Matiyos 23
23
Lɔga Ibbayɛa :Yesusi Zugo Na Lɔga Messɛa :Zuga Kɔbhbhɛa Damiya Bhɛrɛsi Ngamessɛ
1Na koo Yesus yogɛsɛ zugaa bo mɛra ko ga kɔbhbhɛa nɔng lɔgɔ na sɛɛsɛ, 2“Yɔk zuga madhdhɛa zugo Damiya Tumu bere kàjjɛa Muse ko zuga kɔbhbhɛa damiya Bhɛrɛsi ɛl alleya Muse.#23.2 Ngalɔkta sennɛ, “..ɛl alleya Museye..” a bhɛa kènɛa lɔmmɛ buyna madhɛa zugo Damiya Tumu bere kàjjɛa Muse. 3Na mɛa lɔkte madhdhagungɛ :yɔkkuye kumulɔng, maya shikko shɛɛ na bhɛkkoyɔ. Na yɔk lɔga messɛa :yɔkku, igge ngamesso, ke ngaya lɔga madhɛsɛnɛa zugo, yɔk ngabhɛkkɛoye. 4Yɔk ibhbhanɛ ahaa bo dhidhinga kìtto na ngakɔ̀anao na dhɔngɛsɛnɛ zugo na kɛttɛ gawulo. Na yɔk chɔɔ ngaahaonu hallagiyɔ ngaidharrɛo dhul.#23.4 Ngalɔkta ɛl kutur 4ɔye hologun a bhɛa kènɛa, “Ngazuktonu a zukte ibhbhanɛ lɔga bo dhandala kɛ̀bhɛkka na ngakɔ̀anao na madhɛsɛnɛ zugo na kɛbhɛgɛtɔ. Na yɔk chɔɔ ngalɔktonu madhɛsɛnɛ zugoye rɛ, ngabhɛkkɛo dhul.
5Na lɔkte messɛ :yɔkkuye kumulɔng messɛ ke bhɛa senno kartɛ :zugu hung. Na gala gɛ toye lɔmɛa lɔga Tumu, ibhbhanɛ na messɛ ke bibi. Na gala kìshigɛsɛna ruminya nyabha, yɔk shigɛsɛnɛ na agga bo rammaya.#23.5 . Ngagaldonu gɛye, agga chibɛsɛnɛa mumi oo sɛnɔ. Na zuga Ayhudhi maya hunde oynyaa gɛ a 13 oo jorrono ngaoynyayaye, tii tii hunde allinɛnɛ ko Tumuye, ibhbhanɛ gala chinyo chinyo hɛtta ko kɔbɔrtɔ na ojjɛsɛnɛ lɔga Tumu gena kɔ̀gɔdha gali konnɔ na chibɛsɛnɛ mumi ko sɛna gɛ ku kangitɛn. Na lɔkte ɛl ngagaldonu toyeye, a lɔga Tumu ɛlla dadaba gɛnyɛ toye. Na ɛl Zɛsatɔ 13:1-16, Zɛdagimɔ 6:4-9, 11:13-21. 6Na hunde hɛ hana kàbhanyisiyɛa zugo amissɛyɔ ko doriyoa madhinɛnɛa zuga Ayhudhi lɔga Tumuye, hinnɛ bhɛa senno kɛtɛldɛ alleyiya ɛlɛa zuga bibiyo. 7Na hunde hɛ gawugiyeye, hinnɛ bhɛa dhɔngɛa :zugu na issayɛa na senɛsɛnɛa, ‘Rabbay’.
8Na nɔng igge zugo maya, ‘Rabbay#23.8 Rabbay Hibiruchɛn Rabbay a bhɛa kèsenɛa “Hira Madhdhiy.”’ ngaeleungɛo ke ngaya hira madhdhungu anɛ dhɔnɛ sɔng, na igge kumulɔng annɛno gɔynggɛye. 9Na ngaeli ngazukta ɛl bay ngayaye kona, ‘baba’. Anye bhee kesennagɛung ngangaye, a ngaya Baba nu anɛ dhɔnɛ sɔng, na i tumɔ tundɔye. 10Na chɔɔ zugo ko yɔk maya ‘Hira Madhdhiy’ ngaeleungɛo ke ngaya hira madhdhungu anɛ :Kirisosi dhɔnɛnɛ sɔngge. 11Na nɔng inde bhɛa nu kay lalugɛ kumulɔngge, aynde ale bu bhɛa nuye. 12Anye bhee kesennagɛung ngangaye a ore go, hirre dhɔng rɛye ale kàlachchanayɔ. Na nɔng inde lachchana rɛye, ale kɔ̀dhɔnggɔ.
