Luka 2

Yezu lora kam na ke tei to

Matiyu 1:18-25

1Maŋa kam konto ne logo kom Pa-faro wolo yere na ye Agusita to déem ma pa ni se ba ga o teo kom maama nɔn-bia bam se o lɔre ba ni. 2Konto maa ye boboa garem dem, ye ko ke maŋa kalo Kwirinusi de déem na ye Siria teo kom yuu tu to. 3Garem dem na lage de bobo konto to, nɔɔno maama ma vo o tete teo se ba ga‑o.

4Josɛf de déem ma zaŋe o nwoŋi Nazarete kolo na ye Galili teo to. O ma vo Judea teo kodwoŋi, ko yere mo Bɛtelehem, ba na loge faŋa faŋa Pɛ David mɛ to. O déem vei dáane, o na ye David dwi tu to ŋwaane. 5Mary wolo ba na sɛ se o taa ye Josɛf kaane to de ma tɔge ded‑o o vo se ba ga-ba. O déem jege puga mo. 6Ba na wo Bɛtelehem ne konto to, ko ma yi se o lo bu wom. 7O ma lo bakeira. Mo o boboa bu. O ma kwei bu wom o kukuli de gwaaro o tiŋi vara wodiu tiŋim jeiga ne, pwola na wo daare veira diga kam wone to ŋwaane.

Nayera nigi Yezu lora kam taane

8Dɛ dem konto tete ne nayera déem mo wora jei sem konto ne, ba na wo gaao ne ba yere ba vara. 9Baŋa Wɛ maleka ma nwoŋi ba yia ne, ye Wɛ zeiŋi o nenɔŋ-fɔrɔ kom pwooni ba baŋa ne pa se de nyeene de gilimi-ba. Foone ma tiini de zo-ba dedɛ. 10Maleka kam laam ma ta de-ba ka we, “Yé ta‑á kɔre-na foone. Ko ye kwor-ywoŋa mo a tu se a ta a bere abam, ye ka lage ka pa Wɛ nɔɔna bam maama di ywoni dedɛ. 11Zem dɛ dem ne mo ba loge abam Vereno David teo Bɛtelehem ne. Wonto mo ye Wɛ Dam Tu Krista wom. O maa ye dé Teiru.#Izaya 9:6 12Á ná vei á nii, á wó na bu-seseŋa ba na kukuli ba tiŋi vara wodiu tiŋim jei ne. Mo kolo na wó bere abam we, ko ye chega mo a tɛa.”

13Maleka kam na tage konto o ti to, Wɛ telaao malese kɔgɔ dedɛ ma pɔpɔ se nwoŋi se woli de-ka. Se maama maa leena se seini Wɛ se we:

14“Baŋa Wɛ maŋe de tia wɛyuu ne.

Ko daare tega baŋa ne,

balo kikia na su o yi to

wó taa zoore de bochare-zuru.”

15Malese sem laam ma jwoori telaao. Se na kɛ to, nayera bam maa tɛ daane ba we, “Pa-na se dé vo Bɛtelehem de nii kolo na ke da ye Wɛ pa se de lɔre to.”

16Ba ma zaŋe lela ba kɛ teo kom wo. Ba ma vo ba na Mary dedaane Josɛf. Ba ma na bu wom na tigi vara wodiu tiŋim jeiga ne. 17Ba na nɛ‑o konto to, ba ma ta maleka kam na maŋe o ta bu wom taane tei to. 18Balo maama na nigi nayera bam na tage kolo to, ko ma ke-ba yaau. 19Mary de na nigi wonnu telo na ke to, o maa tiini o jege te boboŋa o bochare ne.

20Nayera bam ma jwoori ba viiri, ye ba leeni ba seini Wɛ de kolo ba na nɛ ye ba ta kwori ba ni to. Ko déem seene ko ke nenɛɛne maleka kam ya na wuuri o ta o bere-ba tei to.

21Bu wom na yi nenɛɛne da nana to, ba ma pa se ba gwoni o peini. Ba ma pa o yere we Yezu. Mo yere delo maleka kam na maŋe ka pa‑o ye ba ta wo jaane o puga to.#Matiyu 1:21

Ba ke Yezu Wɛ jeŋa ne

22Maŋa kam laam ma yi se Mary zare o digiru se o kwɛ o tete de Wɛ, se ko tɔge Wɛ nia yalo o na ke Moses jeŋa ne na bere tei to. Josɛf de Mary ma zaŋe ba ja bu wom ba vo Jerusalem, se ba vo ba zo Wɛ diga kam ba ke‑o Baŋa Wɛ jeŋa ne. 23Ba ke konto kolo ŋwaane ko ye Wɛ ni mo. Wɛ ni dem na bere tei to mo tento: “Bakeira kalo maama na ye o nu da-yiga bu to jege se o taa ye Baŋa Wɛ nyem mo.” 24Ba ta ma vo se ba kaane Wɛ, ne o ni dem na bere tei to. O ni dem we, ba jege se ba kwei kunkwona balei naa kunkwon-puura balei ba ma kaane‑o.#Nwoŋim 22:29; Chullu 12:6-8

25Nɔɔno wodwoŋi déem maa zoore Jerusalem teo kom wone, o yere mo Simeon. O ye nɔn-ŋom mo, ye o kɔre Wɛ lanyerane. O maa yɔɔre o pɔe dɛ dem Wɛ na wó ba o jwoŋi Isarele dwi tiina bam o yage to. Wɛ Sin-laao kom maa wo o tei ne. 26Ko déem ya pɛ se o lɔre we, o wó na Wɛ Dam Tu Krista wom mo, ye o laam te.

