ZAWHÂNA 13

Pachupazy phei Zisu ta a pasi

1Zawpakhô kyhchhi hlâta, Zisu ta he khizaw he puasaipa ta Paw lâ a sie daihti a tlô haw tahpa a pahno nahta, a chyhsa khizaw liata a ypa kyh a pachâ tyhpazy cha, a chhâna taihta ama kyh pachâ ta. 2Ahripa ta Saimaw sawchapawpa Zudâh Iskari cha, Zisu patusa awpa pachâna a palôh liata soh ta. Chatanachata zâpati ama dôh nota, 3Zisu cha Paw ta a ku liata hmo to a pavaosapa kyh nata Khazohpa tawhta a vaw puapa a châpa nata Khazohpa lâta a sie heih awpa a châpazy pahno thlâh ha ta. 4Zâpati a dôhpa cha thyu ta, a viahkao pasipa pahluh ta, hruna poh la ta, a chai liata a saih ta. 5Rahô liata ti patlai ta, pachupazy phei pasi pathao ta, hruna poh â saihpa chata ama pheizy hru lymâ ta. 6Saimaw Pity ta ano kô a vaw tlô nahta, “Abeipa, nâ ngâsâ ta ei phei na pasi aw ma?” tah ta. 7Zisu ta a chhy ta, “Ei hmotaopa he tahmâ pahno ngyu va chi, châhrasala noh hro ta na pahno aw,” tah ta. 8Pity ta a hnohta, “Ei phei pasi beih aw va chi,” tah ta. Zisu ta a chhy ta, “Ei cha pasi vei khiahta la, kei liata tovyuh hnei va chi,” tah ta. 9Saimaw Pity ta a hnohta, “Abeipa, chata a châ khiahta la, ei phei dei châ leipa ta, ei ku nata ei luh chhao sy!” tah ta. 10Zisu ta a hnohta, “Ngaisi chiehpa cha a phei dei leipa cha pasi byuh vei, a pôhpa cha a pathaih thlâh haw. Nâmo chhao nama pathaih, nama zydua ta deikua châ vei,” tah ta. 11A patusatuh awpa a pahnopa vâta, “Nama zydua ta pathaih veih ei chi,” a tahpa a châ.

12 # Lka 22.27 Ama phei a pasi khai tawhta, a viahkao pasipa a ky ta, â tyuna liata a tyu heih ta, ama hnohta, “Nama chô liata ei hmotaopa he a yzie nama pahno ma? 13Nâmo ta Pachutuhpa nata Abeipa na tah ei chi ta, nama reipa â do na, ei châna tlai a châ. 14Kei, nama Beipa nata Pachutuhpa ta nama phei ei pasi khiahta cha, nâmo chhao nama phei namâ pasipa raihrie awpa a châ. 15Nama chô liata ei taopa hawhta, nâmo chhao tao hra awpa ta, pamosana ei cha taopa ei. 16#Mat 10.24; Lka 6.40; Zhn 15.20Hmeiseihta ta, hmeiseihta ta ei cha chho ei, chakaotuhpa cha a zibeipa hlâta lai via vei, lyuhchâpa chhao a tuahtuhpa hlâta lai via vei. 17Cha hmozy cha nama pahno khiahta cha, tao u la nama nohlao aw. 18#Hla 41.9Nama zydua kyh reih va na. Ei tlyhpazy cha ei pahno ei. Châhrasala, ‘Ei viahchhâ a niepa ta a phei chakoh eina hy thlu,’ tahpa Biehrai kha a vaw tlô aw. 19Tahmâ a vaw tlô hlâta ei cha chho ei, a vaw tlô tita, keima he ano cha ei châ tahpa namâ ngiapâ thei nawpa ta. 20#Mat 10.40; Mka 9.37; Lka 9.48; 10.16Hmeiseihta ta, hmeiseihta ta ei cha chho ei, ahy rai ei tuapa a lypa cha, keima nâ lypa châ ta, ahy rai keima nâ lypa cha, nâ tuahtuhpa a lypa a châ,” tah ta.