Lɔga Wologɛa :Yesusi Zuga Madhdhɛa Zugo Damiya Tumu Ko Ga Kɔbhbhɛa Damiya Bhɛrɛsi
13“Na mɛa ngazukta tabhbho zugo nigite bu madhdho zugo Damiya Tumu bere kàjjɛa Museye, ko ngagiya kɔbhbho damiya Bhɛrɛsiye, igge ale ruyɛo rɛhiya gu, ke ngaya nyugɛo ganggua senno kaytɛ :zugu gɔra lɔmɛa :Komoruya tumony zugoye. Nɔng igge sabbiya gu rɛ, marro bhɛa hɛyɛo bhɛa lɔmɛa :Komoruya tumony#23.13 :Komoruya tumony Ngalɔkta sennɛ “Komoruya Tumonyde” ɛlɛhɛn sara Tumu. Yɔk zuga Ayhudhi a zukte ɛngɛrsɛ Tumu goore na sara Tumu dib ngaeliyɛo. Na Matiyos huna bere kɔdhdhɛsɛna yɔk ngalɔkta, hunde kɔn lɔkte sennɛ lɔga lɔmɛa :Komoruya Tumony zugoye, ngangaye a bhɛa senɛa lɔga lɔmɛa :Tumu zugo. zugo na chɔɔ kanyɛo zuga hinnɛa bhɛa senno kaytɛ ngonu.
14“Na igge ngazukta tabhbho zugo nigite bu madhdho zugo Damiya Tumu bere kàjjɛa Museye, ko ngagiya kɔbhbho damiya Bhɛrɛsiye, ale ruyɛo rɛhiya gu, ke ngaya tiranyɛo tɛrroa ku bhoyoga na usurranɛo ahaa gɛye. Nɔng igge attiya nu, ale a dhandali, ke ngaya hunde allinɛno ko Tumuye, ekkanɛo lɔgɔ dirr huna naa senno kartɛung :zuguye.#23.14 Dadabinyaa ku Girikichɛn gena ngalɔkta ɛl 14ɔye ninggɛ.
15“Ngazukta tabhbho zugo nigite bu madhdho zugo Damiya Tumu bere kàjjɛa Museye, ko ngagiya kɔbhbho damiya Bhɛrɛsiye, ale ruyɛo rɛhiya gu. Igge woyɛo ba kumulɔng ko yirsɛna na lameo hira senno bhɔdhɔ na kɔɔbh lɔga yɛbhbho :iggeu. Na hunde jɔyao na madhto na yɛbhungɔye, nɔng kalda a eriya jorronungu bhɛa kàttiyɛungu igge goa iho dhul jagarɛ kɛngi ramman.
