Luka 3
3
Zekaria bu Jɔn bere Wɛ kwora
Matiyu 3:1-17; Maake 1:1-11; Jɔn 1:19-28
1-2Ko déem na kɛ ye Tiberia ye logo kom Pa-faro wom ko maŋe de bena fuga-yanu to mo Wɛ kwora déem tu Zekaria bu Jɔn tei. Konto maŋa kam ne Pontusi Pilata mo ye Judea teene dem gɔmena tu o pa Pa-faro wom. Herodi maa ye Galili yuu tu, ye o zembaaro Filipi de maa ye Yituria de Terakonia teene dem yuu tu. Lusania de maa ye Abilena yuu tu. Ko daare Anas de Kayafa déem maa ye Wɛ diga kam kaanem yuu tiina. Maŋa kam Wɛ kwora kam na tu Jɔn tei konto to, o déem wo kagoa yuu ne mo. 3O ma zaŋe o tole Jɔdan buga ni teene dem maama, ye o tɔɔle Wɛ kwora kam o bere nɔɔna o we, ba jege se ba leiri ba wo Wɛ ŋwaane se ba daare ba jwoŋi sɛɛm, se Wɛ laam wó yage ba wɛleera o ma chɛ-ba. 4Jɔn na tɔɔle Wɛ kwora kam konto to, ko ke nenɛɛne Wɛ sampwora Izaya déem na popone o tɔnɔ kom ne o ta tei to. Faŋa faŋa to o déem tage o we:
“Nɔɔno mo wo kagoa yuu ne o na kaase o kwora ye o we:
‘Zaŋe-na á fɔge á kwɛ dé Teiru wom chwoŋa kam
o na lage o ba o tɔge da to.
Pa-na se chwei selo o na lage o tɔge to
fɔge se yɔɔre lanyerane.
5Jei selo maama na jege gwonnu to
jege se te suuri mo.
Jei selo maama na jege zwonnu de peero to
de jege se te guri mo te daare chwoŋa kam.
Chwei selo maama na gugwoli to
jege se se fɔge se yɔɔre mo.
Chwei selo maama na ba lana to
jege se se fɔge se kwɛ mo.
6Nabiina maama laam wó na Wɛ na wó jwoŋi
o nɔɔna tei to.’ ”#Izaya 40:3-5
7Nɔɔna dedɛ déem ma zaŋe ba vo Jɔn tei se o pa ba jwoŋi sɛɛm Wɛ ŋwaane. Ba na tu o tei konto to, o ma ta de-ba o we, “Abam nye de basankwe na dura se se lu mini wone tei to. Wɔ mo bere abam se á kwaane á lu waarem delo Wɛ na lage o pa nabiina to wone? 8Abam nam jege se á ta‑á tɔge kikia yalo na wó bere we á seene á leiri á wo to mo. Abam nam yé gare á boŋe á pa á tete we, abam ye Abaraham dwi tiina mo ye Wɛ daa bá pa á na waarem. A nam tɛ abam we, konto dae kolokolo. Wɛ ná laga, o wó wane o pa se kandwa yanto de leiri ya ji Abaraham dwi tiina. 9Nɔɔno nam maŋe o jege dwooru o jeŋa ne mo se o ma o gwoni teeni dem o de tega ne. Tio kolo maama na ba leiri bu-ŋona to, o jege se o gwoni-ko mo o de tega ne, ye o kwei-ko o de mini wone se ko di kula. Mo Wɛ de nam na lage o ke nɔn-balwaaro tei.”
10Jɔn na tage konto to, nɔn-kɔgɔ kom ma bwei‑o ba we, “Dé nam wó ke bɛ mo?” 11O ma leiri-ba o we, “Abam balo na jege gwaaro telei telei to, á jege se á kwei dedoo mo á pa balo na ba jege kolokolo to. Ko daare abam balo na jege wodiiru to, á de jege se á kwei á pa nɔɔna konto dwoŋi mo.”
12Lampwoo lara de déem ma ba se Jɔn pa ba jwoŋi sɛɛm Wɛ ŋwaane. Ba ma bwei‑o ba we, “Berem tu, bɛ mo debam nam wó ke?” 13O ma leiri-ba o we, “Abam ba jege se á la nɔɔno yuu se ko dwoni á na wó jwoŋi‑o tei to.”
14Soja tiina de daa ma ba ba bwei‑o ba we, “Debam nam wó ke bɛ mo?” O ma leiri-ba o we, “Abam ba jege se á vere nɔɔn-nɔɔno sabu de dam, naa á gane-ba á jwoŋi. Ko daare, pa-na se ŋweero telo á na yeini á jwoŋi to maŋe abam de á wopwolo.”
