Matiyos 24

Lɔga Ale Kòbolkiyɛa :Doraa Tumu Barara Ko Ga Bɛrgua Ale Uturronɛa Ba

1Na koo Yesus bhona doraa Tumu barara tu kɛngɔ na ogo. Na hunaa ngani kɔaye, yɔk zuga kɔbhbhɛa nɔng hoya gɔra nɛnɛ na kɔdhɔldɛsɛ doriyoa ɛlla ko doraa Tumu barara jaa jaa. 2Na nɔng sɛɛsɛ, “Ga shigitɔ! Ngadoriyoa kumulɔng orroyɔ? Yɔk ngabɛnda bere kɔ̀gɔdhdhɛye kumulɔng, ale nganga dhul ngaɛllo. Ale kòbolki rang na ngadamita ngaibhinɛo.”

3Na koo ogu Kutula Girarruny na tɛu bay ngonu. Na hunaa iho ngonuye, yɔk zuga kɔbhbhɛa nɔng hoya gɔra nɛnɛ bhichang na ghini na seyɛsɛ, “Ga yogogiytɔ! Ngangaye kolee ale bhugnyɛsɛnɛ ngalɔkta wa yokkonde ale a minang? Na lɔkte barar ale kòr na kàggaɛ kolea kunɛi :inyo na uturronɛa baye a lɔk giyong?”

4Na nɔng Yesus yagɛsɛ na sɛɛsɛ, “Tɛldi kɔk! Ngakitabhtung :genne. 5Yɔk zuga bo mɛra ale hony na aminɛnɛ sara ganyu na sennɛ, ‘Kani Kirisos,’#24.5 ‘Kani Kirisos,’ Kirisos a bhɛa kènɛa, “Hira Bɛrrana :Tumu Ku Komoruya Ibbayseo Zugo.” na tabhbhɛ zugo ga mɛra. 6Na igge ale shikko lɔga kɔdhdhany ko kamannaa bansanɛa bɛrrɔ. Na hunde shikkoye, ngadɛɛsso. Yɔk ngalɔkta bɛrrunyde maya bhugnyɛsɛnɛyɔ. Na nɔng kolea ale garsɛa ba kumulɔng ngani i rɛna. 7Yɔk bhorinya ko bhorinya ale kɔnnɛ kɛngɔ, na komortɛn ko komortɛn kɔnnɛ kɛngɔ. Na han genne ba ale chukinɛ na hozzo a bu. 8Yɔk ngalɔkta kumulɔng agga shigininyanɛa chɔllaa ale dokkonɛa :zugu kumulɔng hɛtta ko ilagaya ngani ilagassanɛa :tɛriya senno kuhudhugɛ.

9Na igge ale ibhbhongɛ :zugu na hɛyɛungɛ bhɛa chɔllayɛa zugo na nissongɛyɔ. Na bhorinya kumulɔng ale marrungɛ ke ngaya yɛbhbhɛanyu anyeye. 10Na ngakoleonu ale zugo ga mɛra dhɔttɛ bhɛa yɛbhbhɛanyɛa anye na marnɛ kɛngɔ na kona kɔdhdhɛsɛn lallɛn mirɔga na ko nɔng ngalallɛndonu me nganga sɛgɛn. 11Na butoga bo mɛra bhɔdhdhɛa rɛhi ke zuga yogɛsɛnɛa zugo lɔga dhugunono :Tumu ale bansanɛ na tabhbhɛ zugo ga mɛra. 12Na zugo ga mɛra ale laynɛ na dhɔttɛ bhɛa taa ibhɛsɛnɛa Tumu ko zugo hinisi goore, ke ngaya kuhuyamoa messɛa :zugu kɔɛ na anɛ buye. 13Na nɔng hirre ujjɛsɛn hini bɛ na yɛbhbhany anye ko bhee jagarɛ rɛsɛye, ale bassɔ. 14Na kamannaa challa dhugunnono bhɛa lɔmɛa :Tumu zugo, ale kɔ̀ɔbhɛsɛn zugo bay ngaya kumulɔng na shikkɛ bhorinya bhoy. Na wurtɔ a kolea garsɛa ba kumulɔng.

