HMOTAOPAZY 4
4
Pity nata Zawhâna ryureituhpazy hmiakô liata
1Pity nata Zawhâna ta zawpizy hnohta bie ama rei hai nota, theihthaipazy, Achhyna o hyutuhpazy nata Saduasi sahlaozy cha âmo lâ a vy ei ta. 2Zawpi pachu ei ta, Zisu vâta athihpa hry tawhta thyuheihna kyh ama reipa vâta, ama palôh châ lei ngaita ta. 3Pity nata Zawhâna cha patu ei ta, zâlâ a châpa vâta, a mylâ taihta patâhna o liata khô ei ta. 4Châhrasala ama bie a theipa hry liata chyhsa hluhpi ta a ngiapâ ei ta, ama hluhna zie cha maluh sâh pangawh rachhôh ama châ.
5A mylâ ta ama ryureituhpazy, machâzy nata ryhpa pachutuhpazy cha Zerusale liata a hmaohpakhy ei ta. 6Theihthai beichaipa Anâ, Kaiphâ, Zawhâna, Alezandâ nata theihthai beichaipa chiheih zydua chhao a hlao ei ta. 7Pity nata Zawhâna cha a liah liata paduasa ei ta, “Khâpa hmotaotheina ta ma, ahy moh ta ma, hezy he nama tao?” tahpa ta hiahri ei ta. 8Pity cha Thlahpa Pathaihpa ta bie ta, ama hnohta, “Phopi ryureituhpazy nata machâzy saih u, 9chyhsa sypa patlâh ta, hmo pha a taona kyh liata, he chyhsa he khâpa vâta ma a vaw tlâh haw, tahpa ta tanoh miah nama hiahri khiahta la, 10nama zydua ta pahno u la, Izarei saw zydua ta pahno mawh ei sy. Nâzari Zisu Krista nama khaipâpa, Khazohpa ta athihpa hry tawhta a pathyu heihpa moh ta, he chyhsa he nama hmiakô liata a tlâhpa ta â duahpa a châ hih. 11#Hla 118.22Cha Zisu cha, nâmo, o satuhpazy ta alô nama kho leipa, a ki liata alô phahnai chaipa a châ. 12Ahy liata hmah pachhana y vei. Avâ ry liata chyhsa moh bipa hry liata miah pachha thei awpa mohropa rai y veih ei,” tah ta.
13Pity nata Zawhâna riahphazie cha hmô ei ta, châthai leipa nata chyhsa zawrâpa dei ama châpa ama pahno nahta, ama noâh kaw ta. Zisu hnohta a y tyhpa ama châpa pahno ha ei ta. 14Chyhsa ama patlâhpa ama hnohta a duahpa moh ei ta, reipasipasua nawpa hnei tlôh ei va. 15Ryureina su tawhta pua awpa ta bie ama pie khai tawhta, âmo dei ta reipahmaoh ei ta, 16“He chyhsazy he kheihta ma eima tao aw? Hmonoâhpa ngia tlâhpa ama taopa kyh Zerusale liata a ypa zydua ta a siapa ta pahno ei ta, keimo chhao ta eima ei thei vei kha zaw. 17Anodeikuacha chyhsazy ta ama pahno kawh lymâ lei nawpa ta, he moh ta ahy hnohta hmah bie reih khao lei awpa ta pachhipary ei suh u,” tah ei ta. 18Lyuhchâpazy cha aw ei ta, Zisu moh ta bie reih khao chachei lei awpa nata pachu khao lei awpa ta biepie ei ta. 19Châhrasala Pity nata Zawhâna ta a chhy ei ta, “Khazohpa bie zyh leipa ta nâmo bie zyhpa cha, Khazohpa mohmô ta â do thai aw ma? Nâmo ta pasia teh u. 20Keimo la hmo eima hmôpa nata eima theipazy reih leipa ta y thei ma pi,” tah ei ta. 21Hmonoâhpa a tlôpa vâta, chyhsa zydua ta Khazohpa reithai ei ta, zawpizy vâna chata hrie ngâh khao leipa ei ta, pachhipary via heih ei ta, ama pathlie haw. 22Hmonoâhpa taopa ta chyhsa ama patlâhpa cha, kô sypalih hlâta uhthei viapa châ tlôh ta.
Riahpha awpa ta thlahchhâna
23Ama pathlie nahta, Pity nata Zawhâna cha ama viasazy lâ vawh ei ta, theihthai beizy nata machâzy ta ama hnohta ama reipazy cha chho ei ta. 24#Pua 20.11; Neh 9.6; Hla 146.6Cha bie cha ama thei nahta, ama zydua ta â raohpa ta ao paro ngaitapa ta Khazohpa lâ thlahchhâ ei ta, “Hy Beichaipa, nâ cha lei nata vâ nata a chhôh liata a ypa zydua taotuhpa na châ. 25#Hla 2.1,2Thlahpa Pathaihpa ta miah pathlatuhpa, châ chakaotuhpa Dâvi pakah ta,
“‘Zenitaizy khazia ama pathi a ia,
Phopizy khazia hmo hraoleipa ama pachâ?
26Lei beizy thyu ei ta,
Ryureituhpazy a hmaoh ei ta,
Abeipa nata a Mesia amâ dyuh,’
tahpa ta na reipa kha a vaw tlô haw. 27#Lka 23.7-11; Mat 27.1,2; Mka 15.1; Lka 23.1; Zhn 18.28,29He khihpi liana heta, châ chakaotuhpa pathaihpa, na sathawthupa Zisu kyh vâta, Herawda nata Pawtia Pilâ nata Zenitaizy nata Izarei chiphozy amâ hmaohpakhy. 28Na ku nata nâ chhuahna ta hmo a vaw tlô awpa na rao chhieliepazy tao awpa ta amâ hmaohpakhypa a châ. 29Hy Abeipa, ama pachhiparynazy he pachâ tua. Châ chakaotuhpazy he riahpha ngaitapa ta na bie reih lymâ awpa ta miah bao mah y. 30Patlâh awpa ta na ku pazawh la, châ chakaotuhpazy he, châ chakaotuhpa pathaihpa Zisu moh ta ngiana nata hmonoâhpazy pataosa lymâ mah y,” tah ei ta. 31Thlah ama chhâ khai nahta, ama y pahmaohna o cha a vaw chalyu ta, ama zydua ta Thlahpa Pathaihpa ta bie ei ta, riahpha ngaitapa ta Khazohpa bie ama chho lymâ.
Hmo zydua ahlyna
32 #
Hmt 2.44,45 Ngiapâtuhpa manôh zydua cha palôh miakha nata pachâna su kha ta y ei ta. Ahy hmahta a sôh hneipazy cha ano eih sai ta rao leipa ta, hmo zydua a hly khai ei ta. 33Lyuhchâpazy ta hmotaotheina thata hneipa ta, Abeipa Zisu thyuheihna kyh a châhkhei lymâ ei ta, ama zydua chô liata ngiachhiena thata y ta. 34Ama hry liata a phahlapa ahy hmah y veih ei. Alei su nata o a hneipa maihta zuah ei ta, ama hmo zuapa ty cha vaw cheih ei ta, 35lyuhchâpazy phei thaby liata soh ei ta, ama byuhpa rakha chyu ta amâ rai tyh. 36Kuparâ chyhsa Livai chi Zawsi, lyuhchâpazy ta Bânabâ, thlalôhna saw ama tahpa chhao, 37a lyu zuana mâ tâkâ vaw cheih ta, lyuhchâpazy phei thaby liata vaw soh ta.
Currently Selected:
HMOTAOPAZY 4: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