A patusatuh awpa kyh Zisu ta a reih chhielie

(Mat 26.20-25; Mka 14.17-21; Lka 22.21-23)

21Cha biezy cha a rei khai nahta, Zisu cha a thlahpa pachârôh ngaita ta, “Hmeiseihta ta, hmeiseihta ta ei cha chho ei, nama hry liata pakha ta eina patusa aw,” tah ta. 22Ahy kyh ma a reih tahpa pahno leipa ei ta, pachupazy cha a moh chyu ei ta. 23Pachupazy hry liata pakha, Zisu ta kyh a pachâpa cha, Zisu kiapâh liata tlâhkhai dôhpa ta a tyuh ta. 24Saimaw Pity ta ano cha thliethlâpa ta, ahy kyh ma a reih tahpa Zisu cha pahiahrisa ta. 25Cha pachutuhpa cha a hnôhlâ a uah ta, Zisu chachôhna a hnieh ta,#13.25 He liata, “Chachôhna a hnieh” tahpa he pahno thai a ru kaw. Kha daihti no kha, pati tlâhkhai ama dôh nota, dyuchhai hmâh leipa ei ta, siphiah liata a pazawhpa ta a tyuh ei ta, chavei lâ a hniehpa ta, chachâh lâ ku ta pati ama nie tyh. Zawhâna kha Zisu chachâh lâta a tyuh thlyu aw ta, a chavei lâta â hniehpa tawhta a hnôhlâ a kei uah ta, Zisu chachôhna a hnieh pâna taihta a hniapa ta, Zisu cha a uahnaoh thlyu aw. Chachôhna a hniehpa he bieru rei nota ama taozie a châ. Kha daihti no kha, bieparu ama rei khoh nahta, ama chachôhna â hria pâ daihmâpa ta a hniapa a duah ei ta, hmiachhy ta bieparu ama rei tyh. a hnohta, “Abeipa, ahy maw?” tah ta. 26Zisu ta a chhy ta, “Viahchhâ nypa ta ei piepa cha, ano cha a châ,” tah ta. Viahchhâ a ny khai nahta, Saimaw sawchapawpa Zudâh Iskari cha pie ta. 27Viahchhâ a pie khai nahta, Zudâh Iskari chhôh liata Sâtâ a ngia ta. Zisu ta a hnohta, “Na tao awpa cha tao para teh,” tah ta. 28Khâpa vâta Zisu ta cha bie cha Zudâh Iskari hnohta a reihpa ma a châ tahpa tlâhkhai liata a dôhpa ahy hmahta pahno leipa ei ta. 29Thokha ta, Zudâh cha tâkâ sahria a vaotuhpa a châpa vâta, “Kyhchhina châta hmo eimâ ngiahpa kei chalei teh,” a tahpa a châ na ta pangiasa ei ta, a châ vei khiah, dyhchhiepazy hnohta hmo pie awpa a chhopa a châ na ta ama pangiasa. 30Viahchhâ a dao khaipa nata, Zudâh cha thlai pua ta, cha nona cha zâ châ ha ta.

Biepiepa thiehpa

31Zudâh a pua tawhta, Zisu ta, “Tahmâ cha Chyhsa Sawchapawpa parônahsapa ta a y haw, ano liata Khazohpa chhao parônahsapa ta a y. 32Ano liata Khazohpa parônahsapa ta a y khiahta cha, Sawchapawpa chhao Khazohpa ta ano liata parônahsa aw ta, thlai a parônahsa aw. 33#Zhn 7.34Sawnawh saih u, buakhata nama hnohta ei y chy. Na tlua aw ei chi ta, Zuzy hnohta, ‘Ei sie nawpa lâ a vy thei aw veih ei chi,’ ei tahpa hawhna khata, tahmâ nâmo hnohta chhao ei reih. 34#Zhn 15.12,17; 1 Zhn 3.23; 2 Zhn 1.5Biepiepa thiehpa ei cha pie ei, kyh a pachâ raihrie teh u. Kei ta kyh ei pachâpa hawh ei ta, nâmo chhao kyh a pachâ raihrie teh u. 35Kyh namâ pachâ raihriepa liana chata, chyhsa zydua ta ei pachupazy nama châ tahpa ama pahno aw,” tah ta.

Pity apaphasaina kyh rei chhieliena

(Mat 26.31-35; Mka 14.27-31; Lka 22.31-34)

36Saimaw Pity ta a hnohta, “Abeipa, khataih lâ na sie aw?” tah ta. Zisu ta, “Tahmâ la ei sie nawpa lâ na zi thei aw va chi. Noh hro ta eina zi aw chi,” tah ta. 37Pity ta a hnohta, “Abeipa, khazia tahmâ chhao ei cha zi thei aw vei? Na châta ei hro ei hlâ aw,” tah ta. 38Zisu ta a chhy ta, “Keima châta na hro na hlâ aw mâ? Hmeiseihta ta, hmeiseihta ta ei cha chho, ei thôh einâ papha hlâlei chi cha awh khoh aw vei,” tah ta.

Currently Selected:

ZAWHÂNA 13: MARVBSI

Highlight

Copy