15-16“Na hunde arto ‘galiya lɔmma ridhing hunde chilu bhɛa kullɛna na digu ngonu’ damiya bere yokkonɛa :hira yogɛsɛna zugo lɔga dhugunono :Tumu kèe Dandelde, hirre toyi ngalɔktaye sɛɛ kutungɛsɛyɔ, na zuga ɛlla baa Yudha, any kajara kutulo. 17Na inde i dori kuragiyeye, ba ngabhonsana na dori toye tunnugi na ahi kona dhummana. 18Na hirre i guyɔye ngakawak wurtɔ na kudhuma rum. 19Nɔng ngakoleonu ale tɛrroa rɛhi gɛrsa ko ga ku oshogi, bhɛa nɛ lɔgɔ dhandal goore dhogoy. 20Na mɛa igge alliyɛ ko Tumu na kalde ale jorɛo ngalɔktaye, kolea asandayny oo Kala Ayawsuny ngaani, 21ke ngaya ngakoleonu ale anɛ na chɔllanɛna :zugu gooreye. Nɔng ngachɔllaonu ale kunde anna bere sabbɔ chɔɔ bɛrgua kɔdhdhanɛa kala bere ghendonɛa :Tumu aha kumulɔng ko mɛa toye, ngani kàrtao dhul. Na chɔɔ bɛrgunyaye ale ngani andanɛye, chɔllaye ku nganga sɛgɛn ale ngakunno dhul.

22Yɔk ngaungga chɔllainyde hunde bere ke muchugi ngakòjji, anda hirre dhɔnɛ churinya ninggɛ dhul. Na yɔk annaa bere kòyta ke muchugi na kabayɛ :zuga bere kɛ̀bɛrrana. 23Na ngakaldonu hunde seagung :hir konnɔ, ‘Ga hoya gɔnyigiyɛ, Kirisos aynda i gɔrraye,’ oo, ‘a ngandonu i ngonuye,’ igge ngayɛbhbho, 24ke ngaya butoga bhɔdhdhɛa rɛhi ke Kirisos ko butoga yogɛsɛnɛa zugo lɔga magganɛa huna naa dhugunɛsɛna :Tumu ale bansanɛ na messɛ lɔga bo barara ko ga bo kìwacheoye. Yɔk chɔɔ hunde ɔanɛye ale bhɔdhdhɛ zuga bere bɛrrana :Tumu hinisi na tabhbhɛyɔ. 25Na mɛa taga shɛɛ! Yɔk ngalɔkta kumulɔng a ngagiya wa kudhugunogunggɔ sabbɔ hunde kolea ɛrrinyanɛa ngani kugooye.

26Na hunde seagung :hir konnɔ, ‘A ngandonu i korugiye ngonuye,’ igge ngahɛo. Na hunde chɔɔ keseagung, ‘Aynda i dorigiye toyeye,’ igge ngayɛbhbho. 27Anye kesennagung nganga ke ngaya Hiri Hoynɛ hunde ale kunde, hɛt ko tumua bhadhdha surr gɔra yaluny na kòrro chɔɔ gɔra tɔbhaye. 28Nɔng bhɛa lɔmma galiya rɛssa, chɔnyɛsɛnɛ :dhonggau.

29“Na ngakoleonu hunde chɔlla ko na te ushaye,

‘ale su dhittinya ke kɔrrɔ,

na tagi ba ngaterinyo.

Na munyunya ngɔanɛ tumɔ,

na ngaahaya bu barar ɛl tumɔye chukinɛyɔ.’

30Na ngakoleonu ale tumɔ tundɔ kòr lɔga dhɔllanɛa Hiri Hoynɛ. Na zuga bhakkɛa ba kumulɔng ale orrɛ nɔng hunde bu kun idhogiye na bo lɔmmana diram ko barartinde na ruɛ goore. 31Na nɔng ale ibhbhana zuga gɛnyɛ ekko, na ek na hɛ ga bo kona ɛbbɛkka turumbay goore. Na mukkanɛ zuga bere bɛrrana :nɛa ɛlla ba kumulɔng ko surr hana uturronɛa ba ko tumu, gɔra yaluny ko tɔbha ko ga ɛlla gɔra kɛnkɛnuny ko gɔra kuresuny kumulɔng.