27Wɛ Sin-laao kom déem ma pa se Simeon zaŋe o vo o zo Wɛ diga kam. O na wora konto to, Yezu kwo de o nu ma ja‑o ba vo ba zo se ba ke kolo Wɛ ni dem na bere se ba ke o ŋwaane to. 28Ba na jaane bu wom ba vo ba zo konto to, Simeon ma vo o kwei bu wom o zia, ye o daare o tei Wɛ o we:

29“Yuu-tu Baŋa Wɛ,

leile konto a nɛ wolo nmo déem na tage we a wó na to.

Konto ŋwaane, nmo laam wó wane n pa amo wolo na ye nmo kabaa to

na chwoŋa se a yage logo baŋa a vo telaao.

30Amo yi nɛ wolo nmo na wó tɔge o ŋwaane n jwoŋi n nɔɔna n yage to.

31Nabiina maama logo baŋa ne wó lɔre nmo na ti n yiga

se n vere-ba tei to.

32Ko wó pa se dwi maama tiina lɔre nmo chega kam jaja,

ne wea pwooni na nye ba baŋa ne tei to.

Ko ta wó pa se nmo tete nɔɔna Isarele dwi tiina bam na zula.”

33Simeon na tage bu wom taane konto to, o kwo de o nu maa ye yaau de o taane dem. 34O daa ta ma ta de-ba o we, Wɛ wó swɛ ba swolim dedɛ. O ma daare o ta de bu wom nu Mary o we, “Nii mo. Wɛ seene o toŋe bu wom se o ba o pa Isarele tiina dedɛ to tega ne. O daa ta wó fɔge ba dedɛ pa se ba zaŋe wɛɛne. Wɛ wó pa o taa jege maana o pa nɔɔna, ye ba dedɛ nam wó ŋɔɔne ba chɔge o yiga. 35Mo kokuri nɔɔna dedɛ boboŋa ya na seigi to wó ba ya lɔre jaja. Nmo tete tei ne, ko wó pa se n bochɔŋɔ chɛ ko di, ne se-zɔɔ na zo n wo tei to.”

36-37Kaane wodwoŋi déem mo wora o na ye Wɛ ni-jwoŋinu, o yere mo Anna. O kwo yere maa ye Fanweli, o na ye Asere dwi tu to. Anna déem ya zo baro. Ba maa wora daane bena yarepɛ, ye o baro wom te o daare‑o. O daa maa wo zo baro. O ma tiini o kwe lanyerane, nenɛɛne bena funɔnɔ-yana (84). O maa zoore Wɛ diga kam jei sem wone maŋa maama. Wea de tete maama o maa zuli Wɛ de ni-vɔɔm de wɛ-lworo. 38Maŋa kam konto ne nɔɔ mo o vei o yi bu wom na wo mɛ to. O ma ke Wɛ lei, ye o wora o tɛ bu wom taane o bere balo maama na wora ye ba pɔe maŋa kalo Wɛ na wó ba o jwoŋi Isarele dwi tiina bam o yage to.

39Yezu kwo de o nu déem ma ke kolo maama Baŋa Wɛ nia yam na bere se ba ke to. Ba na ti to, ba ma jwoori ba vo Galili teo Nazarete mɛ na ye ba tete teo to. 40Ba na jwoori ba vo ba wora to, bu wom ma ke nɔɔno de ya-dɛɛra. O yi daa ta ma poore lanyerane, Wɛ na ke zaane o ke o yuu ne to ŋwaane.

Yezu na ke tei Wɛ diga kam wone to

41Juu tiina kuri delo yere na ye Atɔgebabaŋa to ma yi. Bene maama wuu Yezu kwo de o nu déem yeini ba vo Jerusalem se ba di kuri dem konto. 42Yezu déem na yi bena fuga-yalei to, ba daa ma vo kuri dem nenɛɛne ba na yeini ba vei ba di tei to. 43Ba na di kuri dem ba ti to, ba ma zaŋe ba maa jwoori sɔŋɔ. Yezu ma maŋe Jerusalem ne, ye o kwo de o nu yeiri ko ni ne. 44Ba ma vo taa, dɛ dedwe, ye ba boŋe we o wó taa wo ba kɔgɔ kom wone mo. Ba na wo nɛ‑o ba tei ne to, ba laam ma bobo se ba beeri o jei ba chorro tem de ba badwonna bam tei ne. 45Ba maa wo nɛ‑o. Ba ma jwoori ba vo Jerusalem teo wo se ba beeri‑o. 46Ba ma beeri‑o taa, da yatɔ, ye ba laam na‑o Wɛ diga kam ne, o na jei zamesem tiina bam tetare ne. O na jei da konto to, o maa cheigi ba na bere tei to, ye o bwei-ba wonnu. 47Balo maama na jei ba cheigi o taane dem to maa ye yaau de o na jege yi-poro de taane dem leirim tei to. 48Yezu kwo de o nu na nɛ‑o konto to, ko ma pa ba yera sɔɔre. O nu wom ma ta ded‑o o we, “A bu, bɛ mo ye n ke konto dedaane debam? Ta‑n nii amo de nmo kwo na tiini de beeri nmo taa, ye lwia jege debam.”

49Yezu ma leiri-ba o we, “Bɛ mo ye abam kare á beeri amo jei? Amo jege se a ta wo a Kwo sɔŋɔ ne mo. Abam yeiri konto na?” 50O na tage konto to, ba maa wo nigi o taane dem kuri.

51Yezu déem ma tɔge de-ba o jwoori Nazarete, ye o sɛ ba ni. O nu wom maa jege wonnu tem konto maama o bochare ne. 52Yezu yera de o bochare déem ma be lanyerane, ye o jege boboŋ-dɛɛra. Wɛ de nabiina maa tiini ba lage o ni taane.

Currently Selected:

Luka 2: KBG

Highlight

Copy