HMOTAOPAZY 2
2
Thlahpa Pathaihpa vaw tlôna
1 #
Ttn 23.15-21; Ryhpa 16.9-11 Pentikaws noh a vaw tlô nahta, ama zydua ta su kha liata y pakhy khai ei ta. 2Eikhapi ta vârâh tawhta thlihpipa pathlipa pyu hawhta za tlô ta, cha chata amâ tyuna o cha pabie khai ha ta. 3Meipaleih hawhta paleihzy a pachhaih pazâhpa ta ama hnohta a vaw luah ta, ama zydua chô liata a choh ta. 4Ama zydua ta Thlahpa Pathaihpa ta bie khai ha ei ta, Thlahpa ta a pareisapa lymâ hawhta reih hropa ta bie reih chyu ei ta.
5Avâ ry liata râh to tawhta Khazohpa a chipa Zu chyhsazy cha Zerusale liata y ei ta. 6Cha pyu cha ama thei nahta, zawpi a vy pakhy ei ta, ama biereipa cha chyhsa to ta ama reih hawh chyu ta ama theipa vâta ama noâh kaw ta. 7Ânano kawpa ta hmô ei ta, ama noâh ngaita ta, “Moh tua u, he bie a reihpa zydua he, Kâlili mo châ veih ei tly ma? 8Kheihtazieta eima zydua ta eima pikheipa reih hawhta eima thei khai thlâh haw? 9Pâthia mozy, Media mozy, Elâmi mozy, Mesôpôtamia râh liata a ypazy, Zudia râh liata a ypazy, Kâpadôkia râh liata a ypazy, Pawntu râh liata a ypazy, Asia râh liata a ypazy, 10Pharuzia râh liata a ypazy, Pamphulia râh liata a ypazy, Izi râh liata a ypazy, Libia râh Kurini khih liata a ypazy nata Rawma khihpi tawhta khi a vaw tlyhpazy châ pi ta, 11Zu chyhsa nata Zu phohlypazy a pahlao pi ta, Krite mozy nata Arabia mozy chhao y hra ei ta, kheihtazie ta Khazohpa hmotao rônahpazy ama reipa eima reih chyu ta eima thei khai thlâh haw?” tah ei ta. 12Ama zydua ta ama noâh kaw ta, a pachâna rai pahno leipa ei ta, “He he khâpa ma a yzie tly?” tah ei ta. 13Thokha ta pahneisao ei ta, “Kresawhti thiehpa ama pari he tly ma,” tah ei ta.
Pentikaws noh ta Pity biereipa
14Pity cha pahrawh hleikhazy nata hmaohkha ta a duah ei ta, ao paro ngaitapa ta ama hnohta bie reih ta, “Nâmo, Zudia mo nata Zerusale liata a pahrâpa zydua saih u, hezy he pahno u la, ei biezy he nathlie teh u. 15He sahlao he nama pangiasapa hawhta pari veih ei, my dawh chaki deita a châ chy hih. 16He he hrohsopa Zôela ta,
17 #
Zôe 2.28-32
“‘Noh chhâna nohzy liata cha,
Hetana heta a vaw châ aw,
Khazohpa ta a tah:
Chyhsa zydua chô liata
Ei Thlahpa hry aw na ta,
Nama sawchapawzy nata nama sawchanôzy ta
Hrohsona bie phuah aw ei ta,
Nama thyutliazy ta aluahnazy hmô aw ei ta,
Nama pawpipazy ta mâ lâta ama sa aw.
18Cha nohzy liata cha,
Nâ chakaotuhpa nata nâ chakaotuhnô liata
Ei Thlahpa hry aw na ta,
Hrohsona bie ama phuah aw.
19Chô lâ avâ liata hmonoâhpazy,
Ry lâ alei liata ngianazy,
Thisaih nata mei nata meikhuh zy
Ei chaluah aw.
20Abeipa noh a vaw tlô hlâta,
Noh rônahpa nata noâhchhihpa a vaw tlô hlâta,
Noh cha zohna lâta a lie aw ta,
Thlâpâ chhao thisaih lâta â lie aw.
21Ahy rai Abeipa moh a padopa maih cha,
Pachhapa ama châ aw,’
tahpa ta a vaw reipa kha a châ.
22“Nâmo Izarei sawzy saih u, he biezy he thei teh u: Nâzari Zisu, Khazohpa ta ano hmâpa ta nama hry liata hmo rônahpazy, hmonoâhpazy nata ngianazy a taopa kha, Khazohpa ta â pyhpa chyhsa a châ tahpa nâmo tlai ta nama pahno. 23#Mat 27.35; Mka 15.24; Lka 23.33; Zhn 19.18Kha Zisu kha Khazohpa pachhuahpanohpa nata pahno chhieliepa hawhta, nâmo ta patusa ei chi ta, moleipazy ku ta khaipâ ei chi ta, nama thie hapa a châ. 24#Mat 28.5,6; Mka 16.6; Lka 24.5Châhrasala ano cha thina ta patu thei vei. Khazohpa ta thina pasa taonazy cha pathlâpa ta, a pathyu haw. 25#Hla 16.8-11Dâvi chhao khata Abeipa Zisu kyh liata,
“‘Abeipa cha ei hmiakô liata khâ hmô na ta,
Ei chachâh lâta y ta,
A chalyu aw va na.