32Na mɛa igge arta madha bhɛa chamochiny. Nɔng chamochi hunde nyabha chɔ na labhayɛye, gao chi hunde dhak bɛrgu na ba se kete asandayte. 33Na ko igge hunde arto ngalɔkta wa kudhugunogungge kumulɔng hunde urruknyɛsɛye, tagatɔ hunde kolea kunɛa :Hiriyɔ Hoynɛ ngangaye dhaa te ja na te girɔng ko tugɔye. 34Mɛa ga shigitɔ! Yɔk ngalɔkta kumulɔng ko bhee urruknyɛsɛnɛ, ngatenyda mɛa toyneye ngagarsɛo. 35Yɔk ba ko tumu ale garsɛyɔ. Na yɔk lɔga ganyu ngagarsɛo dhul ko kingi.

Lɔga Kìmagɛa Kolea Ale Wokkonɛa :Yesusi

36“Nɔng kolea ale kunɛa :Hiriyɔ Hoynɛ, inde gaye a :Baba na Tumu sɔng. Kona ninggɛ dhul. Chɔɔ zuga ekko ꞉Tumu tumɔ ko Eriya Nɛnɛ, ngakoleonu imaggɛyɔ. 37Na bɛrguye ale kunɛ :nɛaye, ale hɛt ko bɛrgua bere Nɔa. 38Nɔng ngabɛrguonu huna bere maa dhittɛa ba ngani kohoyaayo, yɔk zugo annaa bere bhakkɛa ba ke ga bo aminɛna na maynɛna na gamnɛna gee gɛ hung ko bhee anɛ kolea tunnugɛa Nɔa gonggul. 39Na zugo annaa bere imaggɛa lɔga ale ɛrrinyana ko bhee ma honynyɛ na hukkanɛ yɔk kumulɔng. Na ko nɔng kolea ale kunɛa :Hiriyɔ Hoynɛ, ale a nganga. 40Na ngakaldonu hunde lɔ zukte ku ramman kɔhinɛ guyɔye, kona ale kɛ̀hɛyɛyɔ, kona dhɔynɛyɔ. 41Na hunde lɔ tɛrroye ku ramman ngunynɛye, kona ale kɛ̀hɛyɛyɔ, kona dhɔynɛyɔ.

42Na mɛa igge mɛdhta na tɛldi tunɔ ke ngaya imagɛo kala ale kunɛa :Komoruya nuye. 43Na mɛa ga tunggɛsɛ ngalɔkta keni kòyogogungge na tagatɔ! Nɔng hira ku ɛnaa dori hunde katak kolee kunɛ :ɔgɔrchagiyɔ barɔye, anda i tunɔ na bhɛginɛ na ɔgɔrchagi dori ngabhɔkko. 44Na mɛa ko igge chɛbtɛ na tɛldi kɔk ke ngaya ale Hiri Hoynɛ dhullanɛ dari kolea ngani ɛsɛdhtɛayoye.

45Na ngangaye gaymaya gaa bho shɛɛ na kɛ̀yɛbhbha, na ibhbhana :komoruyɔ na allinɛnɛa gaymanyaa gɛnyɛ, na bhɛkka kole shɛɛ na ajjɛa yɔk amissɛ, a nonni? 46Nɔng ngagaymaytonu hunde me lɔga ajjɛa :komoruya nɛnɛ shɛɛ na hunde komoru wokkonoye orte, ale lɔga gɛnyɛ a challi. 47Ga shigitɔ! Nɔng ngagaymaytonu ale ibhbhana :komoruyɔ na oy ke hira allinɛnɛa ahaa gɛnyɛ kumulɔng. 48Na nɔng hunde ngagaymaytonu kete kuhuyagi na kese, ‘Komoruya nanu mɛa ale shaw ngakunno,’ 49na kitiranyɛ gaymanyaa mesinɛna kari na kassa dhutiyoga na kumuldɛ na kirtɛ kari, 50nɔng komoruya nɛnɛ ale dhullana kali konnɔ dɛk kolea nɔng ngani kɛsɛdhɛayo dhul. 51Na atti goore dhogoy na idhoy ko zuga tabhbhɛa zugo nigite, bhɛa bo ruyɛa :zugu na rimmɛa nigiya.

Currently Selected:

Matiyos 24: SUQ

Highlight

Copy