GENESIS 34
34
1Ma ni Daena, thari ni Lia ne tharea ifatha Jekofo, ka liliu ana fasi kai kwairoomi bia thari na i fanua eri ki: 2Ma tha Sekema, kaluwane tha Hemo ṉa Haefaete, na wane inoto ka tatha i fanua eri, ka riki nia, ka raua, ka teo isana, ka faasuaa. 3Ma lione thathamii aabe ṉado ani Daena, na thari tha Jekofo, ma nia ka liothau ana thari eri, ka ṉata lea uria ruruuna thari eri. 4Ma tha Sekema ka ṉata isana maka nia na tha Hemo, ka una eri, Folia fasi thari nei ifaku kwai tolea. 5Ma tha Jekofo e roṉoa wane eri ne faasuaa thari nia na ni Daena; ma kaluwane nia ki kera to bia katele nia ki i masuu: ma tha Jekofo ka bona bana maakwalia si maṉa keki fula mai. 6Ma tha Hemo, maka tha Sekema, e lae mai satha Jekofo fasi kai tamani bi nia. 7Ma toto kera roṉoa naa, kaluwane tha Jekofo ki keka lae mai faisia i masuu; ma wane eki liode dila, ma keka rakeiri faamau, uria ne abula oewanea i Isirela, e teo isana thari tha Jekofo; si ade la ne a’i si kokoto neri. 8Ma tha Hemo ka tamani bida, ka una eri, Ruruuna kaluwane nau na tha Sekema ka thathamia faamau thari kamulua ba: nau ku thathamia sa muki falea mai ifana kai tolea. 9Ma muki kwaimaani lea bi kamilia ana foli‐kini la; muka falea thari kamulua ki ifamilia, ma muka tolea thari kamilia ki ifamulua. 10Ma muki to ofu bi kamilia: ma fanua nei kai laa inaofamulua; to si amulua i lala, muka ra ana todado la, muki todaa ogogonia ki kunei. 11Ma tha Sekema ka soree isana maka thari eri ma waiwaena nia ki, Alamatai nau kwai fulatoona kwaiofei la i maamulua, ma atona bana to si do muki soree isaku, ni nau kwai falea. 12Muki gaṉia fasi foli lana ma si do kwai tona falea na kai baita asia naa, ma ni nau kwai falea si do sulia bae lamulua: talitoona bana muki falea mai thari ba kwai tolea. 13Ma kaluwane tha Jekofo ki keka luua tha Sekema ma maka nia na tha Hemo ana lole la, keka una eri, uria ne faasuaa waiwaena kera na ni Daena, 14Keka una eri isadaroa, Kamilia mili dora asi ade la eri, sa mika falea kau waiwaena kamilia eri ifana wane na kesi kwa’i kali nia; sulaania si ade la na keki ṉata taa uri kamilia sulia neri: 15Ma sui asi kula eri miki ade sulia ṉata lamulua: Mada sa ni kamulua muka ’uri kamilia, keki kwa’i kalia wane kamulua ki, ta wane si e’i boo; 16Mada se una eri, miki bii falea kau thari kamilia ki ifamulua, ma miki tolea thari kamulua ki ifamilia, miki to ofu bi kamulua, kulu kuki ofu ana tee kulee toa boo. 17Ma sui mada sa mulu lalakwee roṉoa ṉata lamilia, muka lalakwa sa keki kwa’i kali kamulua; mika ṉalia thari kamilia eri, mika lae amilia. 18Ma bae lada ka lea i aliṉana tha Hemo, ma ka lea i aliṉana kaluwane tha Hemo na tha Sekema. 19Ma wane bii baita eri e a’i si totoo fasi, ka ili fofoa asi ade la eri, uria ne lea faamau iana sulia thari tha Jekofo: ma kera faare baita ana wane eri ka tatha ana toa eki sui bana na i maafera maka nia. 20Ma tha Hemo ma kaluwane nia na tha Sekema kero lae isana maethakaa toaa susu keroa, keko tamani bia wane ki i la toaa susu keroa eri, keko una eri, 21Wane nei ki keka kwaimaani bi kulu; mania kulu kuki alamatanida keki to ada i fanua nei, keki ra ana todado la i kunei; uria na, rikia fasi, fanua nei e baita ka talaani kera; kuki folikini ana thari kera ki ma kuki falea kau thari kulu ki ifada 22Talitoona bana asi ade la nei wane eki keki kania alaofua bi kulu, keki to ofu bi kulu ana tee kulee toa bonaa, mada sa kuka kwa’i kalia wane ki sui bana imaalutakulua, alafana ni kera kera kwa’i kali kera 23Katele kera ki, ma ogogonia kera ki, ma aini do maruki kera ki, na ṉa do kulu ki, mado? talitoona bana kuki ade sulia bae lada, ma keki bii to ofu bi kulu. 24Ma toa eki sui bana na kera tatha kau i la maethakaa toaa susu nia, keka roo sulia bae lana tha Hemo ma bae lana kaluwane nia na tha Sekema; ma keka kwa’i kalia wane eki sui boo ana toa ni sui bana na kera tatha kau i la maethakaa toaa susu nia. 25Ma lalae mai, ana ula fa boṉi, si maṉa na seena wane eki ka fi asia naa, tha Simiona ma tha Lifae, ro nonii wane ana kaluwane tha Jekofo ki, na ro waiwaena ni Daena, keko nalia wane boo nini ni firu nia, ta wane boo nini ni firu nia, keko lae seeraa kau, keko alasia toaa susu eri, keko thauṉia wane eki sui bana. 26Ma keko thauṉia tha Hemo ma kaluwane nia na tha Sekema keka mae ana ṉari lana nini ni firu, keko laua ni Daena faisia maafera tha Sekema, sui keko lae nadaroa. 27Kaluwane tha Jekofo ki keka fula isana seena wane eki na kero thauṉida, keka lagua si do na i toaa susu eri, uria na wane eri e faasuaa waiwaena kera. 28Keka laua feree sifi kera ki, ma buloka kera ki, ma ase kera ki, ma si do na i la toaa susu eri ki, ma si do na i masuu ki, 29Ma ogogonia kera ki, ma kaala wela kera, ma kwaida, omea eri keka lauda, keka lagua si do ki sui bana na i maafera. 30Ma tha Jekofo ka soree isatha Simiona ma tha Lifae, Kamaroa moro faafeda nau, kwai ’uria do ne makwa taa imaalutana toa na fanua nei, Kenaṉaete ki neri ma Perisaete ki: ma sulaania toa nau ki kera ununa, keki ofua omea uri nau, keki thauṉi nau; ma keki thau‐labatai nau bia toa na i maafera nau. 31Ma ro wane eki keko sorea, Abula lana uria waiwaena kamarea ka ’uria abula lana uria sesele, mado?
Currently Selected:
GENESIS 34: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951