26Chavâta ei palôh thapha ta,
Ei paleih a ly ta,
Ei sapa ta a hnabei a seih.
27Athihkhih liata ei thlahpa siesai leipa aw chi ta,
Na Mo Pathaihpa thuzao awpa pasaih aw va chi.
28Hrona lâpizy na pahnosa chi ta,
Na ypâna vâta alyna ta eina pabie aw chi,’
tahpa ta a vaw reih haw.
29“Unawh saih u, pathlatuhpa Dâvi kyh riahpha ngaitapa ta ei cha chho thei ei. Ano cha thi ta, pabu ei ta, a thlâ chhao tanoh taihta eima hnohta a y. 30#Hla 132.11; 2 Sam 7.12,13Dâvi kha hrohsopa châ ta, a pathla hry liata pakha cha a beidyuchhai liata a tyuh awpa ta Khazohpa ta bie â taihpa pahno thlâh ha ta. 31Chavâta Mesia thyu heih nawpa kyh hmô chhielie ta, Zisu cha Athihkhih liata siesaipa ta y leipa aw ta, a sapa chhao a thuzao lei awpa kyh a vaw rei chhielie hapa a châ. 32Cha Zisu cha Khazohpa ta pathyu ta, keimo zydua he a pahnotuhpa eima châ. 33Khazohpa ku chachâh lâta palyupalihpa ta y ta, Thlahpa Pathaihpa pie awpa bietai Paw tawhta hmô ta, nama hmôpa nata nama theipa hawhna heta, Thlahpa Pathaihpa hrypa a châ hih. 34#Hla 110.1Dâvi kha vârâh lâ kiah vei, ano tlai ta,
“‘Abeipa ta ei Beipa hnohta,
Ei chachâh lâta a tyuh thlâh ha mah y,
35Na chariahzy na phei tlyna ta ei tao khai hlâlei cha,’
tahpa ta a reipa tlao a châ. 36Chavâta Zisu nama khaipâpa tlai kha, Khazohpa ta Abeipa nata Mesia ta a taopa a châ tahpa cha, Izarei phopi zydua ta pahno tlai mawh ei sy,” tah ta.
37Cha biezy cha ama thei nahta, ama palôh chhô ha ta, Pity nata lyuhchâ hropazy hnohta, “Unawh saih u, khâpa eima tao aw,” tah ei ta. 38Pity ta ama hnohta, “Ro u la, nama moleinazy a ngiahthaipa ta a y thei nawpa ta, Zisu Krista moh ta bâti châ chyu teh u. Chatanachata hmosaipiepa, Thlahpa Pathaihpa cha nama hmô aw. 39Bietai cha nâmo châta châ ta, nama sawzy châta châ hra ta, lâhlapi ta a ypa zydua châta chhao châ ta, Abeipa eima Khazohpa ta a awpa zydua châta a châ,” tah ta. 40Bie hropa hluhpi ta Zisu cha a châhkhei lymâpa ta zawpizy cha pasyu ta, ama hnohta, “He chhâ moleipa tawhna heta a pabohsa teh u,” tah ta. 41A bie a zyhpa maihta bâti châ ei ta, cha noh liata chyhsa sâh thôh rachhôh baichhapa ama châ.
Ngiapâtuhpazy akaona
42Ngiapâtuhpazy cha lyuhchâpazy pachuna dao awpa ta zy, akaona hnei awpa ta zy, viahchhâ pachhaih awpa ta zy, thlahchhâ awpa ta zy ta phahnai khoh ngaitapa ta y tyh ei ta. 43Lyuhchâpazy ta hmonoâhpa nata ngiana hluhpi tao ei ta, chavâta chyhsa to ta chi ei ta. 44#Hmt 4.32-35Ngiapâtuhpa zydua hmaohkha ta y ei ta, hmo to a hly ei ta. 45Ama ryuzy, ama sôhzy zuah ei ta, amâ ngiahpa chyu hawhta ama zydua ta a rai tyh ei ta. 46Noh chareih Achhyna o liata palôh raoh ngaitapa ta a pakhy tyh ei ta, ama o lâta chhao, viahchhâ pachhaihpa ta thaphapa nata pasai ngaitapa ta pati ama nie pahmaoh tyh. 47Khazohpa reithai ei ta, chyhsa zydua modypa ta ama y tyh. Chatanachata pachha a châpazy cha, noh chareih ta Abeipa ta ama hnohta a baichha lymâ ei.
Currently Selected:
HMOTAOPAZY 2: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
