ZAWHÂNA 11

Lâzarâh thina

1 # Lka 10.38,39 Mâri nata a narônô Marthâ yna Bethâni khih liata chyhsa pakha, a moh Lâzarâh ama tahpa pasa ta. 2#Zhn 12.3Cha Mâri cha sathaw ropahâhpa Abeipa thu ta, a sâ ta a phei a hrutuhpa kha châ ta, tlâhleipa cha ano rilâhpa Lâzarâh a châ. 3A sietanôzy ta Zisu hnohta, “Abeipa, na kyhpachâpa kha tlâh vei,” tahpa ta chyhsa Zisu lâ tuah ei ta. 4Zisu ta cha bie cha a thei nahta, “Cha pasana cha thina awpa châ vei. Khazohpa rônahna châta tlao a châ. Khazohpa Sawchapawpa he, cha vâna chata parônahsapa a châ aw,” tah ta. 5Zisu ta Marthâ nata a narônô nata Lâzarâh zy cha kyhpachâ kaw ta. 6Lâzarâh pasapa thâtih a thei nahta, a yna liata noh no y via ta. 7Cha khai tawhta a pachupazy hnohta, “Zudia râh lâ sie heih ei suh u,” tah ta. 8Pachupazy ta a hnohta, “Râbai, tahmâno he Zuzy ta alô ta vaw châ chhuah ngâ thlâh ha ei ta, cha lâ cha na sie heih aw ma?” tah ei ta. 9Zisu ta a chhy ta, “Noh kha ta dawh hrawh hleino y vei ma? Noh y chhôh ta a chareipa chyhsa cha, he khizaw khaihpa he a hmôpa vâta, a chapia aw vei. 10Zâ ta a chareipa deikua cha, ano liata khaihna a y leipa vâta, â chapia tyh,” tah ta. 11Cha biezy cha a rei khai nahta, ama hnohta, “Eima viasa Lâzarâh a mô ha ta, â môpa pahra awpa ta ei sie aw,” tah ta. 12Pachupazy ta, “Abeipa, a môpa a châ khiah cha, â kaw hra heih bao na,” tah ei ta. 13Zisu ta a thi hapa kyh a reipa châ ta, châhrasala âmo ta cha a pahâpa ta â môpa kyh a reipa hawhta pachâ ei ta. 14Zisu ta âmo cha a siapa ta chho ta, “Lâzarâh cha a thi haw. 15Nâmo châta, namâ ngiapâ thei nawpa ta, cha liata ei y leipa cha ei ly kaw. Ano lâ vawh ei suh u,” tah ta. 16Thawma, Maphieh ama tahpa ta a heih pachupazy hnohta, “A thina liata thi awpa ta, sie hra ei suh u,” tah ta.

Zisu thyuheihna nata hrona

17Zisu ta a tlô nahta, Lâzarâh cha noh palih thlâ liata â zia haw tahpa pahno ta. 18Bethâni cha Zerusale kiapâh liata y ta, me no daihmâ a hlapa a châ. 19Ama rilâhpa mâchhie ama sapa thlapalôh awpa ta, Zu chyhsa hluhpi Marthâ nata Mâri o lâ a vy ei ta. 20Marthâ cha Zisu â vypa thâtih a theipa nahta, kei dy ta, Mâri deikua cha o liata a tyuh thlâh ha ta. 21Marthâ ta Zisu hnohta, “Abeipa, he liata a ypa châ la, ei rilâhpa a thi lei awpa tlai. 22Tahmâ chhao Khazohpa lâ na hiapa maih, Khazohpa ta a cha pie aw tahpa ei pahno,” tah ta. 23Zisu ta a hnohta, “Na rilâhpa a thyu heih aw,” tah ta. 24Marthâ ta a hnohta, “Noh ki noh ta thyuheihna liata cha a thyuheih aw tahpa ei pahno,” tah ta. 25Zisu ta a hnohta, “Kei he thyuheihna nata hrona ei châ. Ahy rai nâ ngiapâpa cha, thi hra sala a hroh thlâh ha aw. 26Ahrohpa chhao, nâ ngiapâpa cha thi khao aw vei. Cha bie cha nâ ngiapâ ma?” tah ta. 27Marthâ ta, “Abeipa, ei ngiapâ na. Mesia, Khazohpa Sawchapawpa, khizaw lâ a vy awpa cha na châ tahpa ei ngiapâ,” tah ta.