16“Ngazukta kawarɛ chakkung dhiganno zugoye, igge ale ruyɛo rɛhiya gu, ke ngaya senɛo, ‘Hiri hunde kibhiik lɔga senno keme sara doraa Tumu barara na ngamesi, bhee gɛrsi ninggɛ. Na nɔng hunde lɔgɔ bhiigu sara worgiya iho doraa Tumu barara toyeye, maya ngalɔktonu urrugɛsɛn dhereye.’ 17Ngazukta dalnɛno kawarɛ chakkungge, ngangaye goore dhandal :worgiyɔ oo dhandal doraa Tumu barara messo worgi ke kullɛ? 18Chɔɔ sɛgɛn igge senno, ‘Hiri hunde kibhiik lɔga senno keme gena sara ngawua kùddulɛsɛna Tumu go na ngamesi, bhee gɛrsi ninggɛ. Na nɔng hunde lɔgɔ bhiigu sara galiya kùddulɛsɛna Tumu iho ngawugiyeye, maya ngalɔktonu urrugɛsɛn dhere.’ 19Ngazukta kawarɛ chakkungge, ngangaye goore dhandal galiya kùddulɛsɛna Tumu oo dhandal ngawua kùddulɛsɛna Tumu go messo ngagalitonu ke kullɛ? 20Nɔng mɛa hiri hunde bhiigu lɔga senno keme gena sara ngawua kùddulɛsɛna Tumu goye, ngangaye bhiigu lɔgɔ sara ngangawuonu ko sarre ahaye ɛl ngawugiyeye kumulɔng. 21Na ko nɔng hir kona hunde bhiigu lɔga senno keme gena sara doraa Tumu bararaye, ngangaye bhiigu lɔgɔ sara doraa Tumu barara ko sarre hirre bhak doraa Tumu barara toyeye. 22Na mɛa hir kona hunde bhiigu lɔga senno keme gena sara ngatumuya chakte, ngangaye bhiigu lɔgɔ sara alleya Tumu ko sarre hirre ihɛ ngaalleytonuye.
23“Ngazukta tabhbho zugo nigite bu madhdho zugo Damiya Tumu bere kàjjɛa Museye, ko ngagiya kɔbhbho damiya Bhɛrɛsiye, ale ruyɛo rɛhiya gu. Igge ibhbhano ghimamunyaa gu chicho chicho anyanganisiyɛo aha na toyeo na hunde a tɔmmɔn tɔmmɔnde, dhɔnɛ dhɔnɛ ibhbhano na ajjɛo Tumu shɛɛ chi.#23.23 . Ngalɔkta ibhbhanɛ :zugu ahaa gɛ ngangaye, a lɔga Tumu ɛlla damiya nɛnɛ. Na sennɛ hiri hunde lɔ ahaye maya ngɛrana gaminya tɔmmɔn, na dhɔnɛ ajjɛ Tumu. Na yɔk ngalɔkta bu dhandal ɛl Damiya Tumu bere kàjjɛa Museye, dhɔtto na ngamessoo. Yɔk ngalɔktonu agga kègedhdhɛa lɔgɔ shɛɛ na kìchirbhisiyɛa zugo ko ga kànɛa zuga yɛbhbhiyɛa :zugu. Na nɔng igge maya chɔɔ bere messo ngalɔkta wurtuneye ko ngagiya sabbuneye kari na gena ngadhɔttoo. 24Ngazukta kawarɛ chakkung dhiganno zugoye, igge kugurjɛnday tayeonoyɔ. Na nɔng galisey guchchoyɔ.
25“Ngazukta tabhbho zugo nigite bu madhdho zugo Damiya Tumu bere kàjjɛa Museye, ko ngagiya kɔbhbho damiya Bhɛrɛsiye, igge ale ruyɛo rɛhiya gu ke ngaya messɛo lɔgɔ na kɔgɔnydɛung :zugu huna zuga ridhing ningginɛnaye. Nɔng igge hinisichinne anno ga chirkanno ahaa zugony na ɛsɛdhdho lɔga rɛhiya gu sɔng. Na hɛtto ko kubbay ko kɛdhɛma kònynyono bhuguy sɔng na kɛngɔ toye ngani lɔmma gidhanggey. 26Ngahirra kawarɛ chakkiny bu kɔbhi damiya Bhɛrɛsiye, ga sabbɔ tonyo kubbay ko kɛdhɛm kɛngɔ bhɛa toyne, na aynde ko nɔng bhɛa ku bhuguy ale anɛ hɔliye.
27“Ngazukta tabhbho zugo nigite bu madhdho zugo Damiya Tumu bere kàjjɛa Museye, ko ngagiya kɔbhbho damiya Bhɛrɛsiye, ale ruyɛo rɛhiya gu. Igge hɛtto ko igingoa bo kùhukko shɛɛ na kàrakka dhɔra hɔla na anna ga bo challa dhogoy na yɔk toye dhinɛnɛa gigaa zuga rɛssɛa ko gala bo mɛra dhikkɛa zugo. 28Na ko igge messo lɔgɔ nganga na gunynyongɛ :zugu ke zuga ridhing ningginɛna. Na yɔk kɛngiya gu toye dhinɛnɛ lɔga tabhɛo zugo nigite ko gaa ku kuhu.
