la oe ba ki sui bana ma mamana la oe ni sui bana, no fatai nia ifana wane ni ra Oe nei, sulaania ana talitoona bana kubau nau, ku tona tatha rarafolo ania i Jodana nei; ma si mana eri ro bali laea ki keka safu nau. 11Nau ku thathamia oki suusi nau faisia abana thooku, faisia abana tha Iso neri: uria ni nau ku mau ani nia, ada ka lae mai, ka thauṉi nau, ma kini ne welaa bia wela nia ki. 12Mo sorea na ba, Nau kwai ilia mamana boo si do lea ifamu; kwai adea kwalafaa oe keki ’uria migee one na i la amali ne eteta, ka dora. 13Ma nia ka to bana iei afa rodo eri boo; ma ka ṉalia tei do ana do eki na ni abana, fasi kai tona falea ifana thoona na tha Iso; 14Ro taleṉee gota kini ki ma ro tafulu gota wane, ro taleṉee sifi kini ki ma ro tafulu sifi wane, 15Ulu tafulu kamela na kai faasusu bia kalee kamela kera ki, fai tafulu buloka kini ki ma tee tafulu buloka wane, ro tafulu ase kini ki ma tee tafulu kalee ase ki. 16Ma nia ka falea do eki i abana wane ni ra nia ki, laea eki sui boo keka lae eeta kwailiu, ka una eri sana wane ni ra eki, Kamulua muki ulu rarafolo kau inaoku, ma muka lae da faisi kamulua kwailiu, ta laea faisia ta laea. 17Ma nia ka ṉata fifi sana wane ne tatha inao, ka sorea, Lalae si maṉa na thooku na tha Iso kai toda ani oe, kai soetoomu, kai una eri, Ni oe wane ni ra fani tei? ma oki lae urifei? ma do na inaomu, nai nida, na ṉa do ni tei? 18Sui oko bii una eri, Do eki na ṉa do wane ni ra oe na tha Jekofo; do e tona faledaki ifana wane inoto nau na tha Iso: ma, rikia fasi, ni nia kai lae lau bomai iburiamilia. 19Ma talafana ṉata fifi la nia eri sana wane inao, alafana lau boo ṉata lana isana ruana wane, ma ula, ma wane eki sui bana na keka lae buriana laea eki, ka sorea, Talafana si ṉataa eri, lalae mulu fulatoona naa tha Iso, alafana lau boo ṉata lamulua isana. 20Ma muka sore una eri lau boo, Rikia fasi, wane ni ra oe ba na tha Jekofo kai lae na mai buriamilia. Uria nia ka una eri, Nau kwai dianaa liona ana do eki na ku tona falea, na keki tatha inaoku, kwai bii rikia maana iburi; mado e a’i nia kai ala fafi nau i maana. 21Mania do eki ne tona falea keka ulufolo inaona: ma ni nia ka to bana afa rodo eri bia laea baita eri.
22Ma nia ka tatae afa rodo eri, ka talaia ro ai nia ki, ma ro kini ni ra nia ki, ma tee akwala ma tee fa kaluwane nia ki, ka ulu rarafolo asi kula ne onetaia eri i Jaboka. 23Ma nia ka talaida, ka arasida keki ulu rarafolo ana kafo eri, ka arasia si do ne rikidaki sui bana. 24Ma kera akwasia tha Jekofo ka to bana talifili nia; ma tee nonii wane ka kwaikwairaui bi nia ka fula asi maṉa fanua kai dani. 25Ma si maṉa na wane eri e rikia na sii nia si tatha ania, nia ka suana si kula ni buira thafana; ma si kula ni buira thafana tha Jekofo ka tala faisia fuila si maṉa nia kai kwaikwairaui bi nia. 26Ma wane eri ka sorea, Alamatai nau kwai lae akua, uria fanua kai dani naa. Ma nia ka sorea, Nau sa kwa alamatai oe oko lae e a’i, si maṉa nosi alua u lea la fafi nau. 27Ma wane eri ka soree isana, Thatamu ni tei? Ma nia ka sorea, Tha Jekofo. 28Ma wane eri ka sorea, Kesi alaṉia lau thatamu atha Jekofo, keki alaṉia atha Isirela: sulaania o firu bia tha God ma bia imole ki, ma sii oe e tatha naa. 29Ma tha Jekofo ka soetoona, ka sorea, Nau ku thathamia oki faaroṉo nau mai ana thatamu. Ma wane eri ka sorea, Uria ta noko soetooku uria thataku? Ma nia ka alua lea la fafi nia iei. 30Ma tha Jekofo ka alaṉia thatana si kula eri ana i Beniele: uria ni nau ku lio i maana tha God, ma kera faamaruki nau, kwasi mae. 31Ma si maṉa nia kai ulu rarafolo na kau i Benuele, thato ka tae fafi nia, ma nia ka lae kukube sulia thafana. 32Sulia si kula eri kwalafaa tha Isirela kesi ania si ula na kera lofoṉurusia na ba, na kai to bana buira thafee do ki, ka fula itaraena: uria na wane eri e suana buira thafana tha Jekofo asi ula na kera lofoṉurusia.
Currently Selected:
GENESIS 32: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
