HMOTAOPAZY 3
3
Pheisypa patlâhna
1Pity nata Zawhâna cha noh kia râhsâ ta thlahchhâ daihti nota Achhyna o lâ khy ei ta. 2Chyhsa pakha pheisypa ta a pihpa a vaw sy ei ta, ano cha Achhyna o lâ a ngiapazy lâta ku dao awpa ta, Achhyna o Ochhi Ngiapa ama tahpa kiapâh liata noh chareih ama pazia tyhpa a châ. 3Cha chyhsa chata Pity nata Zawhâna Achhyna o lâ ama ngia awpa a hmô nahta, ku vaw dao ta. 4Pity ta ano cha moh ta, Zawhâna chhao ta moh hra ta, Pity ta, “Miah vaw moh tua,” tah ta. 5Kudaopa cha âmo tawhta khâpa tlyma hmô awpa hnabeiseihpa ta, âmo cha vaw moh ta. 6Pity ta, “Tâkâ nata ngôh hnei va na, châhrasala ei hnei chhôhpa ei cha pie aw. Nâzari Zisu Krista moh ta thyu la, na phei ta sie teh,” tah ta. 7A ku chachâh lâ patu ta, pathyu ta, a pheizy nata a phei lobyuh rupazy cha a tha thlai vaw y ha ta. 8Pheisypa cha a kaw zaw ta, a duah ta, phei ta sie ha ta. Phei ta siepa ta a thluah laih ta, Khazohpa reithaina chôta ama hnohta Achhyna o lâ a ngia ha hra ta. 9Phei ta a siepa nata Khazohpa a reithaipa cha chyhsa zydua ta hmô ei ta. 10Achhyna o Ochhi Ngiapa kiapâh liata kudaopa ta a tyuh tyhpa kha a châ tahpa pahno ei ta. A chô liata hmo a tlôpa cha ama noâh ngaita ta, a pachâna pahno leipa ei ta.
Sawlawmaw aikah liata Pity biereipa
11Pheisypa a tlâh hapa ta Pity nata Zawhâna a patu thlâh ha nota, chyhsa zydua cha noâh tah ngaitana chôta Sawlawmaw aikah ama tahpa liata âmo yna lâ a vaw râ pakhy ei ta. 12Cha cha Pity ta a hmô nahta, zawpi hnohta bie reih ta, “Nâmo, Izarei mo saih u, he hmo he khazia nama no a âh? Keimo hmotaotheina nata Khazohpa eima pachâpa vâta ano he eima pasiesapa hawhta pachâpa ta, khazia miah nama mo thlâh haw? 13#Pua 3.15Abarahâ Khazohpa, Aisika Khazohpa nata Zakaw Khazohpa, miah pathlatuhpazy Khazohpa ta a chakaotuhpa Zisu a parônahsapa a châ hih. Ano cha patusa ei chi ta, Pilâ ta pathlie â chhuahpa chhao ta, Pilâ hmiakô liata namâ paphasai hapa kha a châ. 14#Mat 27.15-23; Mka 15.6-14; Lka 23.13-23; Zhn 19.12-15Mopathaihpa nata Mosiapa kha dytha ei chi ta, lianycheihpa kha cha papuapa awpa ei ta tlao namâ haw. 15Hrona pietuhpa cha thie ei chi ta, châhrasala Khazohpa ta ano cha athihpa hry tawhta a pathyu haw. Cha cha a pahnotuhpazy eima châ. 16Zisu moh ta, Zisu moh angiapâna ta he chyhsa nama hmôpa nata nama pahno tyhpa he a thapatlô ta, ano vâta ngiapâna a vaw ypa ta nama zydua mohmô liata a patlâh ha hih.
17“Châhrasala unawh saih u, nama ryureituhpazy ta ama pahno leipa vâta ama taopa hawhna khata, nâmô chhao nama pahno leipa vâta, hezy he nama taopa a châ tahpa ei pahno. 18Khazohpa ta hrohsopa zydua pakah ta a Mesia cha riethei a tao awpa a châna kyh a vaw reih chhieliepa kha, a vaw patlôsapa a châ. 19Chavâta ro u la, ano lâ kua teh u, nama moleinazy pahleipa a châ aw. 20Chatanachata Abeipa tawhta ahrana daihtizy vaw tlô aw ta, Krista Zisu, nama châta â tlyhpa cha a vaw tuah aw. 21Khazohpa ta bohpi tawhta a hrohso pathaihpazy pakah ta a vaw reipa, ato taopathi daihti a tlô hlâlei deikua cha, vârâh liata a y chy awpa a châ. 22#Ryhpa 18.15,18Mawsi tlai ta, ‘Abeipa Khazohpa ta keima hawhpa hrohsopa he nama unawhzy hry tawhta a cha paduapa aw ei. A biereipa maih nama nathlie awpa a châ. 23#Ryhpa 18.19Ahy rai, cha hrohsopa bie a nathlie leipa cha, phopi tawhta pahleipadiapa a châ aw,’ tahpa ta a vaw reih hapa kha. 24Samuela nata a hnôhlâ ta hrohsopa a vaw ypa zydua chhao ta reih khai ei ta, he nohzy kyh he ama vaw phuah haw. 25#Âtn 22.18Nâmo he hrohsopazy saw châ ei chi ta, Khazohpa ta châ pathlatuhpazy hnohta biehrai tao ta, Abarahâ hnohta, ‘Na pathla tawhta khizaw liata phopi to byhnâ topa ta ama y aw,’ a vaw tahpa biehrai sawzy nama châ. 26Khazohpa ta a chakaotuhpa cha pathyu ta, nama moleinazy tawhta cha paheisaisa ta, byhnâ cha pie awpa ta, nâmo lâta a vaw tuah tuachaipa a châ,” tah ta.
Currently Selected:
HMOTAOPAZY 3: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
