ZAWHÂNA 12

Bethâni liata Zisu sathawthuna

(Mat 26.6-13; Mka 14.3-9)

1Zawpakhô kyhchhi vaw tlô nawpa noh charu byuh ta, Zisu cha athihpa hry tawhta a pathyupa Lâzarâh yna, Bethâni khih kei tlô ta. 2Cha liata ano châta zâpati taopa ei ta. Marthâ ta chakao ta, Lâzarâh deikua cha tlâhkhai liata Zisu pati dôhlâhpa pakha châ ta. 3#Lka 7.37,38Mâri ta spinâ thaw ropahâh ngaitapa ôh kha vaw cheih ta, Zisu phei liata thu ta, a sâ ta a pheizy cha hru ta. O cha sathaw ropahâhpa ta bie khai ha ta. 4Châhrasala Zudâh Iskari, a pachupa pakha, a patusatuh awpa ta, 5“Khazia ma he sathaw ropahâhpa he dinâri za thôh ta zuapa ta chyhsa dyhchhiepazy piepa tlao a châ vei?” tah ta. 6Chyhsa dyhchhiepazy a pachâpa vâta châ leipa ta, parupa châ ta, tâkâ sahria â vaopa chhôh liata sopazy a la tyhpa a châpa vâta, cha bie cha a reipa a châ. 7Zisu ta, “Pakhâ khah u, he ropahâhpa he pabupa ta ei y nawpa noh châta â vaw pasopa a châ. 8#Ryhpa 15.11Dyhchhiepazy cha nama hry liata ama y ngâ thlâh ha aw, kei deikua la nama hnohta y ngâ thlâh ha aw va na,” tah ta.

Lâzarâh thie achhuahna

9Cha su liata Zisu a y tahpa Zu chyhsa hluhpi ta ama vaw pahno nahta, a vy ei ta. Zisu vâ dei châ leipa ta, athihpa hry tawhta a pathyupa Lâzarâh hmô awpa ama khohpa vâta a vypa ama châ. 10Chavâta theihthai beizy ta Lâzarâh chhao cha thie a chhuah ei ta. 11A chhâpa cha ano vâta Zu chyhsa hluhpi pua ei ta, Zisu amâ ngiapâpa vâta a châ.

Zerusale rônahpa ta â ngia

(Mat 21.1-11; Mka 11.1-11; Lka 19.28-40)

12A mylâ ta kyhchhi a vaw hlaopa zawpi hluhpi ta, Zisu cha Zerusale lâ â vy aw tahpa thei ei ta. 13#Hla 118.25,26Thiahrâ kuahzy a cheipa ta ano dy awpa ta pua ei ta, “Haozanâ! Abeipa moh ta Izarei Bei a vypa cha reithaipa ta y mawh sy!” tahpa ta awh ei ta. 14Zisu cha alâ taw hmô ta, a chô liata kiah ta,

15 # Zkr 9.9 “Hy Zaio sawchanô, chi khah y,

Moh teh, alâ taw kiapa ta,

Na Beipa cha â vy,”

tahpa ta ropa hawhna khata.

16Cha hmozy cha a hmiatuata la a pachupazy ta pahno thai veih ei. Châhrasala Zisu parônahsapa ta a y tawhna khata, cha hawhta a thâtih ropa châ ta, cha hmozy cha a chô liata ama vaw tao tlai tahpa a thei ha ei ta. 17Thlâ tawhta Lâzarâh aw ta, athihpa hry tawhta a pathyu nota a hnohta zawpi a ypazy khata, Zisu thâtih cha reih lymâ ei ta. 18Hmonoâhpa a taopa thâtih ama theipa vâta, zawpizy ta ano cha ama kei dypa a châ. 19Phârisaihzy cha a chhohia ei ta, “Pahno teh u, khâpa hmah tao thei veih ei chi. Moh teh u, khizaw ta ano ama zi ha hih,” tah ei ta.

Krikâh mo thokha ta Zisu ama tlua

20Khazohpa a chhy awpa ta kyhchhi a hlaopazy hry liata Krikâh mo a hlao hra ei ta. 21Chazy chata Kâlili râh Besaidâ khihpa Phili lâ a vy ei ta, a hnohta, “Pâpuh, Zisu eima hmô khoh,” tahpa ta a haw ei ta. 22Phili ta Adaru kei chho ta, Adaru nata Phili ta Zisu cha kei chho ei ta. 23Zisu ta âmo cha a chhy ta, “Chyhsa Sawchapawpa parônahsapa ta a y nawpa daihti a tlô haw. 24Hmeiseihta ta, hmeiseihta ta ei cha chho ei, sâh hmô cha alei liata tla leipa sala, a thi leipa khiahta cha, ano dei ta y ta, a thi khiahta deikua cha, thei hluhpi a pathei tyh. 25#Mat 10.39; 16.25; Mka 8.35; Lka 9.24; 17.33Ahy rai a hrona a tlaichhaipa cha, a hrona pahlei aw ta, he khizaw liata a hrona a haopa deikua cha, a hrona cha chhâzaw ta â vao thlâh ha aw. 26Ahy rai eina chakao khiahta la, na zi mawh sy. Nâ chakaotuhpa cha ei yna liata a y hra aw. Ahy rai eina chakao khiahta la, ano cha Paw ta a palyupalih aw.