15Nɔɔna déem maa jege teena Wɛ tei ne lanyerane, ye ba maama bwɛ ba wone se ba lɔre Jɔn na ye wolo to. Ba maa we, “Wonto mo wó taa ye Wɛ Dam Tu Krista wom na?” 16Ba maama na boŋe konto to, Jɔn ma ta de-ba o we, “Á nii-na amo. A mɛ na mo a pa abam sɛɛm. Ko daare wolo na tiini o dwoi amo to lage o saŋe amo kwaga o ba. Amo wo maŋe se a bwoli wonto nɛ natera a pa‑o. Wonto nam ná lage o pa abam jwoŋi sɛɛm, ko wó taa ye Wɛ Sin-laao kom mo o wó pa á jwoŋi, ye o daare o pa mini zwɛ abam.#Kikia 1:5 17Wonto maa zei da-lɔŋɔ mo se o ma mage o mena se o laam chaare-ka o pɛ o ke o tula ne. O maa wó daare men-swanno tem o zwɛ de mini delo na ba di de dwei to. Mo o na lage o pɔɔre nɔɔna daane o ke-ba tei to.”#Malaki 4:1
18Jɔn déem na wora o tɛ Wɛ kwor-ywoŋa kam o bere nɔn-kɔgɔ kom to, o yeini o ŋɔɔne konto dwoŋi, ye o mae wonnu dwi dwi mo o kaane-ba. 19O déem ma kaane Herodi wolo na ye Galili yuu tu to, de o na ke kolo de o zembaaro kaane Herodisa to. O daa ta ma kaane‑o de wo-lwanno telo maama o na maŋe o ke to. 20Herodi ma zaŋe o ja Jɔn o ke peena diga ne. Konto to, o daa ta ke wo-balɔrɔ mo o woli da.#Matiyu 14:3-4
21Nɔn-kɔgɔ kom déem na tu Jɔn tei se o pa ba jwoŋi sɛɛm Wɛ ŋwaane to, Yezu de déem ma ba o tei se o pa o de jwoŋi sɛɛm. Yezu na jwoŋi sɛɛm konto to, o maa wora o ware Wɛ. Wɛyuu laam ma pore 22pa se Wɛ Sin-laao kom tɔge da ko tu o baŋa, ye ko nyenyego nye de kunkwoŋa yera tei. Kwora laam ma ŋɔɔne Wɛ telaao ne we:
“Nmo mo ye amo bu-doa a na jege nmo swono to.
N kikia su amo yi.”#Izaya 11:2-3; Luka 9:35
Yezu kwoa kwoa natɔga kam
Matiyu 1:1-17
23Maŋa kam Yezu na bobo se o taa bere nɔɔna Wɛ chega kam to, o déem yi nenɛɛne bena fintɔ mo. Nɔɔna déem boŋe ba we o ye Josɛf bu mo.
Josɛf kwo déem mo ye Heli.
24Heli kwo déem maa ye Matati.
Matati kwo déem maa ye Levi.
Levi kwo déem maa ye Melaki.
Melaki kwo déem maa ye Janayi.
Janayi kwo déem maa ye Josɛf.
25Josɛf kwo déem maa ye Matatia.
Matatia kwo déem maa ye Amosi.
Amosi kwo déem maa ye Nawum.
Nawum kwo déem maa ye Esali.
Esali kwo déem maa ye Nagayi.
26Nagayi kwo déem maa ye Maata.
Maata kwo déem maa ye Matatia.
Matatia kwo déem maa ye Semeini.
Semeini kwo déem maa ye Joseka.
Joseka kwo déem maa ye Joda.
27Joda kwo déem maa ye Joanan.
Joanan kwo déem maa ye Resa.
Resa kwo déem maa ye Zerubabel.
Zerubabel kwo déem maa ye Selateli.
Selateli kwo déem maa ye Neri.
28Neri kwo déem maa ye Melaki.
Melaki kwo déem maa ye Adi.
Adi kwo déem maa ye Kosam.
Kosam kwo déem maa ye Elimadam.
Elimadam kwo déem maa ye Ara.
29Ara kwo déem maa ye Josua.
Josua kwo déem maa ye Eliazera.
Eliazera kwo déem maa ye Jorim.
Jorim kwo déem maa ye Matati.
Matati kwo déem maa ye Levi.
30Levi kwo déem maa ye Simeon.
Simeon kwo déem maa ye Judah.
Judah kwo déem maa ye Josɛf.
Josɛf kwo déem maa ye Jonam.
Jonam kwo déem maa ye Eliakim.
31Eliakim kwo déem maa ye Melea.
Melea kwo déem maa ye Menna.
Menna kwo déem maa ye Matata.
Matata kwo déem maa ye Natan.
Natan kwo déem maa ye David.
32David kwo déem maa ye Jesse.
Jesse kwo déem maa ye Obeda.
Obeda kwo déem maa ye Bowaza.#Ruf 4:17
Bowaza kwo déem maa ye Salimon.
Salimon kwo déem maa ye Naason.
33Naason kwo déem maa ye Aminadabi.
Aminadabi kwo déem maa ye Adimina.
Adimina kwo déem maa ye Arani.
Arani kwo déem maa ye Hezeron.
Hezeron kwo déem maa ye Pɛreza.
Pɛreza kwo déem maa ye Judah.
34Judah kwo déem maa ye Jakob.
Jakob kwo déem maa ye Izaak.
Izaak kwo déem maa ye Abaraham.
Abaraham kwo déem maa ye Tera.
Tera kwo déem maa ye Rewu.
35Rewu kwo déem maa ye Serugi.
Serugi kwo déem maa ye Arawu.
Arawu kwo déem maa ye Pɛlega.
Pɛlega kwo déem maa ye Ebera.#Pulim 10:25
Ebera kwo déem maa ye Sela.
36Sela kwo déem maa ye Kayinam.
Kayinam kwo déem maa ye Arapazade.
Arapazade kwo déem maa ye Sɛm.
Sɛm kwo déem maa ye Noah.#Pulim 11:10-26
Noah kwo déem maa ye Lameke.
37Lameke kwo déem maa ye Metusela.
Metusela kwo déem maa ye Enoki.
Enoki kwo déem maa ye Jaredi.
Jaredi kwo déem maa ye Mahalaleli.
Mahalaleli kwo déem maa ye Kayinam.
38Kayinam kwo déem maa ye Enosi.
Enosi kwo déem maa ye Sɛfi.
Sɛfi kwo déem maa ye Adam.
Adam kwo maa ye Wɛ.
Currently Selected:
Luka 3: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