29“Ngazukta tabhbho zugo nigite bu madhdho zugo Damiya Tumu bere kàjjɛa Museye, ko ngagiya kɔbhbho damiya Bhɛrɛsiye, ale ruyɛo rɛhiya gu. Igge ibhbhano igingoa zuga bere yogɛsɛnɛa zugo lɔga dhugunono :Tumu ko ga zuga bere ridhing ningginɛna rɛssɛa kingi na dhakko simbiliyɔ na messo shɛɛ shɛɛ, 30na senno, ‘Agge mɛa hunde kète zuga bere kàbhakka bɛrgua bere kokonginyaa ga, anda bere ko yɔk ngani kɔ̀tɔrteo na kìndito ngazukta bere yogɛsɛnɛ zugo lɔga dhugunono :Tumuye.’ 31Na ngaya senɛo ngangaye, a bhɛa dhugunnonɛo bhɛa anɛo ashaa ngazuktonu bere nissɛ zuga bere yogɛsɛnɛa zugo lɔga dhugunono :Tumuye. 32Na mɛa ago urruktɛsɛ lɔga bere shigionɛa :kokonginyaa gu!
33“Ngazukta bu hɛtto ko konnaa lɔmmɛa madhdha ko hoyaa kurmusinyanyde! Ngangaye igge senno ale jorro bhɛa ale kùjjukkanɛungu na kàttiyɛungu goa iho dhul ka? 34Nɔng anye mɛa kibhbhan zuga yogɛsɛnɛa zugo lɔga dhugunono :Tumu ko ga gayɛa lɔgɔ ko ga madhdhɛa zugo, na kegi bhɛa nu. Na nɔng igge ale ibhbhano na gen nissoyɔ, gen ilakkoyɔ, gen dhakko doriyoa madhinɛnɛa zuga Ayhudhi lɔga Tumu toye na kɔbhbho chɔɔ oree hɛɛye na hangngoyɔ. 35Na mɛa kɔdhdhanɛ bhɛa nyawaa hira bere ridhing ningginɛna kèe Abel kìnisso ko bhee dogɛ nyawaa eriya Burakiyu kèe Zakariyas bere nisso :iggeu doraa Tumu barara ko ngawugiye kɛrghɛnɔ, na igge lɔmmo gigaa nyawaa ngazukta ko ga zuga ridhing ningginɛna bere kìnisso bay ngaya kumulɔng. 36Na mɛa ga shigitɔ! Yɔk zukte ale kattiyɛ ngalɔkta kumulɔngge, a zuga ngatenyda mɛa toyneye.
37“Yerusalem! Yerusaleme! Ngaɔrra dheshan zuga yogɛsɛnɛa zugo lɔga dhugunono :Tumu na ujji ga bere kèkkono bhɛa nunu bɛnneye. Anye bere kalameoni bhɛa keni kùmugay erroa gu kingi, na kɔ̀tɔlɔ shɛɛ huna kobiya mukkana hoyaa gɛnyɛ na ulubbo tawaye. Na igge ngani ngahinnoo. 38Mɛa ga gɔnyigiyɛ! Chɔɔ doraa nu a ngandonu wa dhɔyɛa ke guruye. 39Nɔng anye bhee kesennagɛung ngangaye a ore go, igge sɛgɛn ale ngaorronyuo ko bhee ale yokkonɛo lɔgɔ na senɛo, ‘Hirre lɔmmana buyna ajjɛa :Komoruyɔ Tumu na kunde, a tuhinɛ!’”
Currently Selected:
Matiyos 23: SUQ
Highlight
Share
Copy
Want to have your highlights saved across all your devices? Sign up or sign in
©2023 Suri Translation Project which is a project of the Ethiopian Evangelical Church Mekane Yesus