Chyhsa Sawchapawpa chaluahpa a châ aw

27 “Tahmâ he ei palôh nô a po ngaita. Khâpa ma ei reih aw tly? ‘Ei Paw y, he daihti tawhna heta na pachha mah y,’ ei tah aw ma? Châ vei, he hmo tao awpa ta, he daihti he ei vaw tlôpa a châ. 28Chavâta ei Paw y, na moh parônahsa mah y,” tah ta. Avâ tawhta ao za pua ta, “Ei parônahsa haw, ei parônahsa heih aw,” tah ta. 29Cha liata a duahpa zawpizy ta ao cha thei ei ta, “Tôkalôhpa na a thua,” tah ei ta. Ahropazy ta, “Vâlyuhchâpa ta ano bie â chho,” tah ei ta. 30Zisu ta a chhy ta, “Kha ao kha keima châta a puapa châ vei, nâmo châta tlao a châ. 31Tahmâ he khizaw pachiana daihti châ ta, tahmâ he khizaw bei cha thypa a châ aw. 32Kei he alei tawhta chaluahpa ei châ tita, chyhsa zydua kei lâta ei sy aw ei,” tah ta. 33Cha bie cha a thi nawpazie pahnosa nawpa ta a reipa a châ. 34#Hla 110.4; Isai 9.7; Ezk 37.25; Dân 7.14Zawpizy ta a chhy ei ta, “Mesia cha chhâzaw ta a y aw tahpa ryhpa châbu liata eima pahno. Kheihtazieta Chyhsa Sawchapawpa chaluahpa ta a y aw a tahpa ma na châ? Chyhsa Sawchapawpa cha ahy maw?” tah ei ta. 35Zisu ta ama hnohta, “Khaihpa cha buakhata nama hry liata a y chy. Khaihpa nama hnei chhôh heta charei teh u, chataleipatala zohna ta a cha pachhai pathlei aw ei. Zohna liata a chareipa cha a sie nawpa pahno vei. 36Khaihpa nama hnei chhôh heta, khaihpa he a ngiapâ teh u, chatanachata khaihpa sawzy nama châ aw,” tah ta. Cha biezy cha a rei khai nahta, Zisu cha sie ta, âmo tawhta a nyu ha ta.

Zuzy ngiapâleina

37Ama hmiakô liata hmonoâhpa hluhpi a taopa chhao ta, Zu chyhsazy ta ano cha a ngiapâ pyly veih ei. 38#Isai 53.1He he hrohsopa Isai ta,

“Abeipa, eima bie reipa ahy ma a ngiapâ?

Abeipa bâh ahy hnohta ma â luah?”

tahpa ta a reipa kha a vaw tlô nawpa ta a châ. 39Cha vâna chata a ngiapâ thei veih ei. Chavâta Isai ta,

40 # Isai 6.10 “Ama mozy pachao ta,

Ama palôh kuh a pachhasa;

Chata châ vei mawh sala,

Ama mo ta hmô aw ei ta,

Ama palôh ta pahnopa ta,

A vaw heih aw ei ta,

Ei patlâh ha awpa ei tlai,”

a tahpa kha a châ. 41A rônahzie hmô ta, a thâtih a chhopa vâta, cha biezy cha Isai ta a reipa a châ. 42Chatanachôta ryureituhpa hluhpi ta Zisu cha a ngiapâ ei ta, châhrasala Phârisaihzy ama chipa vâta, pakhyna o tawhta papuapa ama châ lei nawpa ta, amâ ngiapâna cha palâhâh veih ei. 43Khazohpa reithaina hlao awpa hlâta, chyhsa reithaina hlao awpa ama khoh viapa vâta a châ.

Zisu kyhpachâna

44Zisu cha ao paro ngaitapa ta awh ta, “Ahy rai nâ ngiapâpa cha, kei nâ ngiapâpa châ leipa ta, nâ tuahtuhpa a ngiapâpa a châ. 45Ahy rai nâ hmôpa cha, nâ tuahtuhpa a hmôpa a châ. 46Khizaw pakhaihsa awpa ta a vypa ei châ, ahy rai nâ ngiapâpa cha zohna liata a y lei nawpa ta. 47Chyhsa ta ei biezy thei ta, a zyh leipa chhao ta, ano cha pachia aw va na. Khizaw pachia awpa ta a zupa châ leipa na ta, khizaw pachha awpa ta a zupa tlao ei châ. 48Ahy rai nâ khoh leipa nata ei bie a zyh leipa cha, pachiatuhpa pakha a hnei. Ei bie reipa, kha bie tlai khata, noh chhâna noh liata ano cha a pachia aw. 49Keima biehneina ta bie reih va na. Nâ tuahtuhpa ei Paw ta bie na pie ta, rei awpa nata chho awpa eina piepazy ei reih tyh. 50Ano biepiepa cha chhâzaw hrona a châ tahpa ei pahno. Chavâta bie ei reipa he, Paw ta eina chhopa lymâ hawhta a reihpa ei châ,” tah ta.

Currently Selected:

ZAWHÂNA 12: MARVBSI

Highlight

Copy