Zisu a cha

28Cha bie cha a rei khai nahta, vawh ta, a narônô Mâri kei aw ta, arulâta a hnohta, “Pachutuhpa he liata y ta, a cha pado,” tah ta. 29Cha bie cha a thei nahta, Mâri cha thlai thyu ta, Zisu lâ vawh ta. 30Zisu cha khih a ngia mâh leipa ta, Marthâ ta a kei dy nota â tyhna su liata y thlâh ha chy ta. 31Mâri thlai thyu ta a puapa cha, o chhôh liata ano thlah a palôhpa Zuzy ta ama hmô nahta, Lâzarâh chakhei awpa ta thlâ lâ a vawh awpa khiah ma tah ei ta, Mâri cha pazi ei ta. 32Mâri cha Zisu yna kei tlô ta, a hmô nahta, a phei thaby liata â khu lâta pao ta, a hnohta, “Abeipa, he liata a ypa châ la, ei rilâhpa a thi lei awpa tlai,” tah ta. 33Zisu ta Mâri chapa nata a vaw zipa Zuzy chapa cha a hmô nahta, a thlahpa pachârôhpa ta, a palôh pasa ngaita ta. 34“Khataih liata nama pazia?” tah ta. Âmo ta, “Abeipa, a vy la, moh tua,” tah ei ta. 35Zisu cha ta. 36Zuzy ta, “Moh tua u, Lâzarâh kyh a vaw pachâ hmeiseih tlai na!” tah ei ta. 37Thokha ta, “Mochaopa mo a pavâsatuhpa heta, he chyhsa chhao he thi leipa ta paysa thei vei tly ma?” tah ei ta.

Lâzarâh thyuheihna

38Zisu cha palôh pasa ngaitana chôta thlâ kei tlô ta. Thlâ cha lôpu khiepa châ ta, a paka liata alô ta pamaipa a châ. 39Zisu ta, “Alô he pasie teh u,” tah ta. Athipa sietanô Marthâ ta a hnohta, “Abeipa, tahmâ la a roh chhao a chhie bâ aw, a thi tawhta noh palih châ ha tlôh ta,” tah ta. 40Zisu ta a hnohta, “Nâ ngiapâ khiahta la, Khazohpa rônahna na hmô aw, cha tah va na ma?” tah ta. 41Alô cha pasie ei ta. Zisu cha avâ lâ ua ta, “Ei Paw, ei bie na nathliepa vâta alyna bie ei cha hlâ. 42Ei bie khâ na nathlie tyh tahpa ei pahno. Châhrasala he liata zawpi a duahpazy heta, na tuapa ei châpa ama pahno thei nawpa ta, he bie he ei reipa a châ,” tah ta. 43Cha biezy cha a rei khai nahta, ao paro ngaitapa ta awh ta, “Lâzarâh, vaw pua teh,” tah ta. 44Athihpa cha a ku nata phei rito poh ta pahlyna chôta nata a hmia poh ta pahlyna chôta vaw pua ta. Zisu ta ama hnohta, “Pathlâ u la, pasiesa teh u,” tah ta.

Zisu thie achhuahna

(Mat 26.1-5; Mka 14.1-2; Lka 11.1-2)

45Mâri hnohta thlâ lâ a vawhpa Zu chyhsa hluhpi ta, Zisu hmotaopa cha ama hmô nahta, ano cha a ngiapâ ha ei ta. 46Thokhazy deikua cha, Phârisaihzy lâ vawh ei ta, Zisu hmotaopazy cha kei chho ei ta. 47Theihthai beizy nata Phârisaihzy ta ryureituhpazy awpakhy ei ta, “Kheihta eima tao aw? He chyhsa heta hmonoâhpa hluhpi tao tlôh ta. 48He hawhta eima pathlie thlâh ha khiahta cha, chyhsa zydua ta ano a ngiapâ aw ei ta, Rawma mo a vy aw ei ta, eima su hneipa nata eima phopi he ama vaw parao aw,” tah ei ta. 49Ama hry liata chyhsa pakha, a moh Kaiphâ ama tahpa, cha kô liata theihthai beichaipa ta ama hnohta, “Khâpa hmahta pahno veih ei chi. 50Eima phopi duata leidia khai awpa hlâta cha, phopi vyuhpa ta chyhsa pakha thi awpa cha, nama châta a pha via tahpa pahno veih ei chi,” tah ta. 51Cha bie cha ano khota a reipa châ leipa ta, cha kô liata theihthai beichaipa a châpa hawhta, Izarei phopi châta Zisu a thi awpa kyh hrohsona bie a reipa tlao a châ. 52Izarei phopi châta dei châ leipa ta, Khazohpa saw râh to liata hiepatlapazy hlao kha ta syhpahmaoh nawpa a châ hra. 53Cha noh tawhta cha, Zisu thie thei nawpa lâpi tlua lymâ ei ta. 54Chavâta Zisu cha Zuzy hry liata â lâhâhpa ta charei khao leipa ta, râhchawhpa daih lâta Epharai ama tahpa khih lâ sie ta, pachupazy chhaota cha liata y ta.

55Zuzy Zawpakhô Kyhchhi a hnia ha ta. Zawpakhô Kyhchhi hlâta a pathaisa awpa ta, khitaw chyhsa hluhpi Zerusale lâ khy ei ta. 56Zisu tlua ei ta, Achhyna o liata amâ dua nota, âmo nata âmo ta, “Kheihta nama pachâ? Kyhchhina lâ a vy lei awpa ma â chhuah ha tly?” a tah ei ta. 57Zisu ama patu thei nawpa ta, a yna su a pahnopa maihta âmo chho awpa ta, theihthai beizy nata Phârisaihzy ta biepiepa ama vaw papua hapa a châ.

Currently Selected:

ZAWHÂNA 11: MARVBSI

Highlight

Copy