GENESIS 33
33
1Ma tha Jekofo ka tafoa maana, ka lio alaa, ma, rikia fasi, tha Iso ka lae na mai, bia fai taleṉee wane na keka lae bi nia. Ma nia ka toliṉia baree wela eki sani Lia, ma sani Resela, ma isana ro kini ni ra eki. 2Ma ro kini ni ra eki bia baree wela keroa ki nia ka aluda keka tatha totonao, ma ni Lia bia baree wela nia ki iburiada, ma ni Resela bia tha Josefa iburi bonaa. 3Ma ni nia ka tatha inaona toa eki, ka gwau toli uri theegano fiu si maṉa, lalae ka fula karaṉia thoona. 4Ma tha Iso ka fita mai, ka toda ani nia, ka kalilua bia, ka nonoia: ma keko ani. 5Ma wane eri ka tafoa maana, ka rikia kini eki ma kaala wela; ka una eri, Ni tei na kera lae bi oe, nai nida? Ma nia ka una eri, Baree wela eki na tha God ana kwaiofei lana e falea mai ifana wane ni ra oe. 6Sui ro kini ni ra eki keko idu karaṉi mai, ni keroa bia wela keroa ki, ma keka gwau toli uri theegano. 7Ma ni Lia ka idu karaṉi lau bomai bia wela nia ki ma keka gwau toli: ma tha Josefa ka idu karaṉi mai iburi bia ni Resela, ma keko gwau toli. 8Ma wane eri ka sorea, Laea baita ufita na nau ku toda ani kera na ba? Ma nia ka una eri, Ṉa do fasi kwai bii fulatoona kwaiofei la i maana wane inoto nau nei. 9Ma tha Iso ka una eri, Doora ae, do faamau ku rikidaki naa; do nei ki ka to ana do oe ki. 10Ma tha Jekofo ka una eri, E a’i bana, mada sa ku fulatoona kwaiofei la i maamu, nau ku thathamia oki ṉalia i abaku si do ku tona faledaki naa iamu neri: sulaania asi kula eri ku rikia maamu ’uria sa ku rikia maana tha God, me lea iamu uri nau. 11Nau ku thathamia oki ṉalia boo si do ku tona falea na kera talaia mai isamu neri; uria na tha God e thasi lea ana kwaiofei la nia uri nau, ma ni nau kwa rikia si do ki sui bana. Ma nia ka gwafea, sui wane eri ka ṉalia. 12Ma nia ka sorea, Koro kau, koki lae akaroa, ma ni nau kwai tatha inaomu. 13Ma nia ka soree isana, Do wane inoto nau e thaitoomana neri, Kaala wela nei ki kesi sukwai u bada, ma feree sifi ma aini katele bia kalee do kera ki keka ni bada isaku: mada sa wane ki kera suuwanida keka lae fofoa sulia tee fa boṉi boo, aini do eki keka mae. 14Nau ku thathamia na wane inoto nau kai tatha kau totonao inaona wane ni ra nia: ma ni nau kwai talaida keki thafee lae sulia lae la na katele na keki lae inaoku, ma kaala wela, keki talaana susuu la ania, lalae kwa fula isana wane inoto nau i Sia. 15Ma tha Iso ka una eri, Alamatai nau kwai akwasia tei wane isamu ana toa na keka ni bada isaku nai nida. Ma nia ka sorea, Oki ade una eri uria ta? alamatai nau kwai fulatoona kwaiofei la i maana wane inoto nau nei. 16Mania tha Iso ka oli naa afa boṉi eri, ka lae na kau sulia tala nia uri i Sia. 17Ma tha Jekofo e lalae ka fula i Sakatha, ka kasi luma iana, ka kasia ooba ki ifana katele nia ki: mania kera alaṉia thatana si kula eri ana Sakatha.
18Ma tha Jekofo e lae ka fula i Salema, toaa susu i Sekema, na ni fanua i Kenana, si maṉa ne lae nana faisia i Bedanerama; sui ka kasia biui‐maku nia i maana toaa susu eri. 19Ma nia ka usia mai kasi fanua ne kasia biui‐maku nia eri iei, i abana kwalafaa tha Hemo, maka tha Sekema, ma usi lana tee taleṉee malefo. 20Ma nia ka thauwai nia fulii era ni foa la iei, ka alaṉia thatana ana Eleloe‐Isirela.
Currently Selected:
GENESIS 33: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
